1, 2. (a) Mɛni okadi tsɔɔ kaa wa Matsɛ ɔ bɔni nɔ yemi kɛ je jeha 1914? (b) Mɛni he wa ma susu ngɛ yi nɛ ɔ mi?

 NÍIHI nɛ Mawu Matsɛ Yemi ɔ tsu ngɛ e he nyɛli a kpɛti nɛ wa susu he ɔ wo wa hemi kɛ yemi mi he wami wawɛɛ. (La 110:2) Wa Matsɛ ɔ bua fiɛɛli babauu a nya. E tsu e se nyɛɛli a he, nɛ a he tsɔ ngɛ mumi mi kɛ je mi bami mi. Jehanɛ hu, ngɛ mɔde nɛ Matsɛ Yemi ɔ he nyɛli bɔ kaa a ma gba wa mi ɔ tsuo se ɔ, kake peemi ngɛ wa kpɛti mwɔnɛ ɔ ngɛ je kɛ wɛ. Munyu nɛ ɔmɛ kɛ ní kpahi nɛ Matsɛ Yemi ɔ tsu nɛ wa susu he ɔ ji odase nɛ tsɔɔ kaa wa Matsɛ ɔ bɔni nɔ yemi ngɛ e he nyɛli a kpɛti kɛ je jeha 1914.

² Matsɛ Yemi ɔ maa pee nyakpɛ níhi fuu hwɔɔ se. E maa “ba” nɛ́ e ba “kpata” e he hyɛli a hɛ mi. (Mat. 6:10; Dan. 2:44) Se loko jamɛ a be ɔ maa ba a, ní komɛ nɛ a sa kadimi maa ya nɔ. Mɛni ji jamɛ a ní ɔmɛ ɔ? Baiblo gbamihi fuu haa sane bimi nɛ ɔmɛ a heto. Nyɛ ha nɛ wa susu gbami nɛ ɔmɛ ekomɛ a he nɛ waa hyɛ níhi nɛ maa ba ngɛ wa hɛ mi.

3. Mɛni ji kekleekle nɔ́ nɛ wa ngɛ blɔ hyɛe?

³ A ma de ke a tue mi jɔ mɛ. Paulo tsɔɔ kekleekle okadi nɛ maa ba ngɛ womi nɛ e ngma ya ha Tesalonika bi ɔmɛ ɔ mi. (Kane 1 Tesalonika Bi 5:2, 3.) Ngɛ womi nɛ Paulo ngma a mi ɔ, e wo ‘Yehowa ligbi,’ nɛ maa je sisi kɛ ‘Babilon ngua a’ tuami ɔ nɔ ta. (Kpoj. 17:5) Se loko ‘Yehowa ligbi’ ɔ maa je sisi ɔ, je ma amɛ maa hi dee ke, “Wa he mi jɔ wɔ, nɛ wa tue mi hu jɔ wɔ.” Eko ɔ, a ma de nɔ́ nɛ ɔ sisi kake, loo si abɔ. Anɛ jami mi hɛ mi nyɛɛli maa piɛɛ a he lo? Akɛnɛ mɛ hu a ji je ɔ fã he je ɔ, eko ɔ, a maa piɛɛ a he kɛ de ke, ‘Wa tue mi jɔ wɔ.’ (Yer. 6:14; 23:16, 17; Kpoj. 17:1, 2) Jamɛ a he jɔmi kɛ tue mi jɔmi he gɔgɔ nɛ a maa fia a maa pee okadi nɛ tsɔɔ kaa Yehowa ligbi ɔ ma sisi jemi. Mawu Matsɛ Yemi ɔ he nyɛli ‘be a he yee’ kɔkɔɔkɔ.

4. Ke wa nu Paulo gbami nɛ kɔɔ tue mi jɔmi kɛ he mi jɔmi nɛ a maa jaje ɔ he ɔ sisi ɔ, mɛni se wa ma ná?

 ⁴ Ke wa nu gbami nɛ ɔ sisi ɔ, kɛ wa ma ná he se ha kɛɛ? Paulo de ke: “Nyɛɛ lɛɛ pi diblii mi nɛ nyɛ ngɛ nɛ ligbi ɔ ma ba ti nyɛ si kaa julɔ.” (1 Tes. 5:3, 4) Wa be kaa ni kpahi, wa le nɔ́ nɛ níhi nɛ ngɛ nɔ yae amlɔ nɛ ɔ tsɔɔ. Mɛni blɔ tutuutu nɔ nɛ hemi jɔmi kɛ tue mi jɔmi he gbami nɛ ɔ maa gu kɛ ba mi? E sa nɛ waa mlɛ nɛ waa hyɛ bɔ nɛ níhi maa ya nɔ ha ngɛ je ɔ mi. Lɔ ɔ he ɔ, nyɛ ha nɛ “waa hi hɛ ngmengmle, nɛ wa hɛ mi nɛ ka si.”​—1 Tes. 5:6; Zef. 3:8.

5. Mɛni lɛ maa je ‘amanehlu ngua a’ sisi?

⁵ A ma tua jami ɔmɛ. Mo kai kaa Paulo ngma ke: “Be mi nɛ nihi ma de ke, ‘Wa he mi jɔ wɔ, nɛ wa tue mi hu jɔ wɔ!’ ɔ, jamɛ a be ɔ mi nɔuu nɛ a hɛ mi ma kpata tlukaa.” Kaa bɔ nɛ ke oslabai gba kɛkɛ hiɔmi simi hu nyɛɛ se ɔ, jã kɛ̃ nɛ ke a de ke, “Wa he mi jɔ wɔ, nɛ wa tue mi hu jɔ wɔ!” ɔ, “a hɛ mi ma kpata tlukaa.” Mɛni nɔ́ a ma kpata hɛ mi ɔ? Kekleekle ɔ, a ma kpata ‘Babilon Ngua a’ nɛ ji je ɔ tsuo lakpa jami blɔ nya tomi nɛ a tsɛɛ lɛ hu ke “yo ajuama” a hɛ mi. (Kpoj. 17:5, 6, 15) Sɔlemi ɔmɛ kɛ lakpa jami kpahi a hɛ mi kpatami ɔ ji ‘amanehlu ngua a’ sisije. (Mat. 24:21; 2 Tes. 2:8) Nɔ́ nɛ ɔ maa pee nihi fuu nyakpɛ. Mɛni he je? Ejakaa jinɛ Babilon Ngua a buu e he kaa “manyɛ” nɛ “be aywilɛho yee gblegbleegble.” Se e maa na kaa e sisi e he ejakaa e hɛ mi kpatami ɔ maa ba tlukaa. A ma je lɛ kɛ je si himi mi oya, nɛ e maa pee kaa nɔ́ nɛ e ba “ligbi kake too.”​—Kpoj. 18:7, 8.

6. Mɛnɔ loo mɛni nɛ ma tua ‘Babilon Ngua a’?

⁶ Mɛnɔ loo mɛni nɛ ma tua ‘Babilon Ngua a’? “Lohwe awi yelɔ” ko nɛ ngɛ “koli nyɔngma.” Kpojemi womi ɔ tsɔɔ kaa lohwe awi yelɔ ɔ daa si ha Je Ma Amɛ A Kake Peemi Kuu ɔ. Koli nyɔngma amɛ daa si ha ma kudɔmi he wamihi tsuo nɛ a ngɛ mwɔnɛ ɔ nɛ a fiɔ “lohwe awi yelɔ” ɔ se ɔ. (Kpoj. 17:3, 5, 11, 12) Mɛni maa ba yo ajuama a nɔ? Mahi nɛ a fĩ Je Ma Amɛ A Kake Peemi Kuu ɔ se ɔ maa ngɔ níhi tsuo nɛ e ngɛ ɔ, nɛ a maa ye e he lo ɔ, nɛ a kɛ “la ma kpata e hɛ mi pɛsɛpɛsɛ.”​—Kane Kpojemi 17:16. a

7. Yesu munyu nɛ ngɛ Mateo 24:21, 22 ɔ ba mi ngɛ kaseli ɔmɛ a be ɔ mi ngɛ mɛni blɔ nɔ, nɛ e maa ba mi hwɔɔ se ngɛ mɛni blɔ nɔ?

⁷ A maa po ligbi ɔmɛ a nɔ kpiti. Wa Matsɛ ɔ tsɔɔ nɔ́ nɛ maa ba ngɛ amanehlu ngua a mi. Yesu de ke: “Mawu bimɛ ɔmɛ nɛ e hla a he je ɔ, a maa po jamɛ a ligbi ɔmɛ a nɔ kpiti.” (Kane Mateo 24:21, 22.) Yesu munyu ɔ ba mi ngɛ blɔ nyafii nɔ ngɛ jeha 66 benɛ Roma bi ɔmɛ tua Yerusalem nɛ Yehowa ‘po ligbi ɔ nɔ kpiti’ ɔ. (Mar. 13:20) Ligbi ɔ nɛ a po nɔ kpiti ɔ ha nɛ a baa Kristofohi nɛ a ngɛ Yerusalem kɛ Yudea a yi. Se mɛni maa ba ngɛ je kɛ wɛ ngɛ amanehlu ngua nɛ ma a mi? Ke Je Ma Amɛ A Kake Peemi Kuu ɔ  tua jami ɔmɛ ɔ, Yehowa maa gu wa Matsɛ ɔ nɔ kɛ ‘po tuami ɔ nɔ kpiti’ konɛ a ko kpata anɔkuale jami hɛ mi kɛ piɛɛ lakpa jami he. Lɔ ɔ he ɔ, be mi nɛ a ma kpata lakpa jamihi tsuo a hɛ mi ɔ, anɔkuale jami kake ɔ maa hi si. (La 96:5) Nyɛ ha nɛ wa susu nɔ́ kpa nɛ maa ya nɔ ngɛ enɛ ɔ se ɔ he nɛ waa hyɛ.

8, 9. Mɛni nyakpɛ níhi nɛ Yesu tsɔɔ kaa e ma nyɛ maa ba, nɛ kɛ nihi maa pee a ní ngɛ nɔ́ nɛ a maa na a he ha kɛɛ?

⁸ Yesu gbami nɛ kɔɔ nyagbe ligbi ɔmɛ a he ɔ ha nɛ wa na kaa ní pɔtɛɛ komɛ maa ya nɔ loko Harmagedon ta a ma fɛ. Wa ma susu níhi nɛ maa ya nɔ ɔ a kpɛti enyɔ nɛ Sane Kpakpa ngmali Mateo, Marko, kɛ Luka bɔ he amaniɛ ɔ he.​—Kane Mateo 24:29-31; Mar. 13:23-27; Luka 21:25-28.

⁹ Nyakpɛ níhi maa je kpo ngɛ hiɔwe. Yesu gba kɛ fɔ si ke: “Pu maa tsɔ diblii, nɛ nyɔhiɔ be kpɛe hu. Dodoehi ma tsɔ kɛ je hiɔwe ba fia si.” Nihi be blɔ tsɔɔmi hlae kɛ je jami nya dali a ngɔ hu. Anɛ Yesu ngɛ tsɔɔe kaa nyakpɛ ní nitsɛ maa ba ngɛ hiɔwe lo? Eko ɔ, jã. (Yes. 13:9-11; Yoel 2:1, 30, 31) Kɛ nihi maa pee a ní ngɛ níhi nɛ a maa na a he ha kɛɛ? Nihi “a kɔni mi ma jɔ̃” ejakaa ‘gbeye maa nu mɛ.’ (Luka 21:25; Zef. 1:17) Ngɛ anɔkuale mi ɔ, “níhi nɛ ma je ɔ mi ɔ” maa wo Mawu Matsɛ Yemi ɔ he nyɛli a he gbeye, kɛ je ‘matsɛmɛ a nɔ kɛ ya si nyɔguɛhi a nɔ,’ nɛ a ma hla laami hehi. Se a be laami he ko nae nɛ maa po a he piɛ ngɛ Matsɛ ɔ mi mi fumi ɔ he.​—Luka 21:26; 23:30; Kpoj. 6:15-17.

10. Mɛni kojomi Yesu kɛ maa ba, nɛ kɛ nihi nɛ a fĩ Mawu Matsɛ Yemi ɔ se, kɛ nihi nɛ a ji Matsɛ Yemi ɔ he nyɛli maa pee a ní ngɛ he ha kɛɛ?

¹⁰ Kojomi. Mawu Matsɛ Yemi ɔ he nyɛli tsuo maa na nɔ́ ko nɛ ma ha nɛ a maa ye gbeye wawɛɛ. Yesu de ke: “A maa na Nɔmlɔ Bi ɔ kaa e ma ngɛ bɔku mi kɛ he wami nguaa, kɛ hɛ mi nyami.” (Mar. 13:26) Nyakpɛ nɔ́ nɛ ɔ maa pee okadi nɛ tsɔɔ kaa Yesu ba konɛ e ba kojo. Ngɛ gbami nɛ kɔɔ nyagbe ligbi ɔmɛ a he ɔ nɔuu mi ɔ, Yesu tsɔɔ níhi nɛ kɔɔ kojomi nɛ maa ba ngɛ be nɛ ɔ mi ɔ mi fitsofitso. Wa naa enɛ ɔ ngɛ nɔ́ hetomi nɔ́ nɛ kɔɔ jijɔhi kɛ apletsihi a he ɔ mi. (Kane Mateo 25:31-33, 46.) Nihi nɛ a fĩ Mawu Matsɛ Yemi ɔ se nɛ a maa bu mɛ kaa ‘jijɔhi’ ɔ ‘ma wo a yi nɔ,’ ejakaa a le kaa ‘e be kɛe nɛ Mawu ma he a yi wami.’ (Luka 21:28) Se Matsɛ Yemi ɔ he nyɛli lɛɛ a maa kojo mɛ kaa ‘apletsihi’, nɛ “a maa wo yana” ejakaa a le kaa a maa ya ‘neneene hɛ mi kpatami’ mi.​—Mat. 24:30; Kpoj. 1:7.

11. Mɛni e sa kaa e hi wa juɛmi mi be mi nɛ wa ngɛ níhi nɛ maa ba hwɔɔ se ɔ a he susue ɔ?

¹¹ Ke Yesu kojo “je ma amɛ tsuo” ta a, ní komɛ nɛ sa kadimi maa ya nɔ loko Harmagedon ta a ma fɛ. (Mat. 25:32) Wa ma susu a kpɛti enyɔ he: Tuami nɛ Gog kɛ maa ba, kɛ nihi nɛ a pɔ mɛ nu ɔ a nya buami. Be mi nɛ wa ngɛ ní enyɔ nɛ ɔmɛ a he susue ɔ, e sa kaa e hi wa juɛmi mi kaa Mawu  Munyu ɔ tsɔɔ we be tutuutu nɛ ní enyɔ nɛ ɔmɛ maa ba mi. Ngɛ anɔkuale mi ɔ, e ma nyɛ maa ba kaa kake nya be tae nɛ kake ɔ hu maa je sisi.

12. Mɛni tuami nɛ nya wa nɛ Satan kɛ maa ba Matsɛ Yemi ɔ nɔ?

¹² Nyagbe tuami nɛ nya wa. Gog nɛ je Magog ɔ ma tua nihi nɛ a pɔ mɛ nu nɛ a piɛ ngɛ zugba a nɔ ɔ, kɛ a nyɛmimɛ to kpa amɛ. (Kane Ezekiel 38:2, 11.) Kɛ je be nɛ a fie Satan kɛ je hiɔwe ɔ, e kɛ nihi nɛ a pɔ mɛ nu ɔ ngɛ ta hwue. Se tuami nɛ e kɛ maa ba a nɔ nɛ ɔ maa pee nyagbe ta nɛ e kɛ Matsɛ Yemi nɛ a to sisi momo ɔ maa hwu. (Kpoj. 12:7-9, 17) Satan bɔ mɔde kaa e ma puɛ huɛ bɔmi nɛ ngɛ nihi nɛ a pɔ mɛ nu ɔ kɛ Mawu a kpɛti ɔ. Benɛ a bɔni nihi nɛ a pɔ mɛ nu ɔ a nya buami kɛ ngɛ Kristofohi asafo ɔ mi woe ɔ ji be titli nɛ e bɔ mɔde kaa e maa pee jã, se e yi manye. (Mat. 13:30) Se ke a kpata lakpa jamihi tsuo a hɛ mi, nɛ Mawu we bi pee kaa nihi nɛ ‘gbogbo kɛ agbo se lami dade ko be’ a he ɔ, Satan ma susu kaa e nine su a nɔ ta. Satan ma kudɔ e we bi nɛ a nɛ́ nɔ mɔbɔ ɔ konɛ a kɛ nyagbe tuami nɛ ba nihi nɛ a fĩ Matsɛ Yemi ɔ se ɔ a nɔ.

13. Mɛni blɔ nɔ Yehowa maa hwu kɛ ha e we bi ngɛ?

¹³ Ezekiel tsɔɔ nɔ́ nɛ maa ba. Gbami ɔ de ngɛ Gog he ke: ‘O maa hia blɔ kɛ je omleyi je tsitsaa he nɛ o ngɛ ɔ, kɛ o ta buli kpanakpanaa nɛ hi okpɔngɔhi a nɔ kɛ je je mahi babauu a mi kɛ ba. O ma ba tua ye ma Israel ɔ kaa ahumi nɛ ngɛ fiae huu kɛ nyɛɛ zugba a nɔ tsuo.’ (Ezek. 38:15, 16) Mɛni Yehowa maa pee ngɛ tuami nɛ ngɛ kaa nɔ́ nɛ nɔ ko be nyɛe maa tsi nya nɛ ɔ he? Yehowa de ke, ‘Ye mi mi ma fu wawɛɛ. Ma ha nɛ a maa hia klaate kɛ wo a sibi.’ (Ezek. 38:18, 21; kane Zakaria 2:8.) Yehowa maa hwu kɛ ha e sɔmɔli nɛ a ngɛ zugba a nɔ ɔ. Jamɛ a ta a nɛ a tsɛɛ ke Harmagedon ɔ nɛ.

14, 15. Mɛni maa ba ngɛ Satan nyagbe tuami ɔ se?

¹⁴ Loko wa ma susu bɔ nɛ Yehowa maa hwu kɛ ha e we bi ngɛ Harmagedon ta a mi ɔ he ɔ, nyɛ ha nɛ wa susu nɔ́ kpa ko hu nɛ e he hia he. Jamɛ a nɔ́ nɛ ɔ maa ba ngɛ Satan nyagbe tuami ɔ sisije loko Yehowa maa hwu kɛ ha e we bi ngɛ Harmagedon. Kaa bɔ nɛ wa na ngɛ yi 11 ɔ mi ɔ, nɔ́ enyɔne nɛ ɔ ji nihi nɛ a pɔ mɛ nu nɛ a piɛ ngɛ zugba a nɔ ɔ a nya buami.

¹⁵ Nihi nɛ a pɔ mɛ nu ɔ a nya buami. Mateo kɛ Marko tsuo ngma Yesu munyuhi nɛ kɔɔ “nihi nɛ Mawu hla,” nɛ ji Kristofohi nɛ a kɛ mumi ɔ pɔ mɛ nu ɔ a he munyu kɛ piɛɛ níhi nɛ maa ya nɔ loko Harmagedon maa je sisi ɔ he. (Hyɛ kuku 7.) Benɛ Yesu ngɛ lɛ nitsɛ e he munyu tue kaa Matsɛ ɔ, e gba ke: “E maa tsɔ hiɔwe bɔfo ɔmɛ kɛ ya bua nihi nɛ Mawu hla a a nya kɛ je je ɔ kɔ nya eywiɛ ɔmɛ tsuo, kɛ je  zugba nyagbe he kɛ yaa si hiɔwe nyagbe he.” (Mar. 13:27; Mat. 24:31) Mɛni nɛ Yesu ngɛ tsɔɔe kaa a ma bua nya a? Pi Kristofohi nɛ a pɔ mɛ nu ɔ a kpɛti nihi nɛ piɛ ngɛ zugba a nɔ ɔ a nyagbe nya sɔumi ɔ nɛ maa ba loko amanehlu ngua a maa je sisi ɔ he munyu nɛ e ngɛ tue. (Kpoj. 7:1-3) Mohu ɔ, nɔ́ nɛ maa ya nɔ ngɛ amanehlu ngua nɛ ma a mi ɔ he munyu Yesu ngɛ tue ɔ nɛ. Lɔ ɔ he ɔ, eko ɔ, ke Satan nyagbe tuami nɛ e kɛ maa ba Mawu we bi a nɔ ɔ je sisi bɔɔ pɛ ɔ, a maa ngɔ nihi nɛ a pɔ mɛ nu ɔ a kpɛti nihi nɛ piɛ ngɛ zugba a nɔ ɔ kɛ ho hiɔwe ya.

16. Mɛni nihi nɛ a pɔ mɛ nu nɛ a tle mɛ si ɔ ma tsu ngɛ Harmagedon ta a mi?

¹⁶ Anɛ a ma bua nihi nɛ a pɔ mɛ nu nɛ a piɛ ngɛ zugba a nɔ ɔ a nya a ta loko Harmagedon ta a ma fɛ lo? A ma bua nihi nɛ a pɔ mɛ nu ɔ tsuo a nya kɛ ya hiɔwe loko Mawu ta nɛ ji Harmagedon ɔ ma fɛ. A ma ha nihi 144,000 nɛ a kɛ Yesu maa ye nɔ ɔ he wami ngɛ hiɔwe, nɛ a maa piɛɛ Yesu he, nɛ a kɛ “dade tso” ma kpata Mawu Matsɛ Yemi ɔ he nyɛli a hɛ mi. (Kpoj. 2:26, 27, NW) Lɔ ɔ se ɔ, nihi tsuo nɛ a pɔ mɛ nu nɛ a tle mɛ si ɔ maa piɛɛ hiɔwe bɔfohi nɛ a he wa a he kɛ nyɛɛ Kristo, nɛ ji Matsɛ Tatsɛ ɔ se. Matsɛ ɔ dla e he kaa e kɛ he nyɛli “babauu” nɛ a ngɛ hlae nɛ a ye Yehowa we bi awi ɔ yaa kpe. (Ezek. 38:15) Ke jamɛ a ta a je sisi ɔ, lɔ ɔ tsɔɔ kaa Harmagedon ta a nɛ je sisi ɔ nɛ!​—Kpoj. 16:16.

17. Mɛni maa ba “apletsi” ɔmɛ a nɔ ngɛ Harmagedon?

¹⁷ Hɛ mi kpatami nɛ maa ba. Harmagedon ta a maa pee amanehlu ngua a nyagbe. Ngɛ jamɛ a be ɔ mi ɔ, Yesu ma tsu ní tsumi kpa ko hulɔ. Ngɛ “je ma amɛ tsuo” a Kojolɔ nɛ e ji ɔ se ɔ, e maa pee Plaafo nɛ ma kpata je ma amɛ​—nɛ ji nihi tsuo nɛ e sɛ hlami kojo mɛ kaa ‘apletsihi’ ɔ a hɛ mi. (Mat. 25:32, 33) Wa Matsɛ ɔ maa ngɔ ‘klaate nɛ nya ba kɛ fiaa je ma amɛ ní.’ Ngɛ anɔkuale mi ɔ, nihi tsuo nɛ e maa kojo mɛ kaa apletsihi​—kɛ je “matsɛmɛ” a nɔ kɛ ya si ‘nyɔguɛhi’ a nɔ ɔ​—‘maa ya neneene hɛ mi kpatami mi’​—Kpoj. 19:15, 18; Mat. 25:46.

18. (a) Mɛni blɔ nɔ si himi ɔ ma tsake ha “jijɔ” ɔmɛ ngɛ? (b) Mɛni blɔ nɔ Yesu maa ye kunimi kɛ pi si ngɛ?

¹⁸ Moo hyɛ bɔ nɛ si himi ɔ ma tsake kɛ ha nihi nɛ Yesu maa bu mɛ kaa ‘jijɔhi’ ɔ ha! Ke Satan kɛ e we bi babauu nɛ a ngɛ kaa ‘apletsihi’ ɔ ya tua ‘nimli asafo’ nɛ a ngɛ kaa ‘jijɔhi’ akɛnɛ a susu kaa jijɔ ɔmɛ be he piɛ pomi ko ɔ, a be manye yee. Jijɔ ɔmɛ maa gblee ‘amanehlu ngua a’ mi slɔkee. (Kpoj. 7:9, 14) Lɔ ɔ se ɔ, ke Yesu kpata nihi tsuo nɛ a ji Mawu Matsɛ Yemi ɔ he nyɛli a hɛ mi ta a, e maa hɛ Satan kɛ e daimonio ɔmɛ ngɔ fɔ muɔ voo ɔ mi. A maa pee kaa gbogboehi nɛ a be nyɛe maa pee nɔ́ ko, nɛ a maa hi lejɛ ɔ jeha akpe.​—Kane Kpojemi 6:2; 20:1-3.

19, 20. Mɛni blɔ nɔ wa ma nyɛ maa ngɔ munyuhi nɛ ngɛ Yesaya 26:20 kɛ 30:21 ɔ kɛ tsu ní ngɛ?

¹⁹ Mɛni blɔ nɔ wa maa gu kɛ dla wa he kɛ to níhi nɛ ngɛ nyakpɛ nɛ maa ba nɛ ɔmɛ? Hwɔɔmi Mɔ ɔ de jeha komɛ nɛ be ɔ ke: “Wa yi baami daa si ngɛ tue bumi nɛ wa maa pee ɔ nɔ.” Mɛni he je? Wa maa na heto ɔ ngɛ kɔkɔ bɔmi nɛ Yehowa kɛ ha Yuda bi nɛ a hi nyɔguɛ yemi mi ngɛ Babilon ɔ mi. Yehowa gba kɛ fɔ si kaa a ma kpata Babilon hɛ mi, se mɛni e sa kaa Mawu we bi nɛ a pee kɛ dla a he kɛ to jamɛ a hɛ mi kpatami ɔ? Yehowa de ke: “Ye ma, nyɛ ya sɛ nyɛ we ɔmɛ a mi, nɛ nyɛɛ ngmɛ sinya amɛ a mi ngɔ wo nyɛ yi. Nyɛɛ laa nyɛ he be kpiti ko kɛ yaa si Mawu mi mi fumi ɔ nya maa be.” (Yes. 26:20) Mo kadi peemi munyuhi nɛ ngɛ kuku nɛ ɔ mi ɔ: ‘yaa,’ “sɛ mi,” ‘ngmɛɛ mi,’ “nyɛɛ laa nyɛ he.” Munyu nɛ ɔmɛ tsuo ji fami gbi. Yuda bi nɛ a bu fami nɛ ɔ tue ɔ hi a wehi a mi, nɛ a kɛ ta buli nɛ a ngɛ níhi a hɛ mi kpatae ɔ kpí. Lɔ ɔ he ɔ, a yi baami daa si ngɛ tue bumi nɛ a maa pee kɛ ha Yehowa, nɛ́ a kɛ e blɔ tsɔɔmihi ma tsu ní ɔ nɔ. b

²⁰ Mɛni wa kaseɔ ngɛ mi? Kaa bɔ nɛ e ba ngɛ Mawu sɔmɔli nɛ a hi si blema a blɔ fa mi ɔ, wa yi baami daa si ngɛ tue bumi nɛ wa maa pee kɛ ha Yehowa, nɛ waa kɛ e blɔ tsɔɔmihi ma tsu ní ɔ nɔ. (Yes. 30:21) Wa náa blɔ tsɔɔmi nɛ ɔmɛ kɛ guu asafo ɔ nɔ. Lɔ ɔ he ɔ, e sa nɛ waa je wa tsui mi nɛ waa bu blɔ tsɔɔmi nɛ a kɛ haa wɔ ɔ tue. (1 Yoh. 5:3) Ke wa pee jã amlɔ nɛ ɔ, e be yee ha wɔ kaa wa maa je wa tsui mi nɛ waa pee tue bumi hwɔɔ se konɛ wa Tsɛ Yehowa kɛ wa Matsɛ Yesu nɛ a po wa he piɛ. (Zef. 2:3) He piɛ pomi nɛ ɔ ma ha nɛ waa kɛ wa hɛngmɛ maa na bɔ nɛ Mawu Matsɛ Yemi ɔ ma kpata e he nyɛli a hɛ mi pɛsɛpɛsɛ ha. Enɛ ɔ maa pee nɔ́ ko nɛ wa hɛ be nɔ jee gblegbleegble!