1, 2. (a) Ano an nagpapakita nga an aton Hadi nagmamando na tikang pa han 1914? (b) Ano an aton paghihisgotan dinhi hini nga kapitulo?

NAPAPARIG-ON gud an aton pagtoo ha pagrepaso han mga nahimo han Ginhadian han Dios ha ‘butnga han mga kaaway’ hito. (Sal. 110:2) An aton Hadi nagbangon hin usa nga panon hin kinaburut-on nga magsarangyaw. Hiya naglilimpyo ngan nag-uuray han iya mga sumurunod ha espirituwal ngan ha moral. Ngan bisan pa han ngatanan nga pangalimbasog han mga kaaway han Ginhadian ha pagbahin-bahin ha aton, nagpapahimulos kita yana hin bug-os-kalibotan nga pagkaurosa. Ini ngan an damu pa nga nahimo han Ginhadian klaro nga nagpapamatuod nga nagmamando na an aton Hadi ha ‘butnga han mga kaaway’ han Ginhadian tikang pa han 1914.

² Mas urusahon pa an hihimoon han Ginhadian ha hirani nga tidaraon. ‘Makanhi’ ito ha ‘pagpinit-pinit ngan pag-anaw’ han mga kaaway. (Mat. 6:10; Dan. 2:44) Kondi antes hini, may pipira nga importante nga mahitatabo. Ano ito? Babatunon ito han pipira nga tagna han Biblia. Paghisgotan naton an pipira hito basi hibaroan kon ano pa an mahitatabo.

3. Ano an siyahan nga panhitabo nga aton ginpapamulat?

³ Pagdeklara han kamurayawan. Ha surat ni apostol Pablo ha mga taga-Tesalonica, iginhulagway niya an siyahan nga panhitabo nga aton ginhuhulat. (Basaha an 1 Tesalonica 5:2, 3.) Gin-unabi niya an “adlaw ni Jehova,” nga magtitikang ha pag-atake ha “Babilonya nga Gamhanan.” (Pah. 17:5) Kondi antes magtikang an adlaw ni Jehova, an mga nasud masiring, “Kamurayawan ngan kasigurohan!” Ini nga mga pulong puydi magtudlok ha usa nga deklarasyon o ha serye hin makatirigamnan nga deklarasyon. Bahin ba hini an mga lider han relihiyon? Tungod kay bahin hira han kalibotan, posible nga maapi hira ha mga nasud ha pagsiring, May kamurayawan! (Jer. 6:14; 23:16, 17; Pah. 17:1, 2) Ito nga pagdeklara han kamurayawan ngan kasigurohan tigaman nga magtitikang na an adlaw ni Jehova. An mga kaaway han Ginhadian han Dios ‘diri gud makakapalagiw.’

4. Kay ano nga mapulsanon nga masabtan naton an importansya han tagna ni Pablo mahitungod han pagdeklara han kamurayawan ngan kasigurohan?

 ⁴ Kay ano nga mapulsanon nga masabtan an importansya hini nga tagna? Hi Pablo nagsiring: “Waray kamo ha kasisidman, salit diri kamo pariho han mga kawatan nga maaabtan hito nga adlaw.” (1 Tes. 5:3, 4) Diri pariho ha katawohan ha kabug-osan, maaram kita han dadangatan han panhitabo yana. Ha ano nga paagi matutuman an tagna han kamurayawan ngan kasigurohan? Mahibabaroan naton ito ha paglabay han panahon. Salit, “padayon kita nga mag-agma ngan tipigan naton an aton maopay nga panhunahuna.”—1 Tes. 5:6; Sep. 3:8.

5. Paonan-o magtitikang an “daku nga kasakitan”?

⁵ Pag-atake ha relihiyon. Hinumdumi nga hi Pablo nagsurat: “Ha panahon nga nagsisiniring hira: ‘Kamurayawan ngan kasigurohan!’ [katapos] tigda nga maabot [dayon] ha ira an kabungkagan.” Sugad la nga an kidlat ginsusundan dayon hin dalugdog, an pagsiring “Kamurayawan ngan kasigurohan!” susundan dayon hin ‘tigda nga kabungkagan.’ Ano an mabubungkag? Siyahan, an “Babilonya nga Gamhanan,” an imperyo han buwa nga relihiyon ha kalibotan, nga gintatawag liwat nga “puta.” (Pah. 17:5, 6, 15) Ini nga kabungkagan han Kakristianohan ngan han ngatanan nga iba nga buwa nga relihiyoso nga organisasyon an tinikangan han “daku nga kasakitan.” (Mat. 24:21; 2 Tes. 2:8) Damu an makakalasan hini. Kay ano? Tungod kay tubtob hito nga takna, gintatagad han puta nga usa hiya nga “rayna” nga ‘diri gud makakaeksperyensya hin kabido.’ Pero tigda na la nga makakamata hiya ha kamatuoran. Tigda nga bubungkagon hiya, sugad hin ha sulod hin “usa ka adlaw” la.—Pah. 18:7, 8.

6. Hin-o o ano an maatake ha “Babilonya nga Gamhanan”?

⁶ Hin-o o ano an maatake ha “Babilonya nga Gamhanan”? Usa nga “mapintas nga hayop” nga may “napulo nga sungay.” Iginpapatin-aw han libro han Pahayag nga ini nga mapintas nga hayop nagtutudlok ha United Nations (UN). An napulo nga sungay nagrirepresentar ha ngatanan nga politikal nga gahum yana nga nasuporta hinin “pula nga mapintas nga hayop.” (Pah. 17:3, 5, 11, 12) Mationan-o kagrabe ito nga pag-atake? Titikasan han mga membro han UN an puta, lalamuyon hiya, ngan “bug-os nga susunugon.”—Basaha an Pahayag 17:16. *

7. Paonan-o natuman an mga pulong ni Jesus ha Mateo 24:21, 22 han siyahan nga siglo C.E., ngan paonan-o ito matutuman ha tidaraon?

⁷ Pahahaliputon an mga adlaw. Iginpahayag han Hadi kon ano an mahitatabo ha daku nga kasakitan. Hi Jesus nagsiring: “Tungod han mga pinili, pahahaliputon ito nga mga adlaw.” (Basaha an Mateo 24:21, 22.) Siyahan nga natuman an ginsiring ni Jesus han 66 C.E. han ‘ginpahalipot’ ni Jehova an pag-atake han Romano nga kasundalohan ha Jerusalem. (Mar. 13:20) Tungod hito, nagkaada higayon an mga Kristiano ha Jerusalem ngan Judea nga makapalagiw. Paonan-o liwat ito matutuman ha bug-os nga kalibotan durante han tiarabot nga daku nga kasakitan? Pinaagi han aton Hadi, “pahahaliputon”  ni Jehova an pag-atake han UN ha mga relihiyon basi an tinuod nga relihiyon diri mabungkag kaupod han buwa. Salit, mabubungkag an ngatanan nga buwa nga relihiyon, kondi magpapabilin an usa nga tinuod. (Sal. 96:5) Yana, paghisgotan naton an mga mahitatabo katapos hini nga bahin han daku nga kasakitan.

8, 9. Ano nga panhitabo ha kalangitan an gintutudlok ni Jesus, ngan ano an magigin reaksyon han mga tawo?

⁸ Iginpapakita han tagna ni Jesus nga ha kataposan nga mga adlaw may mga importante nga mahitatabo antes han Armagedon. An siyahan nga duha nga panhitabo nga aton paghihisgotan gin-unabi ha mga Ebanghelyo nira Mateo, Marcos, ngan Lucas.—Basaha an Mateo 24:29-31; Mar. 13:23-27; Luc. 21:25-28.

⁹ Makatirigamnan nga mga panhitabo ha kalangitan. Hi Jesus nagtagna: “An adlaw magsisirom, an bulan diri maglalamrag, an mga bitoon magkakahulog tikang ha langit.” Sigurado nga diri na lalaoman an mga lider han relihiyon ha paghatag hin kahayag. Kondi, posible ba gihap nga literal nga urusahon nga mga panhitabo ha langit an iginpapasabot ni Jesus? Bangin. (Isa. 13:9-11; Joel 2:1, 30, 31) Ano an magigin reaksyon han mga tawo ha ira makikita? Hira ‘masasakit’ tungod kay diri hira maaram kon ano an bubuhaton. (Luk. 21:25, Baraan nga Kasuratan; Sep. 1:17) Oo, an mga kaaway han Ginhadian han Dios—tikang ha “mga hadi” ngadto ha “mga uripon”—“madidismayo tungod ha kahadlok ngan pagpinamulat han mga mahitatabo,” ngan matatarantar ha pagtago. Kondi, waray hira matatagoan nga makakapanalipod ha ira ha kasina han aton Hadi.—Luc. 21:26; 23:30; Pah. 6:15-17.

10. Ano nga paghukom an ipapahayag ni Jesus, ngan ano an magigin reaksyon han mga nasuporta ngan han mga kaaway han Ginhadian han Dios?

¹⁰ Kapahayagan han paghukom. An mga kaaway han Ginhadian han Dios mapipiritan ha pagkita ha usa nga panhitabo nga dugang nga magsasakit ha ira. Hi Jesus nagsiring: “Makikita nira an Anak han tawo nga nalusad upod han mga dampog nga may daku nga gahum ngan himaya.” (Mar. 13:26) Ini nga urusahon nga pagpakita hin gahum tigaman nga umabot na hi Jesus basi maghukom. Ha kadugtong nga bahin hini nga tagna mahitungod han kataposan nga mga adlaw, naghatag hi Jesus hin dugang nga detalye han pagbubuhaton nga paghukom. Makikita naton ito ha ilustrasyon han karnero ngan kanding. (Basaha an Mateo 25:31-33, 46.) An maunungon nga nasuporta ha Ginhadian han Dios huhukman sugad nga “mga karnero” ngan ‘mahangad’ tungod kay maaram hira nga an ira “katalwasan hirani na.” (Luc. 21:28) Kondi an nakontra ha Ginhadian huhukman sugad nga “mga kanding” ngan ‘magpupukpok han ira dughan ha kasubo,’ kay maaram hira nga “permanente nga kamatayon” an ira dadangatan.—Mat. 24:30; Pah. 1:7.

11. Ano an sadang naton hinumdoman samtang gintatagad naton an tiarabot nga mga panhitabo?

 ¹¹ Katapos hukman ni Jesus an “ngatanan nga nasud,” may pipira pa nga importante nga mahitatabo antes magtikang an girra han Armagedon. (Mat. 25:32) Paghisgotan naton an duha hito: an pag-atake ni Gog ngan an pagtirok han mga dinihogan. Samtang gin-uusisa naton ini nga mga panhitabo, hinumdumi nga waray ihayag han Pulong han Dios an eksakto nga panahon han katumanan hito. Ngani, baga hin mag-aábot inin duha nga panhitabo.

12. Paonan-o hihimoon ni Satanas an iya ultimo nga pag-atake ha Ginhadian?

¹² Ultimo nga pag-atake. Aatakehon ni Gog han Magog an nabibilin nga mga dinihogan ngan an “iba nga mga karnero” nga kaupod nira. (Basaha an Esekiel 38:2, 11.) Maiha na nga nakikig-away hi Satanas ha mga dinihogan nga nanhibilin tikang pa han paiwason hiya ha langit, pero ini an iya magigin ultimo nga pakig-away ha naestablisar nga Ginhadian. (Pah. 12:7-9, 17) Tikang han matirok an mga dinihogan ha iginpahiuli nga Kristiano nga kongregasyon, pursigido hi Satanas ha pagdaot han ira espirituwal nga kahimyang—pero pakyas hiya. (Mat. 13:30) Kondi kon waray na an mga buwa nga relihiyon ngan an katawohan han Dios sugad na hin “waray mga kuta, ngan waray bisan mga trangka o mga ganghaan,” tatagdon ito ni Satanas nga higayon ha pag-atake. Salit, aaghaton niya an iya magraot nga alepores basi atakehon an mga nasuporta ha Ginhadian.

13. Paonan-o magios hi Jehova basi panalipdan an iya katawohan?

¹³ Iginhulagway ni Esekiel kon ano an mahitatabo. Mahitungod kan Gog, an tagna nasiring: “Ikaw makanhi tikang ha imo lugar tikang ha gihihirayoi nga mga bahin ha amihanan, ikaw, ngan an damu nga mga katawohan nga upod mo, hira ngatanan mananakay ha kakabayohan, usa ka daku nga panon ngan makusog nga kasundalohan. Ngan ikaw makanhi patok han akon katawohan nga Israel, sugad hin usa nga dampog ha pagtabon han tuna.” (Esek. 38:15, 16) Ano an magigin reaksyon ni Jehova hinin baga hin diri mapupugngan nga pag-atake? “An akon kapungot masaka ngada ha akon mga pasngawan,” siring ni Jehova. “Ako magpapatawag para hin usa nga kampilan.” (Esek. 38:18, 21; basaha an Sakarias 2:8.) Magios hi Jehova basi panalipdan an iya mga surugoon ha tuna. Ito nga iya paggios amo an girra han Armagedon.

14, 15. Ano an mahitatabo ha bisan ano nga takna katapos magtikang an ultimo nga pag-atake ni Satanas?

¹⁴ Antes naton paghisgotan kon paonan-o papanalipdan ni Jehova an iya katawohan ha girra han Armagedon, tagdon anay naton an usa pa nga importante nga panhitabo. Ito mahitatabo ha bisan ano nga takna butnga han pagtikang han ultimo nga pag-atake ni Satanas ngan han pagtikang han Armagedon. Sumala ha parapo 11, iton ikaduha nga panhitabo amo an pagtirok han nanhibilin nga mga dinihogan.

¹⁵ Pagtirok han mga dinihogan. Han unabihon nira Mateo ngan Marcos an serye han mahitatabo antes han Armagedon, hira nga duha naghisgot han ginsiring ni Jesus mahitungod han “mga pinili”—an dinihogan han espiritu nga mga Kristiano.  (Kitaa an parapo 7.) Ha paghisgot ha iya kalugaringon sugad nga Hadi, hi Jesus nagtagna: “Susugoon niya an mga anghel ngan titirukon an iya mga pinili tikang ha upat nga direksyon han hangin, tikang ha kataposan han tuna tubtob ha kataposan han langit.” (Mar. 13:27; Mat. 24:31) Ano nga ‘pagtirok’ an ginhihisgotan dinhi ni Jesus? Diri ini an ultimo nga pagselyo han nanhibilin nga dinihogan nga mga Kristiano nga mahitatabo antes magtikang an daku nga kasakitan. (Pah. 7:1-3) Lugod, an iya ginhihisgotan usa nga panhitabo nga mahitatabo durante han tiarabot nga daku nga kasakitan. Salit klaro nga titirukon ha langit an nabibilin pa nga mga dinihogan ha tuna katapos magtikang an ultimo nga pag-atake ni Satanas ha katawohan han Dios.

16. Ano an magigin bahin han binanhaw nga mga dinihogan ha girra han Armagedon?

¹⁶ Ano an koneksyon han pagtirok han nanhibilin nga mga dinihogan ha sunod nga mahitatabo, an Armagedon? Iginpapakita han panahon han pagtirok nga aadto na ha langit an ngatanan nga dinihogan antes magtikang an girra han Dios han Armagedon. Ha langit, an 144,000 nga igkasi-magmarando han Kristo makarawat hin awtoridad ha pakigbahin ha paggamit hin “tungkod nga puthaw” ha pagbungkag han ngatanan nga kaaway han Ginhadian han Dios. (Pah. 2:26, 27) Katapos, an gamhanan nga mga anghel ngan an binanhaw nga mga dinihogan masunod han Kristo, an Girriro nga Hadi, basi makiggirra ha “makusog nga kasundalohan” han mga kaaway nga tipahirani na ha ginpupuntirya hito—an katawohan ni Jehova. (Esek. 38:15) Kon magtapo na inin magkaaway nga mga grupo, dida hito magtitikang an Armagedon!—Pah. 16:16.

17. Ano an mahitatabo ha “mga kanding” ha Armagedon?

¹⁷ Pagpadapat han paghukom. An girra han Armagedon an magigin kataposan han daku nga kasakitan. Hito nga takna, magkakaada dugang nga toka hi Jesus. Labot ha pagin Hukom han “ngatanan nga nasud,” hiya an magigin Parapamatay han mga nasud—karuyag sidngon, han ngatanan nga tawo nga iya ginhukman nga “mga kanding.” (Mat. 25:32, 33) Gamit hin “matarom ngan hilaba nga espada,” ‘aatakehon’ han Hadi ‘an mga nasud.’ Oo, an tanan nga sugad-kanding nga tawo—tikang ha “mga hadi” ngadto ha “mga uripon”—‘huhukman hin permanente nga kamatayon.’—Pah. 19:15, 18; Mat. 25:46.

18. (a) Paonan-o mababaliktad an mga panhitabo ha “mga karnero”? (b) Ano an hihimoon ni Jesus basi mabug-os an iya kadaogan?

¹⁸ Mababaliktad gud an mga panhitabo ha mga tawo nga ginhukman ni Jesus sugad nga “mga karnero”! Imbes nga madugmok tungod ha pagtamak-tamaki han daku nga kasundalohan ni Satanas han “mga kanding,” an “daku nga grupo” han baga hin waray depensa nga “mga karnero” makakatalwas ha pag-atake han mga kaaway ngan makakagowa ha “daku nga kasakitan.” (Pah. 7:9, 14) Katapos mapirde ngan poohon ni Jesus an ngatanan nga tawhanon nga kaaway han Ginhadian han Dios, iya ilalabog hi Satanas ngan an mga demonyo ngadto ha  kahiladman. Didto, magigin sugad hira hin patay ha sulod hin usa ka yukot ka tuig.—Basaha an Pahayag 6:2; 20:1-3.

19, 20. Paonan-o naton maiaaplikar an leksyon ha Isaias 26:20 ngan 30:21?

¹⁹ Paonan-o kita makakag-andam para ha magpakaharadlok nga panhitabo ha tidaraon? An Barantayan ha naglabay nga mga tuig nagsiring: “An katalwasan madepende ha pagsugot.” Kay ano? An baton hito makikita ha pahamangno ni Jehova ha bihag nga mga Judio ha Babilonya. Gintagna ni Jehova nga sasakupon an Babilonya. Kondi ano an bubuhaton han iya katawohan basi magin andam para hito? Hi Jehova nagsiring: “Kadi, katawohan ko, sulod ikaw ha imo mga sulod, ngan panadhi an imo mga ganghaan palibot ha imo: tumago ka ha madali nga panahon, ngada nga an kaaligutgot matapos.” (Isa. 26:20) Tigamni an mga berbo hini nga bersikulo: “kadi,” “sulod,” “panadhi,” “tumago”—ngatanan sugo. Kon susundon han mga Judio ito nga mga sugo magpapabilin hira ha ira balay, hirayo ha nananakop nga kasundalohan ha kakalsadahan. Salit, an ira katalwasan nadepende ha pagsunod han mga instruksyon ni Jehova. *

²⁰ Ano an leksyon hito? Pariho han mga surugoon ni Jehova hadto, an aton katalwasan ha tiarabot nga mga panhitabo madepende ha aton pagsunod han iya mga instruksyon. (Isa. 30:21) Ito nga mga instruksyon nakakarawat naton pinaagi han kongregasyon. Salit, karuyag naton magin masinugtanon ha mga giya nga aton nakakarawat. (1 Juan 5:3) Kon yana pa la masinugtanon na kita, magigin masayon para ha aton nga magin masinugtanon ha tidaraon, ngan tungod hito makakarawat naton an panalipod han aton Amay nga hi Jehova, ngan han aton Hadi nga hi Jesus. (Sep. 2:3) Tungod hito nga panalipod han Dios, personal nga makikita naton kon paonan-o pupoohon han Ginhadian han Dios an mga kaaway hito. Sigurado nga diri gud naton mangangalimtan ito nga panhitabo!