1, 2. (a) Ano ang pamatuod nga ang aton Hari nagagahom na halin sang 1914? (b) Ano ang binagbinagon naton sa sini nga kapitulo?

 NAPALIG-ON gid ang aton pagtuo sang ginrepaso naton ang nahimo sang Ginharian sang Dios sa tunga sang mga kaaway sini. (Sal. 110:2) Ang aton Hari nakatipon sing mga manugbantala nga nagaalagad sing kinabubut-on. Gintinluan kag ginpuro niya sa espirituwal kag moral ang iya mga sumulunod. Kag bisan ano nga pagtinguha sang mga kaaway nga bahinbahinon kita, naagom naton ang bug-os kalibutan nga paghiusa subong. Pila lang ini sa madamo nga nahimo sang Ginharian nga ginbinagbinag naton nga nagapamatuod nga halin sang 1914, ang aton Hari nagagahom na sa tunga sang mga kaaway sang Ginharian.

² Madamo pa sing himuon nga makatilingala nga butang ang Ginharian sa malapit nga palaabuton. ‘Magakari’ ini para ‘dugmukon kag laglagon’ ang mga kaaway. (Mat. 6:10; Dan. 2:44) Apang antes sina, may iban pa nga importante nga butang nga mahanabo. Ano ini? Sabton ini sang madamo nga tagna sa Biblia. Binagbinagon naton ang pila sa sini para makita kon ano pa ang mahanabo.

3. Ano ang una nga hitabo nga ginahulat naton?

³ Pagproklamar sang paghidait. Sang nagsulat sia sa mga taga-Tesalonica, ginlaragway ni apostol Pablo ang una nga hitabo nga ginahulat naton. (Basaha ang 1 Tesalonica 5:2, 3.) Ginsambit ni Pablo sa sini nga sulat ang “adlaw ni Jehova,” nga magasugod sa pagsalakay sa “Babilonia nga Daku.” (Bug. 17:5) Pero antes magsugod ang adlaw ni Jehova, ang mga pungsod magasiling, “Paghidait kag kalig-unan!” Mahimo nagapatuhoy ini sa isa ka pahibalo ukon serye sang talalupangdon nga mga deklarasyon. Nadalahig bala sa sini ang mga lider sang relihion? Bangod bahin sila sang kalibutan, mahimo nga magabuylog sila sa mga pungsod sa pagsiling, “May paghidait!” (Jer. 6:14; 23:16, 17; Bug. 17:1, 2) Ining proklamasyon sang paghidait kag kalig-unan mangin senyales nga magaumpisa na ang adlaw ni Jehova. Ang mga kaaway sang Ginharian sang Dios “indi gid . . . makapalagyo.”

4. Ano ang aton mabenepisyo bangod nahangpan naton ang kahulugan sang tagna ni Pablo parte sa proklamasyon sang paghidait kag kalig-unan?

 ⁴ Ano ang aton mabenepisyo bangod nahangpan naton ang kahulugan sini nga tagna? Si Pablo nagsiling: “Wala kamo sa kadudulman, gani indi kamo kaangay sang mga kawatan nga maabtan sina nga adlaw.” (1 Tes. 5:3, 4) Indi pareho sa kalabanan nga tawo, nahangpan naton kon diin nagapadulong ang mga nagakatabo subong. Paano gid bala matuman ining tagna tuhoy sa paghidait kag kalig-unan? Dapat naton hulaton kag tan-awon kon paano magabag-o ang mga hitabo sa kalibutan. Gani, “magpabilin kita nga nagamata kag huptan ang aton ikasarang sa paghunahuna sing maayo.”—1 Tes. 5:6; Sof. 3:8.

5. Ano ang panugod sang “dakung kapipit-an”?

⁵ Pagsalakay sa relihion. Dumduma ang ginsulat ni Pablo: “Sa tion nga magsiling sila, ‘Paghidait kag kalig-unan!’ dayon magaabot gilayon ang hinali nga kalaglagan sa ila.” Pareho sang kilat nga ginasundan gilayon sang daguob, ang tion sang pagsiling sing “Paghidait kag kalig-unan!” sundan man sa gilayon sang “hinali nga kalaglagan.” Ano ang laglagon? Una, ang “Babilonia nga Daku,” ang bug-os kalibutan nga emperyo sang butig nga relihion, nga nakilal-an man subong ang “makihilawason nga babayi.” (Bug. 17:5, 6, 15) Ang paglaglag sa Cristiandad kag sa iban pa butig nga relihion amo ang panugod sang “dakung kapipit-an.” (Mat. 24:21; 2 Tes. 2:8) Madamo gid ang makibot sa sini. Ngaa? Bangod asta sa sina nga tion, ginahunahuna sang makihilawason nga babayi nga isa sia ka “rayna” nga “indi gid . . . maglalaw.” Pero gulpi lang niya marealisar nga nagsala sia. Dulaon sia sing hinali, nga daw pareho “sa isa [lang] ka adlaw.”—Bug. 18:7, 8.

6. Sin-o ukon ano ang magasalakay sa “Babilonia nga Daku”?

⁶ Sin-o ukon ano ang magasalakay sa “Babilonia nga Daku”? Isa ka “mabangis nga sapat” nga may “napulo ka sungay.” Suno sa tulun-an sang Bugna, ining mabangis nga sapat nagapatuhoy sa United Nations (UN). Ang napulo ka sungay nagarepresentar sa pulitikal nga mga kagamhanan nga nagasuporta sa “mabangis nga sapat nga eskarlata ang kolor.” (Bug. 17:3, 5, 11, 12) Daw ano kabaskog ini nga pagsalakay? Ang mga pungsod sang UN magakuha sang tanan nga manggad sang makihilawason nga babayi, magakaon sa iya, kag “magasunog sa iya sing bug-os.”—Basaha ang Bugna 17:16. a

7. Paano natuman ang ginsiling ni Jesus sa Mateo 24:21, 22 sang unang siglo C.E., kag paano ini matuman sa palaabuton?

⁷ Palip-uton ang mga adlaw. Ginapahayag sang aton Hari ang mahanabo sa sini nga bahin sang dakung kapipit-an. Si Jesus nagsiling: “Tungod sa mga pinili yadto nga mga adlaw palip-uton.” (Basaha ang Mateo 24:21, 22.) Ang ginsiling ni Jesus natuman sa diutay nga kasangkaron sang 66 C.E. sang ‘ginpalip-ot’ ni Jehova ang pagsalakay sang hangaway sang Roma sa Jerusalem. (Mar. 13:20) Gintugutan sini ang mga Cristiano sa Jerusalem kag Judea nga maluwas. Ano, nian, ang mahanabo sa bilog nga kalibutan sa nagapakari nga dakung kapipit-an? Paagi sa  aton Hari, “palip-uton” ni Jehova ang pagsalakay sang UN sa relihion agod ang matuod nga relihion indi malaglag upod sa mga butig. Gani, bisan pa laglagon ang tanan nga butig nga relihion, may isa ka matuod nga relihion nga maluwas. (Sal. 96:5) Binagbinagon naton karon ang mahanabo pagkatapos sini nga hugna sang dakung kapipit-an.

8, 9. Ano nga mga hitabo ang mahimo ginpatuhuyan ni Jesus, kag ano ang mangin reaksion sang mga tawo sa ila makita?

⁸ Ginapakita sang tagna ni Jesus parte sa katapusan nga mga adlaw nga may pila ka importante nga hitabo nga magadul-ong sa Armageddon. Ang una nga duha ka hitabo nga binagbinagon naton pareho nga ginsambit sa mga Ebanghelyo nanday Mateo, Marcos, kag Lucas.—Basaha ang Mateo 24:29-31; Mar. 13:23-27; Luc. 21:25-28.

⁹ Mga tanda sa kalangitan. Si Jesus nagtagna: “Ang adlaw magadulom, kag ang bulan indi na magsanag, kag ang mga bituon magakalahulog halin sa langit.” Sigurado nga ang relihioso nga mga lider indi na pagpangayuan sing kapawa. Ginapatuhuyan bala ni Jesus ang makatilingala nga mga talan-awon sa kalangitan? Siguro. (Isa. 13:9-11; Joel 2:1, 30, 31) Ano ang mangin reaksion sang mga tawo sa ila makita? “Malisang” sila bangod “indi [nila] mahibaluan ang himuon.” (Luc. 21:25; Sof. 1:17) Huo, ang mga kaaway sang Ginharian sang Dios—halin sa ‘hari asta sa ulipon’—“magakapunaw sa kahadlok kag sa pagpaabot sa mga butang nga mahanabo” kag magapangita sing panaguan. Pero wala sila sing malig-on nga lugar nga mapanaguan para malikawan ang kaakig sang aton Hari.—Luc. 21:26; 23:30; Bug. 6:15-17.

10. Ano nga paghukom ang ipahayag ni Jesus, kag ano ang mangin reaksion sang nagasakdag kag nagapamatok sa Ginharian sang Dios?

¹⁰ Pagpahayag sang paghukom. Dayon ang tanan nga kaaway sang Ginharian sang Dios mapilitan sa pagtan-aw sa hitabo nga magapadugang pa gid sa ila kasakit. Si Jesus nagsiling: “Makita nila ang Anak sang tawo nga nagakari sa mga panganod nga may daku nga gahom kag himaya.” (Mar. 13:26) Ining indi kinaandan nga pagpakita sang gahom mangin senyales nga nagkari na si Jesus para magpahayag sang paghukom. Sa isa pa ka pareho nga tagna, naghatag si Jesus sing dugang pa nga detalye parte sa paghukom nga ipahayag sa sini nga tion. Makita naton ini sa parabola sang mga karnero kag mga kanding. (Basaha ang Mateo 25:31-33, 46.) Ang mainunungon nga mga nagasakdag sa Ginharian sang Dios hukman nga “mga karnero” kag ‘magahangad sang ila ulo,’ bangod marealisar nila nga “malapit na ang pagtubos” sa ila. (Luc. 21:28) Pero ang mga nagapamatok sa Ginharian hukman nga “mga kanding” kag “magapukpok sang ila dughan sa kalisod,” bangod marealisar nila nga “kamatayon nga wala sing katapusan” ang ila madangatan.—Mat. 24:30; Bug. 1:7.

11. Ano ang dapat naton dumdumon samtang ginabinagbinag naton ang nagapakari nga mga hitabo?

 ¹¹ Pagkatapos mapahayag ni Jesus ang iya paghukom sa “tanan nga pungsod,” may pila pa ka importante nga hitabo antes magsugod ang inaway sang Armageddon. (Mat. 25:32) Binagbinagon naton ang duha sa sini: ang pagsalakay ni Gog kag ang pagtipon sa mga hinaplas. Samtang ginabinagbinag naton ini, kinahanglan dumdumon naton nga wala ginpakita sang Pulong sang Dios ang eksakto nga tayming sining duha ka hitabo. Ang matuod, mahimo nga mag-abtanay ini.

12. Ilaragway ang ubos-ubos nga pagsalakay ni Satanas batok sa Ginharian.

¹² Ubos-ubos nga pagsalakay. Si Gog sang Magog magasalakay sa nagkalabilin nga mga hinaplas kag sa ila kaupod nga iban nga mga karnero. (Basaha ang Ezequiel 38:2, 11.) Ini nga pagsalakay sa sining nagagahom nga Ginharian amo ang katapusan nga pagpakig-away ni Satanas batok sa nagkalabilin nga mga hinaplas halin sang gintabog sia sa langit. (Bug. 12:7-9, 17) Sugod pa sang gintipon ang mga hinaplas pasulod sa napasag-uli nga Cristianong kongregasyon, gintinguhaan gid ni Satanas nga gub-on ang ila kabuganaan sa espirituwal—pero napaslawan sia. (Mat. 13:30) Apang, sa tion nga wala na sing butig nga mga relihion kag ang katawhan sang Dios daw nagakabuhi “nga wala sing pader, trangka, ukon gawang,” makakita si Satanas sing daku nga kahigayunan. Sugyuton niya ang iya malaut nga mga ahente para sa ubos-ubos nga pagsalakay sa mga nagasakdag sa Ginharian.

13. Paano magapatunga si Jehova para sa iya katawhan?

¹³ Ginlaragway ni Ezequiel ang mahanabo. Ang tagna nagsiling parte kay Gog: “Magaabot ka halin sa imo lugar, halin sa pinakamalayo nga mga bahin sang aminhan, ikaw kag ang madamo nga katawhan nga kaupod mo. Tanan sila nagasakay sa kabayo. Isa ka daku nga katilingban, madamo gid nga soldado. Kaangay sang gal-um nga magatabon sa duta, magasalakay ka sa akon katawhan.” (Ezeq. 38:15, 16) Ano ang himuon ni Jehova sa sining daw indi mapunggan nga pagsalakay? “Magadabdab ang akon kaakig,” siling ni Jehova. “Magatawag ako sing espada.” (Ezeq. 38:18, 21; basaha ang Zacarias 2:8.) Magapasilabot si Jehova para sa iya mga alagad sa duta. Ini nga pagpasilabot amo ang inaway sang Armageddon.

14, 15. Ano ang iban pa nga mahanabo pagligad sang pila ka tion pagkatapos magsugod ang ubos-ubos nga pagsalakay ni Satanas?

¹⁴ Antes naton binagbinagon kon paano depensahan ni Jehova ang iya katawhan sa inaway sang Armageddon, balikan anay naton kag usisaon ang isa pa ka importante nga hitabo. Mahanabo ini sa ulot sang pagsugod sang ubos-ubos nga pagsalakay ni Satanas kag sa pagsugod sang pagpasilabot ni Jehova sa Armageddon. Subong sang ginpatalupangod sa parapo 11, ining ikaduha nga hitabo amo ang pagtipon sa nagkalabilin nga mga hinaplas nga ari pa sa duta.

¹⁵ Pagtipon sa mga hinaplas. Sanday Mateo kag Marcos pareho nga nagrekord sang ginsiling ni Jesus parte sa “mga pinili”—ang hinaplas sang espiritu nga mga Cristiano—subong bahin sang serye sang mga hitabo antes sang Armageddon. (Tan-awa  ang parapo 7.) Ginapatuhuyan ang iya kaugalingon subong Hari, si Jesus nagtagna: “Ipadala niya ang mga anghel kag tipunon ang iya mga pinili halin sa apat ka direksion, halin sa isa ka punta sang duta tubtob sa isa ka punta sang langit.” (Mar. 13:27; Mat. 24:31) Ano nga pagtipon ang ginapatuhuyan diri ni Jesus? Indi ini ang katapusan nga pagmarka sang hinaplas nga mga Cristiano, nga mahanabo antes magsugod ang dakung kapipit-an. (Bug. 7:1-3) Kundi, ang ginapatuhuyan ni Jesus amo ang hitabo sa tion sang nagapakari nga dakung kapipit-an. Gani, mahimo nga pagligad sang pila ka tion pagkatapos magsugod ang ubos-ubos nga pagsalakay ni Satanas sa katawhan sang Dios, pagatipunon sa langit ang mga hinaplas nga ari pa sa duta.

16. Ano ang papel sang ginbanhaw nga mga hinaplas sa inaway sang Armageddon?

¹⁶ Ano ang kaangtanan sining pagtipon sa nagkalabilin nga hinaplas sa masunod nga mahanabo, ang Armageddon? Ginapakita sang tayming sang pagtipon nga ang tanan nga hinaplas ara na sa langit antes magsugod ang inaway sang Dios nga Armageddon. Sa langit, ang 144,000 nga kaupod nga manuggahom sang Cristo magabaton sing awtoridad nga mag-upod kay Jesus sa paggamit sang “bilugon nga salsalon” nga magalaglag sa tanan nga kaaway sang Ginharian sang Dios. (Bug. 2:26, 27) Dayon, upod sa gamhanan nga mga anghel, ang ginbanhaw nga mga hinaplas magasunod sa Cristo, subong ang Hangaway nga Hari, sa pagkomprontar sa “madamo gid nga soldado” sang mga kaaway nga nagahana na sa pagsalakay sa katawhan ni Jehova. (Ezeq. 38:15) Kon matabo na inang masingki nga komprontasyon, amo na ina ang inaway sang Armageddon!—Bug. 16:16.

17. Ano ang matabo sa “mga kanding” sa Armageddon?

¹⁷ Pagpadapat sang paghukom. Ang inaway sang Armageddon amo ang katapusan nga bahin sang dakung kapipit-an. Sa sini nga tion, may dugang nga papel si Jesus. Luwas nga Hukom sang “tanan nga pungsod,” mangin Manuglaglag man sia sang mga pungsod—ang mga tawo nga ginhukman niya subong “mga kanding.” (Mat. 25:32, 33) “Isa ka matalom kag malaba nga espada” ang gamiton sang aton Hari sa “paglabo sa mga pungsod.” Huo, ang tanan nga kaangay-kanding—halin sa “mga hari” asta sa “mga ulipon”—‘magaagom sang kamatayon nga wala sing katapusan.’—Bug. 19:15, 18; Mat. 25:46.

18. (a) Paano nagbaliskad ang paya para sa “mga karnero”? (b) Paano kompletuhon ni Jesus ang iya kadalag-an?

¹⁸ Nagbaliskad gid ang paya sa mga ginhukman ni Jesus subong “mga karnero”! Sa baylo nga dugmukon sang madamo nga hangaway sang “mga kanding” ni Satanas, isa ka “daku nga kadam-an” sang daw wala sing pangapin nga “mga karnero” ang maluwas sa pagsalakay sang kaaway kag ‘magagua halin sa dakung kapipit-an.’ (Bug. 7:9, 14) Dayon, pagkatapos ni Jesus malutos kag madula ang tanan nga tawo nga kaaway sang Ginharian  sang Dios, itagbong niya si Satanas kag ang iya mga demonyo sa kadadalman. Didto, kaangay sa patay, mangin indi aktibo sila sa sulod sang isa ka libo ka tuig.—Basaha ang Bugna 6:2; 20:1-3.

19, 20. Paano naton maaplikar ang leksion sa Isaias 26:20 kag 30:21?

¹⁹ Paano naton ihanda ang aton kaugalingon sa sining makakilibang nga mga hitabo sa palaabuton? Ang Lalantawan nagsiling sang nagligad nga mga tinuig: “Ang kaluwasan nagasandig sa pagkamatinumanon.” Ngaa? Ang sabat makita sa paandam ni Jehova sa bihag nga mga Judiyo sa dumaan nga Babilonia. Gintagna ni Jehova nga ang Babilonia lutuson, pero ano ang himuon sang katawhan sang Dios para makahanda sa sina nga hitabo? Si Jehova nagsiling: “Maglakat kamo, katawhan ko, magsulod kamo sa inyo mga hulot, kag isira ninyo ang puertahan. Magpanago kamo sing makadali tubtob magligad ang kaakig.” (Isa. 26:20) Talupangda ang mga tinaga: “maglakat,” “magsulod,” “isira,” “magpanago”—ini tanan mga sugo. Ang mga Judiyo nga nagtuman sa sini mahimo nga nagpabilin sa ila mga balay, kag nakalikaw sa nagasalakay nga mga soldado sa dalan. Gani, ang ila kaluwasan nagdepende sa ila pagtuman sa mga instruksion ni Jehova. b

²⁰ Ano ang leksion para sa aton? Pareho sa mga alagad sang Dios sadto, ang aton kaluwasan nagadepende sa aton pagtuman sa mga instruksion ni Jehova. (Isa. 30:21) Ini nga mga instruksion nagaabot sa aton paagi sa kongregasyon. Gani, kabay nga palambuon naton ang tinagipusuon nga pagtuman sa mga panuytoy nga aton ginabaton. (1 Juan 5:3) Kon himuon naton ini subong, mas mahapos sa aton nga magtuman sing kinabubut-on sa palaabuton kag sa amo maamligan sang aton Amay nga si Jehova kag sang aton Hari nga si Jesus. (Sof. 2:3) Kon amligan kita sang Dios, makita naton mismo kon paano dulaon sing bug-os sang Ginharian sang Dios ang mga kaaway sini. Sigurado nga indi gid naton malipatan ina nga hitabo!