1, 2. (a) Kiko ta proba ku nos Rei ta goberná for di aña 1914? (b) Kiko nos lo analisá den e kapítulo akí?

 NOS fe a bira mas fuerte despues ku nos a repasá tur loke e Reino di Dios a logra meimei di su enemigunan. (Sal. 110:2) Nos Rei a lanta un ehérsito di predikadó boluntario. El a limpia i purifiká su siguidónan den sentido spiritual i moral. Anto apesar di tur e esfuerso ku enemigunan di e Reino ta hasi pa kousa divishon entre nos, nos ta gosa awe di un hermandat uní mundialmente. E logronan akí di e Reino, huntu ku hopi otro logro mas ku nos a analisá, ta duna prueba konvinsente ku for di 1914 nos Rei ta goberná meimei di enemigunan di e Reino.

² E Reino lo hasi kosnan asta mas asombroso ainda den futuro serkano. Lo e “bini” pa “garna i pone un fin” na tur su enemigunan. (Mat. 6:10; Dan. 2:44) Pero promé ku e tempu ei yega, tin mas suseso importante ku tin ku tuma lugá. Kiko nan ta? Vários profesia di Beibel ta kontestá e pregunta ei. Laga nos analisá algun di nan pa wak kua ta e susesonan ku ainda mester tuma lugá.

3. Kiko ta e promé suseso ku nos ta warda pa tuma lugá?

³ Anunsio di pas. Ora apòstel Pablo a skirbi e tesalonisensenan, el a deskribí e promé suseso ku nos ta warda pa tuma lugá. (Lesa 1 Tesalonisensenan 5:2, 3.) Den e karta akí Pablo ta menshoná “e dia di Yehova”; esaki lo kuminsá ku e atake kontra “Babilonia e Grandi.” (Rev. 17:5) Pero djis promé ku e dia di Yehova kuminsá, e lidernan mundial lo ta bisando “Pas i siguridat!” E ekspreshon akí por ta referí na un anunsio spesífiko òf na un seri di deklarashon notabel. Lidernan religioso lo ta enbolbí den esei? Ya ku nan ta parti di mundu, ta posibel ku nan lo djòin lidernan polítiko den bisa “Pas, pas”! (Yer. 6:14; 23:16, 17; Rev. 17:1, 2) E proklamashon akí di pas i siguridat lo ta e señal ku e dia di Yehova ta a punto di kuminsá. Enemigunan di e Reino di Dios “lo no skapa di ningun manera.”

4. Kon e echo ku nos ta komprondé kiko Pablo su profesia tokante e anunsio di pas i siguridat ta nifiká ta benefisiá nos?

 ⁴ Kon e echo ku nos ta komprondé kiko e profesia akí ta nifiká ta benefisiá nos? Pablo a bisa: “Boso no ta den skuridat; pues e dia ei no mester kue boso di sorpresa manera lus di dia ta kue ladron di sorpresa.” (1 Tes. 5:3, 4) Distinto for di hende en general, nos sí ta ripará ta den ki direkshon susesonan aktual ta bayendo. Pero den ki manera presis e profesia akí tokante pas i siguridat lo kumpli? Nos no sa. Nos tin ku warda i wak kiko ta bai pasa. P’esei, “laga nos keda lantá i mantené nos sano huisio.”—1 Tes. 5:6; Sof. 3:8.

5. Kiko lo ta e promé fase di e “tribulashon grandi”?

⁵ Religion ta ser ataká. Kòrda ku Pablo a skirbi: “Ora nan ta bisa: ‘Pas i siguridat!,’ e ora ei diripiente destrukshon lo bini riba nan instantáneamente.” Meskos ku ora werlek kòrta, bos ta ronka djis su tras, asina tambe ora e nashonnan ta bisa “Pas i siguridat!,” “diripiente destrukshon” lo bini instantáneamente. Kiko lo ser destruí? Di promé, “Babilonia e Grandi,” e imperio mundial di religion falsu, konosí tambe komo “e prostituta.” (Rev. 17:5, 6, 15) E destrukshon akí di kristiandat i di tur otro organisashon religioso falsu ta e promé fase di e “tribulashon grandi.” (Mat. 24:21; 2 Tes. 2:8) Pa hopi hende, e suseso akí lo ta un sorpresa. Dikon? Pasobra te ku e tempu ei, e prostituta ta konsiderá su mes un ‘reina ku hamas lo mira tristesa.’ Pero diripiente lo e deskubrí ku e tabata mal kiboká. Lo e ser eliminá rápidamente, komo si fuera den “ún dia.”—Rev. 18:7, 8.

6. Ken òf kiko lo lansa e atake kontra “Babilonia e Grandi”?

⁶ Ken òf kiko lo lansa e atake kontra “Babilonia e Grandi”? Un “bestia salbahe koló kòrá bibu” ku tin “dies kachu.” E buki di Revelashon ta indiká ku e bestia salbahe akí ta referí na Nashonnan Uní. E dies kachunan ta representá tur poder polítiko aktual ku ta apoyá e “bestia salbahe” akí. (Rev. 17:3, 5, 11, 12) Kon destruktivo e atake lo ta? E nashonnan ei lo plùnder e rikesa di e prostituta, kaba nan ta habrak’é i “kim’é kompletamente ku kandela.”—Lesa Revelashon 17:16. a

7. Kon e palabranan di Hesus na Mateo 24:21 i 22 a kumpli den e promé siglo, i kon nan lo kumpli den futuro?

⁷ Dios ta kòrta durashon di e atake. Nos Rei a revelá kiko lo sosodé na e punto ei durante e tribulashon grandi. Hesus a deklará: “Pa motibu di e skohínan, [Dios lo] hasi e dianan ei kòrtiku.” (Lesa Mateo 24:21, 22.) E palabranan di Hesus a kumpli na un eskala chikitu na aña 66 di e promé siglo ora ku Yehova a ‘hasi kòrtiku,’ òf kòrta, e durashon di e atake di e ehérsito romano kontra Herúsalèm. (Mar. 13:20) E akshon ei a pone ku kristiannan na Herúsalèm i Hudea por a skapa. Wèl, kiko lo pasa na eskala mundial durante e binidero tribulashon grandi? Ora Nashonnan Uní ataká religion, Yehova,  mediante nos Rei, lo kòrta e durashon di e atake ei pa nan no destruí e religion berdadero huntu ku e religionnan falsu. Pues, ora kaba ku tur organisashon religioso falsu, e úniko religion berdadero lo sobrebibí. (Sal. 96:5) Laga nos ban wak awor kiko ta e susesonan ku lo tuma lugá despues ku e parti akí di e tribulashon grandi pasa.

8, 9. Kiko lo por ta e fenómenonan selestial ku Hesus a referí na dje, i kon hende lo reakshoná riba loke nan mira?

⁸ Hesus su profesia tokante e último dianan ta indiká ku vários suseso importante lo tuma lugá durante e periodo ku ta hiba na Armagedon. E promé dos susesonan ku nos lo konsiderá ta ser menshoná den e Evangelionan di Mateo, Marko i Lukas.—Lesa Mateo 24:29-31; Mar. 13:23-27; Luk. 21:25-28.

⁹ Fenómenonan selestial. Hesus a profetisá: “Solo lo bira skur, luna lo no duna su lus, strea lo kai for di shelu.” Hende sigur lo no akudí mas serka lidernan religioso pa haña iluminashon òf guia. Hesus lo tabata referí tambe na fenómenonan sobrenatural den shelu? Kisas sí. (Isa. 13:9-11; Yoël 2:1, 30, 31) Kon hende lo reakshoná riba loke nan mira? Nan lo ta “den angustia, sin sa kiko pa hasi.” (Luk. 21:25; Sof. 1:17) Sí, enemigunan di e Reino di Dios—for di ‘rei te esklabo’—lo “desmayá di miedu i di ansha pa e kosnan ku lo bini” i lo kore buska kaminda pa skonde. Ma nan lo no haña niun lugá ku lo por protehá nan kontra e rabia di nos Rei.—Luk. 21:26; 23:30; Rev. 6:15-17.

10. Ki sentensia Hesus lo dikta, i kon apoyadó i opositor di e Reino di Dios lo reakshoná riba esei?

¹⁰ Separashon di karné for di kabritu. E ora ei tur enemigu di e Reino di Dios lo haña nan obligá di ta testigu di un suseso ku lo oumentá nan agonia. Hesus a deklará: “Nan lo mira e Yu di hende bini den nubia ku gran poder i gloria.” (Mar. 13:26) E despliegue sobrenatural akí di poder lo ta e señal ku Hesus a bini pa pronunsiá huisio, es desir, pa dikta sentensia. Den un otro parti di e mesun profesia akí tokante e último dianan, Hesus a duna mas detaye tokante e sentensia ku lo e dikta na e momento ei. Nos ta haña e informashon akí den e komparashon di karné i kabritu. (Lesa Mateo 25:31-33, 46.) Hende ku lealmente ta apoyá e Reino di Dios lo ser husgá pa Hesus komo “karné,” i nan lo ‘lanta nan kabes,’ pasobra nan ta realisá ku nan “liberashon ta yegando serka.” (Luk. 21:28) Ma opositornan di e Reino lo ser husgá pa Hesus komo “kabritu,” i nan lo “bati nan pechu di tristesa,” pasobra nan ta realisá ku ta “morto eterno” ta warda nan.—Mat. 24:30; Rev. 1:7.

11. Kiko nos tin ku kòrda segun ku nos ta analisá e susesonan ku lo bai tuma lugá?

¹¹ Despues ku Hesus dikta su sentensia riba “tur e nashonnan,” ainda vários suseso importante mester tuma lugá promé ku e guera di Armagedon kuminsá. (Mat. 25:32) Nos lo  konsiderá dos di e susesonan ei: e atake di Gòg i e rekohementu di e ungínan. Segun ku nos ta analisá e dos susesonan ei, nos tin ku kòrda ku e Palabra di Dios no ta revelá e momento eksakto ni e durashon di e susesonan akí. De echo, muy probablemente e kosnan akí lo tuma lugá rònt di e mesun tempu.

12. Ki bataya grandi Satanas lo lansa kontra e Reino?

¹² Un Atake Total. Gòg di Magòg lo ataká e restu di e ungínan i nan kompañeronan, e otro karnénan. (Lesa Ezekiel 38:2, 11.) E atake akí kontra gobernashon di e Reino, ku ya tin basta tempu establesí, lo ta Satanas su último bataya den e guera ku e ta hibando kontra e restu ungí for di tempu ku a sak’é for di shelu. (Rev. 12:7-9, 17) Foral desde ku a kuminsá rekohé e ungínan den e kongregashon kristian restorá, Satanas a purba di kaba ku nan prosperidat spiritual ku nan ta disfrutá di dje, ma e no a logra. (Mat. 13:30) Pero ora ku no tin niun religion falsu mas i ta parse ku e pueblo di Dios ta biba sin defensa, ‘sin muraya, sin grèndel ni porta,’ Satanas lo mira esaki komo un oportunidat di oro pa kaba ku nan. Lo e instigá su kompinchinan malbado pa lansa un atake total kontra e hendenan ku ta apoyá e Reino.

13. Kon Yehova lo intervení na fabor di su pueblo?

¹³ Ezekiel a deskribí kiko lo pasa. E profesia ei ta bisa relashoná ku Gòg: “Lo bo bini for di bo lugá, for di e partinan mas alehá di nort, abo i hopi pueblo huntu ku bo, nan tur riba kabai, un multitut grandi i un ehérsito poderoso; lo bo lanta bini kontra mi pueblo . . . manera un nubia ku ta tapa tera.” (Eze. 38:15, 16) Kon Yehova lo reakshoná riba e invashon aparentemente imparabel akí? Yehova ta deklará: “Mi furia lo subi den mi nanishi.” “Lo mi yama un spada.” (Eze. 38:18, 21; lesa Zakarías 2:8.) Yehova lo intervení na fabor di su sirbidónan riba tera. E intervenshon ei ta e guera di Armagedon.

14, 15. Despues ku e atake total di Satanas kuminsá, ki otro suseso lo tuma lugá na un dado momento?

¹⁴ Promé ku nos konsiderá kon Yehova lo defendé su pueblo durante e guera di Armagedon, laga nos pousa un ratu i analisá un otro suseso importante. Esaki lo tuma lugá despues ku Satanas su atake total kuminsá, pero promé ku Yehova intervení na Armagedon. Manera nos a menshoná na paragraf 11, e di dos suseso akí ta e rekohementu di e restu di e ungínan.

¹⁵ Rekohementu di e ungínan. Tantu Mateo komo Marko a skirbi loke Hesus a deklará tokante “e skohínan”—kristiannan ungí pa spiritu santu—komo parti di un seri di suseso ku lo tuma lugá promé ku komienso di Armagedon. (Wak paragraf 7.) Hesus tabata referí na su mes komo Rei ora el a profetisá: “Anto lo e manda e angelnan i lo reuní su skohínan for di  e kuater skinanan di mundu, for di e punta di mas leu di tera te na e punta di mas leu di shelu.” (Mar. 13:27; Mat. 24:31) Ora Hesus a papia di “reuní,” òf rekohé, na kiko e tabata referí? E no tabata papia tokante e seyamentu final di e restu di kristiannan ungí, ya ku esei ta sosodé djis promé ku e tribulashon grandi kuminsá. (Rev. 7:1-3) Mas bien, Hesus a referí na un suseso ku lo tuma lugá durante e binidero tribulashon grandi. Pues, aparentemente na un dado momento despues ku Satanas kuminsá ku su atake total kontra e pueblo di Dios, e ungínan ku ainda ta riba tera lo ser rekohé òf tumá na shelu.

16. Kon e ungínan resusitá lo partisipá den e guera di Armagedon?

¹⁶ E rekohementu di e restu ungí lo terminá promé ku e siguiente suseso, esta, Armagedon? Parse ku sí, ya ku e taiming di e rekohementu ta indiká ku tur ungí lo ta den shelu promé ku Dios su guera di Armagedon kuminsá. Den shelu, e 144.000 ko-gobernantenan di Kristu lo risibí outoridat pa huntu kuné nan hasi uso di un “bara di heru” di destrukshon kontra tur e enemigunan di e Reino di Dios. (Rev. 2:26, 27) E ora ei, huntu ku angelnan poderoso, e ungínan resusitá lo sigui tras di Kristu, e Rei Guerero, ora e sali pa bai konfrontá e “ehérsito poderoso” di enemigu ku ta kla pa ataká nan proi, esta, e pueblo di Yehova. (Eze. 38:15) Ora ku e konfrontashon violento ei tuma lugá, e guera di Armagedon a kuminsá!—Rev. 16:16.

17. Kiko lo pasa ku “e kabritunan” durante Armagedon?

¹⁷ Hesus ta ehekutá huisio. E guera di Armagedon lo ta e kulminashon di e tribulashon grandi. Na e momento ei, Hesus lo kumpli ku un tarea adishonal. Fuera di ta Hues di “tur e nashonnan,” lo e bira tambe Esun ku ta ehekutá huisio kontra e nashonnan, esta, kontra tur e hendenan ku anteriormente a ser kalifiká komo “kabritu.” (Mat. 25:32, 33) Ku “un spada largu i skèrpi,” nos Rei lo “dal e nashonnan.” Sí, tur hende ku ta manera kabritu—for di “rei” te “esklabo”—“lo haña morto eterno.”—Rev. 19:15, 18; Mat. 25:46.

18. (a) Kon situashon lo kambia pa “e karnénan”? (b) Kon Hesus lo kompletá su viktoria?

¹⁸ Wak kon situashon a kambia pa e hendenan ku a risibí e huisio di Hesus ku nan ta “karné”! Na lugá di Satanas su ehérsito inmenso di “kabritu” trapa nan mata, “un multitut grandi” di “karné” aparentemente indefenso lo sobrebibí e atake enemigu i lo sali bibu for di “e tribulashon grandi.” (Rev. 7:9, 14) E ora ei, despues ku Hesus a vense i eliminá tur enemigu humano di e Reino di Dios, lo e benta Satanas ku su demoñonan den e abismo. Lo tene nan einan den un estado inaktivo, manera morto, pa 1.000 aña.—Lesa Revelashon 6:2; 20:1-3.

19, 20. Kon nos por pone na práktika e lès ku tin den e palabranan ku nos ta haña na Isaías 26:20 i 30:21?

¹⁹ Kon nos por prepará nos mes pa e susesonan ku pronto lo sagudí mundu? Algun aña pasá E Toren di Vigilansia a bisa: “Sobrebibensia lo dependé di obedensia.” Dikon esei ta asina? Nos ta haña e kontesta den e spièrtamentu ku Yehova a duna e hudiunan ku tabata prezu na Babilonia di antigwedat. Yehova a profetisá ku Babilonia lo a ser konkistá pa un otro nashon, pero kiko e pueblo di Dios mester a hasi pa prepará nan mes pa e suseso ei? Yehova a deklará: “Bini, mi pueblo, drenta den bo kambernan i sera bo portanan bo tras; skonde pa un poko tempu, te ora indignashon pasa.” (Isa. 26:20) Tuma nota di e verbonan den e versíkulo akí: “bini,” “drenta,” “sera,” “skonde”; tur ta den forma imperativo; ta òrdu nan ta. E hudiunan ku a obedesé e òrdunan ei lo a keda den kas, leu for di e sòldánan konkistador ku tabata kana pafó riba kaya. Pues, pa nan a sobrebibí, nan mester a obedesé e instrukshonnan di Yehova. b

²⁰ Ki lès nos ta saka for di esaki? Wèl, meskos ku den kaso di e sirbidónan di Dios di antigwedat, nos mester obedesé e instrukshonnan di Yehova pa nos por sobrebibí e susesonan ku ta na kaminda. (Isa. 30:21) Nos ta risibí e instrukshonnan ei via e kongregashon. Pues, nos ke kria e kustumber di obedesé ku henter nos kurason e instrukshonnan ku nos ta risibí. (1 Huan 5:3) Si for di awor nos ta hasi esei, nos lo ta mas inkliná den futuro pa obedesé di buena gana i asina risibí e protekshon di nos Tata, Yehova, i di nos Rei, Hesus. (Sof. 2:3) E protekshon divino ei lo duna nos e oportunidat di mira ku nos propio wowo kon e Reino di Dios lo eliminá su enemigunan kompletamente. Ki un suseso inolvidabel!