ບົດທີ 21
ລາຊະອານາຈັກຂອງພະເຈົ້າກຳຈັດສັດຕູ
1, 2. (ກ) ມີຫຼັກຖານຫຍັງແດ່ທີ່ສະແດງວ່າກະສັດຂອງເຮົາປົກຄອງຕັ້ງແຕ່ປີ 1914? (ຂ) ເຮົາຈະຮຽນຫຍັງໃນບົດນີ້?
ການທົບທວນເລື່ອງຕ່າງໆທີ່ລາຊະອານາຈັກຂອງພະເຈົ້າໄດ້ເຮັດມາຕະຫຼອດເຖິງແມ່ນມີສັດຕູຂັດຂວາງ ເປັນສິ່ງທີ່ຊ່ວຍເສີມສ້າງຄວາມເຊື່ອຂອງເຮົາໃຫ້ເຂັ້ມແຂງຂຶ້ນ. (ເພງ. 110:2) ກະສັດຂອງເຮົາໄດ້ລວບລວມຄົນທີ່ເຕັມໃຈປະກາດເຂົ້າມາຢ່າງຫຼວງຫຼາຍ. ພະອົງຊຳຮະລ້າງເຂົາເຈົ້າໃຫ້ສະອາດທັງດ້ານການນະມັດສະການແລະດ້ານສິນລະທຳ. ພວກເຮົາໃນທຸກມື້ນີ້ສາມັກຄີກັນເປັນໜຶ່ງດຽວທົ່ວໂລກເຖິງແມ່ນວ່າສັດຕູຈະພະຍາຍາມເຮັດໃຫ້ພວກເຮົາແຕກແຍກກັນ ສິ່ງເຫຼົ່ານີ້ລວມທັງຜົນງານຕ່າງໆຂອງລາຊະອານາຈັກທີ່ເຮົາໄດ້ຮຽນໃນບົດຕົ້ນໆ ເຮັດໃຫ້ເຮົາມີຫຼັກຖານຢ່າງຫຼວງຫຼາຍທີ່ເຊື່ອວ່າລາຊະອານາຈັກປົກຄອງທ່າມກາງສັດຕູມາຕັ້ງແຕ່ປີ ຄ.ສ 1914 ແລ້ວ.
2 ລາຊະອານາຈັກຈະເຮັດສິ່ງທີ່ໜ້າງຶດງໍ້ຍິ່ງກວ່ານັ້ນອີກໃນອະນາຄົດອັນໃກ້ນີ້ຄື: ຈະ “ມາ” ທຳລາຍສັດຕູໃຫ້ “ຫັກແຕກຈິບຫາຍ.” (ມັດ. 6:10; ດາ. 2:44) ແຕ່ຍັງມີເຫດການສຳຄັນອີກຫຼາຍຢ່າງທີ່ຈະຕ້ອງເກີດຂຶ້ນກ່ອນ. ເຫດການຫຍັງ? ຄຳຕອບມີຢູ່ໃນຄຳພະຍາກອນຫຼາຍຂໍ້ໃນຄຳພີໄບເບິນ. ໃຫ້ເຮົາມາພິຈາລະນາຄຳພະຍາກອນບາງຂໍ້ເພື່ອເບິ່ງວ່າຈະມີອັນໃດເກີດຂຶ້ນແດ່ໃນວັນຂ້າງໜ້າ.
ກ່ອນທີ່ ‘ການທຳລາຍຈະມາເຖິງເຂົາໃນທັນທີ’
3. ເຫດການທຳອິດທີ່ເຮົາກຳລັງຄອຍຖ້າຢູ່ແມ່ນຫຍັງ?
3 ການປະກາດສັນຕິສຸກ. ໃນຈົດໝາຍທີ່ອັກຄະສາວົກໂປໂລຂຽນເຖິງພີ່ນ້ອງໃນເມືອງເທຊະໂລນີກ ລາວໄດ້ເວົ້າເຖິງເຫດການທຳອິດທີ່ເຮົາກຳລັງລໍຖ້າຢູ່. (ອ່ານ 1 ເທຊະໂລນີກ 5:2, 3) ໃນຈົດໝາຍນັ້ນໂປໂລເວົ້າເຖິງ “ວັນຂອງພະອົງເຈົ້າ [ພະເຢໂຫວາ]” ຈະເລີ່ມໂດຍການໂຈມຕີ “ບາບີໂລນໃຫຍ່.” (ຄຳປ. 17:5) ແຕ່ວັນຂອງພະເຢໂຫວາຈະເລີ່ມຂຶ້ນທັນທີຫຼັງຈາກທີ່ຊາດຕ່າງໆປະກາດວ່າ: “ຄວາມສຸກສຳລານແລະຄວາມຢູ່ສຳບາຍ [“ສະຫງົບສຸກແລະປອດໄພແລ້ວ,” ລ.ມ.] ນີ້ອາດເປັນຄຳປະກາດຫຼືຄຳຖະແຫຼງການທີ່ອອກມາຢ່າງຕໍ່ເນື່ອງ. ພວກຜູ້ນຳສາສະໜາຈະມີສ່ວນຮູ້ເຫັນນຳບໍ? ເນື່ອງຈາກເຂົາເຈົ້າເປັນສ່ວນຂອງໂລກ ເຂົາເຈົ້າກໍອາດຈະຮ່ວມກັບຊາດຕ່າງໆທີ່ພາກັນກ່າວວ່າມີ “ສັນຕິສຸກ, ລ.ມ.” ແລ້ວ! (ຢເຣ. 6:14; 23:16, 17; ຄຳປ. 17:1, 2) ຄຳປະກາດເລື່ອງສັນຕິສຸກແລະຄວາມປອດໄພນີ້ຈະເປັນ ສັນຍານບົ່ງບອກວ່າວັນຂອງພະເຢໂຫວາກຳລັງຈະເລີ່ມຂຶ້ນ. ສັດຕູຂອງລາຊະອານາຈັກ ‘ຈະປົບໜີໄປບໍ່ພົ້ນ.’
4. ເຮົາໄດ້ປະໂຫຍດແນວໃດຈາກການເຂົ້າໃຈຄຳພະຍາກອນທີ່ສຳຄັນຂອງໂປໂລກ່ຽວກັບຄຳປະກາດເລື່ອງສັນຕິສຸກແລະຄວາມປອດໄພ?
4 ການເຂົ້າໃຈຄຳພະຍາກອນທີ່ສຳຄັນຂໍ້ນີ້ມີປະໂຫຍດຕໍ່ເຮົາແນວໃດ? ໂປໂລບອກວ່າ: “ທ່ານທັງຫຼາຍບໍ່ຢູ່ໃນທີ່ມືດໃຫ້ວັນນັ້ນຈະມາຮຸມໃສ່ທ່ານທັງຫຼາຍເໝືອນດັ່ງຄົນຂະໂມຍ.” (1 ເທ. 5:3, 4) ບໍ່ຄືກັບຄົນສ່ວນຫຼາຍໃນທຸກມື້ນີ້ ເຮົາຮູ້ວ່າເຫດການທີ່ກຳລັງເກີດຂຶ້ນນັ້ນຈະມຸ່ງໜ້າໄປທາງໃດ ແລ້ວຄຳພະຍາກອນເລື່ອງສັນຕິສຸກແລະຄວາມປອດໄພຈະເກີດຂຶ້ນແທ້ແນວໃດ? ເຮົາຕ້ອງຖ້າເບິ່ງວ່າເຫດການຕ່າງໆໃນໂລກຈະເປັນແນວໃດ ດັ່ງນັ້ນ ຂໍໃຫ້ເຮົາ “ຕື່ນຕົວແລະມີສະຕິສະເໝີ, ລ.ມ.”—1 ເທ. 5:6; ຊໂຟ. 3:8
ຄວາມທຸກຍາກລຳບາກຄັ້ງໃຫຍ່ເລີ່ມຂຶ້ນ
5. “ຄວາມທຸກຍາກລຳບາກຄັ້ງໃຫຍ່” ຈະເປີດສາກແນວໃດ?
5 ການໂຈມຕີສາສະໜາ. ຂໍໃຫ້ນຶກເຖິງຂໍ້ຄວາມທີ່ໂປໂລຂຽນວ່າ: “ໃນເວລາໃດເຂົາເວົ້າວ່າ ‘ຄວາມສຸກສຳລານແລະຄວາມຢູ່ສຳບາຍ [“ສະຫງົບສຸກແລະປອດໄພແລ້ວ,” ລ.ມ.]’ ໃນເວລານັ້ນຄວາມຈິບຫາຍຈະມາເຖິງເຂົາໂດຍເຮວ [“ທັນທີ,” ລ.ມ.]” ຄືກັບສຽງຟ້າຜ່າດັງປ່ຽງທີ່ຕາມມາຫຼັງຈາກທີ່ຟ້າແມບ “ຄວາມຈິບຫາຍ” ຈະເກີດຂຶ້ນ “ທັນທີ” ຫຼັງຈາກທີ່ມີການປະກາດວ່າ: “ສະຫງົບສຸກແລະປອດໄພແລ້ວ.” ແລ້ວອັນໃດທີ່ຈະຖືກທຳລາຍ? ສິ່ງທຳອິດຄື “ບາບີໂລນໃຫຍ່” ສາສະໜາປອມທັງໝົດໃນໂລກນີ້ຫຼືເອີ້ນວ່າ “ຍິງແມ່ຈ້າງ.” (ຄຳປ. 17:5, 6, 15) ການທຳລາຍຄລິດສາສະໜາຈັກແລະອົງການສາສະໜາປອມທັງໝົດນີ້ເປັນການເປີດສາກຂອງ “ຄວາມທຸກຍາກລຳບາກຄັ້ງໃຫຍ່, ລ.ມ.” (ມັດ. 24:21; 2 ເທ. 2:8) ສຳລັບຫຼາຍຄົນແລ້ວ ນີ້ຄົງເຮັດໃຫ້ເຂົາເຈົ້າແປກໃຈຫຼາຍ. ຍ້ອນຫຍັງ? ຍ້ອນວ່າເມື່ອຮອດຕອນນັ້ນ “ຍິງແມ່ຈ້າງ” ກໍຍັງຈະຄິດວ່າຕົວເອງເປັນ “ລາຊີນີ” ທີ່ຈະ “ບໍ່ຮູ້ໂສກເສົ້າຈັກເທື່ອ!” ແຕ່ແລ້ວຢູ່ໆລາວກໍຮູ້ໂຕວ່າກຳລັງຄິດຜິດທີ່ໝັ້ນໃຈໃນຕົວເອງມາຕະຫຼອດ ລາວຈະຖືກກຳຈັດ “ໃນມື້ດຽວ” ເຊິ່ງໄວຫຼາຍຈົນບໍ່ທັນຕັ້ງຕົວ.—ຄຳປ. 18:7, 8, ທ.ປ.
6. ອັນໃດທີ່ຈະມາທຳລາຍ “ບາບີໂລນໃຫຍ່”?
6 ອັນໃດທີ່ຈະມາທຳລາຍ “ບາບີໂລນໃຫຍ່”? ຄື “ສັດຮ້າຍ” ທີ່ມີ ‘ສິບເຂົາ.’ ພະທຳຄຳປາກົດລະບຸວ່າສັດຮ້າຍນີ້ໝາຍເຖິງອົງການສະຫະປະຊາຊາດ (UN) ແລະເຂົາສິບເຂົາໝາຍເຖິງອຳນາດທາງການເມືອງທີ່ສະໜັບສະໜູນ ‘ສັດຮ້າຍສີແດງຈັດ’ ນີ້. (ຄຳປ. 17:3, 5, 11, 12) ແລ້ວການໂຈມຕີຈະຮຸນແຮງຂະໜາດໃດ? ຍິງແມ່ຈ້າງນີ້ຈະຖືກຊາດຕ່າງໆທີ່ເປັນສະມາຊິກຂອງຢູເອັນປຸ້ນຊັບສິນ ກິນເນື້ອ ແລະ “ເອົາໄຟເຜົາເສຍ.”—ອ່ານຄຳປາກົດ 17:16. a
7. ຄຳເວົ້າຂອງພະເຍຊູໃນມັດທາຍ 24:21, 22 ເຄີຍເກີດຂຶ້ນໃນສະໄໝສະຕະວັດທຳອິດແນວໃດ? ແລະຈະເກີດຂຶ້ນລະດັບໂລກໃນອະນາຄົດແນວໃດ?
7 ການຫຍໍ້ເວລາໃຫ້ສັ້ນເຂົ້າ. ກະສັດເຍຊູເປີດເຜີຍວ່າຈະມີຫຍັງເກີດຂຶ້ນເມື່ອເຖິງຈຸດນີ້ໃນໄລຍະຄວາມທຸກລຳບາກຄັ້ງໃຫຍ່. ເພິ່ນບອກວ່າ: “ເພາະເຫັນແກ່ຄົນທັງຫຼາຍທີ່ເລືອກໄວ້ນັ້ນ ວັນທັງຫຼາຍນັ້ນຈະໄດ້ເປັນທີ່ຕັດໃຫ້ສັ້ນເຂົ້າ.” (ອ່ານມັດທາຍ 24:21, 22) ຄຳເວົ້າຂອງພະເຍຊູເຄີຍເກີດຂຶ້ນໃນຂອບເຂດທີ່ນ້ອຍໆ ເມື່ອປີ ຄ.ສ. 66 ຕອນທີ່ພະເຢໂຫວາຫຍໍ້ເວລາຫຼືເຮັດໃຫ້ໄລຍະເວລາທີ່ກອງທັບໂລມໂຈມຕີເມືອງເຢຣຶຊາເລມ “ສັ້ນເຂົ້າ.” (ມໂກ. 13:20) ຄລິດສະຕຽນໃນເມືອງ ເຢຣຶຊາເລມແລະໃນແຂວງຢູເດຈຶ່ງມີໂອກາດໜີລອດໄດ້. ແລ້ວຈະເກີດເຫດການຫຍັງໃນລະດັບໂລກລະຫວ່າງຄວາມທຸກຍາກລຳບາກຄັ້ງໃຫຍ່ທີ່ກຳລັງໃກ້ເຂົ້າມາ? ພະເຢໂຫວາຈະໃຊ້ກະສັດເຍຊູຫຍໍ້ເວລາໃຫ້ “ສັ້ນເຂົ້າ” ເພື່ອເຮັດໃຫ້ສະຫະປະຊາຊາດໂຈມຕີສາສະໜາຕ່າງໆໄດ້ພຽງເວລາສັ້ນໆ ສາສະໜາແທ້ຈະບໍ່ຖືກທຳລາຍໄປພ້ອມກັບສາສະໜາປອມ. ໃນຂະນະທີ່ສາສະໜາປອມທັງໝົດຖືກກວາດລ້າງ ຈະມີພຽງສາສະໜາແທ້ເທົ່ານັ້ນທີ່ລອດ. (ເພງ. 96:5) ໃຫ້ເຮົາມາເບິ່ງວ່າຫຼັງຈາກເຫດການນີ້ຈະມີຫຍັງເກີດຂຶ້ນອີກໃນໄລຍະຄວາມທຸກຍາກລຳບາກຄັ້ງໃຫຍ່.
ເຫດການຕ່າງໆທີ່ເກີດຂຶ້ນຕາມລຳດັບຈົນເຖິງສົງຄາມອະລະມະເຄໂດນ
8, 9. ພະເຍຊູອາດຈະເວົ້າເຖິງປາກົດການຫຍັງ ແລະຜູ້ຄົນຈະເປັນແນວໃດເມື່ອເຫັນສິ່ງທີ່ເກີດຂຶ້ນ?
8 ຄຳພະຍາກອນຂອງພະເຍຊູກ່ຽວກັບສະໄໝສຸດທ້າຍບົ່ງຊີ້ວ່າ ຈະມີເຫດການສຳຄັນຫຼາຍຢ່າງເກີດຂຶ້ນກ່ອນຈະເຖິງສົງຄາມອະລະມະເຄໂດນ. ເຫດການ 2 ຢ່າງທຳອິດທີ່ເຮົາຈະເບິ່ງນຳກັນມີບອກໄວ້ໃນພະທຳກິດຕິຄຸນຂອງມັດທາຍ ມາລະໂກ ແລະລືກາ.—ອ່ານມັດທາຍ 24:29-31; ມໂກ. 13:23-27; ລືກາ 21:25-28
9 ປາກົດການໃນທ້ອງຟ້າ. ພະເຍຊູບອກລ່ວງໜ້າວ່າ: “ດວງຕາເວັນຈະມືດໄປແລະດວງເດືອນຈະບໍ່ສ່ອງແຈ້ງ ແລະດວງດາວທັງຫຼາຍຈະຕົກລົງຈາກທ້ອງຟ້າ.” ຜູ້ຄົນກໍຈະເຊົາຫວັງເພິ່ງຜູ້ນຳສາສະໜາທີ່ເຂົາເຈົ້າເຄີຍຖືວ່າເປັນແສງສະຫວ່າງນຳທາງຊີວິດ. ພະເຍຊູກຳລັງເວົ້າເຖິງປາກົດການເໜືອທຳມະຊາດເທິງທ້ອງຟ້ານຳບໍ? ກໍອາດເປັນໄປໄດ້. (ເອຊາ. 13:9-11; ໂຢເອນ 2:1, 30, 31) ຜູ້ຄົນຈະເປັນແນວໃດເມື່ອເຫັນສິ່ງເຫຼົ່ານັ້ນ? ເຂົາເຈົ້າຈະມີ “ຄວາມທຸກເດືອດຮ້ອນ” ເພາະ “ບໍ່ຮູ້ທາງອອກ.” (ລືກາ 21:25, ລ.ມ.; ຊໂຟ. 1:17) ສັດຕູຂອງລາຊະອານາຈັກພະເຈົ້າ ‘ຕັ້ງແຕ່ກະສັດຈົນເຖິງທາດ’ ຈະ “ຢ້ານຈົນສະຫຼົບໄປເພາະເຫັນສິ່ງທີ່ກຳລັງເກີດຂຶ້ນເທິງໂລກ, ລ.ມ.” ແລະເຂົາເຈົ້າຈະແລ່ນຊອກຫາບ່ອນລີ້ ແຕ່ກໍບໍ່ມີບ່ອນໃດທີ່ຈະປົກປ້ອງຄຸ້ມຄອງເຂົາເຈົ້າໃຫ້ລອດພົ້ນຈາກກະສັດເຍຊູທີ່ຈະມາຄິດບັນຊີກັບເຂົາເຈົ້າໄດ້.—ລືກາ 21:26; 23:30; ຄຳປ. 6:15-17
10. ພະເຍຊູຈະປະກາດຄຳພິພາກສາເລື່ອງຫຍັງ ແລະຄົນທີ່ສະໜັບສະໜູນລາຊະອານາຈັກຂອງພະເຈົ້າກັບຄົນທີ່ຕໍ່ຕ້ານຈະມີທ່າທີຕ່າງກັນແນວໃດ?
10 ການປະກາດຄຳພິພາກສາ. ໃນຕອນນັ້ນສັດຕູທັງໝົດຂອງລາຊະອານາຈັກຈະຕ້ອງຈຳໃຈທົນເບິ່ງເຫດການທີ່ເຮັດໃຫ້ເຂົາເຈົ້າຢ້ານຫຼາຍ. ພະເຍຊູບອກວ່າ: “ເຂົາຈະເຫັນບຸດມະນຸດພວມມາເທິງເມກດ້ວຍລິດເດດອັນໃຫຍ່ແລະດ້ວຍລັດສະໝີ.” (ມໂກ. 13:26) ປາກົດການທີ່ວ່ານີ້ເປັນສັນຍານບອກວ່າພະເຍຊູຈະມາເພື່ອພິພາກສາເຂົາເຈົ້າ. ໃນອີກສ່ວນໜຶ່ງຂອງຄຳພະຍາກອນກ່ຽວກັບສະໄໝສຸດທ້າຍທີ່ເປັນເລື່ອງດຽວກັນນີ້ ພະເຍຊູໃຫ້ລາຍລະອຽດເພີ່ມເຕີມກ່ຽວກັບການປະກາດຄຳພິພາກສາຂອງເພິ່ນເຊິ່ງເຮົາສາມາດອ່ານໄດ້ຈາກຕົວຢ່າງປຽບທຽບເລື່ອງແກະກັບແບ້. (ອ່ານມັດທາຍ 25:31-33, 46) ຄົນທີ່ສະໜັບສະໜູນລາຊະອານາຈັກຂອງພະເຈົ້າຢ່າງສັດຊື່ຈະໄດ້ຮັບການຕັດສິນວ່າເປັນ “ແກະ” ແລະເຂົາເຈົ້າຈະ “ເງີຍຫົວຂຶ້ນ” ເພາະຮູ້ວ່າ “ຄວາມພົ້ນ” ຂອງເຂົາເຈົ້າກໍມາໃກ້ແລ້ວ. (ລືກາ 21:28) ສ່ວນຄົນທີ່ຕໍ່ຕ້ານລາຊະອານາຈັກເຊິ່ງຈະຖືກຕັດສິນວ່າເປັນ “ແບ້” ກໍຈະ “ຮ້ອງຄາງ” ເພາະເຂົາເຈົ້າຮູ້ວ່າກຳລັງຈະຖືກ ‘ໂທດທໍລະມານຕະຫຼອດໄປເປັນນິດ’ ເຊິ່ງໝາຍເຖິງຖືກທຳລາຍຕະຫຼອດໄປ.—ມັດ. 24:30; ຄຳປ. 1:7
11. ເມື່ອພິຈາລະນາເຫດການຕ່າງໆທີ່ກຳລັງຈະມາເຖິງ ເຮົາຕ້ອງຈື່ຫຍັງໄວ້ສະເໝີ?
11 ຫຼັງຈາກພະເຍຊູພິພາກສາ “ຄົນທຸກຊາດ, ລ.ມ.” ແລ້ວ ຈະມີເຫດການສຳຄັນອີກຫຼາຍຢ່າງຕາມມາກ່ອນຈະເຖິງສົງຄາມອະລະມະເຄໂດນ. (ມັດ. 25:32) ເຮົາຈະມາເບິ່ງ 2 ເຫດການຄື: ການໂຈມຕີຂອງໂຄກ ແລະການລວບລວມຜູ້ຖືກເຈີມທີ່ເຫຼືອຢູ່ເທິງໂລກ. ໃນຂະນະທີ່ພິຈາລະນາ 2 ເຫດການນີ້ ເຮົາຕ້ອງຈື່ໄວ້ວ່າຄຳພີໄບເບິນບໍ່ໄດ້ບອກເວລາທີ່ຊັດເຈນວ່າເຫດການເຫຼົ່ານີ້ຈະເລີ່ມຫຼືຈົບລົງເມື່ອໃດ. ທີ່ຈິງ ເບິ່ງຄືວ່າ 2 ເຫດການນີ້ຈະມີໄລຍະເວລາທີ່ຄາບກ່ຽວກັນ.
12. ຊາຕານຈະໂຈມຕີລາຊະອານາຈັກແບບທຸ່ມສຸດກຳລັງແນວໃດ?
12 ການໂຈມຕີແບບສຸດກຳລັງ. ໂຄກແຫ່ງມາໂຄກຈະໂຈມຕີຜູ້ຖືກເຈີມທີ່ເຫຼືອຢູ່ແຜ່ນດິນໂລກລວມທັງແກະອື່ນທີ່ເປັນໝູ່ຂອງເຂົາເຈົ້າ. (ອ່ານເອເຊກຽນ 38:2, 11) ການໂຈມຕີລາຊະອານາຈັກໃນຄັ້ງນີ້ຈະເປັນການສູ້ຮົບຄັ້ງສຸດທ້າຍໃນສົງຄາມລະຫວ່າງຊາຕານກັບຜູ້ຖືກເຈີມທີ່ເຫຼືອຢູ່ ນັບຕັ້ງແຕ່ທີ່ມັນຖືກໄລ່ລົງມາຈາກສະຫວັນ. (ຄຳປ. 12:7-9, 17) ໂດຍສະເພາະຕັ້ງແຕ່ຕອນທີ່ຜູ້ຖືກເຈີມເລີ່ມຖືກລວບລວມເຂົ້າມາໃນປະຊາຄົມຄລິດສະຕຽນທີ່ໄດ້ຮັບການຟື້ນຟູແລ້ວ ຊາຕານກໍຍັງພະຍາຍາມທຳລາຍຄວາມເຊື່ອແລະຄວາມສຳພັນຂອງເຂົາເຈົ້າກັບພະເຈົ້າ ແຕ່ມັນກໍເຮັດບໍ່ສຳເລັດ. (ມັດ. 13:30) ຫຼັງຈາກສາສະໜາປອມທັງໝົດຖືກກວາດລ້າງໄປແລ້ວ ເບິ່ງຄືວ່າປະຊາຊົນຂອງພະເຈົ້າກຳລັງຢູ່ໃນບ່ອນທີ່ “ບໍ່ມີກຳແພງ ບໍ່ມີຮາວ ບໍ່ມີປະຕູ” ຊາຕານເຫັນວ່ານີ້ເປັນໂອກາດເໝາະທີ່ສຸດທີ່ຈະກະຕຸ້ນພວກຜູ້ມີອຳນາດທີ່ຊົ່ວຊ້າເຊິ່ງຢູ່ຝ່າຍດຽວກັບມັນໃຫ້ທຸ່ມສຸດກຳລັງໃນການໂຈມຕີຄົນທີ່ສະໜັບສະໜູນລາຊະອານາຈັກ.
13. ພະເຢໂຫວາຈະເຂົ້າແຊກແຊງເພື່ອຊ່ວຍຜູ້ຮັບໃຊ້ຂອງພະອົງແນວໃດ?
13 ເອເຊກຽນພະຍາກອນເຖິງສິ່ງທີ່ໂຄກຈະເຮັດດັ່ງນີ້ວ່າ: ‘ເຈົ້າຈະມາແຕ່ບ່ອນຢູ່ຂອງເຈົ້າແຕ່ທີ່ສຸດທິດອຸດອນ [ທິດເໜືອ] ທັງເຈົ້າກັບຊາວປະເທດທັງຫຼາຍຂີ່ມ້າທຸກຄົນເປັນພວກຊຸມນຸມໃຫຍ່ເປັນກອງທັບໃຫຍ່ ແລະເຈົ້າຈະຂຶ້ນໄປຕໍ່ສູ້ພວກຂອງເຮົາພວກຍິດສະລາເອນຄືເມກທີ່ປົກຫຸ້ມປະເທດໄວ້.’ (ເອເຊກ. 38:15, 16) ພະເຢໂຫວາຈະເຮັດແນວໃດກັບການຮຸກຮານທີ່ເບິ່ງຄືວ່າຈະບໍ່ມີຫຍັງມາຢຸດຢັ້ງໄດ້? ພະເຢໂຫວາປະກາດວ່າ: “ຄວາມຄຽດຮ້ອນຈະພຸ່ງຂຶ້ນແກ່ໜ້າເຮົາ” ແລະພະອົງຈະ “ຮ້ອງດາບມາຕໍ່ສູ້.” (ເອເຊກ. 38:18, 21; ອ່ານຊາກາລີ 2:8) ພະເຢໂຫວາຈະຍື່ນມືເຂົ້າມາຊ່ວຍຜູ້ຮັບໃຊ້ຂອງພະອົງທີ່ຢູ່ເທິງໂລກ. ການແຊກແຊງນີ້ກໍຄື ສົງຄາມອະລະມະເຄໂດນ.
14, 15. ຫຼັງຈາກທີ່ຊາຕານເລີ່ມໂຈມຕີປະຊາຊົນຂອງພະເຈົ້າຢ່າງເຕັມທີໃນໄລຍະໜຶ່ງແລ້ວຈະມີເຫດການຫຍັງເກີດຂຶ້ນອີກ?
14 ກ່ອນຈະເວົ້າເຖິງເລື່ອງທີ່ວ່າ ພະເຢໂຫວາຈະປົກປ້ອງປະຊາຊົນຂອງພະອົງແນວໃດໃນໄລຍະສົງຄາມອະລະມະເຄໂດນ ໃຫ້ເຮົາມາເບິ່ງເຫດການສຳຄັນອີກຢ່າງໜຶ່ງເຊິ່ງຈະເກີດຂຶ້ນຕອນທີ່ຊາຕານເລີ່ມໂຈມຕີແບບທຸ່ມສຸດກຳລັງກັບຕອນທີ່ພະເຈົ້າເຂົ້າມາແຊກແຊງດ້ວຍສົງຄາມອະລະມະເຄໂດນ. ດັ່ງທີ່ບອກໄປແລ້ວໃນຂໍ້ທີ 11 ເຫດການທີສອງນີ້ກໍຄື ການລວບລວມຜູ້ຖືກເຈີມທີ່ເຫຼືອຢູ່ເທິງໂລກ.
15 ການລວບລວມຜູ້ຖືກເຈີມທີ່ເຫຼືອຢູ່ເທິງໂລກ. ທັງມັດທາຍແລະມາລະໂກໄດ້ບັນທຶກຄຳເວົ້າຂອງພະເຍຊູກ່ຽວກັບການລວບລວມ ‘ຄົນທັງຫຼາຍທີ່ເລືອກໄວ້’ ຫຼືຄລິດສະຕຽນຜູ້ຖືກເຈີມວ່າ ນີ້ເປັນໜຶ່ງໃນຫຼາຍໆເຫດການທີ່ຈະຕ້ອງເກີດຂຶ້ນກ່ອນສົງຄາມອະລະມະເຄໂດນ (ເບິ່ງຂໍ້ 7) ພະເຍຊູພະຍາກອນເຖິງຕົວເອງທີ່ຈະມາ ເປັນກະສັດໃນອະນາຄົດວ່າ: “ເມື່ອນັ້ນພະອົງຈະໃຊ້ຝູງທູດສະຫວັນໄປ ແລະຈະໂຮມເອົາຄົນທັງຫຼາຍທີ່ພະອົງໄດ້ເລືອກໄວ້ແລ້ວໃຫ້ມາຈາກລົມທິດທັງສີ່ນັ້ນຕັ້ງແຕ່ທີ່ສຸດແຜ່ນດິນໂລກເຖິງທີ່ສຸດຟ້າອາກາດ.” (ມໂກ. 13:27; ມັດ. 24:31) ການລວບລວມທີ່ພະເຍຊູເວົ້າເຖິງນີ້ໝາຍເຖິງຫຍັງ? ເພິ່ນບໍ່ໄດ້ເວົ້າເຖິງການປະທັບຕາຂັ້ນສຸດທ້າຍຂອງຄລິດສະຕຽນຜູ້ຖືກເຈີມທີ່ເຫຼືອຢູ່ເທິງໂລກ ເຊິ່ງຈະຕ້ອງເກີດຂຶ້ນບໍ່ດົນກ່ອນທີ່ຄວາມທຸກຍາກລຳບາກຄັ້ງໃຫຍ່ຈະເລີ່ມຂຶ້ນ. (ຄຳປ. 7:1-3) ແຕ່ພະເຍຊູເວົ້າເຖິງເຫດການທີ່ຈະເກີດຂຶ້ນໃນໄລຍະຄວາມທຸກຍາກລຳບາກຄັ້ງໃຫຍ່. ດັ່ງນັ້ນ ເບິ່ງຄືວ່າຫຼັງຈາກຊາຕານເລີ່ມໂຈມຕີປະຊາຊົນຂອງພະເຈົ້າຢ່າງເຕັມທີໄດ້ໄລຍະໜຶ່ງ ຜູ້ຖືກເຈີມທີ່ເຫຼືອຢູ່ເທິງໂລກກໍຈະຖືກລວມລວມໄປສະຫວັນ.
16. ຜູ້ຖືກເຈີມທີ່ໄດ້ຮັບການປຸກໃຫ້ຟື້ນຄືນມາຈາກຕາຍຈະມີສ່ວນໃນສົງຄາມອະລະມະເຄໂດນແນວໃດ?
16 ການລວບລວມຜູ້ຖືກເຈີມທີ່ເຫຼືອຢູ່ເທິງໂລກກ່ຽວຂ້ອງແນວໃດກັບສົງຄາມອະລະມະເຄໂດນເຊິ່ງຈະເກີດຂຶ້ນຕໍ່ຈາກນັ້ນ? ໄລຍະຂອງການລວບລວມນີ້ບົ່ງຊີ້ວ່າ ຜູ້ຖືກເຈີມທັງໝົດຈະຂຶ້ນໄປສະຫວັນກ່ອນສົງຄາມອະລະມະເຄໂດນຂອງພະເຈົ້າຈະເລີ່ມຂຶ້ນ. ຜູ້ຮ່ວມປົກຄອງກັບພະຄລິດໃນສະຫວັນທັງ 144.000 ຄົນຈະໄດ້ຮັບອຳນາດຮ່ວມກັບພະເຍຊູໃນການທຸບສັດຕູທັງໝົດຂອງລາຊະອານາຈັກໃຫ້ແຫຼກມຸ່ນດ້ວຍ “ຄ້ອນເຫຼັກ.” (ຄຳປ. 2:26, 27) ຜູ້ຖືກເຈີມທີ່ໄດ້ຮັບການປຸກໃຫ້ຟື້ນຂຶ້ນຈາກຕາຍລວມທັງທູດສະຫວັນທີ່ມີອຳນາດກໍຈະຕິດຕາມພະຄລິດກະສັດຍອດນັກຮົບ ອອກໄປປະເຊີນໜ້າກັບ ‘ກອງທັບໃຫຍ່’ ຂອງພວກສັດຕູທີ່ເກືອບຈະປ້ຳກິນເຫຍື່ອ ເຊິ່ງກໍຄືປະຊາຊົນຂອງພະເຢໂຫວາ. (ເອເຊກ. 38:15) ແລ້ວສົງຄາມອະລະມະເຄໂດນກໍຈະເກີດຂຶ້ນຕອນທີ່ທັງສອງຝ່າຍປະທະກັນຢ່າງດຸເດືອດ!—ຄຳປ. 16:16
ສາກສຸດທ້າຍຂອງຄວາມທຸກຍາກລຳບາກຄັ້ງໃຫຍ່
ສົງຄາມອະລະມະເຄໂດນເລີ່ມຂຶ້ນ!
17. ໃນສົງຄາມອະລະມະເຄໂດນຈະເກີດຫຍັງຂຶ້ນກັບຄົນທີ່ຖືກຕັດສິນວ່າເປັນ “ແບ້”?
17 ການພິພາກສາລົງໂທດ. ສົງຄາມອະລະມະເຄໂດນຈະເປັນສາກສຸດທ້າຍຂອງຄວາມທຸກຍາກລຳບາກຄັ້ງໃຫຍ່. ເມື່ອເຖິງຕອນນີ້ ພະເຍຊູມີວຽກອີກຢ່າງໜຶ່ງທີ່ຈະຕ້ອງເຮັດຄື: ເປັນຜູ້ພິພາກສາ “ຄົນທຸກຊາດ, ລ.ມ.” ແລະເພິ່ນຈະເປັນຜູ້ລົງໂທດຊາດຕ່າງໆນຳອີກ ເຊິ່ງໝາຍເຖິງຄົນທີ່ຖືກຕັດສິນວ່າເປັນ “ແບ້.” (ມັດ. 25:32, 33) ກະສັດຂອງເຮົາຈະ ‘ຟັນແທງປະເທດຕ່າງໆ’ ດ້ວຍ “ດາບຄົມ 2 ຂ້າງ.” ທຸກຄົນທີ່ເປັນຄືແບ້ເຊິ່ງມີຕັ້ງແຕ່ “ກະສັດ” ຈົນເຖິງ “ທາດ” ຈະ “ຖືກທຳລາຍຕະຫຼອດໄປ, ລ.ມ.”—ຄຳປ. 19:15, 18; ມັດ. 25:46
18. (ກ) ສະຖານະການຂອງຄົນທີ່ພະເຍຊູຕັດສິນວ່າເປັນ “ແກະ” ຈະປ່ຽນຈາກໜ້າມືເປັນຫຼັງມືແນວໃດ? (ຂ) ພະເຍຊູຈະໄດ້ໄຊຊະນະຂັ້ນເດັດຂາດແນວໃດ?
18 ແລ້ວສະຖານະການຂອງຄົນທີ່ພະເຍຊູຕັດສິນວ່າເປັນ “ແກະ” ກໍຈະປ່ຽນຈາກໜ້າມືເປັນຫຼັງມື! ແທນທີ່ຈະຖືກພວກ “ແບ້” ຫຼືກອງທັບໃຫຍ່ຂອງຊາຕານທຳລາຍ ແກະຫຼື “ຊົນຝູງໃຫຍ່” ທີ່ເບິ່ງຄືວ່າບໍ່ມີຫຍັງປົກປ້ອງກໍຈະໜີລອດຈາກພວກສັດຕູ ແລະ “ຜ່ານຄວາມທຸກຍາກລຳບາກຄັ້ງໃຫຍ່” ໄດ້. (ຄຳປ. 7:9, 14, ລ.ມ.) ຫຼັງຈາກກະສັດເຍຊູກຳຈັດສັດຕູຂອງລາຊະອານາຈັກພະເຈົ້າແລ້ວ ເພິ່ນຈະຈັບຊາຕານແລະພວກຜີປີສາດຖິ້ມລົງໃນຂຸມເລິກ ເຊິ່ງພວກມັນຈະມີສະພາບຄືກັບຕາຍແລ້ວ ເພາະພວກມັນບໍ່ສາມາດອອກມາສ້າງຄວາມເດືອດຮ້ອນວຸ່ນວາຍເປັນເວລາ 1.000 ປີ.—ອ່ານຄຳປາກົດ 6:2; 20:1-3
ເຮົາຈະກຽມຕົວໃຫ້ພ້ອມໄດ້ແນວໃດ?
19, 20. ເຮົາຈະນຳບົດຮຽນຈາກເອຊາອີ 26:20 ແລະ 30:21 ມາໃຊ້ໄດ້ແນວໃດ?
19 ເຮົາຈະກຽມຕົວໃຫ້ພ້ອມໄດ້ແນວໃດສຳລັບເຫດການສະເທືອນໂລກເຊິ່ງກຳລັງໃກ້ເຂົ້າມາ? ຫໍສັງເກດການ ເຄີຍເວົ້າໄວ້ເມື່ອຫຼາຍປີກ່ອນວ່າ: “ຄວາມລອດຈະຂຶ້ນຢູ່ກັບການເຊື່ອຟັງ” ຍ້ອນຫຍັງ? ລອງສັງເກດເບິ່ງຄຳເຕືອນຂອງພະເຢໂຫວາຕອນທີ່ເວົ້າກັບຊະເລີຍຊາວຢິວເຊິ່ງອາໄສໃນເມືອງບາບີໂລນບູຮານ. ພະເຢໂຫວາບອກລ່ວງໜ້າວ່າເມືອງບາບີໂລນຈະພ່າຍແພ້ ແລ້ວປະຊາຊົນຂອງພະເຈົ້າຕ້ອງເຮັດຫຍັງແດ່ເພື່ອກຽມຮັບມືກັບເຫດການຄັ້ງນັ້ນ? ພະເຢໂຫວາບອກປະຊາຊົນຂອງພະອົງວ່າ: “ພວກຂອງເຮົາເອີຍ ຈົ່ງມາຈົ່ງເຂົ້າໄປໃນສ້ວມ [ຫ້ອງ] ທັງຫຼາຍຂອງເຈົ້າແລະຈົ່ງງັບປະຕູ. ຈົ່ງລີ້ຕົວສັກໜ້ອຍຈົນເຖິງຄວາມຄຽດຈະໄດ້ຫາຍໄປແລ້ວ.” (ເອຊາ. 26:20) ຂໍສັງເກດຄຳກຳມະທີ່ວ່າ “ເຂົ້າໄປ” “ງັບ” ແລະ “ລີ້” ມີລັກສະນະເປັນຄຳສັ່ງທີ່ກະຕຸ້ນໃຫ້ລົງມືເຮັດ. ຊາວຢິວທີ່ເຊື່ອຟັງຄຳສັ່ງກໍຈະຢູ່ແຕ່ໃນເຮືອນ ບໍ່ເຂົ້າໄປໃກ້ພວກທະຫານທີ່ກຳລັງບຸກເຂົ້າມາໃນເມືອງ. ດັ່ງນັ້ນ ເຂົາເຈົ້າຈະລອດຊີວິດຫຼືບໍ່ກໍຂຶ້ນຢູ່ກັບການເຊື່ອຟັງຄຳສັ່ງຂອງພະເຢໂຫວາ. b
20 ເຮົາຮຽນຫຍັງໄດ້ຈາກເລື່ອງນີ້? ຄືກັບຜູ້ຮັບໃຊ້ພະເຈົ້າໃນສະໄໝບູຮານ ເຮົາຈະລອດຜ່ານເຫດການທີ່ໃກ້ຈະມາເຖິງນີ້ໄດ້ຫຼືບໍ່ ກໍຂຶ້ນຢູ່ກັບວ່າເຮົາເຊື່ອຟັງຄຳສັ່ງຂອງພະເຢໂຫວາຫຼາຍສ່ຳໃດ. (ເອຊາ. 30:21) ເຮົາຈະໄດ້ຮັບຄຳສັ່ງຂອງພະເຈົ້າຜ່ານທາງປະຊາຄົມ. ດັ່ງນັ້ນ ເມື່ອໄດ້ຮັບຄຳແນະນຳຕ່າງໆ ເຮົາຢາກຝຶກຝົນຕົວເອງໃຫ້ມີຫົວໃຈທີ່ເຊື່ອຟັງ. (1 ໂຢ. 5:3) ຖ້າເຮົາເຊື່ອຟັງຕັ້ງແຕ່ຕອນນີ້ ເຮົາກໍຈະເຕັມໃຈເຊື່ອຟັງໃນວັນຂ້າງໜ້ານຳ ແລ້ວເຮົາກໍຈະໄດ້ຮັບການປົກປ້ອງຄຸ້ມຄອງຈາກພະເຢໂຫວາພໍ່ຂອງເຮົາ ແລະພະເຍຊູກະສັດຂອງເຮົາ. (ຊໂຟ. 2:3) ຕອນທີ່ເຮົາໄດ້ຮັບການປົກປ້ອງຈາກພະເຈົ້າ ເຮົາກໍເຫັນກັບຕາຕົວເອງວ່າລາຊະອານາຈັກຂອງພະເຈົ້າກຳຈັດສັດຕູຈົນບໍ່ເຫຼືອຊາກ ແລະເຫດການນັ້ນກໍຈະຖືກຈົດຈຳຢູ່ໃນໃຈເຮົາຕະຫຼອດໄປ!
a ເບິ່ງຄືມີເຫດຜົນທີ່ວ່າ ຄວາມພິນາດທີ່ຈະເກີດຂຶ້ນກັບ “ບາບີໂລນໃຫຍ່” ໂດຍຫຼັກໆແລ້ວໝາຍເຖິງຄວາມພິນາດຂອງອົງການສາສະໜາ ບໍ່ແມ່ນການຂ້າຜູ້ຄົນໃນສາສະໜາເຫຼົ່ານັ້ນ. ດັ່ງນັ້ນ ຄົນຈຳນວນຫຼາຍທີ່ເຄີຍນັບຖືສາສະໜາຂອງບາບີໂລນໃຫຍ່ຈະມີໂອກາດລອດຈາກການຖືກທຳລາຍໃນຄັ້ງນີ້ ແລ້ວເຂົາເຈົ້າກໍຈະຫັນຫຼັງໃຫ້ກັບສາສະໜາຄືກັບທີ່ບອກໄວ້ໃນຊາກາລີ 13:4-6.
b ສຳລັບລາຍລະອຽດເພີ່ມເຕີມ ເບິ່ງປຶ້ມຄຳພະຍາກອນຂອງເອຊາອີ—ຄວາມສະຫວ່າງສຳລັບມວນມະນຸດຊາດ ເຫຼັ້ມ 1 ໜ້າ 282-283 (ພາສາອັງກິດ)