1, 2. 1) ¿Kunatsa awisajj Paraíso oraqen wali jakʼankjjatap amuyañajj chʼamäspa? 2) ¿Kun yatjjatañas Diosan arsutanakapar jukʼamp confiyañatak yanaptʼistani?

 KUNJAMSA tamamankir mä jilatajj uru jornäla trabajisajj wali qarita tantachäwir purini ukwa uñjtajja. Uka jilatan warmipajj wali usutawa, ukatwa jupajj wal llakisi, kunjamsa familiapar uñjani uka toqetsa llakisirakiwa, patronapas urut urutjamaw jukʼamp trabajiñap muni. Ukampis tantachäwir purisa qʼochuñ libron musicap istʼasajj sumakiw chuymapan jikjjatasi ukat munat jilat kullakanakapamp chika tantachtʼasisajj wali kusisitaw jikjjatasiraki. Ukat paraíso oraqet parlir qʼochu qʼochtʼasajja, ukankkaspasa ukhamwa amuyasi. Uka qʼochojj nayratpachaw jupar wal gustäna ukat chuymapar purtʼäna. Ukat familiapamp chika qʼochtʼasajj kunjamsa jutïr urunakan sum jakasjjani ukwa amuyaraki.

² ¿Jumajj tantachäwinakar sarasajj uka jilatjam jikjjatasirïtati? Niya taqeniw ukhaman jikjjataspachätanjja. Ukampis kunayman jan walinakanwa jichhürunakan uñjastanjja, ukatwa Paraíso oraqen wali jakʼankjjatap amuyañajj chʼamäspa. Kunjamtï Bibliajj siskejja, ‘jan wali tiemponakanwa’ jaktanjja (2 Tim. 3:1). Ukhamajj jutïr urunakan sumwa jakasjjañäni sasin jukʼamp confiyañatakejja, ¿kunas yanaptʼistani? Diosan Reinopaw aka Oraqpach apnaqjjani sasajja, ¿kunatsa sissna? Uka jisktʼanakar qhanañchañatakejja, Jehová Diosan nayra servirinakapajj kuna profecianaksa phoqasir uñjapjjäna ukat kunjamsa uka profecianakasa ukat yaqha profecianakas jichhürunakan phoqasiski, ukwa aka yatichäwin uñjaskañäni. Taqe ukanak yatjjatañaw Diosan arsutanakapar jukʼamp confiyañatak yanaptʼistani. Tukuyañatakejja,  kunjamsa Diosajj arsutanakap jutïr urunakan phoqani ukwa yatjjatarakiñäni.

3. Babilonia markar apat uñjasipkäna uka judionakajja, ¿Diosan kuna arunakaparus confiyapjjäna?

³ Khä 600 maranakana Babilonia markar apat uñjasipkäna uka judionakajja, kunjamsa jakasipjjäna uk amuytʼañäni. Jupanakat waljaniw awk taykanakapjamajj uka markan jilsuwayapjjäna. Ukan jakañajj wali chʼamänwa, Jehová Diosar servipjjatap laykuw Babilonia markankirinakajj jupanakar sapa kut jiskʼachapjjäna (Sal. 137:1-3). Ukampis marat maratjamaw judionakajj kuntï Jehová Diosajj jupanakar arsuwaykäna ukar jukʼamp confiyapjjäna. ‘Wasitatwa Judá oraqer kutʼjjapjjäta ukat Edén jardinar uñtata mä suma oraqenwa jakasipjjäta’ sasaw Diosajj judionakar säna (Isaías 51:3 liytʼañataki). Markapar chʼamañchtʼañataki ukat jan pächasipjjañapatakiw Jehová Diosajj uka arunak arsüna. Kunjamsa jupanakar chʼamañchtʼäna uk yatjjatañatakejja, mä qawqha profecianakatwa jichhajj yatjjataskañäni.

4. Jan ajjsarapjjañapatakejja, ¿kunsa Diosajj judionakar säna?

⁴ Janiw kunarus ajjsarapjjañapäkänti. Judionakajj janiw mä cheqpach paraíso oraqer kuttʼapjjañapäkänti, jan ukasti, 70 maranak apanukuta jaya oraqeruw kuttʼapjjañapäna, jupanakat waljanejj janiw uka oraq uñtʼapkänti. Bibliajj qellqaskäna uka tiemponjja, leonanaka, qamaqenaka, tigrenaka ukat yaqha ukham animalanakaw uka cheqan utjäna. Ukatwa familia pʼeqtʼiri judionakajj akham jisktʼasipjjpachäna: “Warmijasa, wawanakajasa ukat uywanakajasa, ¿walikïsipkpachäniti?” sasa. Cheqas taqeniw ukhaman uñjasisajj llakissna. Ukampis kuntï Jehová Diosajj Isaías 11:6-9 qellqatan siskäna, ukaw jupanakarojj chʼamañchtʼäna (liytʼañataki). Uka arunakarjamajja, judionakasa ukat uywanakapas jan walinakatwa jarkʼaqatäpjjañapäna, janiw kunarus ajjsarapjjañapäkänti. ‘Leonajj mä vacjamaw pasto manqʼani’ sasaw Diosajj säna, mä arunjja, leonanakajj janiw judionakan uywanakap manqʼantapjjañapäkänti. ‘Wasara ukat chʼumi cheqanakan sarkasajj jan kuna kamachtʼataw qhespipjjäta’ sasaw Jehová Diosajj markapar säna (Eze. 34:25).

5. Kunatï jakañatak wakiskäna ukanakjja Diosaw judionakarojj churañapäna, ¿kawkïr profecianakas uk qhanañchi?

 ⁵ Manqʼajj jilarkiriw utjañapäna. Familia pʼeqtʼiri judionakajj akham sasaw llakisipjjarakïna: “Judá markar kuttʼasajja, ¿kunsa familiajarojj manqʼapjjañapatak churäjja? ¿Kawkinsa jakapjjäjja? ¿Trabajojj utjpachäniti? ¿Babilonia markan qheparañakit walïspa?” sasa. Ukampis Jehová Diosaw ukham jan llakisipjjañapatakejj kunayman profecianak arsüna. Taqe chuyma servirinakaparojj akham sänwa: ‘Jallu apayanïma, ukatsti oraqejj walja jilarkiri trigo achurakini’ sasa (Isa. 30:23). Trabajo toqetsa ukat kawkinsa jakasipjjani uka toqetsa, Jehová Diosajj akham sarakïnwa: “Utanak utachasipjjani, ukan jakasipjjarakini, uvanak yapuchasipjjani, uka yaputjja manqʼasipjjarakini[wa]. Janiw ukanjja maynejj yaqhan jakasiñapataki utachkaniti, janirakiw maynejj yapuchkaniti mayninakan askipatakikejja” sasa (Isa. 65:21, 22). Kunjamtï uka arunakajj qhanañchkejja, kʼari diosanakar yupaychiri Babilonia markan jakapkäna ukat sipansa, jukʼamp sumwa judionakajj Judá oraqen jakasipjjañapäna. Ukampis Diosar yupaychäwipan aynachtʼapjjatap laykuw jupanakajj yaqha markar apat uñjasipjjäna, ¿Jehová Diosajj Jupar wasitat yupaychapjjañapatak yanaptʼpachänti?

6. ¿Kunjamansa judionakajj Diosar yupaychäwipan jikjjatasipjjäna, ukat kunsa Diosajj jupanakar säna?

⁶ Ajay toqen kʼumaräpjjañapänwa. Babilonia markar janïr apatäpkäna ukhatpachaw judionakajja ajay toqet usutäpkaspasa ukham jikjjatasipjjäna. Ukatwa Jehová Diosajj Isaías profeta toqejj akham säna: ‘Markajan pʼeqenakapajj qʼala chhojjriñchjatawa, janirakiw kunatakis chʼamapajj utj-jjeti’ sasa (Isa. 1:5). Judionakajja, janiw Jehová Diosan ewjjtʼanakapa ukat yatichäwinakap istʼañsa ni uñjañsa munapkänti. Ukatwa jupanakajj ajay toqen oqara ukat juykhu ukham jikjjatasipjjäna (Isa. 6:10; Jer. 5:21; Eze. 12:2, 3). Jupanakatï markapar ukhampach kuttʼapjjasapäna ukhajja, ¿janit Diosan bendicionanakap wasitat aptʼasipkasapäna? Jïsa, ukampis Jehová Diosan aka arunakapaw jupanakar chuymachtʼäna: “Uka urunakanjja oqaranakajj istʼapjjaniwa kuntejj jupanakataki maynejj liytʼani ukjja, juykhunakas uñjjapjjarakiniwa, jupanakatakejj janiw chʼamakas [utj-jjaniti]” sasa (Isa. 29:18). Cheqansa, Jehová Diosaw arrepentisit markaparojj ajay toqet  qollaña, jan ukajj yanaptʼañ arsüna. Judionakatï Diosar istʼapjjasapäna ukhajja, Jupaw kuna ewjjtʼanakatï ukat yatichäwinakatï wakiskäna ukanak jupanakar horasapar churasapäna.

7. ¿Kunjamsa Diosajj judionakar arskäna uka arunakap phoqäna, ukat kunjamsa uka toqet lupʼiñajj Diosar jukʼamp confiyañatak yanaptʼistu?

⁷ ¿Jehová Diosajj arsutanakap phoqpachänti? ¡Jïsa! Judá markar kuttʼapkäna uka judionakajj janiw kunarus ajjsarapkänti, janiw manqʼas jupanakatak pistʼkänti ukat Diosar yupaychäwipan sumwa jikjjatasipjjarakïna. Jehová Diosaw Judá marka jakʼankir jachʼa ukat wali chʼamani markanakat servirinakapar jarkʼaqäna, pampankiri ukat montenkir animalanakatsa uywanakap jarkʼaqarakïnwa. Ukampis kuntï Isaías, Jeremías, Ezequiel ukat yaqha profetanakajj paraíso toqet qellqapkäna uk janiw judionakajj taqpach phoqasir uñjapkänti. Ukhamarusa, kuntï uka urunakan phoqasir uñjapkäna ukajj wal jupanakar kusisiyäna, cheqas Diosaw ukanak horasapar phoqäna. Ukhamajj kunsa Jehová Diosajj markap laykojj nayratpach lurawayi, uka toqet lupʼiñaw Jupar jukʼamp confiyañatakejj yanaptʼistani. Diosan arsutanakapajj kunjamsa nayrajj phoqasiwayi uk yatisaw wal musphartanjja. Jutïrinjja, ¡jukʼamp muspharkañaw Diosan arsutanakapajj phoqasini! Jichhajja, kunsa Diosajj jiwas layku jichhürunakan luraski ukwa yatjjatañäni.

8. ¿Jehová Diosan markapajj jichhürunakan utjki uka markanakar uñtatäpachati?

⁸ ¿Jehová Diosan markapajj jichhürunakan utjki uka markanakar uñtatäpachati? Janiwa. Ajllit cristianonakajj ‘Diosan Israelapa’ sasin uñtʼatäpjjewa, ukajj janiw mä cheqpach markapunïkiti (Gál. 6:16, MT). Ukat ‘yaqha uwijanakjam’ uñtʼatäpki uka cristianonakasa, ajllitanakamp chikaw mä paraíso oraqensa jakapkaspa ukham wali sum jakasipjje, ukanwa Jehová Diosar mayachtʼat yupaychapjje ukat jakäwipan nayrar uchapjjaraki (Juan 10:16; Isa. 66:8). Kuntï Jehová Diosajj paraíso oraqen jakañat arsuwaykäna ukajja, Diosan markapanwa phoqasiskaraki, ukwa jichhajj mä qawqhanak uñjañäni.

9, 10. 1) Isaías 11:6-9 qellqatan jikjjataski uka profeciajja, ¿kunjamsa jichhürunakan phoqasiski? 2) ¿Kunatsa Diosan servirinakapajj taqenimp sum apasiñatakiw chʼamachasipjje sasin sissna?

⁹ Janiw kunarus ajjsarktanti. Isaías 11:6-9 qellqatan jikjjataski uka profeciarjamajja, pampankir jan  ukajj montenkir animalanakajj sumakiw jakasipjjañapäna ukat jaqenakajj animalanak uywasipki ukanakampejj sumakiw jakasipjjañaparakïna. ¿Kunjamsa uka profeciajj jichhürunakan phoqasiski? Kunatsa animalanakajj sumak jakasipjjañapäna ukwa Isaías 11:9 qellqatajj akham sasin qhanañchi: “Kunjämatejj umajj qʼal phoqhantejja ukhamarakiw Tatitun yatiñapajj taqe markpacharu phoqhantani” sasa. ¿Kunsa uka arunakajj sañ munpacha? ¿‘Tatitun yatiñapa’ utjipanti animalanakajj jan qhoruchasipjjañapäna? Janiwa. Jan ukasti, jaqenakaw Diosat yateqasisajj nayra jakäwinakap jaytapjje ukat taqenimp sum apasiñsa yateqapjjaraki. Ukhamatwa uka profeciajj Diosan markapan jichhürunakan sum phoqasiski. Cheqansa, Diosan Reinopamp yanaptʼataw cristianonakajj jilat kullakanakapamp sum apasiñsa ukat suma chuymanïñsa yateqasipki.

¹⁰ Biblian yatichäwinakaparjamajja, kunatsa cristianonakajj politicaru ukat guerranakar jan mitisipjje  ukwa aka libron yatjjataniwayktanjja. Ukham jan mitisipjjatap laykuw awisajj kunayman arknaqata ukat wali tʼaqhesiyat uñjasiwayapjje. Cheqansa, jan sinttʼasiri qhoru chuymani jaqenak taypinjja, Diosan walja servirinakapaw jaqe masipamp sum apasiñatak chʼamachasipjje, ¿janit ukajj wali muspharkañäki? ¿Kunsa ukajj uñachtʼayistu? ‘Sumankañaw utjani’ sasaw Isaías profetajj arsüna, ukarjamaw Jesucristo Reyimp apnaqatäpki ukanakajj jichhürunakan sum jakasipjje. Kunjamtï Jesusajj siskänjja, arkirinakaparojj ‘maynit maynikam munasirïpjjatapatwa’ uñtʼasiñapäna (Juan 13:34, 35). Ukat tama taypinjja, Amuyasiri Cheqapa Uywata toqew Jesusajj suma chuymanïña ukat taqenimp sum apasiña yaticharakistu (Mat. 24:45-47).

11, 12. ¿Kunjamsa jaqenakajj jichhürunakan ajay toqen jikjjatasipjje, ukat kunjamsa Jehová Diosajj kunatï wakiski ukanak markapar churawayi?

¹¹ Walja yanaptʼanakaw utjistu. Kunjamtï Bibliajj siskejja, jaqenakajj ajay toqen manqʼat awtjatäpkaspas ukhamäpjjewa. Uka toqet parlkasajj Jehová Diosajj akham sänwa: ‘Urunakasti jutaskiwa. Uka urunakaw Oraqerojj machʼa apayanëjja; janiw manqʼaña machʼäkanisa, ni umat pharjayasiñäkanisa, jan ukasti, Tatitun arupat istʼaña machʼäniwa’ sasa (Amós 8:11). ¿Diosan Reinopamp apnaqatäpki ukanakat kamsasirakispasa? Jupanakajj janiw manqʼat awtjayasis sarnaqapjjañapäkänti. Markapasa ukat enemigonakapasa, kunjamansa jakasipjjañapäna uk akham sasaw Jehová Diosajj säna: “Servirinakajjajj manqʼañanïsipkaniwa, ukampis jumanakajj manqʼat awtjatäpjjatawa; jupanakatakejj umañajj utjaskaniwa, ukampis jumanakajj umat pharjataw sarnaqapjjäta; jupanakajj kusisitäpjjaniwa, ukampis jumanakajj mä pʼenqa jiskʼachjataw uñjasipjjäta” sasa (Isa. 65:13). ¿Uka arunak phoqasir uñjawaytati?

¹² Biblian yatichäwinakapajj waljapuniw jichhürunakan utjistu, mä jachʼa jawirar uñtatawa. Bibliat apstʼat qellqatanaka, istʼañatak grabacionanaka, videonaka ukat tantachäwinakaw utjistu. Internetan jw.org sat cheqansa, walja yatichäwinakaw utjaraki. Cheqansa, kunatï cheqäki ukanak jan yatichiri aka ñanqhapachanjja, kunayman toqetwa Diosajj cheqa yatichäwinak yatichistu (Eze. 47:1-12; Joel 3:18). Jehová Diosajj walja yanaptʼanak markapar churasaw kuntï arsuwayki  uk jichhürunakan phoqaski, ¿janit uk yatisajj wali kusisit jikjjatasktanjja? Ukat kuna yatichäwinaktï Diosajj churkistu ukanak sapüru yatjjatañatakejja, ¿chʼamachasisktanti?

13. ‘Oqaranakajj istʼapjjaniwa juykhunakas uñj-jjapjjarakiniwa’ siski uka arunakajja, ¿kunjamsa jichhürunakan phoqasiski?

¹³ Ajay toqen kʼumaräpjjtanwa. Jichhürunakanjja, niya taqe jaqenakaw ajay toqen juykhu ukat oqara ukham jikjjatasipjje (2 Cor. 4:4). Ukampis Cristow uka jaqenakarojj Oraqpachan yanaptʼaski. ¿Kunjamsa mä juykhojj uñjañ qalltäna ukat mä oqara jaqejj istʼañ qalltarakïna uk uñjawaytati? Kunapachatï maynejj Biblian cheqa yatichäwinakap yateqasin juyktʼayiri ukat oqartʼayir kʼari religionat mistjje ukhajja, Biblian aka profeciapaw phoqasiski: “Uka urunakanjja oqaranakajj istʼapjjaniwa kuntejj jupanakataki maynejj liytʼani ukjja, juykhunakas uñj-jjapjjarakiniwa, jupanakatakejj janiw chʼamakas [utj-jjaniti]” (Isa. 29:18). Sapa maraw walja jaqenakajj kunjamsa Diosar sum yupaychapjjaspa uk yateqapjje. Cheqas Jachʼa Babiloniat mistusa Diosan markapar mantapki taqe uka jaqenakaw kunjamsa Diosan arsutanakapajj jichhürunakan phoqasiski uk uñachtʼayapjje.

14. Diosan arsutanakapar jukʼamp confiyañatakejja, ¿kuna toqet lupʼiñasas wakisi?

¹⁴ Kunjamsa Cristojj aka qhepa urunakan arkirinakapar Diosan markapar apthapiwayi, ukwa kuntï aka libron yatjjatawayktan ukanakajj uñachtʼayistu. Diosan markapankkasajj walja bendicionanakwa Jupat katoqawaytanjja, uka toqenakat lupʼiñasapuniwa. Ukhamatwa kuntï Diosajj jutïrin phoqañ arsuwayki ukanakar jukʼamp confiyañäni.

15. ‘Aka Oraqejj mä suma paraisöjjaniwa’ sasajja, ¿kunatsa sissna?

¹⁵ Jehová Diosajj qalltatpachaw aka Oraqjja mä suma paraíso oraqer tukuyañ munäna. Ukatwa Adanampiru Evampir lurasajj Edén jardinar usküna ukat ‘wal mirantapjjam, taqe animalanakarus apnaqapjjarakim’ sasaw jupanakar säna (Gén. 1:28). Ukampis Supayar arkasaw jupanakajj Dios contra saytʼasiwayapjje, ukhamatwa jucharu ukat jiwañar aptʼawayapjjestu. Ukhamarusa, Jehová Diosan amtapajj pachpakïskiwa. Ukat kuntï Jupajj arski ukjja, phoqapuniwa (Isaías 55:10, 11 liytʼañataki). Ukatwa akham sasin taqe chuym sissna: ‘Adanan ukat Eva warmin  wawanakapajj aka Oraqenwa jakasipjjani, jupanakaw aka Oraqpach mä suma paraisor tukuyapjjani ukat kuntï Diosajj lurawayki ukanaksa wali munasiñampiw uñjapjjarakini’ sasa. Uka tiemponwa Jehová Diosajj kuntï mä suma paraíso oraqen jakasiñat judionakar siskäna uka arunakajj sum phoqasini. Ukwa jichhajj uñjañäni.

16. Bibliarjamajja, ¿kunjamsa jutïr urunakan jakasiñäni?

¹⁶ Janiw kunarus ajjsarapkañäniti. Paraíso oraqenwa kuntï Isaías 11:6-9 qellqatajj siski uka arunakajj sum phoqasini. Chachanakasa, warminakasa ukat wawanakasa, kawkin jikjjataskasasa ukat kawkïr sarkasasa, janiw animalanakarusa ni jaqenakarus ajjsarapkaniti. Mä urojja, aka Oraqpachajj juman utamäkaspas ukhamäjjaniwa. Jan ajjsarasaw jawiranakaru, qotanakaru ukat jachʼa lamar qotar mantäta. Qollunakansa pampanakansa tʼijnaqarakïtawa. Arumanakas janiw kunarus ajjsarkätati. Uka tiemponwa Ezequiel 34:25 qellqatan siski uka arunakajj sum phoqasini, Jehová Diosan servirinakapajj ‘pampanakan jan kun ajjsarasaw jakasipjjani, chʼuminakansa ikipjjarakini’ sasaw uka qellqatajj qhanañchi.

17. Diosan Reinopajj aka Oraqer apnaqjjani ukhajj jilarkiriw manqʼajj utjani sasajja, ¿kunatsa sissna?

¹⁷ Manqʼajj jilarkiriw utjani. Jutïr urunakanjja, janipuniw pisin jakasiñasa, machʼasa, ni manqʼat pistʼañas utj-jjaniti. Janirakiw marka apnaqer gobiernonakan yanaptʼapas wakisjjaniti. Jichhürunakanjja, Diosan servirinakapajj Biblian yatichäwinakap jilarkirwa manqʼäkaspas ukham katoqapjje, ¿kunsa ukajj uñachtʼayistu? Jesucristo Reyisajj kunatï jakañatak wakiski ukanakwa jutïr urunakan jilarkir churistani. Ukwa aka Oraqer jutasajj uñachtʼayäna, mä qawqha tʼantʼampi ukat chawllampikiw waranq waranqa chacha warminakaru manqʼayäna (Mat. 14:17, 18; 15:34-36; Mar. 8:19, 20). Kunapachatï Diosan Reinopajj aka Oraqer apnaqjjani ukhaw aka profeciajj sum phoqasini: “Tatituw jallu apayanïtam yapuchasitamar purjjatañataki, ukatsti oraqejj walja jilarkiri trigo achurakini. Uka urunjja uywanakamatakejj manqʼajj walipunïniwa” (Isa. 30:23).

18, 19. 1) Isaías 65:20-22 qellqatan jikjjataski uka profeciajja, ¿kunjamsa phoqasini? 2) ‘Markajajj mä qoqar uñtataw jakani’ siski uka arunakajja, ¿kunsa amuytʼayistu?

¹⁸ Jichhürunakanjja, inamayaw walja jaqenakajj mä suma utanïña ukat trabajisajj kusisit jikjjatasiñ munapjje. Aka jan wali ñanqha pachanjja, jaqenakajj walsa  trabajipjjchejja, pagopajj jukʼakiwa, janiw ukampejj familiapar sum uñjirjamäpkiti. Ukampis jupanakatakik muniri qamiri jaqenakajja, urut urutjamaw jukʼamp qamiriptapjje. Ukhamasti, Isaías profetan arunakapajj phoqaskani uka tiemponjja, ¡taqeniw wali kusisit jakasipjjañäni! Uka profetajj akham sasaw säna: “Jaqenakasti utanak utachasipjjani, ukan jakasipjjarakini, uvanak yapuchasipjjani, uka yaputjja manqʼasipjjarakini[wa]. Janiw ukanjja maynejj yaqhan jakasiñapataki utachkaniti, janirakiw maynejj yapuchkaniti mayninakan askipatakikejja. Markajjasti mä qoqar uñtataw walja maranaka jakarakini; ajllitanakajjasti kuntejj amparapampi lurasipki ukwa manqʼasipjjani” sasa (Isa. 65:20-22).

¹⁹ ‘Markajajj mä qoqar uñtataw walja maranak jakani’ siski uka arunakajja, ¿kunsa amuytʼayistu? Qoqanakajj walja patak patak maranakaw jakapjje, ukajj wali muspharkañawa. Inas jumajj mä jachʼa qoqa jakʼan saytʼasirïsta, achachilanakamajj jakkäna uka nayra tiemponakatpachaw uka qoqajj utjpachäna ukat jumajj jiwjjas laqʼar tukjjäta uka qhepatsa, uka qoqajj wali sumaw walja maranak jakaskakini. Ukhamarakiw jumanakajj Paraíso oraqen walja maranak jan jiwas wali kusisit sum jakasipjjäta, sasaw Jehová Diosajj wali munasirïtap laykojj markapar arsuwayi (Sal. 37:11, 29). Kunjamtï panqaranakajj mä qawqha tiempok jakapkejja, ukhamarakiw qoqanakajj jiwasat sipansa mä qawqha tiempoki uka urunakan jakapjjani. Jiwasajj walja maranakaw jakañäni. Jïsa, wiñayan wiñayapatakiw jakasiñäni.

20. Diosan Reinopamp apnaqatäpkani ukanakajja, ¿kunjamsa jañchi toqen jakasjjapjjani?

²⁰ Kʼumaräjjañäniwa. Jichhürunakanjja, taqe jaqenakaw usuntapjje, jan ukajj jiwañar puripjje. Cheqansa, juchajj mä jan wali usükaspasa ukhamaw taqe jaqenakarojj nayratpach jiwañar aptʼawayi. ¿Khitikis uka usut qhespiyistaspa? Jesusan jiwatapakiw juchat qhespiyistaspa (Rom. 3:23; 6:23). Jesucristojj waranq maranak apnaqkani ukhaw jupan jiwatapajj jukʼat jukʼata Diosan servirinakaparojj yanaptʼani. Uka tiemponjja, 144.000 ajllitanakamp chikaw Jesusajj nayrïr awk taykasat juch katoqawayktan uk chhaqtayjjani. Ukhaw Isaías profetan arunakapajj sum phoqasjjani,  jupajj akham sänwa: “Janiw khitis siskaspati: ‘Usutätwa’ sasajja. Diosasti Sionan jakir jaqenakan juchanakapjja perdonarakiniwa” sasa (Isa. 33:24). Uka urunakanjja, janiw oqaranakasa, juykhunakasa ni yaqha ukham usuni jaqenakas utjjaniti (Isaías 35:5, 6 liytʼañataki). Jesusatakejj janiw kuna usus jan qollañjamajj utjkaniti. Cheqansa, uka urunakan taqeniw amuyunsa jan ukajj jañchinsa sum jikjjatasjjañäni. Jehová Diosan Reinopamp apnaqatäpkani uka jaqenakajja, ¡kʼumaraw jakasjjapjjani!

21. ¿Kunas jiwañampejj pasani, ukat uk yatiñajj kunjamsa chuymachtʼistu?

²¹ Juchararätas layku ukat usunak utjatap laykuw taqenis jiwañar purtanjja. “Qhepïri uñisiristi jiwañawa” sasaw Bibliajj qhanañchi, uka uñisirejj taqeniruw katuntistu, ¿kunas ukampejj paspachäni? (1 Cor. 15:26.) Jiwañajj Jehová Diosat sipansa, ¿jukʼamp chʼamanïpachati? ¡Janiwa! Isaías profetajj akham sänwa: “Tatitojj wiñayatakiw jiwañarojj tʼunjani, taqe jaqenakana nayranakapatsti jachanakapsa pichararakiniwa” sasa (Isa. 25:8). Uka tiemponjja, janiw cementerionakajj utj-jjaniti, ni maynin jiwatapatsa jachjjañäniti. Jan ukasti, kunjamsa Jehová Diosajj jiwatanakar jaktayasajj amtap phoqani uk uñjasaw kusisiñat jachañäni (Isaías 26:19 liytʼañataki). Ukhaw kuna llakinaktï jiwañajj utjayawayki ukanakajj jan mayampitak qʼal tukusjjani.

22. Diosajj Reinop toqe amtanakap aka Oraqen phoqjjani ukhajja, ¿kunas pasani?

²² Waranq maranak qhepatjja, Reinop toqew Diosajj kuntï aka Oraqetak amtkäna uk sum phoqani ukat ukhaw Cristojj apnaqäwip Awkipar katuyjjarakini (1 Cor. 15:25-28). Uka tiemponjja, jaqenakajj janiw juchararäjjapjjaniti, ukhamajj mikʼaya manqhapachat Supayaru antutaskani uka qhep qhepa yantʼar saykatañatakejj wakichtʼatäpjjaniwa. Uka qhepatwa Cristojj uka ñanqha katariru, mä arunjja, Supayaru ukat sajjranakapar wiñayatak qʼal tukjani (Gén. 3:15; Apo. 20:3, 7-10). Ukampis Jehová Diosar munasiri ukat Jupat jan jitheqtiri jaqenakajj wiñayatakiw aka Oraqen jakasipjjani. Kunjamsa uka urunakan jakasiñäni uk Biblian aka arunakapaw sum qhanañchi: Jehová Diosar taqe chuyma serviri chachanakasa ukat warminakasa, ‘Diosan wawanakapjam qhespiyataw jakasipjjani’ (Rom. 8:21).

23, 24. 1) Diosan arsutanakapajj phoqasipuniniwa sasajja, ¿kunatsa taqe chuym sistan? 2) ¿Kun lurañsa jumajj amtawayta?

 ²³ Diosan arsutanakapajj phoqasipuniniwa, janiw ukajj mä samkakïkiti, ¿kunatsa jan pächasis ukham sistan? Kunjamtï aka libron nayrïr yatichäwipan uñjaniwayktanjja, Jesusajj akham sasaw arkirinakaparojj Jehová Diosar oracionan mayisiñ yatichäna: ‘Reinomajj jutpan ukat munañamasti alajjpachansa aka Oraqensa luraspan’ sasa (Mat. 6:9, 10). Diosan Reinopajj utjaskapuniwa. Ukat alajjpachatwa apnaqaskistu. Patak maranakaw Jehová Diosajj Reinop toqejj arsutanakap phoqawayi, ukajj cristiano tama taypinwa qhan uñjasi. Kunapachatï Diosan Reinopajj aka Oraqpachar apnaqjjani ukhaw kuntï Jupajj arsuwayki ukajj sum phoqasini. ¡Janiw uka toqet pächasiñasäkiti!

²⁴ Jehová Diosan Reinopajj jutapuniniwa ukat uka toqew Jehová Diosajj amtanakap sum phoqani. ¿Kunatsa taqe chuym ukham sistanjja? Kuna laykutejja, ¡DIOSAN REINOPAJJ APNAQJJEWA! Ukatwa sapa maynejj akham jisktʼasiñasajj wakisi: “¿Diosan Reinopamp nayajj apnaqayasiskti?” sasa. Diosan Reinopamp apnaqat jaqenakjam jakañataki jichhatpach chʼamachasiskakiñäni. Ukhamatwa wiñayan wiñayapataki uka Reinon bendicionanakap katoqañäni.