1, 2. 1) ¿Baʼaxoʼob eʼesik desde tu jaʼabil 1914 ka káaj u gobernar Cristo? 2) ¿Baʼax ken k-il teʼ xookaʼ?

 TEʼ LIBROAʼ tsʼoʼok k-xakʼaltik yaʼab baʼaxoʼob tsʼoʼok u beetik le Reino kex yaʼab máaxoʼob pʼekmiloʼ, lelaʼ ku muʼukʼaʼankúuntik k-fe (Sal. 110:2). Rey Jesucristoeʼ tsʼoʼok u nuʼuktik yaʼabkach máakoʼob utiaʼal ka xiʼikoʼob kʼaʼaytaj. Tsʼoʼok u pʼatik limpioil u kuxtaloʼob yéetel le bix u adorartikoʼob Diosoʼ. Yéetel ku yáantkoʼob utiaʼal maʼ u xuʼulul u biskubaʼob kex pʼektaʼanoʼob. Tuláakal lelaʼ ku yeʼesikeʼ desde tu jaʼabil 1914 ka káaj u gobernar Cristo kex yaʼab máaxoʼob pʼekmil.

² Maʼ kun xáantaleʼ le Reinooʼ yaan u beetik baʼaloʼob maas nuuktak. Yaan u «taal» utiaʼal «u xuʼulsik junpuliʼ» tiʼ tuláakal le máaxoʼob pʼekmiloʼ (Mat. 6:10; Dan. 2:44). Baʼaleʼ táanileʼ yaan u yúuchul uláakʼ nukuch baʼaloʼob jeʼex u yeʼesik le Bibliaoʼ. Koʼox ilik jujunpʼéeliʼ.

3. ¿Baʼax táan k-páaʼtik u yaʼalaʼal táanil tiʼ u kʼuchul u kʼiinil Jéeoba?

³ Yaan u yaʼalaʼal tuláakal jeetsʼel yanil. Teʼ carta tu tsʼíibtaj apóstol Pablo tiʼ le tesalonicailoʼoboʼ tu yaʼalaj le yáax baʼax kun úuchloʼ (xok 1 Tesalonicailoʼob 5:2, 3). Teʼeloʼ tʼaanaj tiʼ «u kʼiinil Jéeoba». Lelaʼ yaan u káajal ken xuʼulsaʼak tiʼ «le Nojoch Babiloniaoʼ» (Apo. 17:5). Baʼaleʼ táanil tiʼ u káajaleʼ le máakoʼoboʼ yaan u yaʼalikoʼob: «¡Tuláakal jejetsʼkil yéetel maʼalob yanil!». Lelaʼ maʼ xaaneʼ chéen juntéen kun aʼalbil wa yaʼab u téenel. ¿Tak wa u nuuktakil le religionoʼob kun aʼalikoʼ? Tumen táakpajaʼanoʼob ichil le kʼasaʼan yóokʼol kaabaʼ, maʼ xaaneʼ tak letiʼob kun aʼalik «láaj maʼalob» yanil (Jer. 6:14; 23:16, 17; Apo. 17:1, 2). Lelaʼ yaan u yeʼesik jach naatsʼ yanil u kʼiinil Jéeoba. Le máaxoʼob pʼekmil u Reino Diosoʼ «maʼ kun púutsʼloʼob».

4. ¿Bix u yáantkoʼon k-naʼatik le baʼax tu yaʼalaj Pablo yoʼolal u yaʼalaʼal tuláakal jeetsʼel yaniloʼ?

⁴ ¿Bix u yáantkoʼon k-ojéeltik baʼax u kʼáat u yaʼal le profecíaaʼ? Pabloeʼ ku yaʼalik: «Teʼexeʼ minaʼaneʼex ich éeʼjochʼeʼenil utiaʼal ka téek taalak le kʼiin ta wóokʼoleʼex jeʼex u taal tu yóokʼol j-ookoloʼobeʼ» (1 Tes. 5:3, 4). Toʼoneʼ k-ojel baʼax oʼolal táan u yúuchul yaʼab baʼaloʼob teʼ kʼiinoʼobaʼ, maʼ jeʼex u maasil máakoʼoboʼ.  Baʼaleʼ ¿bix kun béeytal le baʼax ku yaʼalik le profecía yoʼolal u yaʼalaʼal tuláakal jeetsʼel yaniloʼ? Yaan k-páaʼtik k-ilik jach bix kun úuchul jujunpʼéel baʼaloʼob tuláakal yóokʼol kaab. Le oʼolal «unaj k-pʼilik k-ich mantatsʼ yéetel unaj k-kanáantik maʼ u saʼatal k-óol» (1 Tes. 5:6; Sof. 3:8).

5. ¿Baʼax kun yáax úuchul ken káajak le nojoch muʼyajiloʼ?

⁵ Yaan u xuʼulsaʼal tiʼ le religionoʼoboʼ. Kʼaʼajaktoʼoneʼ Pabloeʼ tu yaʼalaj: «Le táan u yaʼalaʼal tumen le máakoʼob: ‹¡Tuláakal jejetsʼkil yéetel maʼalob yanil!›, letiʼ túun ken téek taalak xuʼulsajil tu yóokʼoloʼob». Jeʼex ken tsʼoʼokok u léembal le cháak tu séebaʼanil ku yuʼubaʼal u kíilbaloʼ, bey xan kun úuchul le ken aʼalaʼak «¡tuláakal jejetsʼkil yéetel maʼalob yanil!», tu séebaʼanil «ken téek taalak xuʼulsajil tu yóokʼoloʼob». Baʼaleʼ ¿baʼax le kun xuʼulsbiloʼ? Yáaxeʼ letiʼe «Nojoch Babilonia» ku chíikbesik tuláakal le maʼ jaajil religionoʼob ku keʼetel yéetel juntúul koʼolel chéen bey u máanoʼ (Apo. 17:5, 6, 15). Bey túunoʼ tu káajbal le «nojoch muʼyajil» ken xuʼulsaʼak tiʼ le religionoʼob ku yaʼalikoʼob ku tsaypachtikoʼob Cristooʼ bey xan tuláakal le maʼatech u kaʼanskoʼob u jaajiloʼ (Mat. 24:21; 2 Tes. 2:8). Lelaʼ yaan u beetik u jaʼakʼal u yóol yaʼabkach máakoʼob. ¿Baʼaxten? Tumen le koʼolel chéen bey u máanoʼ ku yuʼubikuba bey «juntúul reinaeʼ» yéetel ku tuklik «mix bikʼin bíin okʼolnak». Baʼaleʼ yaan u tsʼáaik cuenta maʼ maʼalob úuchik u tuukul beyoʼ, tumen «chéen ichil junpʼéel kʼiin kun» xuʼulsbil tiʼ (Apo. 18:7, 8).

6. ¿Máax kun xuʼulsik tiʼ «le Nojoch Babiloniaoʼ»?

⁶ ¿Máax túun kun xuʼulsik tiʼ «le Nojoch Babiloniaoʼ»? «Juntúul chak tsʼíitsʼik baʼalcheʼ» yaan «diez u baakoʼob». U libroil Apocalipsiseʼ ku tsʼáaik naʼatbileʼ, letiʼe Organización de las Naciones Unidasoʼ (ONU). Yéetel le diez baakoʼoboʼ ku chíikbesik le gobiernoʼob ku yáantkoʼob le tsʼíitsʼik baʼalcheʼ wa le ONU teʼ kʼiinoʼobaʼ (Apo. 17:3, 5, 11, 12). «Le Nojoch Babiloniaoʼ» jach xuʼulsbil kun beetbil tiʼ tumen le luʼumiloʼob táakaʼanoʼob ichil le ONU teʼ kʼiinoʼobaʼ, «yaan u tokikoʼob tuláakal baʼax yaantiʼ [...], yaan u jaantkoʼob u bakʼel, yéetel yaan u xuʼulskoʼob yéetel kʼáakʼ» (xok Apocalipsis 17:16). a

7. 1) ¿Bix béeychajik teʼ yáax siglo le baʼaxoʼob tu yaʼalaj Jesús teʼ Mateo 24:21 yéetel 22? 2) ¿Bix kun béeytal xan teʼ kʼiinoʼob ku taaloʼ?

⁷ «Le kʼiinoʼob jeʼeloʼ yaan u kóomkíintaʼaloʼob». Jesuseʼ tu yaʼalaj baʼax kun úuchul teʼ kʼiinoʼob táan le nojoch muʼyajiloʼ: «Tu yoʼolal le máaxoʼob yéeyaʼanoʼoboʼ, le kʼiinoʼob jeʼeloʼ yaan u kóomkíintaʼaloʼob» (xok Mateo 24:21, 22). Le baʼax tu yaʼaloʼ yáax béeychaj tu jaʼabil 66 tiʼ le yáax siglooʼ, tumen Jéeobaeʼ tu kóomkintaj le kʼiinoʼob le ka lukʼ u soldadoiloʼob Roma tu paach u kaajil Jerusalenoʼ (Mar. 13:20). Lelaʼ áantajnaj utiaʼal u salvarkuba le disipuloʼob yanoʼob kaʼach Jerusalén  yéetel Judeaoʼ. Baʼaleʼ ¿bix kun béeytal tuláakal yóokʼol kaab le baʼaxoʼob tu yaʼalaj Jesusoʼ? Jéeoba, yéetel u yáantaj Rey Jesucristoeʼ, yaan u beetik u xuʼulul u baʼateʼel le ONU tu contra le religionoʼoboʼ. Bey túunoʼ le máaxoʼob meyajtik Jéeobaoʼ maʼ kun xuʼulsbiloʼob, chéen letiʼob kun pʼáatloʼob (Sal. 96:5). ¿Baʼax túun kun úuchul ken tsʼoʼokok u xuʼulsaʼal tiʼ le religionoʼob maʼatech u kaʼanskoʼob u jaajiloʼ? Koʼox ilik.

8, 9. ¿Baʼaxoʼob kun ilbil teʼ kaʼan tu yaʼalaj Jesusoʼ, yéetel bix ken u yuʼubiluba le máakoʼoboʼ?

⁸ Le baʼaxoʼob tu yaʼalaj Jesús kun úuchul tu tsʼook kʼiinoʼoboʼ ku yeʼesik yaan u yúuchul jejeláas baʼaloʼob táanil tiʼ le Armagedonoʼ. Le yáax kaʼapʼéel baʼax kun úuchloʼ ku chíikpajal tu Evangelioil Mateo, Marcos yéetel Lucas (xok Mateo 24:29-31; Mar. 13:23-27; Luc. 21:25-28).

⁹ Baʼaloʼob kun ilbil teʼ kaʼanoʼ. Jesuseʼ tu yaʼalaj: «Yaan u yéeʼjochʼeʼental le Kʼiinoʼ, le Lunaoʼ maʼ kun sáasiltal, le estrellaʼob yanoʼob kaʼanoʼ yaan u lúubloʼob». Le máakoʼob bejlaʼaʼ ku yilkoʼob u nuuktakil u religionoʼob bey junpʼéel sáasil ichil u kuxtaloʼobeʼ, baʼaleʼ maʼ kun xáantal ken xuʼuluk u yilkoʼob beyoʼ. ¿Jach wa tu jaajil yaan u yúuchul baʼaloʼob jelaʼantak teʼ kaʼanoʼ? Maʼ xaaneʼ yaan (Isa. 13:9-11; Joel 2:1, 30, 31). ¿Bix túun ken u yuʼubiluba le máakoʼoboʼ? «Yaan u muʼyajoʼob», tumen maʼ u yojloʼob «bix jeʼel u púutsʼloʼobeʼ» (Luc. 21:25; Sof. 1:17). «U reyiloʼob Luʼum» pʼekmil le Reino yéetel «le palitsiltaʼanoʼoboʼ», «yaan u desmayaroʼob, tumen jach saajkoʼob yoʼolal le baʼaloʼob ku yilkoʼob ku taal u kʼiinil u yúuchul[oʼ]». Letiʼobeʼ yaan u joʼopʼol u kaxtikoʼob tuʼux jeʼel u páajtal u taʼakikubaʼobeʼ. Baʼaleʼ mix tuʼux kun páajtal u taʼakikubaʼob tiʼ le castigo ken u taas le Reyoʼ (Luc. 21:26; 23:30; Apo. 6:15-17).

10. 1) ¿Bix kun juzgartbil le kaʼa jaats máakoʼob tumen Jesusoʼ? 2) ¿Bix ken u yuʼubiluba le tamanoʼob yéetel le chivoʼoboʼ?

¹⁰ U yorail le juiciooʼ. Le máaxoʼob pʼekmil u Reino Diosoʼ yaan u yilkoʼob u yúuchul junpʼéel baʼax kun beetik u maas muʼyajoʼob. Jesuseʼ tu yaʼalaj: «Yaan u yilkoʼob táan u taal u Paal máak teʼ múuyaloʼob yéetel nojoch páajtalil bey xan yéetel nojbeʼenil[oʼ]» (Mar. 13:26). Le ken úuchuk lelaʼ ku yeʼesik tsʼoʼok u kʼuchul u yorail u juzgartaʼal le máakoʼob tumen Jesusoʼ. Tiʼ uláakʼ profecía ku tʼaan tiʼ le baʼaxoʼob kun ilbil tu tsʼook kʼiinoʼoboʼ ku maas tsolik bix kun úuchul le juicioaʼ. Lelaʼ letiʼe u kettʼaanil le tamanoʼob yéetel le chivoʼoboʼ (xok Mateo 25:31-33, 46). Le máaxoʼob ku tsʼáaikubaʼob tu tséel u Reino Diosoʼ ku keʼeteloʼob yéetel «tamanoʼob», letiʼobeʼ yaan u líiʼsik u pooloʼob «tumen tsʼoʼok u náatsʼal u kʼiinil» u jáalkʼabtaʼaloʼob (Luc. 21:28). Baʼaleʼ le máaxoʼob ku pʼektikoʼob u Reino Diosoʼ ku keʼeteloʼob yéetel «chivoʼob», letiʼobeʼ «yaan u yokʼoloʼob  táan u loxik u tseemoʼob» tumen «yaan u xuʼulsaʼaltiʼob utiaʼal mantatsʼ» (Mat. 24:30; Apo. 1:7).

11. ¿Baʼax unaj u kʼaʼajaltoʼon le ken joʼopʼok k-xakʼaltik le baʼax ku taal u kʼiinoʼ?

¹¹ Le Armagedonoʼ maʼ kun káajal chéen pʼelak u tsʼoʼokol u juzgartaʼal «u máakiloʼob tuláakal kaajoʼob» tumen Jesús. Táanileʼ yaan u yúuchul uláakʼ nukuch baʼaloʼob (Mat. 25:32). Yáaxeʼ Gog tiʼ u luʼumil Magogueʼ yaan u líikʼil tu contra le máaxoʼob meyajtik Diosoʼ, u kaʼapʼéeleʼ yaan u láaj bisaʼal le yéeyaʼanoʼob teʼ kaʼanoʼ. Le táan k-xakʼaltik le kaʼapʼéel baʼaloʼobaʼ maʼalob ka kʼaʼajaktoʼoneʼ le Bibliaoʼ maʼatech u yaʼalik máakalmáak kun yáax úuchliʼ. Maʼ xaaneʼ jun jaats tiʼ cada junpʼéeleʼ yaan u yúuchul tiʼ junpʼéeliliʼ kʼiin.

12. ¿Bix kun líikʼil Satanás tu contra le máaxoʼob yanoʼob tu tséel le Reinooʼ?

¹² Ku líikʼil tu contra u kaajal Dios. Gog tiʼ u luʼumil Magog wa Satanás, le Kʼaasilbaʼaloʼ, yaan u líikʼil tu contra le sukuʼunoʼob yéeyaʼanoʼob pʼaatloʼob way Luʼumoʼ bey xan tu contra le uláakʼ tamanoʼoboʼ (xok Ezequiel 38:2, 11). Lelaʼ letiʼe u tsʼook baʼateʼel ken u beet Satanás tu contra u Reino Dios bey xan tu contra le sukuʼunoʼob yéeyaʼanoʼob utiaʼal u binoʼob kaʼanoʼ (Apo. 12:7-9, 17). Le Kʼaasilbaʼaloʼ desde úuch taakchajak u xuʼulsik tiʼ le yéeyaʼanoʼoboʼ, baʼaleʼ maʼ páajchajak u beetkiʼ (Mat. 13:30). Ken tsʼoʼokok u láaj xuʼulsaʼal tiʼ le maʼ jaajil religionoʼoboʼ, u kaajal Dioseʼ yaan u pʼáatal bey mix máak kanáantikeʼ tumen «mix junpʼéel u kaajiloʼob yaan u tulumiloʼob» wa u baʼpakʼiloʼob. Satanás túuneʼ yaan u yilik bey u súutukil utiaʼal u xuʼulsiktiʼeʼ. Yaan u beetik u líikʼil le máaxoʼob yanoʼob tu tséel utiaʼal ka baʼatelnakoʼob tu contra le máaxoʼob yanoʼob tu tséel le Reinooʼ.

13. ¿Bix kun salvartbil le máaxoʼob meyajtik Jéeobaoʼ?

¹³ Ezequieleʼ ku yaʼalik baʼax kun úuchul: «[Desde] ta luʼumeʼ [Gog], tu maas náachil xaman[,] láakʼintaʼanech tumen j-baʼateloʼob muʼukʼaʼanoʼob yéetel yaʼaboʼob, bey xan yéetel u j-baʼateliloʼob natʼ tsíiminoʼob, bíin a pulaba a baʼateʼelt in kaajal» (Eze. 38:15, 16). ¿Baʼax kun úuchul le ken líikʼik Satanás tu contra u kaajal Dios? Jéeobaeʼ ku yaʼalik: «Bíin sen pʼuʼujuken», tsʼoʼoleʼ ku yaʼalik xan: «Bíin in beet u [...] paklan kíimsubaʼob yéetel máaskab» (Eze. 38:18, 22; xok Zacarías 2:9). Letiʼeʼ yaan u salvartik le máaxoʼob meyajtikoʼ, le oʼolal yaan u káajsik le Armagedonoʼ.

14, 15. ¿Baʼax uláakʼ kun úuchul ken tsʼoʼokok u líikʼil Satanás tu contra le máaxoʼob meyajtik Diosoʼ?

¹⁴ Baʼaleʼ teʼ kʼiinoʼob ken líikʼik Satanás tu contra u kaajal Dios yéetel táanil tiʼ u káajal le Armagedonoʼ yaan u yúuchul uláakʼ junpʼéel baʼal jach kʼaʼanaʼan. Jeʼex t-ilaj teʼ xóotʼol 11, le u kaʼapʼéel baʼal kun úuchloʼ letiʼe u láaj bisaʼal teʼ kaʼan u yalab le sukuʼunoʼob yéeyaʼanoʼoboʼ.

¹⁵ Ku láaj muʼuchʼul le sukuʼunoʼob yéeyaʼanoʼoboʼ. Mateo yéetel Marcoseʼ tu tsʼíibtoʼob le baʼax tu yaʼalaj Jesús yoʼolal le  yéeyaʼanoʼob utiaʼal u binoʼob kaʼan le ka tʼaanaj tiʼ le baʼaxoʼob kun úuchul táanil tiʼ le Armagedonoʼ (ilawil le xóotʼol 7). Ka tʼaanaj Jesús tiʼ le baʼax ken u beet ken tsʼaʼabak u beet u Reyiloʼ, tu yaʼalaj: «Letiʼ túuneʼ yaan u túuxtik le angeloʼob utiaʼal ka u muchʼkíintoʼob le máaxoʼob u yéeymaj desde tu kantiʼitsil le yóokʼol kaaboʼ, desde tu yáax tiʼitsil le Luʼumoʼ tak tu tsʼook tiʼitsil le kaʼanoʼ» (Mar. 13:27; Mat. 24:31). Le ka tu yaʼalaj Jesús yaan u muchʼik tuláakal le yéeyaʼanoʼoboʼ maʼ táan u tʼaan tiʼ u tsʼok sellartik le yéeyaʼanoʼoboʼ, tumen lelaʼ yaan u yúuchul junpʼíit táanil tiʼ u káajal le nojoch muʼyajiloʼ (Apo. 7:1-3). Baʼaxeʼ táan u tʼaan tiʼ junpʼéel baʼax kun úuchul le táan le nojoch muʼyajiloʼ. Lelaʼ ku yeʼesikeʼ maʼ xaaneʼ le sukuʼunoʼob yéeyaʼanoʼob pʼaatloʼob way Luʼumaʼ yaan u láaj bisaʼaloʼob kaʼan le tsʼokaʼaniliʼ u káajal u baʼateʼel Satanás tu contra u kaajal Diosoʼ.

16. ¿Baʼax ken u beet le 144,000 ken tsʼoʼokok u kaʼa kuxkíintaʼaloʼob teʼ kaʼan tu kʼiinil le Armagedonoʼ?

¹⁶ ¿Bix k-ojéeltik yaan u láaj bisaʼal kaʼan le yéeyaʼanoʼob táanil tiʼ le Armagedonoʼ? Tumen ken xuʼulsaʼak tumen Jesús le máaxoʼob pʼekmil u Reino Dios «yéetel junpʼéel xóolteʼ de hierrooʼ» yaan u yáantaʼal tumen le 144,000 tsʼaʼan páajtalil tiʼoboʼ (Apo. 2:26, 27). Ken kaʼa kuxkíintaʼak le sukuʼunoʼob yéeyaʼanoʼob teʼ kaʼanoʼ yaan u muchʼkubaʼob yéetel le angeloʼob utiaʼal u yáantkoʼob Rey Jesucristo utiaʼal u salvartikoʼob le máaxoʼob meyajtik Dios tiʼ le yaʼabkach máaxoʼob pʼekmiloʼoboʼ (Eze. 38:15). Le baʼatelaʼ letiʼ kun káajsik le Armagedonoʼ (Apo. 16:16).

17. ¿Baʼax kun úuchul tiʼ le máaxoʼob beyoʼob «chivoʼob» teʼ Armagedonoʼ?

¹⁷ U kʼiinil le juiciooʼ. Le Armagedonoʼ letiʼ kun tsʼoʼoksik le nojoch muʼyajiloʼ. Ken úuchuk lelaʼ Jesuseʼ yaan uláakʼ baʼax ken u beete. Yaan u juzgartik «tuláakal kaajoʼob» yéetel tu tsʼookeʼ yaan u xuʼulsik tiʼ tuláakal le máaxoʼob beyoʼob «chivoʼoboʼ» (Mat. 25:32, 33). Rey Jesucristoeʼ yaan u xuʼulsik tiʼ le kaajoʼob yéetel «junpʼéel chowak espada[oʼ]». Bey túunoʼ tuláakal le máaxoʼob beyoʼob chivoʼob, ichiloʼobeʼ tiaʼan «reyoʼob» yéetel «le palitsiloʼoboʼ», «yaan u xuʼulsaʼaltiʼob utiaʼal mantatsʼ» (Apo. 19:15, 18; Mat. 25:46).

18. 1) ¿Baʼax kun úuchul tiʼ le máaxoʼob beyoʼob «tamanoʼoboʼ»? 2) ¿Baʼax ken u beet Jesús tiʼ Satanás yéetel tiʼ le kʼasaʼan angeloʼoboʼ?

¹⁸ Baʼaleʼ le máaxoʼob beyoʼob tamanoʼoboʼ yaan u kiʼimaktal u yóoloʼob. Maʼ kun xuʼulsbiltiʼob jeʼex le máaxoʼob beyoʼob chivoʼoboʼ, baʼaxeʼ yaan u salvartaʼaloʼob «tiʼ le nojoch yaayaj óolaloʼ». Kex ka óotaʼak xuʼulsbiltiʼob tumen le Kʼaasilbaʼaloʼ maʼ kun úuchul mix baʼal tiʼob (Apo. 7:9, 14). Ken tsʼoʼokok u láaj xuʼulsik Jesús le máaxoʼob pʼekmil u Reino Diosoʼ, yaan u píikchʼintik Satanás yéetel u kʼasaʼan angeloʼob «teʼ taamkach  chʼeʼenoʼ». Teʼeloʼ mix baʼal kun páajtal u beetkoʼob tu yáamil le mil jaʼaboʼoboʼ (xok Apocalipsis 6:2; 20:1-3).

19, 20. ¿Bix jeʼel k-beetik le baʼax ku yaʼalik Isaías 26:20 yéetel 30:21?

¹⁹ ¿Baʼax unaj k-beetik táanil tiʼ u yúuchul le baʼaxoʼob ku yaʼalik le Bibliaaʼ? Junpʼéel u revistail U Pʼíich Tulumil Kanan tsʼoʼok u chan máan kʼiin jóoʼsaʼakeʼ tu yaʼalaj: «Máaxoʼob beetik baʼax ku yaʼalaʼaleʼ yaan u salvarkubaʼob». Lelaʼ bey u yeʼesik le baʼax úuch tiʼ le judíoʼob palitsiltaʼanoʼob kaʼach Babiloniaoʼ. Jéeobaeʼ tu yaʼaleʼ yaan u xuʼulsaʼal tiʼ Babilonia, le oʼolal tu yaʼalaj tiʼ le máaxoʼob meyajtik baʼax unaj u beetkoʼob utiaʼal u salvarkubaʼoboʼ. Tu yaʼalajtiʼob: «In kaajal, xeen, ooken ta wotoch, kʼal u jool najiloʼob a wotoch ta paach. Taʼakbesaba junpʼíit kʼiin kaʼalikil u máan u pʼujaʼanil Yuumtsil» (Isa. 26:20). Tuukulnen tiʼ le tʼaanoʼob ku meyaj teʼ tekstoaʼ: «xeen», «ooken», «kʼal» yéetel «taʼakbesaba». Le tʼaanoʼobaʼ ku yeʼesik yaan baʼax kʼaʼabéet u beetik máak. Le judíoʼoboʼ unaj u kʼalkubaʼob ichil u yotochoʼob utiaʼal maʼ u yilaʼaloʼob tumen le soldadoʼob ku máanoʼob teʼ bejoʼoboʼ. Bey túunoʼ utiaʼal maʼ u kíimsaʼaloʼobeʼ unaj u beetkoʼob baʼax aʼalaʼabtiʼob tumen Jéeoba. b

²⁰ ¿Baʼax ku kaʼansiktoʼon le baʼax aʼalaʼab tiʼ le judíoʼob ka u beetoʼoboʼ? Ku kaʼansiktoʼon chéen jeʼel u páajtal k-salvartikba wa k-beetik le baʼaxoʼob ku yaʼalik Jéeobaoʼ (Isa. 30:21). Le baʼaxoʼob ku yaʼalik Jéeobaoʼ teʼ múuchʼulil ku yaʼalaʼaltoʼonoʼ. Le oʼolal unaj u suuktal k-beetik yéetel kiʼimak óolal le baʼax ku yaʼalaʼaloʼ (1 Juan 5:3). Wa k-uʼuyik tʼaan desde teʼ kʼiinoʼobaʼ maas maʼ talam jeʼel k-beetik le baʼax ken u yaʼal Jéeoba yéetel Jesús utiaʼal k-salvartikba tiʼ le xuʼulsajiloʼ (Sof. 2:3). Wa k-uʼuyik tʼaaneʼ yaan k-ilik u xuʼulsaʼal tiʼ le máaxoʼob pʼekmil Dios tumen le Reinooʼ. Ken k-il u yúuchloʼobeʼ, ¡mix bikʼin kun tuʼubultoʼon!