1, 2. (a) Uumbangi wuni tawu ulike kutya Omukwaniilwa gwetu okwa kala ta pangele okuza mo 1914? (b) Otatu ka kundathana shike montopolwa ndjika?

 OSHA koleka eitaalo lyetu okukundathana shoka Uukwaniilwa waKalunga wa tompola mokati kaatondi yawo. (Eps. 110:2) Omukwaniilwa gwetu okwa gongele ongundu yaantu mboka taya uvitha nehalo ewanawa. Okwa yelitha nokuyogola aalanduli ye pambepo nosho wo eihumbato lyawo. Nonando aatondi yUukwaniilwa oya kambadhala oku tu topola, otu na natango uukumwe muuyuni awuhe. Iinima ayihe mbika twa kundathana nosho wo yilwe mbyoka ya longwa kUukwaniilwa, otayi tu pe uumbangi wa yela kutya Omukwaniilwa gwetu okwa kala ta pangele mokati kaatondi yUukwaniilwa okuza mo 1914.

² Otwa tegelela Uukwaniilwa wu ka ninge ishewe iinima iikumithi monakuyiwa. Otawu ke ‘ya’ wu ‘yonagule po’ aatondi yawo. (Mat. 6:10; Dan. 2:44) Ihe manga shoka inaashi ningwa, otapu ka ningwa iinima yilwe ya simana. Oshike tashi ka ningwa? Omahunganeko gamwe gOmbiimbeli otaga yamukula epulo ndyoka. Natu kundathaneni gamwe gomomahunganeko ngoka tu mone kutya iiningwanima yini yi li pokuningwa.

3. Oshiningwanima shotango shoka twa tegelela oshini?

³ Otaa ka tya oku na ombili. Sho omuyapostoli Paulus a nyolele Aatessalonika okwa popi kombinga yoshiningwanima shotango shoka twa tegelela. (Lesha 1 Aatessalonika 5:2, 3.) Montumwafo ndjika Paulus okwa popi kombinga ‘yesiku lyOmuwa’ ndyoka tali ka tameka nehanagulopo ‘lyaBabiloni oshinene.’ (Eh. 17:5) Ihe manga esiku lyaJehova inaali tameka, iigwana otayi ka tya: “Ope li nawa, naayihe oya gamenwa,” nenge opu na ombili negameno. Shika otashi vulika shi ka popiwe lumwe aluke nenge shi kale tashi popiwa lwiikando. Mbela aawiliki yomalongelokalunga nayo otaya ka popya ngawo? Molwaashoka yo oyomuuyuni, otashi vulika nayo ya ka popye ngaashi iigwana, taya ti: “Oku na ombili.” (Jer. 6:14; 23:16, 17; Eh. 17:1, 2) Omupopyo ngoka kutya oku na ombili negameno otagu ke tu  ulukila kutya esiku lyaJehova oli li pokutameka. Aatondi yUukwaniilwa waKalunga “itaa ka vula okuya ontuku.”

4. Okuuva ko ehunganeko lyaPaulus li na ko nasha nombili negameno otaku tu etele ngiini uuwanawa?

⁴ Okuuva ko ehunganeko ndika shoka tali ti otaku tu etele ngiini uuwanawa? Paulus okwa ti: “Ne kamu shi yomomilema, esiku ndyoka li mú adhe ando ohaluka ngaashi omufuthi.” (1 Tes. 5:3, 4) Tse inatu fa aantu yomuuyuni, oshoka otu shi shi kutya iiningwanima mbika otayi ti shike. Ehunganeko ndika kutya otaya ka tya opu na ombili negameno otali ka gwanithwa naanaa ngiini? Katu shi shi, otatu tegelele owala tu tale shoka tashi ka ningwa muuyuni. Onkee ano “tu kaleni twa tonata notu na eidhidhimiko.” —  1 Tes. 5:6; Sef. 3:8.

5. “Uudhigu uunene” otawu ka tameka ngiini?

⁵ Omalongelokalunga taga hanagulwa po. Dhimbulukwa kutya Paulus okwa nyola a ti: ‘Manga aantu ye li mokutya: “Ope li nawa, naayihe oya gamenwa,” nena ohaluka ehanagulo otali ya adha.’ Ngaashi owala olwaadhi halu landulwa nziya komungungumo, osho wo omupopyo kutya, “Ope li nawa, naayihe oya gamenwa” nenge opu na ombili negameno, tagu ka landulwa nziya ‘kehanagulo lyohaluka.’ Oshike tashi ka hanagulwa po? Tango, ‘oBabiloni oshinene,’ ano omalongelokalunga giifundja agehe muuyuni, ngoka hagi ithanwa wo “ohonda.” (Eh. 17:5, 6, 15) “Uudhigu uunene” otawu ka tameka nehanagulopo lyoongeleka dhopaKriste dhiifundja nolyomalongelokalunga galwe giifundja. (Mat. 24:21; 2 Tes. 2:8) Oyendji itaya ka kala ye shi tegelela. Omolwashike? Omolwashoka manga shoka inaashi ningwa, ohonda ndjoka otayi ka kala yi wete kutya yo “omukwaniilwa omukuluntu” ngoka itaa ka “adhika nando koluhodhi!” Ashike ohaluka, otayi ka mona kutya einekelo lyayo osima yowala. Oshoka otayi ka hanagulwa po mepathimo lyeho, ongo tayi hanagulwa po ‘mesiku limwe alike.’ —  Eh. 18:7, 8.

6. Oshike nenge olye ta ka hanagula po “Babiloni oshinene”?

⁶ Oshike nenge olye ta ka hanagula po “Babiloni oshinene”? “Oshilikama” shoka shi na ‘ooniga omulongo.’ Embo lyEhololo otali holola kutya oshilikama shika osho Iigwanahangano (UN). Ooniga omulongo odho omapangelo agehe gopapolotika ngoka taga ambidhidha ‘oshilikama oshitiligane.’ (Eh. 17:3, 5, 11, 12) Ehanagulopo ndika otali ka faalela shike? Iilongo mbyoka yi li iilyo yo-UN otayi ka hula ohonda ashihe shoka yi shi na ‘notayi ke yi lungunitha po.’ —  Lesha Ehololo 17:16. a

7. Oohapu dhaJesus ndhoka dhi li muMateus 24:21, 22 odha gwanithilwe po ngiini pethimbo lyAakriste yopetameko? Oohapu ndhika otadhi ka gwanithwa po ngiini monakuyiwa?

⁷ Omasiku taga fupipikwa. Omukwaniilwa gwetu okwe tu hololele shoka tashi ka ningwa pethimbo lyuudhigu uunene. Jesus okwa ti: “Kalunga ota fupipike omasiku ngoka omolwaahogololwa ye.” (Lesha Mateus 24:21, 22.) Oohapu dhaJesus tango odha gwanithilwe mo 66 E.N., sho Jehova ‘a fupipikile’ omasiku geponokelo lyaJerusalem ketangakwiita lyaRoma. (Mark. 13:20) Shoka osha pele Aakriste muJerusalem nomuJudea ompito ya hupithwe. Mbela oshike tashi ka ningwa  muuyuni awuhe pethimbo lyuudhigu uunene mboka wu li popepi? Jehova ota ka longitha Omukwaniilwa gwetu ‘a fupipike’ ehanagulopo lyomalongelokalunga ndyoka tali ka ningwa kIigwanahangano, opo elongelokalunga lyashili kaali hanagulwe po pamwe nomalongelokalunga giifundja. Onkee ano, sho omalongelokalunga giifundja taga ka hanagulwa po, elongelokalunga lyashili otali ka hupa po. (Eps. 96:5) Ngashingeyi natu ka kundathaneni kombinga yiiningwanima mbyoka tayi ka landula ko ngele shika sha hulu.

8, 9. Jesus otashi vulika a li ta popi kombinga yiinima iikumithi yini, naantu otaya ka ninga po shike molwiinima mbyoka ye wete?

⁸ Sho Jesus a li ta hunganeke kombinga yomasiku gahugunina, okwa hunganeke wo kombinga yiiningwanima ya simana mbyoka tayi ka tetekela Armagedon. Iiningwanima yotango iyali mbyoka tatu ka kundathaneni oya nyolwa mEvaangeli lyaMateus, Markus nolyaLukas. —  Lesha Mateus 24:29-31; Mark. 13:23-27; Luk. 21:25-28.

⁹ Iinima iitilithi tayi ningwa kegulu. Jesus ota ti: ‘Etango otali ka luudha, omwedhi itagu ka yela we, oonyothi otadhi ka gwa megulu.’ Osha yela kutya aantu itaa ka konga we ewiliko kaawiliki yomalongelokalunga. Mbela Jesus okwa li ta popi wo kutya iinima mbyoka iitilithi otayi ka ningwa lela kegulu? Otashi vulika. (Jes. 13:9-11; Joel 2:1, 30, 31) Aantu otaye ki ihumbata ngiini shampa ya mono shoka tashi ningwa? Otaya ka kala ya “limbililwa notaa ka tilithwa,” molwaashoka “ya nyengwa kutya naya ninge ngiini.” (NW) (Luk. 21:25; Sef. 1:17) Eeno, aatondi yUukwaniilwa waKalunga, kutya nduno “aakwaniilwa” nenge “aapika,” otaya ka ‘sa omolwuumbanda mokutegelela mbyoka tayi ka adha evi alihe’ notaya ka holama. Ashike kape na mpoka taya ka adha uuholameno ya holame ondjahi yOmukwaniilwa gwetu. —  Luk. 21:26; 23:30; Eh. 6:15-17.

10. Jesus ota ka pangula oolye? Aalelwa yUukwaniilwa waKalunga nosho wo aatondi yawo otaye ki inyenga ngiini?

¹⁰ Oonzi tadhi yoololwa miikombo. Opo nduno aatondi yUukwaniilwa waKalunga otaya ka mona oshiningwanima shoka tashi ke ya ehameka nayi. Jesus okwa ti: “Aantu otaa ka mona ihe Omuna gwOmuntu te ya te ende kiikogo yokegulu e na oonkondo odhindji neadhimo.” (Mark. 13:26) Oshilongankondo shika otashi ku ulika kutya Jesus okwe ya a pangule aantu. Mehunganeko omo tuu moka, Jesus okwa gandja uuyelele wa gwedhwa po kombinga yepangulo ndyoka. Uuyelele mbuka otatu wu adha meyele lyoonzi niikombo. (Lesha Mateus 25:31-33, 46.) Mboka ya gama kombinga yUukwaniilwa waKalunga otaya ka pangulwa ‘ongoonzi’ notaya ka ‘thikama yu ukilila, oshoka ehupitho lyawo olya thika popepi.’ (Luk. 21:28) Ashike aatondi yUukwaniilwa otaya ka pangulwa ‘ongiikombo’ notaya ka “lilagana,” oshoka otaya ka mona kutya ‘egeyelo lyaaluhe’ nenge ehanagulo lyaaluhe oli ya li popepi. —  Mat. 24:30; Eh. 1:7.

11. Oshike tu na okukaleka momadhiladhilo sho tatu kundathana iiningwanima mbyoka yi li pokuningwa?

¹¹ Shampa Jesus a pangula “aantu ayehe yokombanda yevi,”  opu na natango iiningwanima yilwe ya simana mbyoka yi na okuningwa manga iita yaArmagedon inaayi tameka. (Mat. 25:32) Otatu ka kundathaneni iyali yomiiningwanima mbyoka: eponokelo lyaGog nosho wo okugongelwa kwaagwayekwa. Natu kalekeni momadhiladhilo sho tatu kundathaneni iiningwanima mbika kutya Ombiimbeli inayi popya kondandalunde kutya otayi ka ningwa lelalela uunake. Nokuli otashi vulika manga shimwe shi li metifa, sho oshikwawo nasho otashi tameke.

12. Satana ota ka ponokela ngiini Uukwaniilwa noonkondo dhe adhihe?

¹² Satana ta ponokele oshigwana shaKalunga. Gog gwomevi lyaMagog ota ka ponokela aagwayekwa mboka ya hupa ko kombanda yevi nosho wo oonzi dhilwe. (Lesha Hesekiel 38:2, 11.) Shika otashi ka kala oshikando shahugunina Satana ta ponokele Uukwaniilwa mokuhingila oshihupe shaagwayekwa iita okuza sho u umbwa mo megulu. (Eh. 12:7-9, 17) Okuza sho aagwayekwa ya tameke okugongelwa megongalo lyopaKriste ndyoka lya yumudhwa po, Satana okwa kala ta kambadhala okuyonagula po uupambepo wawo, ihe ina tompola. (Mat. 13:30) Ashike pethimbo mpoka uuna omalongelokalunga giifundja ga hanagulwa po, oshigwana shaKalunga otashi ka kala sha fa shi li “miilando yaa na eshigo lyedhingililokuma moka [mwaa] na omiyelo nomakumba.” Satana ota ka dhiladhila kutya okwa mona ompito ombwanawa oku shi ponokela. Satana ota ka hongakanitha omapangelo gopantu ga ponokele ayehe mboka haya ambidhidha Uukwaniilwa ga mana mo.

13. Jehova ota ka ninga po shike a gamene aapiya ye?

¹³ Hesekiel ota hokolola shoka tashi ka ningwa po. Ehunganeko olya ti ngeyi kombinga yaGog: “Oto ka pita mo mehala lyoye lyokokule kuumbangalantu, to wilike etanga enene lyaakwiita ya za miigwana oyindji, ayehe ya kayila uukambe. Oto ka ponokela aantu yandje Aaisraeli wa fa oshikungulu tashi taakana oshilongo.” (Hes. 38:14-16) Jehova ota ka kala u uvitile ngiini oshiponokela shika? Jehova ota ti: “Ondjahi yandje otayi [ka] tukuluka. . . . Otandi ka tilitha Gog niiponga oyindji.” (Hes. 38:18, 21; lesha Sakaria 2:8.) Jehova ota ka lwa peha lyaapiya ye kombanda yevi. Nolugodhi ndoka olwo talu ithanwa iita yaArmagedon.

14, 15. Oshiningwanima shini tashi ka ningwa konima sho Satana a tameka nale okuponokela oshigwana shaKalunga?

¹⁴ Manga inaatu kundathana nkene Jehova ta ka kondjela oshigwana she pethimbo lyiita yaArmagedon, natu konakoneni oshiningwanima shilwe sha simana. Oshiningwanima shika otashi ka ningwa konima ngele Satana a tameke okuponokela oshigwana shaKalunga, ihe omanga Jehova inaa tameka okukondjela oshigwana she puArmagedon. Ngaashi sha popiwa mokatendo 11, oshiningwanima shika oshitiyali oshi na ko nasha nokugongelwa kwoshihupe shaagwayekwa.

¹⁵ Aagwayekwa taya gongelwa. Mateus naMarkus ayehe oya nyola kombinga yaashoka Jesus a popi kombinga ‘yaahogololwa,’ ano Aakriste aagwayekwa, sho a li ta popi kombinga  yiiningwanima ya landulathana mbyoka tayi ka ningwa manga iita yaArmagedon inaayi tameka. (Tala okatendo 7.) Jesus okwa hunganeke kombinga ye mwene sho ta ka ninga omukwaniilwa a ti: “Oye ota ka tuma ko aayengeli ye, ya ka gongele aahogololwa ye koombinga ne dhevi, okuza koshigo yevi sigo okoshigo yegulu.” (Mark. 13:27; Mat. 24:31) Jesus okwa li ta popi kombinga yokugongelwa kuni? Ka li ta popi kombinga yokutula oshihupe shaagwayekwa iihako, shoka tashi ka ningwa manga owala uudhigu uunene inaawu tameka. (Eh. 7:1-3) Pehala lyaashono Jesus okwa li ta popi kombinga yoshiningwanima shoka tashi ka ningwa, sho uudhigu uunene wu li metifa. Onkee ano osha fa shi li ngeyi kutya aagwayekwa mboka taya ka adhika natango ye li kombanda yevi otaya ka falwa megulu, konima sho Satana a tameka nale okuponokela oshigwana shaKalunga.

16. Aagwayekwa otaya kutha ngiini ombinga muArmagedon konima yeyumuko lyawo?

¹⁶ Okugongelwa huka kwoshihupe shaagwayekwa okwa pambathana ngiini niita yaArmagedon mbyoka tayi landula ko? Ngele otwa tala kethimbo ndyoka okugongelwa taku ka ningwa, osha yela kutya aagwayekwa otaya adhika ye li nale megulu manga iita yaArmagedon mbyoka Kalunga ta ka hinga inaayi tameka. Aapangeli mbaka 144 000 taya ka pangela pamwe naKristus megulu, nayo otaya pewa oonkondo dhokulongitha “ondhimbo yosheela” yokuhanagula po aatondi ayehe yUukwaniilwa waKalunga. (Eh. 2:26, 27) Okuza mpoka aagwayekwa mboka ya yumudhwa nosho wo aayengeli aanankondo otaya ka ya pamwe naKristus, Omukwaniilwa omusindani, sho ta ka kondjitha “etanga enene” lyaatondi ndyoka lya hala okuhanagula po oshigwana shaJehova. (Hes. 38:15) Armagedon ota ka tameka ngele omatanga ngoka gaali ga pwakele. —  Eh. 16:16.

17. Oshike tashi ka ningilwa “iikombo” puArmagedon?

¹⁷ Ehanagulo tali tameke. Uudhigu uunene otawu ka hula niita yaArmagedon. Pethimbo mpoka Jesus ota ka pewa ishewe oshinakugwanithwa shilwe. Kakele kokupangula “aantu ayehe yokombanda yevi,” ota ka hanagula po iigwana nenge aantu ayehe mboka a tokolele kutya yo “iikombo.” (Mat. 25:32, 33) Omukwaniilwa gwetu ota ka longitha “egongamwele lya tsa, ndyoka ta ka sinda nalyo iigwana.” Eeno, mboka ya fa iikombo, kutya nduno ‘aakwaniilwa’ nenge ‘aapika,’ ayehe ‘otaa ka ya mokugeyelwa kwaaluhe,’ nenge ano taya ka hanagulwa po sigo aluhe. —  Eh. 19:15, 18; Mat. 25:46.

18. (a) Oshike tashi ka ningilwa “oonzi”? (b) Konima ngele Jesus a hanagula po aantu ayehe mboka ye tonde Uukwaniilwa, ota ka ninga shike?

¹⁸ Onkalo yaamboka Jesus a tala ko kutya yo “oonzi” itayi ka lunduluka tuu! Pehala lyokuhanagulwa po ketangakwiita lyaSatana ndyoka tali faathanithwa ‘niikombo,’ “engathithi lyaantu” mboka taya faathanithwa ‘noonzi’ kaadhi na omugameni otali ka hupa notali ka ‘pita momahepeko ngoka omanene’ nenge muudhigu uunene. (Eh. 7:9, 14) Opo nduno konima ngele Jesus a sindi aantu ayehe mboka ye tonde Uukwaniilwa waKalunga noku ya hanagula po, ote ku umbila Satana  noompwidhuli dhe molumbogo. Otaya ka kala moka itaaya vulu okuninga nando osha uule woomvula eyuvi. —  Lesha Ehololo 6:2; 20:1-3.

19, 20. Oshike tatu ilongo muJesaja 26:20 nosho wo Jesaja 30:21?

¹⁹ Ongiini tatu vulu okukala twi ilongekidhila iiningwanima iikumithi mbyoka tayi ka ningwa? Omimvo dha piti Oshungolangelo oya tile: “Aantu otaya ka hupa owala ngele ohaya vulika.” Omolwashike? Eyamukulo otali adhika melondodho ndyoka Jehova a pele Aajuda mboka ya li muukwatwa muBabiloni shonale. Jehova okwa hunganeke kutya Babiloni otashi ka sindwa, ihe oshigwana shaKalunga osha li shi na okuninga shike, opo shi ilongekidhile oshiningwanima shoka? Jehova okwa ti: “Ne aantu yandje, indeni momagumbo geni, mu iyedhilile mo. Holameni okathimbo, manga ondjahi yaKalunga tayi pitilile po.” (Jes. 26:20) Ndhindhilika kutya iityalonga “indeni,” “iyedhilile,” “holama,” mbyoka yi li moohapu ndhoka, ayihe oyi li molupe lwelombwelo. Aajuda mboka ya vulikile komalombwelo ngoka inaya ya momapandaanda moka mwa li aakwiita taya kondjo, ihe oya kala momagumbo gawo. Onkee ano, opo ya hupithwe, oya li ye na okuvulika kuJehova. b

²⁰ Mbela otatu ilongo mo shike? Ngaashi sha ningililwe aapiya yaKalunga yonale, natse otatu ka hupithwa owala miiningwanima mbyoka tayi ka ningwa, ngele otatu vulika komalombwelo gaJehova. (Jes. 30:21) Omalombwelo ngoka ohatu ga pewa okupitila megongalo. Onkee ano, otwa hala okukala hatu vulika nomutima aguhe kewiliko ndyoka hatu pewa. (1 Joh. 5:3) Ngele ohatu vulika ngashingeyi, nomonakuyiwa otatu ka kala twa halelela okuvulika nehalo ewanawa notatu ka gamenwa kuTate, Jehova, nokomukwaniilwa, Jesus. (Sef. 2:3) Egameno lyopakalunga ndika otali ke tu pa ompito yokumona nkene Uukwaniilwa waKalunga tawu hanagula po aatondi yawo. Oshiningwanima shika itashi ka dhimbiwa nando!