1, 2. (a) Gin gik mage ma nyiso ni Pinyruodh Nyasaye osebedo ka locho chakre higa mar 1914? (b) En ang’o ma wadwaro nono e sulani?

 GIK ma wasebedo ka wanono e bugni e wi gik ma Pinyruodh Nyasaye osebedo ka timo e dier jowasike osetego yiewa ahinya. (Zab. 110:2) Ruodhwa oseloso oganda mang’ongo mochiwore lando wach maber. Osebedo ka opiedho jolupne kendo puodhogi mondo gibed maler e timbegi kod yo ma gilamogo Nyasaye. Kata obedo ni jowasik Pinyruoth osetemo pogowa, pod wasiko ka wariwore kanyachiel. Gik ma wasenonogo kaachiel gi gik mamoko ma Pinyruoth osebedo ka timo, nyiso gadier chuth ni Ruodhwa osebedo ka locho e kind jowasike chakre higa mar 1914.

² Machiegnini, Pinyruodh Nyasaye biro timo gik moko mabeyo moloyo. Pinyruodhno nobi e piny mondo ong’inj jowasike mi otiekgi. (Mat. 6:10; Dan. 2:44) Kata kamano, ka mano pok otimore, nitie gik mamoko ma nyaka timre. Gin gik magego? Nitie weche mang’eny ma ne okor e Muma ma chiwo dwoko mar penjono. We wanon ane moko kuom weche ma nokorgo mondo wang’e gik ma pok otimore ma pod ni nyimwa.

3. Ang’o ma biro kwongo timore ka pok odiechieng Jehova ochakore?

³ Lando ni kuwe nitie. Ka ne Paulo ndiko ne Jokristo ma Thesalonika, ne olero gima dhi timore mokwongo. (Som 1 Jo-Thesalonika 5:2, 3.) E baruano, Paulo nowacho ni “odiechieng’ mar Jehova,” biro chakore sama ibiro monj “Babilon Maduong’.” (Fwe. 17:5) Kata kamano, ka pok odiechieng Jehova ochakore, pinje biro bedo ka wacho ni, “Kuwe nitie kendo weche beyo!” Nyalo bedo ni lendono biro bedo lendo achiel maduong’, kata onyalo bedo lendo mitimo nyadinwoya. Be jotend dinde biro riwore e wachno? Nikech gin bende gin mag piny, nenore ni gibiro riwore gi pinje e wacho ni, ‘Kuwe nitie!’ (Yer. 6:14; 23:16,  17; Fwe. 17:1, 2) Sama ibiro chak land ni kuwe nitie kendo weche beyo, mano biro nyiso ni odiechieng Jehova chiegni chakore. Jowasik Pinyruodh Nyasaye ‘ok notony ngang’.’

4. Ng’eyo tiend wach ma Paulo nokoro e wi kuwe e yo matut konyowa e yo mane?

⁴ Ng’eyo tiend wach ma nokorno e yo matut konyowa e yo mane? Jaote Paulo nowacho niya: “Ok un e mudho ma chieng’no dipou mana kaka ler mar odiechieng’ nyalo poyo jokuoge.” (1 The. 5:3, 4) Kata obedo ni ji pod omemore, gik ma timore sani konyowa ng’eyo kama weche ochomo. Wach ma ne okor e wi lendo mar kuwe biro timore e yo mane? Nyalo bedo maber ka waketo wang’wa mondo wane kaka weche biro dhi. Omiyo, “wasik ka waneno kendo waritreuru e pachwa.”—1 The. 5:6; Zef. 3:8.

5. Ere kaka “masira maduong’” biro chakore?

⁵ Monjo dinde. Par ni Paulo nowacho niya: “E kinde moro amora ma giniwachie ni, ‘Kuwe nitie kendo weche beyo!’ eka kethruok ma apoya nobi kuomgi gikanyono.” Mana kaka mil polo iluwo gi mor polo, e kaka kosewach ni “kuwe nitie kendo weche beyo,” “kethruok ma apoya” luwe. En ang’o mibiro kethi? Mokwongo, ibiro keth “Babilon Maduong’,” ma gin riwruok mar dinde mag miriambo ma Muma bende luongo ni, ‘dhako ma ndhaga.’ (Fwe. 17:5, 6, 15) Keth ma ibiro kethgo joma luongore ni Jokristo kaachiel gi dinde mag miriambo duto e ma biro bedo chakruok mar “masira maduong’.” (Mat. 24:21; 2 The. 2:8) Wachni biro bwogo ji mang’eny ahinya. Ang’o momiyo? En nikech “dhako ma ndhagano” biro bedo ka pod paro ni en “ruoth ma dhako,” kendo ni ‘ok obi yudo kuyo ngang’.’ Kata kamano, apoya nono obiro fwenyo ni kare nogeno mobare. Tiek mibiro tiekego biro timore piyo-piyo mana ka gima otimore “odiechieng’ achiel.”—Fwe. 18:7, 8.

6. En ng’a ma biro monjo “Babilon Maduong’”?

⁶ En ng’a ma biro monjo “Babilon Maduong’”? En “ondiek” moro ma nigi “tunge apar.” Bug Fweny nyiso ni ondiegno ochung’ ne Riwruok mar Pinje (United Nations). Tunge apargo ochung’ ne loje duto ma riwo lwedo ‘ondiek ma kwar ma rienyno.’ (Fwe. 17:3, 5, 11, 12) Monjno biro bedo marach e okang’ ma romo nade? Loje duto ma ni e Riwruok mar Pinje biro yako mwandu dhako ma ndhagano mi gicham ringrene, kendo “wang’e gi mach mi gitieke chuth.”—Som Fweny 17:16. a

7. Ere kaka wach ma Yesu nokoro e Mathayo 24:21, 22 nochopo e kinde Jokristo mokwongo, to wachno biro chopo nade e kinde mabiro?

⁷ Ng’ado ndalogo obed machuok. Ruodhwa Yesu ne onyisowa gik mabiro timore e ndalo masira maduong’.  Nolero niya: “Nikech joma oyier, ndalogo ibiro ng’ad machuok.” (Som Mathayo 24:21, 22.) Wach ma ne Yesu okorono nochopo kare e okang’ moro e higa mar 66 ka ne Jehova ‘ong’ado machuok’ monj ma ne jolweny mag Rumi omonjogo Jerusalem. (Mar. 13:20) Mano ne omiyo Jokristo ma ne ni Jerusalem gi Judea oyudo thuolo mar tony. Ere kaka wachno biro chopo e okang’ malach e kinde masira maduong’? Jehova biro tiyo gi Ruodhwa Yesu e ng’ado monj ma Riwruok mar Pinje biro monjogo dinde, mondo din madier kik keth kanyachiel gi dinde mag miriambo. Omiyo, kata obedo ni ibiro keth dinde duto mag miriambo, din madier to biro tony. (Zab. 96:5) We koro wanon ane gik ma biro timore bang’ mano.

8, 9. Gin ranyisi mage ma Yesu nowacho ni ne dhi nenore e kor polo, to ji ne dhi timo ang’o ka gineno gigo ka timore?

⁸ Weche ma Yesu nokoro e wi ndalo mag giko nyiso maler ni nitie gik moko ma biro timore ka pok Har–Magedon ochakore. Weche ariyo mokwongo ma wadwaro wuoyoe yudore e Injili mag Mathayo, Mariko, kod Luka.—Som Mathayo 24:29-31; Mar. 13:23-27; Luka 21:25-28.

⁹ Ranyisi malich ma biro nenore e polo. Yesu nokoro niya: “Ibiro lok wang’-chieng’ obed mudho kendo dwe ok nochiw ler mare, mi sulwe biro lwar koa e polo.” Mano nyiso ni ji ok bi dwaro ni otagi gi jotend dindegi kata manyo ler irgi nikech biro yudo ka ji osechayogi. Be dibed ni Yesu ne wuoyo bende kuom gik malich ma ji ne dhi neno gi wang’gi ka timore e kor polo? Samoro. (Isa. 13:9-11; Joel 2:1, 30, 31) Ji biro timo ang’o ka gineno gigo ka timore? Gibiro ‘chandore malit’ nikech “ok gining’e gima ginyalo timo.” (Luka 21:25; Zef. 1:17) Kuom adier, jowasik Nyasaye duto te, bed ni gin ‘ruodhi mag piny gi wasumbni,’ ‘chunygi biro a nikech luoro kendo nikech gik ma biro timore e piny,’ kendo gibiro manyo kuonde ma ginyalo pondoe. Kata kamano, ok gibi yudo kama ginyalo pondoe ne mirimb Ruodhwa.—Luka 21:26; 23:30; Fwe. 6:15-17.

10. En bura mane ma Yesu biro ng’ado, to joma riwo Pinyruoth lwedo kod joma kwede biro kawo nade wachno?

¹⁰ Ng’ado bura. Jowasik Pinyruodh Nyasaye duto biro neno wach moro kendo ma biro medonegi lit nyowuoyo. Yesu nowacho niya: “Ginine Wuod dhano ka biro e boche polo ka en gi teko mang’ongo kod duong’.” (Mar. 13:26) Wach malich ma biro timoreno biro nyiso ni koro Yesu osebiro mondo ong’ad bura. E weche ma ne okoro e wi ndalo mag giko, Yesu bende wacho gik ma obiro timo sama ong’ado bura. Wayudo wechego e ngero mar rombe kod  diek. (Som Mathayo 25:31-33, 46.) Joma omakore chuth gi Pinyruodh Nyasaye ibiro ng’adnegi bura ni gin “rombe,” kendo gibiro ‘ting’o wigi malo’ ka gifwenyo ni ‘resruokgi okayo machiegni.’ (Luka 21:28) Kata kamano, joma kwedo Pinyruoth ibiro ng’adnegi bura ni gin “diek,” kendo gibiro “goyo korgi gi kuyo maduong’” ka gifwenyo ni “kethruok mochwere” ochomogi.—Mat. 24:30; Fwe. 1:7.

11. En ang’o ma dwarore ni waket e paro sama wanono weche mabiro timore ka lweny mar Har–Magedon pok ochakore?

¹¹ Bang’ ka Yesu oseng’ado bura ne “ogendni duto,” nitie gik moko mang’eny madongo ma biro timore ka lweny mar Har–Magedon pok ochakore. (Mat. 25:32) Wadwaro nono ariyo kuomgi ma gin: Monj ma Gog biro timo kod choko joma owir. Sama wanono wechego, dwarore ni waket e paro ni Muma ok nyiswa kinde sie ma gibiro timoree. Nenore ni moro biro chakore kae to machielo chakore ka mokwongono pod dhi nyime.

12. En monj mane mogik ma Satan biro timo?

¹² Monj mogik. Mokwongo, Gog mar Magog biro monjo Jokristo mowir modong’ kod rombe mamoko. (Som Ezekiel 38:2, 11.) Monj ma Satan biro monjogo loch mar Pinyruoth e ma biro bedo monj mogik e lweny ma Satan osebedo ka kedogo gi Jokristo mowir nyaka ne gole e polo. (Fwe. 12:7-9, 17) Nyaka ne chak chok Jokristo mowir, Satan osetemo ahinya ketho winjruok ma Jokristogo nigo gi Nyasaye to pok onyalo. (Mat. 13:30) Kata kamano, bang’ ka oseketh riwruoge mag dinde mag miriambo, biro nenore ka gima jotich Nyasaye odak e mier ma ok ochiel. Satan biro neno ni mano e kinde maberie moloyo mar monjogi. Omiyo, obiro siayo joma richo ma riwe lwedo mondo gimonj joma riwo Pinyruoth lwedo.

13. Ang’o ma Jehova biro timo mondo ores joge?

¹³ Janabi Ezekiel lero gima biro timore. Kowuoyo e wi Gog, owacho kama: ‘Inibi ka ia e kari ma ni e kor masawa mabor ahinya, in kod ji mang’eny, giduto ka giidho ambuoche, oganda maduong’, oganda mar lweny man gi teko. Inibi mondo iked kod joga Israel, mondo ium piny ka luoch.’ (Eze. 38:15, 16) Jehova biro timo ang’o? Owacho niya: “Uma nofitre gi mirima,” kendo “analuong ji manie godena duto mondo gikel ligangla kuom jalo.” (Eze. 38:18, 21; som Zekaria 2:8.) Jehova biro donjo e wachno mondo ores joge. Mano e ma koro iluongo ni lweny mar Har–Magedon.

14, 15. En ang’o ma biro timore e kinde ma Satan chako timoe monj mogik?

¹⁴ Ka pok wanono kaka Jehova biro rito joge e lweny mar Har–Magedon, we wanon ane wach mar ariyo maduong’ ma biro timore. Wach maduong’no notimre e kinde ma Satan chako timoe monj mogik kod ka Har–Magedon pok ochakore. Mana kaka ne wawacho e paragraf  mar 11, wach mar ariyono en choko Jokristo mowir ma kindeno biro yudo ka ni e piny.

¹⁵ Choko Jokristo mowir. Buge mag Mathayo kod Mariko wuoyo e wi wach ma ne Yesu owacho e wi gima ne dhi timore ne ‘joma oyier’ ma gin Jokristo mowir. En gima biro timore ka Har–Magedon pok ochakore. (Ne paragraf mar 7.) Ka ne Yesu wuoyo e wi gima obiro timo kaka Ruoth, nokoro niya: “Eka obiro oro malaikene mi ginichok joge moyier kanyachiel ka giwuok e tunge ang’wen mag piny, a e tung’ piny nyaka e tung’ polo.” (Mar. 13:27; Mat. 24:31) Yesu ne wuoyo kuom choko ang’o? Ne ok owuo e wi kaka ne idhi ket ne Jokristo mowir alama mogik mana kinde matin ka pok masira maduong’ ochakore. (Fwe. 7:1-3) Kar mano, Yesu ne wuoyo e wi gima ne dhi timore e kinde masira maduong’. Omiyo, nenore ni kinde matin bang’ ka Satan osechako monjo jo Nyasaye, Jokristo mowir modong’ ibiro chok mondo otergi e polo.

16. Jokristo mowir biro timo migawo mane e lweny mar Har–Magedon?

¹⁶ Ere kaka wach choko Jokristo mowir modong’ otudore gi Har–Magedon? Har–Magedon biro chakore ka oseter Jokristo mowir e polo. Ka gin kuno kargi ji 144,000, gibiro konyore gi Yesu e tiyo gi “luth mar chuma” mondo gitiek jowasik Pinyruodh Nyasaye duto. (Fwe. 2:26, 27) Kae to, Jokristo mowir kod malaike ma nigi teko biro luwo Kristo ma e Ruoth ma Jalweny mondo girakre gi ‘oganda mar lweny’ mar jowasigu ma monjo jotich Nyasaye. (Eze. 38:15) Mano e lweny mar Har–Magedon!—Fwe. 16:16.

17. Ang’o ma biro timore ne “diek” e kinde lweny mar Har–Magedon?

¹⁷ Ketho joma richo. Lweny mar Har–Magedon e ma biro bedo giko mar masira maduong’. E kindeno, Yesu biro timo tich moro momedore. Mopogore gi bedo Jang’ad-Buch “ogendni duto,” obiro ketho ogendinigo, tiende ni joma ne oseng’adonegi bura ni gin “diek.” (Mat. 25:32, 33) Ruodhwa biro ‘chadho ogendni’ gi “ligangla mabith kendo mabor.” Adier, joma nigi kido ka mag diek, bed ni gin “ruodhi” kata “wasumbni,” noyud “kethruok mochwere.”—Fwe. 19:15, 18; Mat. 25:46.

18. (a) Ere kaka weche biro lokore apoya ne joma Yesu kwano kaka “rombe”? (b) Ere kaka Yesu biro tieko jowasike?

¹⁸ To mano kaka weche biro lokore apoya ne joma Yesu kwano kaka “rombe”! E seche ma biro nenore ka gima “diek” mag Satan dhi tiekogi, e sama Ruoth biro resogie mi gitony e “masira maduong’” ka gin “oganda mang’ongo.” (Fwe. 7:9, 14) Kae to bang’ ka Yesu oseloyo jowasik Pinyruodh Nyasaye motiekogi chuth, obiro wito Satan gi  jochiendene e abiso. Ka gin kanyo, gibiro chalo ka joma otho nikech ok gibi bedo gi nyalo mar timo gimoro amora kuom higni gana achiel.—Som Fweny 6:2; 20:1-3.

19, 20. Ere kaka wanyalo tiyo gi puonj ma ni e Isaiah 26:20 kod 30:21?

¹⁹ Ere kaka wanyalo ikore ne gik malich ma birogo? The Watchtower nowacho kama higni moko mokalo: “Tony marwa biro luwore gi yo ma waluwogo gik michikowa.” Ang’o momiyo? Dwoko mar penjono yudore e weche ma ne Jehova osiemogo Jo-Yahudi ma ne ni Babilon. Jehova nokoro ni ne idhi keth Babilon. To ang’o ma jotich Nyasaye ne onego otim mondo giikre ne monj ma kamano? Jehova nowacho niya: “Un joga, donjuru e utu, loruru thikeu bang’u: ponduru kinde matin, nyaka mirima mang’enyni nokadh.” (Isa. 26:20) Weche motigo e ndikono ni “donjuru,” “loruru,” kod “ponduru” gin chike ma dwaro ni ji okaw okang’ mapiyo. Jo-Yahudi ma ne owinjo siemno ne onego osik e i utegi mondo kik girom gi jolwenj jowasigu e nderni. Omiyo, mondo ne gitony, ne nyaka giluw kaka nochikgi. b

²⁰ Wechego puonjowa ang’o? Mana kaka jotich Nyasaye ma kindego, wan bende mondo wabi watony e gik malich ma biro, nyaka waluw mana kaka Jehova chikowa. (Isa. 30:21) Wayudo chikego e kanyakla. Omiyo, dwarore ni waluw kaka ichikowa. (1 Joh. 5:3) Ka watimo kamano sani, biro bedonwa mayot luwo kaka ibiro chikwa e kinde mabiro, to mano biro miyo Jehova kod Ruodhwa Yesu oritwa. (Zef. 2:3) Rit ma Nyasaye ritowago e ma biro miyo wane kaka Pinyruodh Nyasaye ketho jowasike duto. Adier, mano kinde ma wiwa ok nowilgo nyaka chieng’!