1, 2. a) Mun na a be se ka gwɛlɛya an ma tuma dɔw la k’a ye ko alijɛnɛ ye tiɲɛnko ye? b) Mun lo be se k’an dɛmɛ an b’an ka limaniya sabati Ala ka layiduw koo la?

 BALIMACƐ kantigi dɔ nana lajɛn na, a sɛgɛnninba lo sabu a ye baara caaman kɛ tile kɔnɔ. A ka patɔrɔn ka koo ka gwɛlɛ ani a b’a niin degun kojugu baara la. A man nɔgɔ a ma k’a janto a ka denbayamɔgɔw la ani a be hamina sabu bana dɔ b’a muso sɛgɛnna. Dɔnkili fɔlɔ daminɛnin kɔ, a ye nɛnɛkiriba kɛ k’a yira ko a ninsɔn ka di ka kɛ Masaya Boon na n’a balimaw ye. O dɔnkili be kuma alijɛnɛ jigiya lo koo la ani a kɔnɔnakumaw b’a jija a ka miiri k’a filɛ ko a be alijɛnɛ kɔnɔ. O dɔnkili ka di a ye ani a kɛtɔ k’a la n’a ka denbayamɔgɔw ye, alijɛnɛ jigiya b’a dusu saalo.

² O ɲɔgɔn delila k’i sɔrɔ wa? O delila k’an fanba sɔrɔ. Tiɲɛn na, koow man nɔgɔ duniɲa juguman nin kɔnɔ ani o be se k’a to a be gwɛlɛya an ma k’a ye ko alijɛnɛ nata ye tiɲɛnko ye. An be wagati gwɛlɛw lo la ani duniɲa be cogo min na bi, o ni alijɛnɛ cɛ ka jan (2 Tim. 3:1). Mun lo be se k’an dɛmɛ k’a ye ko alijɛnɛ ye tiɲɛnko ye? An b’a lɔn cogo di ko yanni dɔɔni Ala ka Masaya bena duniɲa kuru bɛɛ mara tiɲɛn tiɲɛn na? An ka kiraya kuma damanin lajɛ minw dafara galen Jehova sagokɛlaw ɲɛɛ na. O kɔ, an ben’a ye cogo min na o kiraya kumaw n’a ɲɔgɔnnaw be dafara cogo kabakoman na bi yɛrɛ. O bena an ka limaniya sabati ani a laban, an ben’a ye o kiraya kumaw be min yira an na siniɲasigi koo la.

3. Yahutu minw tun be jɔnya la Babilɔni, Jehova ka layidu juman lo ye olu dusu saalo?

³ Yahutu minw tun be jɔnya la Babilɔni saan kɛmɛkulu 6nan na ka kɔn Krista tile ɲɛ, miiri k’a filɛ u ka ɲɛnamaya tun be cogo min na. U caaman n’u bangebagaw kɔrɔbayara Babilɔni ani ɲɛnamaya tun ka gwɛlɛ yen. Babilɔnikaw tun be u lɔgɔbɔ sabu u limaniyanin lo Jehova la (Zab. 137:1-3). Saan caaman kɔnɔ, Yahutu kantigiw ye u jigi la jigiya ɲuman nin kan: Jehova tun ye layidu ta ko a ben’a kɛ a sagokɛlaw be kɔsegi u ka jamana na Zuda. A tun ko u  bena ɲɛnamaya kɛ yen hɛɛrɛ ni ninsɔndiya la. U tun bena ɲɛnamaya kɛ yɔrɔ min na, Jehova yɛrɛ ye o yɔrɔ suma ni Edɛn nankɔtu ye, o kɔrɔ alijɛnɛ! (Ezayi 51:3 kalan). O layiduw kuun tun ye ka Ala ka jama hakili sigi ani k’a to u tɛ sigasiga. Cogo di do? An ka kiraya kuma tigitigi dɔw lajɛ.

4. Jehova ye Yahutuw hakili sigi cogo di ko u latanganin bena to u wolodugu la?

⁴ Latangali. Yahutu minw tun be jɔnya la, u tun tɛna kɔsegi alijɛnɛ yɛrɛ yɛrɛ lo kɔnɔ. Nka u tun bena kɔsegi jamana min na u fanba tun t’o lɔn, a yɔrɔ tun ka jan ani a lakolon tun tora saan 70 kɔnɔ. O wagati la, jaraw, kongowuluw, waranikalaw n’a ɲɔgɔnnaw tun ka ca o mara la. O kama, sotigi dɔ tun be se k’a yɛrɛ ɲininga ko: “Ne bena mun lo kɛ walisa n’ muso ni n’ deenw latanganin ka to? N’ bena n’ ka sagaw ni n’ ka misiw latanga cogo di?” O jɔrɔnankow tun daganin lo. O la, Ala ka layidu min be sɔrɔ Ezayi 11:6-9 kɔnɔ, miiri k’a filɛ o ye u dusu saalo cogo min na (a kalan). Jehova tɛmɛna o kuma diimanw fɛ k’a ka jama hakili sigi ko olu n’u ka bɛgɛnw latanganin bena to. Jaraw bena biin ɲimi, o kɔrɔ u tɛna Yahutuw ka bɛgɛnw ɲimi. Kuun tun t’a la mɔgɔ kantigiw ka siran o waraw ɲɛ. Jehova tun ye layidu ta ko a ka jama latanganin bena sigi u ka jamana na Zuda, hali kongokolonw ni tubaw kɔnɔ.—Ezek. 34:25.

5. Yahutu minw kɔsegira u ka jamana na, kiraya kuma jumanw lo y’a to u lara a la ko Jehova bena u mako wasa kosɔbɛ?

⁵ Makoyafɛn caaman. Dɔw tun be se k’u yɛrɛ ɲininga ko: “Yala n’ bena se ka n’ ka denbayamɔgɔw balo n’ kɔseginin n’ wolodugu la wa? An bena to ka si yɔrɔ juman? Yala n’ bena baara dɔ sɔrɔ ani o bena fisaya ni Babilɔnikaw ka jɔnya baara ye wa?” Jehova tun y’o ɲiningaliw kelen kelen bɛɛ jaabi fana a ka kiraya kumaw sababu fɛ. A tun ye layidu ta a sagokɛla kantigiw ye ko a ben’a kɛ sanji be ben tuma o tuma ani o sababu la, “dugukolo bena dumunifɛn min di, o bena caya.” (Ezayi 30:23). Siyɔrɔ ni baara nafaman koo la, Jehova tun ye layidu ta ko: “U bena soow lɔ ka sigi u kɔnɔ. U bena ɛrɛzɛnforow bɔ k’u deen dumu. U tena soow lɔ tugu janko mɔgɔ wɛrɛ be don u la. U tena yiriw tutu tugu janko mɔgɔ wɛrɛ k’u deen dumu.” (Ezayi 65:21, 22). Tiɲɛn na, u ka ɲɛnamaya tun bena diya kosɔbɛ ka tɛmɛ u tun be ɲɛnamaya min kɛra kafiriw cɛma Babilɔni. Nka gwɛlɛya min tun y’a to u tagara jɔnya la Babilɔni do?

6. Kabi wagatijan, gwɛlɛya juman lo tun be Ala sagokɛlaw kan? Yahutu minw tun be jɔnya la, Jehova tun ye layidu juman lo ta u ye?

⁶ Kɛnɛya, Alako ta fan fɛ. Wagatijan sanni Ala ka jama ka taga jɔnya la, u tun tɛ Jehova batora kantigiya la. Jehova tɛmɛna kira Ezayi fɛ k’a fɔ a ka jama koo la ko: “Kungolo bɛɛ ye joli ye, dusukun bɛɛ nagasira!” (Ezayi 1:5). U tun kɛra fiyentɔw ni tulogwerenw ye Alako ta fan fɛ sabu u tun ye u ɲɛɛw n’u tulow tugu Jehova ka ladiliw n’a ka kalanw na (Ezayi 6:10; Zer. 5:21; Ezek. 12:2). Yahutu minw tun bɔra  jɔnya la ka na, n’o koo ɲɔgɔn tun ye u sɔrɔ, u latanganin tun be se ka to cogo di? Yala u tun tɛna bɔnɛ Jehova ka nɛɛma na tugun wa? Jehova ka layidu nin tun be u hakili sigi yɛrɛ le: “O loon na, tulogwerenw bena sɛbɛ nin kɔnɔnakuma mɛn, fiɲɛntɔw bena bɔ dibi la, u ɲaa bena yeli kɛ.” (Ezayi 29:18). Tiɲɛn na, Jehova sagokɛla minw nimisanin lo, a bena olu kɛnɛya Alako ta fan fɛ. N’u tora ka mɛnni kɛ a fɛ ani ka kolo a ye, a bena to k’u ladi ani k’u kalan u nafa kosɔn.

7. Jehova ka mɔgɔ minw tun be jɔnya la, a tun ye layidu minw ta olu ye, o dafara cogo di? O layiduw dafali ka ɲi ka nɔɔ juman lo to an ka limaniya kan?

⁷ Yala Jehova ye a ka layiduw dafa wa? Koow b’a yira ko a ye u dafa. Yahutu minw kɔsegira u ka jamana na, Jehova ye olu duga: u tun latanganin lo, a ye u mako wasa bɛrɛbɛrɛ ani a y’u kɛnɛya Alako ta fan fɛ. Misali la, Jehova ye u latanga u gɛrɛfɛ siyaw ma, u minw tun ka ca ani u barika tun ka bon n’u ta ye. Waraw ma Yahutuw ka bɛgɛnw halaki. Kiraya kuma minw ɲɛsinna alijɛnɛ koo ma i n’a fɔ Ezayi, Zeremi ani Ezekiyɛli ye minw sɛbɛ, olu damanin dɔrɔn lo dafara o Yahutuw ɲɛna. Nka minw dafara u ɲɛɛ na, o ye u ninsɔn diya ani u mako tun b’o lo la. Jehova ye min kɛ a ka jama ye o wagati la, n’an be miiri o la, o b’an ka limaniya barika bonya. O kiraya kumaw dafako fɔlɔ kɛra ninsɔndiyako ye. O la u bena dafa bɛrɛbɛrɛ tuma min na, miiri k’a filɛ an ninsɔn bena diya cogo min na! An k’a filɛ Jehova ye min kɛ an ka wagati la.

8. Jehova sagokɛlaw be “jamana” sifa juman lo kɔnɔ an ka wagati la?

⁸ Bi Jehova sagokɛlaw tɛ siya kelen mɔgɔw ye ani u tɛ jamana kelen kɔnɔ. Nka kerecɛn mɔlenw ye siya dɔ ye Alako ta fan fɛ min be weele ko “Ala ka Israɛl.” (Gal. 6:16, Bible senuma). U balima ‘saga dɔ wɛrɛ’ mɔgɔw be Jehova batora n’u ye a ka ɔriganisasiyɔn kɔnɔ, o min be se ka jati i ko jamana dɔ. U be Jehova batora yen kelenya la. O batoli ɲɛsinna u ka ɲɛnamaya faan bɛɛ lo ma (Zan 10:16; Ezayi 66:8). Jehova ye “jamana” sifa juman lo di an ma? A ye alijɛnɛ lo di an ma Alako ta fan fɛ. A tun ye layidu minw ta Edɛn nankɔ kɔnɔ, olu be dafara cogo kabakoman na o alijɛnɛ kɔnɔ. An k’o layidu dɔw lajɛ.

9, 10. a) Kiraya kuma min be Ezayi 11:6-9 kɔnɔ, o be dafara cogo di an ka wagati la? b) Mun lo b’a yira ko Ala sagokɛlaw be hɛɛrɛ la u ni ɲɔgɔn cɛ?

⁹ Latangali. Kiraya kuma min be Ezayi 11:6-9 kɔnɔ, o b’a yira ko hɛɛrɛ ni bɛɛn bena kɛ kongosogow, adamadenw ani bɛgɛnw cɛ. Yala o kiraya kuma be dafara bi Alako ta fan fɛ wa? Ɔnhɔn. Vɛrise 9nan kɔnɔ, an b’a faamu fɛɛn min kama bɛgɛnw ni kongosogow tɛna tiɲɛni ni halakili kɛ tugun. A fɔra yen ko: “Bari Masaba lɔnni bena yɔrɔ bɛɛ fa i ko jii be baa fa cogo min na.” Yala “Masaba lɔnni” be bɛgɛnw ni  kongosogow ka kɛwalew yɛlɛma wa? Ayi. O be mɔgɔw ka kɛwalew lo yɛlɛma sabu u sera ka Sebagayabɛɛtigi lɔn ani ka kɛ hɛɛrɛmɔgɔw ye i ko ale. O lo kama bi, an ɲɛɛ b’a la ko Ezayi ka kiraya kuma be dafara cogo kabakoman na Alako ta fan fɛ. Ala ka Masaya kɔrɔ, mɔgɔ minw ka fari i ko bɛgɛnw, olu be kɛra Krista ka kalandenw ye ani u b’u jijara ka kɛ hɛɛrɛ la n’u balimaw ye.

¹⁰ An ka misali dɔ lajɛ. Gafe nin kɔnɔ, an y’a ye ko an t’an seen don duniɲa ka koow la. An y’a ye fana k’o desizɔn basiginin be Bibulu lo kan ani an ye tɔɔrɔ minw sɔrɔ o sen fɛ. Duniɲa fariman nin kɔnɔ, jamakuluba dɔ be yen min tɛ sɔn k’a seen don duniɲa ka fariyako si la, hali n’u niin bena kɛ farati la o kosɔn. Yala o tɛ mɔgɔ kabakoya wa? O b’a yira ka gwɛ ko Ezayi ye hɛɛrɛ min kofɔ, Masiya ka marakɔnɔmɔgɔw be o diyabɔra! Yezu ko kanuya min be a ka kalandenw ni ɲɔgɔn cɛ, mɔgɔw bena a lɔn o lo fɛ ko u ye a ka kalanden sɔbɛw ye (Zan 13:34, 35). Yezu be muɲuna ka kerecɛn sɔbɛ kelen kelen bɛɛ dɛmɛ u ka ɲɔgɔn kanu, ka kɛ hɛɛrɛmɔgɔw ni mɔgɔ ɲumanw ye. A be tɛmɛ, “jɔncɛ kantigiman hakiliman” lo fɛ k’o kɛ kafo kɔnɔ.—Mat. 24:45-47, NW.

11, 12. Kɔngɔ sugu juman lo be mɔgɔw tɔɔrɔla bi duniɲa kɔnɔ? Nka, Jehova b’a ka mɔgɔw balola koɲuman cogo di?

 ¹¹ Makoyafɛn caaman. Kɔngɔba lo be duniɲamɔgɔw kan Alako ta fan fɛ. Bibulu tun kɔnna k’a fɔ ko: “Waati dɔ bena se, ne bena kɔngɔ yɛrɛkɛ jamana kɔnɔ. A tena kɛ dumuniko, walima jiko ye dɛ! Nga o bena kɛ Masaba ka kuma mɛnko nigɛ ye.” (Amɔsi 8:11). Yala o kɔngɔ sera Ala ka Masaya marakɔnɔmɔgɔw ma fana wa? Jehova tun kɔnna k’a fɔ faranfasi min bena kɛ ale ka mɔgɔw n’a juguw cɛ. A ko: “Ne ka baarakɛlaw bena dumuni kɛ, aw bena to kɔngɔ la. U bena minni kɛ, aw bena to minnɔgɔ la. U bena nisɔndiya, aw bena to maloya la.” (Ezayi 65:13). I ɲɛɛ t’a la k’o kumaw be dafara tiɲɛn tiɲɛn na wa?

¹² An be dumuni minw sɔrɔ Alako ta fan fɛ, u be i ko kɔji min barika be bonya ka taga. An be dumuni caaman lo sɔrɔ Alako ta fan fɛ, k’a sɔrɔ duniɲa mɔgɔw be sara kɔngɔ la. O dumunifɛn dɔw ye an ka gafew, fɛɛn lamɛntaw, videwow, lajɛnw, lajɛnbaw ani fɛɛn wɛrɛ minw be sɔrɔ an ka site web kan (Ezek. 47:1-12; Zowɛli 3:18). Jehova tun ye layidu ta ko a bena an makoyafɛnw di an ma caaman. I kɛtɔ k’a ye loon o loon k’o be dafara i ka ɲɛnamaya kɔnɔ, yala o tɛ i ninsɔndiya wa? Yala i b’i janto k’i yɛrɛ balo Jehova ka tabali kan tuma o tuma wa?

13. Jehova tun ye layidu ta ko fiyentɔw ɲɛɛ bena yɛlɛ ani tulogwerenw bena mɛnni kɛ. O kiraya kuma dafara cogo di i ɲɛɛ na?

¹³ Kɛnɛya, Alako ta fan fɛ. Bi, mɔgɔ caaman ye fiyentɔw ni tulogwerenw ye Alako ta fan fɛ (2 Kor. 4:4). Nka, Yezu be farikolodɛsɛw ni banaw kɛnɛyara duniɲa kɔnɔ. Yala i ɲɛɛ b’a la ko fiyentɔw ɲɛɛw be yɛlɛla ani tulogwerenw tulo be yɛlɛla wa? I ye mɔgɔ dɔw ye minw ye lɔnniya sɔbɛ sɔrɔ Ala ka Kuma kɔnɔ wa? Yala i y’a ye ko u banna ngalon kalanw na minw tun y’u ɲɛɛw fiyen ani k’u tulow gweren Alako ta fan fɛ wa? N’o lo, i ye layidu nin dafatɔ ye: “O loon na, tulogwerenw bena sɛbɛ nin kɔnɔnakuma mɛn, fiɲɛntɔw bena bɔ dibi la, u ɲaa bena yeli kɛ.” (Ezayi 29:18). Saan o saan, mɔgɔ waa caaman lo be kɛnɛya o cogo la Alako ta fan fɛ. Mɔgɔ o mɔgɔ mana bɔ Babiloniba la ka na fara an kan ka Jehova bato an ka alijɛnɛ kɔnɔ Alako ta fan fɛ, o b’a yira ka gwɛ ko Jehova ka layiduw be dafara!

14. N’an be wagati ta ka miiri dalilu jumanw lo kan, o bena an ka limaniya barika bonya?

¹⁴ Gafe nin sapitiri kelen kelen bɛɛ kɔnɔ dalilu barikamanw be yen minw b’a yira ko laban loon nunu na, Krista ye a ka kalandenw ɲɛminɛ u donna alijɛnɛ kɔnɔ Alako ta fan fɛ. An be duga caaman minw sɔrɔ o alijɛnɛ kɔnɔ bi, an ka to ka miiri o la. N’an b’o kɛ, an ka limaniya barika bena to ka bonya kosɔbɛ Jehova ka layiduw koo la, a ye minw ta siniɲasigi koo la.

15. Mun na an lanin b’a la ko dugukolo bena kɛ alijɛnɛ ye?

¹⁵ Kabi wagatijan, Jehova sagonata ye ko dugukolo kuru bɛɛ ka kɛ alijɛnɛ ye. A ye Adama ni Awa dan k’u bila zaradɛn  dɔ la alijɛnɛ kɔnɔ. A ye cii di u ma ko u ka deenw wolo ka dugukolo fa ani k’u janto a kɔnɔnafɛnw bɛɛ la (Zɛnɛzi 1:28). Nka, Adama ni Awa tugura Sutana kɔ ka muruti ani u ye dafabaliya, jurumu ni saya lase u deenw bɛɛ ma. O bɛɛ n’a ta, Ala sagonata ma yɛlɛma. Kuma o kuma mana bɔ a daa la, o be dafa tuma bɛɛ (Ezayi 55:10, 11 kalan). O la, an be se ka la a la ko Adama ni Awa deenw bena dugukolo fa k’a kolo ani u bena u janto Jehova ka danfɛnw na ni kanuya ye alijɛnɛ kɔnɔ, dugukolo kuru bɛɛ la. Yahutu minw bɔra jɔnya la ka kɔsegi u ka jamana na, kiraya kuma minw tun b’a yira ko olu bena ɲɛnamaya kɛ i ko alijɛnɛ kɔnɔ, u bena dafa bɛrɛbɛrɛ! An ka misali nunu lajɛ:

16. An latanganin bena kɛ cogo min na alijɛnɛ kɔnɔ, Bibulu b’o yira cogo di?

¹⁶ Latangali. A laban, ɲɛnamaya hɛɛrɛman min lakalila Ezayi 11:6-9 kɔnɔ, an bena o sɔrɔ bɛrɛbɛrɛ yɛrɛyɛrɛ la. Cɛɛw, musow ani denmisɛnw latanganin bena kɛ, u mana kɛ yɔrɔ o yɔrɔ dugukolo kan. Adamadenw wo bɛgɛnw wo, danfɛn si tɛna koo jugu kɛ. Miiri k’a filɛ ko dugukolo kuru bɛɛ be i n’a fɔ i ka soo. I be se ka nɔmi kɔjiw, bajiw ni kɔgɔjiw kɔnɔ, ka yɛlɛ kuluw sanfɛ, ka yala bintuw kɔnɔ ani i tɛ siran foyi ɲɛ. Ni suu kora i tɛ siran. Ezekiyɛli 34:25 kɔnɔkumaw bena dafa. O la, Ala sagokɛlaw bena “sigi kongokolon kɔnɔ ani ka si tubaw la hɛrɛ la.”

17. Tuma min na Ala ka Masaya bena dugukolo kuru bɛɛ mara, mun na an be se ka la a la ko Jehova bena an mako wasa bɛrɛbɛrɛ?

¹⁷ Makoyafɛn caaman. Miiri k’a filɛ ko fantanya, balodɛsɛ ni kɔngɔ tɛ yen ani an mako tɛ jɛnkuluw la minw be fantanw dɛmɛ. Bi, Ala sagokɛlaw balonin lo koɲuman Alako ta fan fɛ. O b’a yira ka gwɛ ko Masiya ka kuntigiya kɔrɔ, a bena a marakɔnɔmɔgɔw balo farikolo ani Alako ta fan fɛ. Tuma min na Yezu tun be dugukolo kan, a y’a yira dɔɔni dɔrɔn le ko a be se k’o layiduw dafa. A ye burukun ni jɛgɛ damanin dɔrɔn kɛ ka kɔngɔtɔ waa caaman balo (Mat. 14:17, 18; 15:34-36; Mariki 8:19, 20). Kiraya kuma minw bena dafa tuma min na Ala ka Masaya bena dugukolo mara, u dɔ ye nin ye: “Aw bena fɛɛn minw dan dugukolo la, Matigi bena sanji jigi u kan. Dugukolo bena dumunifɛn min di, o bena caya, barika bena sɔrɔ a la. O waati la, aw ka begɛnw dɛndɛnyɔrɔ bena boɲa.”—Ezayi 30:23.

18, 19. a) Ezayi 65:20-22 kɔrɔ ko di ele fɛ? b) Kɔrɔ juman na an bena “sijan sɔrɔ i ko yiriw”?

¹⁸ Bi, a ka gwɛlɛ mɔgɔ caaman ma k’a miiri ko u be se ka u yɛrɛla soo sɔrɔ min cɛ ka ɲi wala ka baara nafaman sɔrɔ min b’u wasa. Duniɲa juguman nin kɔnɔ, a be mɔgɔ caaman ɲɛɛ na ko u be baara gwɛlɛ kɛ lɛri caaman kɔnɔ ani olu ni u ka denbayamɔgɔw tɛ nafa bɛrɛ sɔrɔ o la. K’a sɔrɔ nafolotigiw ni wasabaliw lo b’o baara nafaw bɛɛ sɔrɔ. Miiri k’a filɛ koow bena kɛ cogo min na, tuma min na kiraya kuma nin bena dafa duniɲa kuru bɛɛ la: “U bena soow lɔ ka sigi u kɔnɔ. U bena ɛrɛzɛnforow bɔ k’u deen dumu. U  tena soow lɔ tugu janko mɔgɔ wɛrɛ be don u la. U tena yiriw tutu tugu janko mɔgɔ wɛrɛ k’u deen dumu. Bari, ne ka mɔgɔw bena sijan sɔrɔ i ko yiriw. Ne ka mɔgɔ wolomaninw bena u ka baara tɔnɔ dumu.”—Ezayi 65:20-22.

¹⁹ Kɔrɔ juman na an bena “sijan sɔrɔ i ko yiriw”? N’i lɔra yiriba dɔ kɔrɔ ani ka miiri a sanda koo la, yala o t’i kabakoya wa? N’a sɔrɔ a tun be yen sanni i mamacɛ kɔrɔba yɛrɛ ka wolo. I b’a faamu ko n’i tun bena to mɔgɔ dafabali ye, o yiri tun bena sijan sɔrɔ ka tɛmɛ i kan ani a tun bena to yen hali wagatijan i sanin kɔ. Jehova b’an minɛ ni ɲumanya ye, a kɛtɔ k’an hakili sigi ko alijɛnɛ nata kɔnɔ an bena sijan sɔrɔ ani an bena sigi hɛɛrɛ la! (Zab. 37:11, 29). Yiri minw be sijan sɔrɔ bi, loon dɔ, u bena kɛ an ɲɛɛ na i ko biin min be falen ani ka ja joona joona sabu an bena ɲɛnamaya kɛ fɔɔ abada!

20. Ala ka Masaya marakɔnɔmɔgɔ kantigiw bena kɛnɛya dafanin sɔrɔ cogo di?

²⁰ Kɛnɛya dafanin. Bi, bana ani saya be se bɛɛ ma. An be se k’a fɔ ko an bɛɛ ye banabagatɔw ye sabu banajugu dɔ b’an na, o min ye jurumu ye. Krista ka kunmabɔsara dɔrɔn lo ye o bana fura ye (Ɔrɔm. 3:23; 6:23). Saan waa kelen mara tuma na, Yezu n’a marakɛɲɔgɔnw bena mɔgɔw dɛmɛ u ka nafa sɔrɔ bɛrɛbɛrɛ o saraka la. Dɔɔni dɔɔni, u bena jurumu bɛɛ bɔ pewu adamaden kantigiw la. Ezayi ka kiraya kuma nin bena dafa bɛrɛbɛrɛ: “[Mɔgɔ] si ten’a fɔ ko: ‘Ne man kɛnɛ.’ Dugu mɔgɔw ka kojuguw bena yafa u ma.” (Ezayi 33:24). Miiri k’a filɛ wagati min na mɔgɔ si tɛna kɛ fiyentɔ, tulogweren wala namara ye tugun (Ezayi 35:5, 6 kalan). Banabagatɔ si tɛ yen Yezu tɛna se ka min kɛnɛya, a mana kɛ hakili ɲagami bana be minw na wala bana wɛrɛw. Ala ka Masaya marakɔnɔmɔgɔ kantigiw bena kɛnɛya dafanin sɔrɔ!

21. Mun lo bena saya sɔrɔ? Mun na o layidu b’i dusu saalo?

²¹ Mɔgɔw be bana ani u be sa. O la, mun lo bena saya sɔrɔ do? Saya ye an “jugu laban” ye ani adamaden dafabaliw bɛɛ be laban ka sa (1 Kor. 15:26). Nka yala saya fanga ka bon ni Jehova ta ye wa? A kɔrɔsi Ezayi tun kɔnna ka min fɔ. A ko: “A bena saya fanga ban pewu! Matigi, Masaba bena bɛɛ ɲaji cɛ.” (Ezayi 25:8). Miiri k’a filɛ: sutarali, kaburutuw ani sukasi tɛna kɛ yen tugun! Nka tuma min na Jehova bena a ka layidu kabakoman dafa a kɛtɔ ka suuw lakunu, an bena kasi ninsɔndiya bolo! (Ezayi 26:19 kalan). Saya ye tɔɔrɔba min la an kan, o bɛɛ bena ban.

22. Mun lo bena kɛ ni Masiya ka Masaya ye Ala sago dafa ka ban dugukolo kan?

²² Saan waa kelen mara laban na, o y’a sɔrɔ Ala ka Masaya ye Ala sago dafa ka ban dugukolo kan. O kɔ, Krista bena Masaya kɔsegi a Faa ma (1 Kor. 15:25-28). O wagati la, adamadenw bɛɛ bena kɛ mɔgɔ dafaninw ye. U labɛnnin bena kɛ ka kɔrɔbɔli laban muɲu tuma min na Sutana bena bɔ a  ka kaso la. O kɔ, Krista bena o saa jugu n’a kɔmɔgɔw bɛɛ halaki pewu! (Zɛnɛzi 3:15; Yir. 20:3, 7-10). Nka, minw bɛɛ be Jehova kanu ani u be kantigiya kɛ a ye, u bena siniɲasigi ɲuman sɔrɔ. Bibulu b’o siniɲasigi ɲuman lakali cogo min na, n’a sɔrɔ an tɛ se k’o lakali ka ɲɛ ten. A b’a fɔ ko mɔgɔ kantigiw bena “Ala denw ta hɔrɔnya nɔɔrɔ sɔrɔ.”—Ɔrɔm. 8:21, Bible senuma.

23, 24. a) Mun na an lanin b’a la ko Ala ka layiduw bena dafa? b) I cɛsirinin lo ka mun lo kɛ?

²³ Jehova ka layiduw tɛ sikow, fɛtaw wala kuma gwansanw ye. O layiduw bena dafa, siga t’o la! Mun na do? I hakili to Yezu ka kumaw na an ye minw lajɛ gafe nin sapitiri fɔlɔ la. A ko a ka kalandenw ka Jehova deli ko: “I ka masaya ka na. I sago ka kɛ dugukolo kan i ko a be kɛ sankolo la cogo min na.” (Mat. 6:9, 10). Ala ka Masaya tɛ adamaden dɔ ka miiriya lo ye, nka tiɲɛnko lo! A be sen kan sankolo la sisan yɛrɛ. A saan kɛmɛ ye nin ye a be Jehova ka layiduw dafara ani an ɲɛɛ b’o la ka gwɛ kerecɛn kafo kɔnɔ. O la, an be se ka la a la ko tuma min na Ala ka Masaya bena dugukolo kuru bɛɛ mara bɛrɛbɛrɛ, Jehova ka layiduw bɛɛ bena dafa!

²⁴ An b’a lɔn ko Ala ka Masaya bena na ani ko Jehova ka layiduw bɛɛ bena dafa. Mun na an lanin b’o la do? Sabu ALA KA MASAYA BE SEN KAN! An kelen kelen bɛɛ ka ɲi k’an yɛrɛ ɲininga ko: “Ala ka Masaya be nɔɔ tora ne kan wa?” An k’an seko bɛɛ kɛ kabi sisan ka kɛ Ala ka Masaya marakɔnɔmɔgɔ kantigiw ye. O la, Krista ka kuntigiya dafanin bena an nafa fɔɔ abada!