1, 2. (a) Wanem nao showimaot King blo iumi start for rul lo 1914? (b) Wanem nao bae iumi storyim lo disfala chapter?

 TAEM iumi storyim olketa samting wea Kingdom blo God duim finis nomata olketa enemy againstim datfala Kingdom, datwan barava strongim faith blo iumi. (Sams 110:2) King blo iumi hem hipimap staka pipol wea olsem army wea willing for preach. Hem mekem pipol blo hem klin saed lo worship and wei blo olketa. And nomata olketa enemy blo Kingdom duim staka samting for divaedem iumi, iumi gohed garem wan mind evriwea lo world distaem. Olketa samting hia and olketa nara samting wea Kingdom duim finis wea iumi storyim lo disfala buk, hem showimaot start lo 1914, King blo iumi rul finis midolwan olketa enemy blo datfala Kingdom.

² Klosap nao Kingdom bae duim tu olketa samting wea bae mekem man sapraes fogud. Hem bae “kam” for “smasem and finisim” olketa enemy blo hem. (Matt. 6:10; Dan. 2:44, NW) Bat bifor datwan happen, olketa nara important samting bae happen firstaem. Wanem nao olketa samting hia? Samfala profesi lo Bible bae ansarem datfala kwestin. Iumi storyim samfala profesi hia for savve lo olketa samting wea bae klosap for happen.

3. Wanem nao first samting wea iumi weitim for happen?

³ Talemaot Peace. Lo leta wea aposol Paul raetem for olketa lo Thessalonica, hem storyim first samting wea iumi weitim for happen. (Readim 1 Thessalonica 5:2, 3.) Lo datfala leta Paul storyim “day bilong Jehovah,” wea bae start taem olketa attakim “Bigfala Babylon.” (Rev. 17:5) Bat bifor day blo Jehovah hem start, olketa world leader bae sei, “Iumi garem peace and stap gud nao!” Maet olketa announcem diswan wantaem nomoa, or maet hem samting wea olketa announcem tu-thri taem. Waswe, olketa bigman blo religion bae joinim olketa tu for talemaot diswan? From olketa part lo world, maet olketa bae joinim olketa world leader for sei, “Peace stap nao!” (Jer. 6:14; 23:16, 17, NW; Rev. 17:1, 2) Taem olketa talemaot iumi  garem peace and stap gud, datwan showimaot day blo Jehovah bae start nao. Olketa enemy blo Kingdom blo God bae “hard for olketa ranawe from diswan.”

4. Wanem gud samting nao iumi kasem taem iumi minim datfala profesi blo Paul abaotem for garem peace and stap gud hem important?

⁴ Wanem gud samting nao iumi kasem taem iumi minim hao disfala profesi hem important? Paul sei: “Iufala no stap long darkness. Man wea stap long darkness bae seke long datfala day, olsem man for steal bae seke taem daylaet kasem hem.” (1 Thess. 5:3, 4) Iumi no olsem pipol lo world wea no minim olketa samting wea happen distaem, and olketa samting wea bae happen lo future. Lo wanem wei nao disfala profesi abaotem peace and wei for stap gud bae kamap tru? Iumi mas weit and lukim wanem bae happen. So “iumi mas gohed wekap and garem gudfala tingting.”—1 Thess. 5:6; Sefenaea 3:8.

5. Wanem nao bae happen wea showimaot datwan hem start blo “bigfala trabol”?

⁵ Attakim religion. Paul hem sei: “Long taem wea pipol sei: ‘Iumi garem peace and stap gud nao!’ then seknomoa olketa bae finis.” Olsem thunder hem bosta bihaen laetning, so taem olketa sei “Iumi garem peace and stap gud nao! then seknomoa olketa bae finis.” Wanem nao bae finis? First samting, hem “Bigfala Babylon,” wea hem nao evri false religion wea Bible kolem tu lo “jury woman.” (Rev. 17:5, 6, 15) Taem olketa distroem olketa religion wea sei olketa Christian and olketa nara false religion, datwan hem start blo “bigfala trabol.” (Matt. 24:21; 2 Thess. 2:8) Staka pipol bae seke lo diswan. Why nao olsem? Bikos go kasem datfala taem, datfala jury woman ting lo hemseleva olsem “wanfala queen” and “no enitaem bae [hem] sorre.” Bat seknomoa hem bae luksavve tingting blo hem no stret. Kwiktaem nomoa bae hem finis, olsem “insaed wanfala day nomoa.”—Rev. 18:7, 8.

6. Hu or wanem nao bae attakim “Bigfala Babylon”?

⁶ Hu or wanem nao bae attakim “Bigfala Babylon”? Wanfala “wild animal” wea garem “tenfala horn.” Bible buk Revelation showimaot disfala wild animal hem nao United Nations (UN). Datfala tenfala horn hem piksarem evri gavman distaem wea sapotim disfala “wild animal wea kala bilong hem red.” (Rev. 17:3, 5, 11, 12) Wanem nao olketa bae duim for attakim hem? Olketa gavman wea sapotim UN bae tekem evri riches blo datfala jury woman, distroem hem, and “bonem hem long fire.”—Readim Revelation 17:16. a

7. Hao nao toktok blo Jesus lo Matthew 24:21, 22 kamap tru lo first century C.E., and hao nao datfala toktok bae kamap tru lo future?

⁷ Datfala trabol bae no gohed for longtaem. King blo iumi storyim moa wanem bae happen lo taem blo bigfala trabol. Jesus sei: “From hem tingim olketa wea hem chusim, hem bae no letem datwan for gohed” for longfala taem. (Readim Matthew 24:21, 22.) Disfala toktok blo Jesus hem kamap tru firstaem lo 66 C.E. taem Jehovah no letem attak blo army blo Rome  againstim Jerusalem for “gohed for longfala taem.” (Mark 13:20) Samting wea Jehovah duim sevem laef blo olketa Christian lo Jerusalem and lo Judea. So wanem nao bae happen lo full world lo taem blo bigfala trabol? Jehovah bae iusim King blo iumi for no letem attak blo United Nations againstim olketa religion for “gohed for longfala taem,” mekem tru religion no finis witim false religion. So taem evri false religion finis, wanfala tru religion nomoa bae stap. (Sams 96:5) Distaem bae iumi storyim olketa samting wea bae happen bihaen evri false religion finis.

8, 9. Wanem saen wea showaot lo skae nao Jesus maet minim, and wanem nao bae pipol duim taem olketa lukim datwan?

⁸ Profesi blo Jesus abaotem olketa last day showimaot samfala important samting bae happen wea lead go lo Armageddon. Bae iumi storyim tufala samting wea Gospel blo Matthew, Mark, and Luke storyim.—Readim Matthew 24:29-31; Mark 13:23-27; Luke 21:25-28.

⁹ Olketa saen wea showaot lo skae. Jesus sei: “Sun bae start for dark nao, and moon bae no shaen kam. And olketa star bae foldaon from skae.” Pipol bae no depend lo olketa bigman lo religion for givim direction lo olketa. And maet Jesus minim tu olketa saen bae showaot lo skae. (Isa. 13:9-11; Joel 2:1, 30, 31, NW) Wanem nao bae pipol duim taem olketa lukim wanem hem happen? Olketa bae “kasem barava hard taem” bikos olketa “no savve wanem for duim.” (Luke 21:25; Sefenaea 1:17) Tru nao, olketa enemy blo Kingdom blo God, start lo olketa ‘king go kasem olketa slave,’ bae “fraet fogud and wari long olketa samting wea bae happen” and bae lukaotem ples for haed. Nomata olsem, bae olketa no faendem eni sef ples for haed from kros blo King blo iumi.—Luke 21:26; 23:30; Rev. 6:15-17.

10. Wanem nao Jesus bae duim taem hem kam for judgem pipol, and wanem nao pipol wea sapotim Kingdom bae duim, and wanem nao pipol wea againstim Kingdom bae duim?

¹⁰ Jesus kam for judgem pipol. Evri enemy blo Kingdom blo God bae mas lukim wanfala samting wea bae mekem olketa wari go moa. Jesus sei: “Olketa bae lukim Son bilong man hem kam long olketa cloud witim bigfala paoa and glory.” (Mark 13:26) Disfala samting wea happen hem showimaot Jesus hem kam nao for judgem pipol. Lo nara part blo disfala sem profesi abaotem olketa last day, Jesus storyim samfala samting moa wea bae hem duim taem wea hem bae judgem pipol. Iumi lanem datwan lo datfala tokpiksa abaotem olketa sheepsheep and olketa goat. (Readim Matthew 25:31-33, 46.) Jesus bae judgem pipol wea faithful for sapotim Kingdom blo God olsem olketa “sheepsheep,” and olketa bae “apim hed bilong [olketa]” and luksavve “taem for God sevem [olketa] hem klosap.” (Luke 21:28) Bat Jesus bae judgem olketa wea  againstim Kingdom olsem “olketa goat,” and olketa bae “hitim chest bilong olketa seleva from olketa sorre tumas,” and olketa luksavve olketa redi for “dae and no laef moa.”—Matt. 24:30; Rev. 1:7.

11. Wanem nao iumi mas tingim taem iumi storyim olketa samting hia wea bae happen?

¹¹ Bihaen Jesus judgem “evriwan long full world,” samfala samting moa bae happen bifor Armageddon hem start. (Matt. 25:32) Bae iumi storyim tufala samting. First samting, attak blo Gog, and nara samting hem for hipimap olketa anointed Christian. Taem iumi storyim tufala samting hia, iumi mas tingim Bible no talem barava taem wea olketa samting hia bae happen. Luk olsem maet wanfala samting bae happen and no finis yet then nara samting bae happen nao.

12. Wanem nao bae Satan duim for attakim Kingdom?

¹² Attakim pipol blo God. Gog blo Magog bae attakim olketa anointed Christian wea stap yet lo earth witim olketa nara sheepsheep. (Readim Ezekiel 38:2, 11, NW.) Datfala attak againstim Kingdom and olketa anointed Christian hem lastfala faet blo Satan. Satan bin startim disfala faet start lo taem wea olketa torowem hem kam daon from heven. (Rev. 12:7-9, 17) Start taem Jesus hipimap moa olketa anointed Christian insaed Christian kongregeson, Satan waka hard for spoelem wei wea olketa gohed gud lo spiritual wei, bat hem nating win. (Matt. 13:30) Bat taem evri false religion finis and luk olsem pipol blo God no garem eni samting for protectim olketa olsem “ston wall, olketa bar, or gate,” Satan bae lukim datwan olsem chance nao for bihaenem olketa gavman blo man for finisim olketa wea sapotim Kingdom.

13. Wanem nao Jehovah bae duim for sevem pipol blo hem?

¹³ Ezekiel storyim wanem bae happen. Profesi sei olsem abaotem Gog: “Bae yu lusim kam ples blong yu farawe long not, an lidim kam wanfala bikfala ami wea hemi barava strong fogud, wetem olketa soldia from olketa narafala kantri hu i ran long olketa hos. Bae yufala plande fogud, an bae yufala kavarem nomoa olketa pipol blong mi . . . olsem wanfala bikfala klaod.” (Esikiel 38:15, 16) Wanem nao Jehovah bae duim taem hem luk olsem olketa enemy bae win? Jehovah sei: “Bae mi barava kros fogud,” and ‘bae mi sendem olketa enemi fo faet agensim Gog.’ (Esikiel 38:18, 21; readim Zechariah 2:8, NW.) Jehovah bae faet for pipol blo hem lo earth. Datfala faet nao hem Armageddon.

14, 15. Wanem nao nara samting wea bae happen bihaen Satan attakim pipol blo God?

¹⁴ Bifor iumi storyim wanem Jehovah bae duim for protectim pipol blo hem lo taem blo Armageddon, bae iumi storyim nara important samting wea bae happen. Diswan bae happen bihaen Satan attakim pipol blo God and bifor Armageddon start. Olsem paragraf 11 storyim, mek-tu samting wea bae happen hem for hipimap olketa anointed Christian wea stap yet lo earth.

 ¹⁵ Hipimap olketa anointed Christian. Matthew and Mark storyim wanem Jesus talem abaotem samting wea bae happen lo “olketa wea hem chusim,” wea hem nao olketa anointed Christian. Diswan hem wanfala lo olketa samting wea bae happen bifor Armageddon start. (Lukim paragraf 7.) Jesus profesi abaotem hemseleva taem hem King. Hem sei: “Then hem bae sendem go olketa angel and bae hipimap olketa wea hem chusim from skae and earth.” (Mark 13:27; Matt. 24:31) Wanem kaen wei for hipimap olketa anointed Christian nao Jesus storyim? Jesus no storyim taem wea olketa anointed Christian bae kasem lastfala mark, wea bae happen just bifor bigfala trabol hem start. (Rev. 7:1-3) Bat hem storyim wanfala samting wea bae happen lo taem blo datfala big trabol. So luk olsem, bihaen Satan start for attakim pipol blo God, then olketa anointed Christian wea stap yet lo earth bae go ap lo heven.

16. Wanem nao olketa anointed Christian wea laef bak bae duim lo war blo Armageddon?

¹⁶ Waswe, wei for hipimap olketa anointed Christian bae finis bifor Armageddon start? Taem wea olketa bae hipimap olketa anointed Christian for go ap lo heven hem bae happen firstaem bifor war blo God, Armageddon, hem start. Lo heven, 144,000 wea rul witim Christ bae kasem paoa for joinim Jesus for iusim “wanfala iron stik” for distroem evri enemy blo Kingdom blo God. (Rev. 2:26, 27) Then Christ, datfala King wea garem paoa for faet, bae leadim olketa angel and olketa anointed Christian wea laef bak for faetem “bikfala ami” blo olketa enemy wea kam for faetem pipol blo Jehovah. (Esikiel 38:15) Datwan nao start blo datfala war blo Armageddon!—Rev. 16:16.

17. Wanem nao bae happen lo “olketa goat” lo Armageddon?

¹⁷ Finisim olketa enemy. War blo Armageddon bae hem last part blo datfala big trabol. Lo datfala taem, Jesus bae duim nara samting moa. Bihaen Jesus judgem “evriwan long full world” hem bae kamap tu man for finisim evri pipol wea hem judgem finis olsem “olketa goat.” (Matt. 25:32, 33) King blo iumi bae iusim “longfala sword wea sharp . . . for finisim evri kantri long world.” Evri pipol wea olsem goat, nomata “olketa king” go kasem olketa “slave,” “bae dae and no laef moa.”—Rev. 19:15, 18; Matt. 25:46.

18. (a) Wanem gud samting nao bae “olketa sheepsheep” kasem? (b) Wanem nao Jesus bae duim for winim nao olketa enemy blo hem?

¹⁸ Pipol wea Jesus judgem olketa olsem “olketa sheepsheep” bae kasem barava gud samting! Datfala “big crowd” blo “olketa sheepsheep” wea luk olsem olketa no garem eni protection bae sef taem datfala big army blo Satan, wea hem nao “olketa goat” attakim olketa. Olketa bae “no dae long datfala big trabol.” (Rev. 7:9, 14) Bihaen Jesus winim and finisim evri enemy blo Kingdom blo God, bae hem torowem Satan and olketa Demon insaed lo hol wea deep tumas. Olketa bae stap lo there  for wan thousand year and bae olketa no savve duim eni samting for spoelem pipol.—Readim Revelation 6:2; 20:1-3.

19, 20. Wanem nao iumi savve duim for followim wanem Isaiah 26:20 and Aesaea 30:21 talem?

¹⁹ Wanem nao iumi savve duim for redi for olketa big samting wea bae happen lo future? Samfala year wea go pas, Wastaoa hem sei: “Wei for stap laef hem depend long wei for obey.” Why nao datwan important? Ansa stap lo warning wea Jehovah talem for olketa Jew wea prisoner lo Babylon bifor. Jehovah talem finis Babylon bae distroe, bat wanem nao pipol blo Hem mas duim for redi for samting wea bae happen? Jehovah sei: “Olketa pipol bilong mi, go insaed olketa rum bilong iufala, and satem olketa door. Haed for lelebet taem go kasem taem kros bilong God hem finis.” (Isa. 26:20, NW) Lukim olketa toktok wea insaed lo disfala scripture. Hem sei for “go insaed,” “satem,” and “haed.” Olketa toktok hia minim man mas duim samting. Olketa Jew wea obeyim olketa toktok hia bae stap sef insaed haos blo olketa from olketa soldia aotsaed lo olketa street. So for olketa stap sef, olketa mas obeyim olketa instruction wea kam from Jehovah. b

²⁰ Wanem nao iumi lanem from datwan? Olsem pipol blo God bifor, for iumi sef lo taem wea olketa samting bae happen lo future, iumi mas obeyim olketa instruction wea kam from Jehovah. (Aesaea 30:21) Jehovah iusim kongregeson for givim iumi olketa instruction olsem. So iumi barava laek for obeyim olketa instruction wea iumi kasem. (1 John 5:3) Sapos iumi duim olsem distaem, iumi bae willing for obey lo future and Dadi blo iumi, Jehovah, and King blo iumi, Jesus, bae protectim iumi. (Sefenaea 2:3) Taem Jehovah and Jesus sevem iumi, bae iumi lukim wanem Kingdom blo God bae duim for finisim evri enemy blo hem. Datwan hem samting wea bae iumi no savve forgetim!