1, 2. (a) Aha do na patuduhon naung mamarenta Harajaon ni Debata sian taon 1914? (b) Aha do na laho taparsiajari di pasal on?

 LAM togu do haporseaonta mangida angka naung diulahon ni Harajaon ni Debata. (Ps. 110:2) Diparade Raja i do torop naposoNa laho marbarita. Dipabadia do nasida di parange dohot di partondion. Marsada ni roha do hita di liat portibi on, nang pe musu ni hasintongan parohon hasusaan tu hita. Sude na niulahon ni Harajaon i, patuduhon nunga mamarenta Jesus Kristus Rajanta di tongatonga ni musuna sian taon 1914.

² Adong dope ulaon na balga na laho ulahonon ni Harajaon i. Ndang sadia leleng nai, ”ro” ma Harajaon i ’mangaropukhon’ sude musuna. (Mat. 6:10; Dan. 2:44) Alai, andorang so ro ari i, adong dope angka na laho masa. Aha ma i? Dipaboa do alusna marhite surirang di Bibel. Saonari, taparsiajari ma pigapiga taringot tu surirang i, jala taida ma muse aha na laho masa.

3. Aha do na parjolo masa andorang so ro ari ni Jahowa?

³ Barita na paboahon dame. Dipaboa apostel Paulus do di bagasan suratna tu halak Tessalonik taringot tu na masa parjolo sahali andorang so ro ari i. (Jaha 1 Tessalonik 5:2, 3.) Di surat si Paulus do molo ”ari ni [Jahowa] i” dipungka dung diporangi ”Babel na balga”. (Pgk. 17:5) Andorang so masa i, didok angka bangso ma, ’Dame do jala ndang adong mara.’ Hata on patuduhon ra adong do boaboa na sahat tu godang inganan jala tarsar di liat portibi on. Parsidohot do angka pamimpin agama mangulahon on? Ala parsidohot do nasida tu portibi on, ra, dohot do nasida mandok, ”Dame!” (Jer. 6:14; 23:16, 17; Pgk. 17:1, 2) Barita na paboahon dame do jala ndang adong mara, gabe tanda na laho dipungka ari ni Jahowa. Jala di tingki i ”ndang adong haporusan” ni angka musu ni Harajaon i.

4. Boasa ringkot mangantusi surirang ni Bibel taringot tu hata dame jala ndang adong mara?

 ⁴ Boasa ringkot taantusi surirang on? Didok si Paulus, ”Ndang di haholomon hamu mangolu jala ndang tarsonggot hamu bahenon ni ari i songon songgotsonggot na binahen ni panangko.” (1 Tes. 5:3, 4, Bibel siganup ari) Ndang songon halak na asing, taantusi do na tinuju ni na masa saonari on. Songon dia do surirang taringot tu hata dame do jala ndang adong mara digohi? Ingkon tapaima do aha na laho masa. Alani i, ”sai dungo ma hita jala marroha na torang”.​—1 Tes. 5:6; Sep. 3:8.

5. Aha do na masa andorang so ”haporsuhon” bolon?

⁵ Diporangi ma agama. Taingot ma na sinurat ni si Paulus, ’Molo didok halak, dame do jala ndang adong mara, disi ma tompu tahop tu nasida hamagoan i.’ Songon sillam diihuthon soara ni ronggur, songon i ma, hata ’dame do jala ndang adong mara’ diihuthon ”hamagoan”. Aha do na laho mago? Na parjolo, ”Babel na balga”, i ma punguan ni sude agama na so sintong manang ”boruboru na jahat”. (Pgk. 17:5, 6, 15) Dung diripashon sude organisasi ni agama na so sintong, i ma pamungka ni ”haporsuhon” bolon i. (Mat. 24:21; 2 Tes. 2:8) Godang do na tarsonggot tingki masa on. Boasa? Ala sahat tu tingki i, didok roha ni boruboru na jahat i ”mangarajai” do ibana, jala ndang dirimpu ’idaonna arsak ni roha’. Alai ”di bagasan na sadari” di na so pamotoanna, tompu ma tahop tu ibana hamagoan i.​—Pgk. 18:7, 8.

6. Ise do na parohon hamagoan i tu ”Babel na balga” i?

⁶ Ise do na parohon hamagoan tu ”Babel na balga”? I ma ”binatang” si ”sampulu tanduk”. Dipaboa do taringot tu binatang i di buku Pangungkapon na manggombarhon Perserikatan Bangsa-Bangsa (PBB). Sisampulu tanduk i manggombarhon sude huaso politik na mangurupi ”binatang” i. (Pgk. 17:3, 5, 11, 12) Sadia balga do hamagoan i? Buaton ni angka bangso na mangihuthon PBB ma arta ni boruboru i, dipasuda, jala ”tutungonnasida ma ibana tu api”.​—Jaha Pangungkapon 17:16. a

7. Songon dia do hata ni Jesus di Mateus 24:21, 22 digohi di abad na parjolo M, jala songon dia do i digohi tu ari na naeng ro?

⁷ Diorui do angka ari i. Dipaboa Jesus do na masa saleleng hasusaan bolon. Didok ibana, ”ala ni angka na pinillit i do umbahen na diorui” ari i. (Jaha Mateus 24:21, 22.) Hata ni Jesus on digohi parjolo sahali taon 66 M, tingki ”diorui” Jahowa leleng ni tentara ni Rom mangkaliangi Jerusalem. (Mrk. 13:20) Alani i, boi ma malua halak Kristen na adong di Jerusalem dohot di Judea. Songon dia do on muse digohi di ari na naeng ro? ”Diorui”  Jahowa do paraloan na binahen ni PBB tu organisasi ni agama asa unang dohot mago agama na sintong. Alani i, diripashon do sude agama na so sintong, alai tading do agama na sintong. (Ps. 96:5) Saonari, taparsiajari ma na masa dung salpu hasusaan bolon i.

8, 9. Aha do tanda na disurirangkon Jesus na laho masa, jala songon dia do pangkilalaan ni halak mangida tanda on?

⁸ Surirang ni Jesus taringot tu tingki parpudi patuduhon adong na laho masa andorang so Armagedon. Taparsiajari ma dua na masa na disurat di buku Mateus, Markus dohot Lukas.​—Jaha Mateus 24:29-31; Mrk. 13:23-27; Luk. 21:25-28.

⁹ Angka tanda di langit. Songon surirang ni Jesus, ”Mangkolom ma mata ni ari jala ndang marsinondang be bulan i. Mardabuan ma angka bintang sian langit.” Ndang dihaporseai be angka pamimpin agama boi mangalehon panogunoguon. Alai, boi do hata ni Jesus i patuduhon tanda di langit? Boi. (Jes. 13:9-11; Joel 2:1; 3:3, 4) Songon dia do pangkilalaan ni halak mangida tanda on? Hebo jala gok biar ma jolma di portibi on. (Luk. 21:25; Sep. 1:17) Angka musu ni Harajaon i dohot ’angka raja sahat tu anak somang’ satonga mate ala ni biarna paimaimahon na naeng masa, jala maporus laho martabuni. Alai, ndang adong inganan na buni sian rimas ni Raja i.​—Luk. 21:26; 23:30; Pgk. 6:15-17.

10. Aha do panguhuman naung ditontuhon na dipaboa Jesus, jala songon dia do pangkilalaan ni halak na mangoloi dohot na mangalo tu Harajaon i taringot tu haputusan i?

¹⁰ Ditontuhon ma panguhuman. Sude musu ni Harajaon ni Debata dipaksa mangida angka na masa na mambahen nasida mabiar. Didok Jesus, ”Idaonnasida ma Anak ni jolma i ro marhitehon ombun, mantat hagogoon dohot hasangapon godang.” (Mrk. 13:26) Tanda on patuduhon naung dapot tingki ni Jesus laho manguhumi. Dipatorang Jesus do muse di surirang na asing panguhuman naung ditontuhon. Taida ma hatorangan ni panguhumon on di tudosan taringot tu birubiru dohot hambing. (Jaha Mateus 25:31-33, 46.) Sude na parsidohot tu Harajaon ni Debata didok birubiru. Jala padirgakon ni nasida ma uluna ala diboto ’nunga jonok haluaon ni nasida’. (Luk. 21:28) Alai, sude na mangalo tu Harajaon ni Debata digoari hambing, jala ”mangangguhi ma” ala diboto upa ni nasida, i ma hamatean na salelengna.​—Mat. 24:30; Pgk. 1:7.

11. Aha do na porlu taingot saleleng mangulas angka na laho masa andorang so ro Armagedon?

¹¹ Dung dipaboa Jesus panguhumon tu ”nasa bangso” i, adong do muse na masa andorang so dipungka Armagedon. (Mat. 25:32) Taulas ma dua na masa i: ro ma  paraloan sian Gog, dung i dipapungu ma halak na miniahan. Huhut taparsiajari porlu taingot, ndang dipaboa di Bibel andigan na masa on digohi. Olo do ra digohi na dua on di tingki na sarupa.

12. Aha do paraloan na diparo Sibolis tu naposo ni Debata na parpudi sahali?

¹² Paraloan na parpudi. Ro ma paraloan ni Gog na sian Magog tu halak na miniahan na mangolu dope di tano on dohot tu birubiru na asing. (Jaha Hesekiel 38:2, 11.) Dung didabu sian surgo, marsitutu do Sibolis mangago halak na miniahan, alai paraloan na sian Gog on ma na parpudi bahenonna mangalo naposo ni Debata. (Pgk. 12:7-9, 17) Dung dipapungu halak na miniahan tu huria Kristen naung dipabadia, marsitutu do Sibolis manegai haporseaon ni nasida alai ndang tolap ibana. (Mat. 13:30) Alai, dung so adong be organisasi ni agama na so sintong, tading ma naposo ni Debata. Diida Sibolis ma nasida songon na so martembok jala ndang marpartahanan. On ma tingki na denggan dihilala Sibolis mangago nasida, dipangke ibana ma angka raja mamorangi naposo ni Debata na parpudi sahali.

13. Songon dia do pangkilalaan ni Jahowa tingki ro paraloan sian Gog tu naposoNa?

¹³ Digombarhon si Hesekiel do na laho masa. Taringot tu Gog didok ibana, ”Hape ro dope ho sian ingananmu, sian ujung ni utara sahali, ho jala torop bangso hinaram, angka na marsihundul di hoda nasida luhut, sada luhutan apala na bolon, parangan apala na torop sahali. Jala nangkok do ho dompak bangsongku.” (Hes. 38:15, 16) Songon dia do pangkilalaan ni Jahowa tingki ro paraloan on tu naposoNa? Jahowa mandok, ”Martimpul ma rimashu di bagasan igungku. . . . Huhut ahu umpanggil podang marlulu dompak ibana.” (Hes. 38:18, 21; jaha Sakaria 2:12.) Urupan ni Jahowa do naposoNa di tano on. On ma na didokna porang Armagedon.

14, 15. Aha do muse na masa andorang so ro Sibolis mambahen paraloan na parpudi?

¹⁴ Andorang so taparsiajari songon dia bahenon ni Jahowa mangondingi hita di Armagedon, adong dope muse na laho masa. On masa andorang so diporangi Sibolis dope naposo ni Debata na parpudi sahali. Songon naung dipaboa di paragraf 11, na masa on, i ma ulaon papunguhon sude angka na miniahan na tading dope di tano on tu surgo.

¹⁵ Dipapungu angka na miniahan. Disurat si Mateus dohot si Markus do hata ni Jesus taringot tu, ”angka na pinillitna”, i ma halak na miniahan ni tondi. Angka on ma na laho masa andorang so dipungka porang Armagedon. (Ida paragraf 7.) Tingki dipaboa Jesus taringot  tu dirina naung gabe Raja disurirangkon ibana ma, ”Suruonna angka pardisurgo papunguhon angka na pinillitna i sian desa na ualu i, sian suhi ni tano sahat ro di suhi ni langit.” (Mrk. 13:27; Mat. 24:31) Taringot tu aha do na nidok ni Jesus dison? Taringot tu pemeteraian ni angka na miniahan do? Ndang songon i. Andorang so dipungka dope hasusaan bolon, nunga disahap [dimeteraihon] angka na miniahan. (Pgk. 7:1-3) Alai, na nidok ni Jesus, i ma angka na masa saleleng hasusaan bolon. Alani i, tingki ro Sibolis laho mangago naposo ni Debata, dipapungu ma angka na miniahan tu surgo.

16. Aha do na laho diulahon halak na miniahan na dipapungu tu surgo di Armagedon?

¹⁶ Songon dia do ulaon papunguhon halak na miniahan hombar tu Armagedon? Sian ulaon papunguhon i, taboto ma nunga di surgo sude halak na miniahan andorang so dipungka dope porang Armagedon. Di surgo, 144.000 halak na miniahan manjalo huaso rap dohot Jesus laho manaluhon musuna mamangke ”tungkot bosi”. (Pgk. 2:26, 27) Dung i, halak na miniahan on, rap dohot angka surusuruan laho mangurupi Jesus mamorangi musu na manusai angka naposo ni Debata. (Hes. 38:15) Tingki dipungka porang i, on ma na nidokna Armagedon!​—Pgk. 16:16.

17. Di Armagedon, aha do na masa tu halak na digoari hambing?

¹⁷ Didabu ma uhum. Porang Armagedon ma ujung ni hasusaan bolon. Di tingki i, Jesus gabe sahalak Panguhum tu ”nasa bangso”, jala ibana do muse na manguhumi angka bangso, i ma halak na targoar tu punguan ni hambing. (Mat. 25:32, 33) Marhite ”podang na tajom” taluhonon ni Rajanta Jesus ma angka bangso. Sude halak sian ”angka raja” sahat tu ”hatoban” na digoari hambing mandapot upa hamatean na salelengna.​—Pgk. 19:15, 18; Mat. 25:46.

18. (a) Aha do na masa tu halak na digoari birubiru? (b) Songon dia do Jesus marhamonangan mangalo musuna?

¹⁸ Imbar do na masa tu halak na digoari birubiru! Nang pe diparo musu rimasna tu nasida, alai malua do punguan on, i ma punguan na ”mansai torop”, sian musu dohot sian ”haporsuhon godang”. (Pgk. 7:9, 14) Dung ditaluhon jala diropukhon Jesus sude musu ni Harajaon i, didabu ma Sibolis dohot angka surusuruanna tu banua toru. Di inganan i, dihinsu ma Sibolis dohot angka surusuruanna saleleng saribu taon, jala songon halak na mate ndang boi ibana mangulahon manang aha pe.​—Jaha Pangungkapon 6:2; 20:1-3.

19, 20. Songon dia do hita boi mangulahon hata di Jesaya 26:20 dohot 30:21?

¹⁹ Songon dia do asa rade hita mangida angka na masa di portibi on? The Watchtower paboahon, ”Pangoloion mangkorhon tu haluaon.” Boasa? Boi taida alusna sian sipasingot ni Jahowa tu halak Jahudi na tartaban di kota Babel najolo. Disurirangkon Jahowa do na laho diripashon kota Babel. Alai, aha do siulahonon ni naposo ni Debata asa boi nasida malua? Jahowa mandok, ”Laho ma ho ale bangsongku, bongot i ma angka bilutmu jala hinsu ma pintumi di pudim. [Martabuni] ma ho satongkin paima salpu rimas i.” (Jes. 26:20) Parenta siulahonon ni nasida, i ma: ”laho”, ”bongot i”, ”hinsu”, jala ”[martabuni]”. Alani i, asa boi malua ingkon oloan ni halak Jahudi do sipasingot on. Ingkon di jabu do nasida, dao sian angka tentara na marporang di tingki i. Pangoloion ni nasida tu tudutudu ni Jahowa mangkorhon do tu haluaon ni nasida. b

²⁰ Aha do parsiajaranna tu hita? Songon naposo ni Debata najolo, haluaonta hombar do tu pangoloionta tu tudutudu ni Jahowa. (Jes. 30:21) Tudutudu on dilehon marhite huria. Alani i, porlu ma hita marsitutu asa marroha pangoloi tu tudutudu na dilehon tu hita. (1 Joh. 5:3) Molo nunga rade hita marroha pangoloi sian saonari, mura ma hita mangoloi jala mangihuthon tudutudu di ari na naeng ro. Ujungna, ondingan ni Jahowa dohot Jesus Rajanta ma hita. (Sep. 2:3) Ala ondingan ni Jahowa do hita, idaonta ma Harajaon ni Debata mangaropukhon musuna. On ma na laho masa na so tarlupahon hita!