1, 2. a) Mun lo b’a yira ka gwɛ ko an ka Masacɛ be masaya la kabi saan 1914? b) An bena mun lo ye sapitiri nin na?

 AN Y’A ye Ala ka Masaya ye koo minw bɛɛ kɛ a juguw cɛma. Siga t’a la, o y’an ka limaniya barika bonya yɛrɛ le! (Zab. 110:2). An ka Masacɛ ye jamaba dɔ lajɛn minw b’u yɛrɛ di ka Ala ka Masaya kibaro diiman fɔ. A y’u saniya ani k’u jogow fisaya Alako ta fan fɛ ani tagamacogo ta fan fɛ. Hali k’a sɔrɔ an juguw b’u seko bɛɛ kɛra walisa k’an faran faran, an kaan bɛnnin lo duniɲa kuru bɛɛ kɔnɔ. O koow ani an ye caaman minw ye ka tɛmɛ, o bɛɛ b’a yira ka gwɛ ko an ka Masacɛ be masaya kɛra a juguw cɛma kabi saan 1914.

² Yanni dɔɔni, Ala ka Masaya bena koo kabakoman wɛrɛw kɛ tugun. A bena “na” a juguw bɛɛ halaki pewu (Mat. 6:10; Dan. 2:44). Nka sanni o wagati ka se, koo kɔrɔtaninba wɛrɛw bena kɛ fɔlɔ. O ye koo jumanw lo ye? Bibulu ka kiraya kuma caaman be kuma o koo la. An k’u dɔw lajɛ walisa k’a lɔn min b’an kɔnɔna.

3. An be koo fɔlɔ juman lo makɔnɔna?

³ U bena a fɔ ko hɛɛrɛ be yen. Ciden Pol ka bataki dɔ la Tesalonikaw ma, a y’a ɲɛfɔ an be koo fɔlɔ min kɔnɔna (1 Tesalonikaw 5:2, 3 kalan). O bataki kɔnɔ, ciden Pol ko Jehova ka loonba bena daminɛ ni Babilonɛba halakili lo ye (Yir. 17:5). Nka dɔɔni dɔrɔn ka kɔn o ɲɛ, jamanaw ben’a fɔ ko “hɛrɛ ni jigisigi be yen.” N’a sɔrɔ u bena o kuma fɔ siɲɛ kelen le wala siɲɛ caaman ka tugu tugu ɲɔgɔn kɔ. Yala diinan kuntigiw bena fara u kan k’o kumaw fɔ wa? Komi olu fana ye duniɲa ta ye, n’a sɔrɔ u bena fara jamanaw kan k’a fɔ ko “hɛrɛ o hɛrɛ.” (Zer. 6:14; 23:16, 17; Yir. 17:1, 2). U kɛtɔ k’a fɔ ko hɛɛrɛ ni jigisigi be yen, o bena kɛ tagamasiɲɛ ye min b’a yira ko Jehova ka loon be nana daminɛ le. Ala ka Masaya juguw ‘tɛna se ka bɔyɔrɔ sɔrɔ’ o la fewu.

4. Ciden Pol ye kiraya kuma min fɔ ka ɲɛsin hɛɛrɛ ni jigisi koo ma, o faamuyali b’an nafa cogo di?

 ⁴ O kiraya kuma faamuyali b’an nafa cogo di? Ciden Pol ko: “Aw te dibilamɔgɔw ye, n’o loon be na bali aw la i n’a fɔ soon.” (1 Tes. 5:3, 4). Mɔgɔw fanba t’a lɔn koow bena laban cogo min na, nka an b’o lɔn. O kiraya kuma min ɲɛsinna hɛɛrɛ ni jigisigi koo ma, o bena dafa cogo di tigitigi? An ka kɔnɔni kɛ k’a filɛ min bena kɛ. O la, “an k’an yɛrɛ kɔlɔsi an labɛnnin ka to ɲana tuma bɛɛ.”—1 Tes. 5:6; Sof. 3:8.

5. “Tɔɔrɔba” wagati bena daminɛ ni mun lo ye?

⁵ U bena wuli diinanw kama. Ciden Pol y’a sɛbɛ ko: “Tuma min na u ben’a fɔ ko hɛrɛ ni jigisigi be yen, o tuma na tɔɔrɔ [halakili] bena ben u kan” yɔrɔnin kelen. Ni san mɛnɛmɛnɛna, o yɔrɔnin bɛɛ san be pɛrɛn. O cogo kelen na, ni duniɲa mɔgɔw ko “hɛrɛ ni jigisigi be yen,” halakili bena ben u kan yɔrɔnin kelen. Mun lo bena halaki? A fɔlɔ, Babilonɛba o kɔrɔ ngalon diinanw jɛnkulu, o min be weele fana ko “kakalamuso [wala jatɔmuso].” (Yir. 17:5, 6, 15). “Tɔrɔba” bena daminɛ ni kerecɛn tɔgɔtigiw ni ngalon diinanw jɛnkulu tɔɔw halakili ye (Mat. 24:21; 2 Tes. 2:8). O koo bena bari mɔgɔ caaman na. Mun na do? Sabu fɔɔ ka na se a halaki tuma ma, a tun b’a miiri ko ale kɛnin be i n’a fɔ “masamuso” ani ko “sanga tena bɔ ale fɛ ka ye.” Nka, a b’a yɛrɛ nigɛra le. A bena bari ka halaki “tile kelen kɔnɔ.”—Yir. 18:7, 8.

6. Jɔn wala mun lo bena wuli Babilonɛba kama?

⁶ Jɔn wala mun lo bena wuli “Babilɔnɛba kama”? “Sogo” min be ni “gɔɔn tan” ye. Yirali ka gafɛ b’a yira k’o sogo ye Nasiyɔn Zini (ONU) lo ye. Politiki jɛnkulu minw bɛɛ be “sogo wuleman” nin dɛmɛna, olu lo ye gɔɔn tan nunu tagamasiɲɛ ye (Yir. 17:3, 5, 11, 12). O halakili bena juguya fɔɔ ka se hakɛ juman ma? Jamana minw be Nasiyɔn Zini kɔnɔ, olu bena kakalamuso nin walaka, k’a bololafɛnw cɛ, k’a yɛrɛ sogo dumu ani a “tɔɔ min bena to, u bena a jɛni.”—Yirali 17:16 kalan. a

7. Yezu ka kuma minw be sɔrɔ Matiyo 24:21, 22 la, u dafara cogo di saan kɛmɛkulu fɔlɔ la ani u bena dafa cogo di sini ma?

⁷ Dɔ bena bɔ o tɔɔrɔw wagati la. An ka Masacɛ y’a fɔ min bena kɛ tɔɔrɔba wagati la. A ko: “A ye minw woloma k’a kɛ a yɛrɛ taw ye, olu kosɔn dɔ bena bɔ” o wagati la (Matiyo 24:21, 22 kalan). Yezu ka kumaw faan dɔ dafara saan 66 an ka tile la. Tuma min na Ɔrɔmukaw ka kɛlɛbolo nana Zeruzalɛmu kama, Jehova ye “dɔ bɔ” o tɔɔrɔw wagati la (Mariki 13:20). O y’a to Zeruzalɛmu ni Zuda kerecɛnw kisira. Mun lo bena kɛ tɔɔrɔba wagati la duniɲa kuru bɛɛ la? Tuma min na Nasiyɔn Zini bena wuli diinanw kama, Jehova bena tɛmɛ an ka Masacɛ  fɛ ka “dɔ bɔ” o tɔɔrɔw wagati la walisa u kana tiɲɛn diinan ni ngalon diinan halaki ɲɔgɔn fɛ. Ngalon diinanw jɛnkuluw bɛɛ bena halaki. Nka tiɲɛn diinan kɔni tɛna halaki (Zab. 96:5). An k’a filɛ sisan min bena kɛ tɔɔrɔba wagati tuma na.

8, 9. Yezu tun kaan be koo juman le ma, ani mɔgɔw bena min ye, o bena mun lo kɛ u la?

⁸ Yezu ka kiraya kuma min ɲɛsinna laban loonw ma, a ye kobaba caaman kofɔ minw bena kɛ dɔɔni dɔrɔn ka kɔn Arimagedɔn ɲɛ. An bena kuma koo fɔlɔ fila minw koo la, u be sɔrɔ Matiyo, Mariki, ani Luka ka Evanziliw kɔnɔ.—Matiyo 24:29-31 kalan; Mariki 13:23-27; Luka 21:25-28.

⁹ Koo minw bena kɛ sankolo la. Yezu tun kɔnna k’a fɔ ko: “Tile bena fin, kalo tena yeelen bɔ tugu, lolow bena bɔ sankolo la ka ben.” A gwɛnin lo ko mɔgɔw tɛna na yeelen ɲini tugun diinan kuntigiw fɛ sabu u tɛn’a to diinan kuntigiw ka kɛ u ɲɛminɛbagaw ye tugun. Yala Yezu tun kaan be kabako koo dɔ lo ma fana min tun bena kɛ sankolo la wa? N’a sɔrɔ a tun kaan b’o lo ma fana (Ezayi 13:9-11; Zowɛli 2:1, 30, 31). Mɔgɔw bena min ye, o bena mun lo kɛ u la? U “kɔnɔ bena gwan” siranya bolo sabu “u dabari bena ban.” (Luka 21:25; Sof. 1:17). Ala ka Masaya juguw (k’a ta masaw la fɔɔ ka ta se jɔɔnw ma), u “bena sa jatigɛ kojugu bolo” ani u bena boli ka dogoyɔrɔ ɲini. Nka u tɛna dogoyɔrɔ si sɔrɔ min latanganin lo ani min b’u kisi an ka Masacɛ ka dimiya ma.—Luka 21:26; 23:30; Yir. 6:15-17.

10. Yezu bena kiti juman lo tigɛ? A bena mun lo kɛ Ala ka Masaya marakɔnɔmɔgɔ kantigiw la ani Ala ka Masaya kɛlɛbagaw la?

¹⁰ Yezu bena kiti dɔ tigɛ. Waajibi lo Ala ka Masaya kɛlɛbagaw ka koo dɔ ye min bena dɔ fara u ka siranya kan kosɔbɛ. Yezu y’a fɔ ko: “Mɔgɔw bena Mɔgɔ Dencɛ natɔ ye sankabaw cɛma ni sebagaya ni nɔɔrɔ ye.” (Mariki 13:26). Yezu kɛtɔ k’a ka sebagaya yira o cogo kabakoman na, o b’a yira ko a be nana kiti tigɛyɔrɔ le. Yezu bena kiti min tigɛ o wagati la, kunnafoni wɛrɛw dira o koo la a ka kiraya kuma kɔnɔ min ɲɛsinna laban loonw ma. Yezu ye ntalen kuma min la sagaw ani baaw koo la, o kunnafoniw be sɔrɔ yen (Matiyo 25:31-33, 46 kalan). A bena Ala ka Masaya marakɔnɔmɔgɔ kantigiw suma ni “sagaw” ye. U bena u “kun kɔrɔta” ani k’u “ɲa lawuri san fɛ” sabu u y’a faamu ko u “ta kisiri wagati le surunya ra ten.” (Luka 21:28, Biblu Ala ta kuma). Nka a bena Ala ka Masaya kɛlɛbagaw suma ni “baaw” ye ani u “bena kasi kosɔbɛ” sabu u b’a lɔn ko halakili “banbali” le b’u kɔnɔna.—Mat. 24:30; Yir. 1:7.

11. Koo minw ka ɲi ka kɛ, n’an b’u lajɛra, an ka ɲi ka mun lo to an hakili la?

 ¹¹ Ni Yezu ye kiti tigɛ ka ban “siyaw bɛɛ” kan, kobaba wɛrɛw ka ɲi ka kɛ tugun sanni Arimagedɔn kɛlɛ ka daminɛ (Mat. 25:32). An k’u la fila lajɛ: o ye Gɔgi min be Magɔgi ka kɛlɛ ye ani kerecɛn mɔlenw lajɛnko ye. O koow lajɛtɔ, an k’a to an hakili la ko Ala ka Kuma t’a yira o koow bena kɛ wagati tigitigi min na. Nka a be komi u bena kɛ ka tugu tugu ɲɔgɔn kɔ le.

12. Sutana bena kɛlɛba laban juman lo wuli Ala ka Masaya kama?

¹² Gɔgi min be Magɔgi ka kɛlɛ. Kerecɛn mɔlen minw bele be dugukolo kan, Gɔgi min be Magɔgi bena wuli olu ni saga dɔ wɛrɛ mɔgɔw kama k’u kɛlɛ (Ezekiyɛli 38:2, 11 kalan). Kabi Sutana gwɛnna ka bɔ sankolo la ka jigi dugukolo kan, a bele be Ala ka Masaya kɛlɛla. Nka kerecɛn mɔlen minw bele be dugukolo kan, ni Sutana nana wuli u kama k’u kɛlɛ, o le bena kɛ a ka kɛlɛ laban ye (Yir. 12:7-9, 17). Kabi kerecɛn kafo sigira kokura ani kerecɛn mɔlenw lajɛnko daminɛna, Sutana y’a ɲini k’u ka Alakow nagasi pewu. Nka a ma se (Mat. 13:30). Ni ngalon diinan jɛnkuluw bɛɛ halakira ka ban pewu, Sutana bena a ye ko sababu ɲuman lo ale fɛ ka Ala sagokɛlaw kɛlɛ sabu u bena kɛ komi duguw, “laminikogo tɛ minw na, koon n’a sɔgɔnan tɛ minw na.” A bena a kɔmɔgɔw lasun u be Ala ka Masaya marakɔnɔmɔgɔw kɛlɛ.

13. Jehova bena mun lo kɛ walisa k’a sagokɛlaw dɛmɛ?

¹³ Ezekiyɛli ka kira kuma dɔ kɔnɔ, a y’a ɲɛfɔ min bena kɛ. A y’a fɔ Gɔgi koo la ko: “E ni kɛlɛden caaman ka bɔ siya caaman na, aw bɛɛ bena yɛlɛ soow kan ka kɛ kɛlɛbolo barikaman ye, aw bena bɔ fɔɔ yɔrɔjan, kɔgɔdugu ɲafan fɛ i ka jamana kɔnɔ ka na. Gɔgi, i bena na ne ka jama . . . kɛlɛ i n’a fɔ sankaba be dugukolo datugu cogo min na.” (Ezek. 38:15, 16). A be se ka kɛ mɔgɔw ɲɛɛ na ko Sutana n’a kɔmɔgɔw bena see sɔrɔ o kɛlɛ la. Nka, Jehova bena mun lo kɛ do? Jehova yɛrɛ y’a fɔ ko: “Ne dusu bena gwan kosɔbɛ.” A y’a fɔ tugun ko: “Ne bena murujantigiw wele Gɔgi kama.” (Ezek. 38:18, 21; Zakari 2:8 kalan). Jehova bena dɔ kɛ dɔ ye k’a sagokɛlaw dɛmɛ. O le bena kɛ Arimagedɔn kɛlɛ ye.

14, 15. Gɔgi min be Magɔgi ka kɛlɛ daminɛnin kɔ, koo wɛrɛ juman lo bena kɛ?

¹⁴ Sanni an k’a lajɛ Jehova bena min kɛ a sagokɛlaw ye Arimagedɔn kɛlɛ la, an ka kɔn k’a filɛ kooba wɛrɛ min bena kɛ. O bena kɛ Gɔgi min be Magɔgi ka kɛlɛ ni Arimagedɔn kɛlɛ cɛ. I ko an y’a ye cogo min na dakun 11nan na, kerecɛn mɔlen minw bele be dugukolo kan, o koo ɲɛsinna olu lajɛnko lo ma.

¹⁵ Kerecɛn mɔlenw lajɛnko. Koo minw bena kɛ ka kɔn Arimagedɔn kɛlɛ ɲɛ, tuma min na Matiyo ni Mariki tun b’o sɛbɛra, u y’a sɛbɛ fana Yezu ye min fɔ ka ɲɛsin  ‘mɔgɔ wolomaninw’ ma, o minw ye kerecɛn mɔlenw ye. (Dakun 7nan lajɛ.) Yezu tun kɔnna k’a fɔ ko tuma min na ale bena Masaya daminɛ, “a bena mɛlɛkɛw ci diɲɛ faan bɛɛ la ka taga olu lajɛn, k’a ta dugukolo daan na fɔɔ ka taga bila sankolo daan na.” (Mariki 13:27; Mat. 24:31). Yezu tun kaan be lajɛnko juman lo ma do? Kerecɛn mɔlen minw bele be dugukolo kan, tagamasiɲɛ laban min bena la u teen na dɔɔni dɔrɔn sanni tɔɔrɔba wagati ka daminɛ, Yezu tun kaan tɛ o lo ma (Yir. 7:1-3). Nka Yezu tun kaan be koo min ma, o tun bena kɛ tɔɔrɔba wagati la le. Tuma min na Gɔgi min be Magɔgi bena wuli Ala sagokɛlaw kama, a be komi dɔɔni o daminɛnin kɔ le kerecɛn mɔlenw bena lajɛn ka taga sankolo la.

16. Kerecɛn mɔlenw minw suu bena kunu, olu bena fara Yezu kan ka mun lo kɛ Arimagedɔn kɛlɛ la?

¹⁶ Cogo juman na, kerecɛn mɔlenw lajɛnko ɲɛsinnin be Arimagedɔn kɛlɛ ma? O lajɛnko bena kɛ wagati min na, o b’an dɛmɛ k’a lɔn ko ka kɔn Arimagedɔn kɛlɛ ɲɛ, kerecɛn mɔlenw bɛɛ bena kɛ sankolo la. O kɔ, Krista marakɛɲɔgɔn mɔgɔ 144 000 nunu bena kuntigiya sɔrɔ walisa ka fara Yezu kan ka Ala ka Masaya juguw halaki ni “nigɛbere” ye (Yir. 2:26, 27). Olu ni mɛlɛkɛ wɛrɛw bena fara kɛlɛbolow kuntigi Yezu Krista kan ka kɛlɛ kɛ ni “kɛlɛden caaman” ye minw wulila Ala sagokɛlaw kama (Ezek. 38:15). O bena kɛ kɛlɛba yɛrɛ lo ye, min be weele ko Arimagedɔn kɛlɛ!—Yir. 16:16.

17. Bibulu be mɔgɔ minw suma ni “baaw ye, mun lo bena olu sɔrɔ Arimagedɔn kɛlɛ la?

¹⁷ Kititigɛ bena laban cogo min na. Kooba laban min bena kɛ tɔɔrɔba wagati la, o ye Arimagedɔn kɛlɛ lo ye. Yezu bena baara dɔ kɛ fana o wagati la. N’a ye kiti tigɛ “siyaw bɛɛ” kan ka ban tuma min na, a ye mɔgɔ minw suma ni “baaw” ye, a bena u bɛɛ halaki (Mat. 25:32, 33). An ka Masacɛ bena “murujan dadiman” kɛ ka “siyaw” bugɔ n’a ye. A ye mɔgɔ minw bɛɛ suma ni baaw ye, k’a ta “masaw” la fɔɔ ka taga se ‘jɔɔnw’ ma, olu bena halaki pewu.—Yir. 19:15, 18; Mat. 25:46.

18. a) Yezu ye minw suma ni “sagaw” ye, olu ka koo bena bari ka yɛlɛma cogo di? b) Yezu bena see sɔrɔ pepewu a juguw kan cogo di?

¹⁸ Yezu ye minw suma ni “sagaw” ye, olu ka koo bena bari ka yɛlɛma! Sutana n’a kɔmɔgɔw (olu minw sumana ni “baaw” ye) bena a miiri ko “jamaba” mɔgɔw (olu minw sumana ni sagaw ye) latanganin tɛ tugun. O kama, u bena a miiri fana k’u bena se k’u dɔn k’u ɲɔɲɔ. Nka jamaba mɔgɔw bena kisi u juguw ma ani ka ‘bɔ tɔɔrɔba’ la (Yir. 7:9, 14). Ni Yezu ye see sɔrɔ Ala ka Masaya juguw bɛɛ kan ka ban tuma min na, a bena Sutana n’a ka jinaw fili dingɛ dunba kɔnɔ saan waa kelen kɔnɔ. O yɔrɔ la, u bena kɛ i n’a  fɔ mɔgɔ saninw, u tɛna se ka foyi kɛ.—Yirali 6:2; 20:1-3 kalan.

19, 20. An be kalan min sɔrɔ Ezayi 26:20 ani 30:21 na, an be se k’o sira taga cogo di?

¹⁹ Kobaba minw bena na kɛ yanni dɔɔni, an be se k’an yɛrɛ labɛn u kama cogo di? A saan damanin ye nin ye, a tun fɔra Kɔrɔsili Sangaso dɔ kɔnɔ ko: “Kisili be bɔ kanminɛli lo la.” Mun na do? O jaabili be sɔrɔ Jehova ka lasɔmini kumaw na Yahutuw ye, olu minw tun be jɔnya la Babilɔni. Jehova tun y’a fɔ ko Babilɔni dugu tun bena minɛ. Nka, a sagokɛlaw tun ka ɲi ka mun lo kɛ walisa k’u yɛrɛ labɛn o koo kama? Jehova ko: “Ne ka jama, aw ka don aw ka soow kɔnɔ, ka daaw tugu. Aw ka dogo waati kunkurunnin kɔnɔ, fɔɔ Masaba ka dimiwaati ka tɛmɛ.” (Ezayi 26:20). Aw y’a kɔrɔsi kumaden minw fɔra ye wa? A fɔra ko: “Aw ka don,” “ka daaw tugu,” “aw ka dogo.” O ye cikanw lo ye ani waajibi tun lo u k’o labato. Yahutu minw ye o cikanw labato u kɛtɔ ka to u ka soow kɔnɔ, sɔrɔdasi minw tun be yalayalara dugu kɔnɔ, u tɛna u sɔrɔ k’u minɛ. N’u tun b’a fɛ ka kisi, waajibi lo u tun ka Jehova ka cikanw labato. b

²⁰ An be kalan juman lo sɔrɔ o la? I ko Jehova sagokɛlaw galen, n’an fana b’a fɛ ka kisi, fɔɔ an ka Jehova ka cikanw labato (Ezayi 30:21). Jehova be tɛmɛ kafow fɛ k’o cikanw di an ma. O kama, an be cikan minw sɔrɔ, an ka ɲi k’u sira tagama n’an dusu bɛɛ ye (1 Zan 5:3). N’an b’o kɛ kabini sisan yɛrɛ, a bena nɔgɔya an ma k’o kɛ sini ma. O cogo la, an Faa Jehova ani an ka Masacɛ Yezu bena an latanga (Sof. 2:3). O la, tuma min na Ala ka Masaya bena a juguw halaki pewu, an ɲɛɛ bena la o kan. O bena kɛ koo ye an tɛna ɲinɛ min kɔ abada!