1, 2. (a) Bukin tera ngkai e kona ni kangaanga n tabetai kakoauaan ae bon iai te Bwaretaiti? (b) Tera ae e kona ni buokira ni kakorakoraa onimakinan ana berita nako te Atua?

AKEA bwa e a roko n te botaki te tari te mwaane temanna ae kakaonimaki ao e a kua imwin ana bong ae karawawata. E karaoaki ae aki riai nakoina iroun ana bwaoti ae tuamatoa, e rawawata ibukini kangaanga ake a riki ni kaineti ma tararuaaia ana utu, ao e tabeaianga n te aoraki ae rotaki iai buuna. Ngke e a waaki te moan anene ao e a torobaki nanona bwa e a kabebeteaki, ao e kukurei ngkai e mena i rarikia tarina ao mwaanena n te Tabo n Taromauri. Te anene aei bon taekan te kantaninga ibukin te maiu n te Bwaretaiti, ao e tuangaki ni mwanewen te kuna aei bwa e na kataamneia te kantaninga anne, ao n iangoia bwa e mena iai. E a kaman taatangira te kuna aei ao ngke e ira aneneakina ma ana utu, e a kabebeteaki nanona n te kantaninga ibukin taai aika a na roko.

² Ko a tia naba n namakina ae aron anne? A bati i buakora ake a a tia. Eng, te maiu n te waaki aei e kona n rangi ni kangaanga iai iroura bwa ti na kakoauaa raoi te Bwaretaiti ae i aoni kawaina n roko. Boong aikai bon “taai aika okoro aika karuanikai,” ao bon tiaki aron te bwaretaiti te aonnaba ae ti maeka iai ngkai. (2Tim. 3:1) Tera ae kona ni buokira n noria bwa bon te koaua ara kantaninga aei? Ti kangaa n ataia raoi bwa e nang waekoa ana Tautaeka n Uea te Atua ni kairiri i aoia aomata? Ti na rinanon tabeua mai buakon ana taetae ni burabeti Iehova ake a noraki kakoroani bukia irouia ana aomata rimoa. Imwina ti na manga rinanon aroni kakoroani bukin taetae ni burabeti akanne ao aika ai aron akanne, n te aro ae kakukurei ni boong aikai. Ao te kabane ngkanne ibukini kakorakoraan ara onimaki, ti na kaatuua riki iangoan nanon taetae ni burabeti akanne ibukira nakon taai aika imwaira.

3. Tera te berita ae kabebeteia I-Iutaia ake a maeka bwa taenikai i Baburon?

³ Iangoa aroni maiuia I-Iutaia ngke a maeka bwa taenikai i Baburon n te kaonoua n tienture B.C.E. A bati aika ikawairake bwa taenikai n aroia naba aia karo, ao e kangaanga aron te maiu. A bwainingareaki irouia kaaini Baburon ibukin onimakinan Iehova irouia. (TaiAre. 137:1-3) I nanon tatabebwi te ririki ao a teimatoa I-Iutaia aika kakaonimaki ni koaua n tiku n aia kantaninga ae kakukurei aei: E berita ngkoa Iehova bwa e na bon ikotiia ao ni  kaokiia ana aomata nako abaia. E taku Iehova bwa moanibaan te raoiroi te maiu iai. E kabotaua naba te aba are e a manga kaokaki nakon arona ae Iuta ma te onnaroka are Eten ae te bwaretaiti! (Wareka Itaia 51:3.) A boni baireaki berita akanne ibukini kabebeteaia ana aomata te Atua ni katoki nanououaia ake a kona n tabeaianga iai. N te aro raa? Rinanoi taetae ni burabeti tabeua aikai.

4. Tera aron Iehova ni karaui nanoia I-Iutaia ni kaineti ma te mweraoi i abaia?

⁴ Te mweraoi. Tiaki te bwaretaiti ni koaua ae a na oki nako iai taenikai akanne, ma bon te aba ae raroanako ae aki kaainaki i nanon 70 te ririki, ae te aba ae tii tabeman i buakoia ake a a tia n noria mai mwaina. A taneiai n nonoraki ngkoa raian, kameaanti, rebwari, ao maan ni kaakang tabeua riki n aaba ake a karakinaki n te Baibara. E na bae n iangoa aei te mwaane ae iai ana utu, ‘N na kangaa ni kamanoa buu ma natiu? Tera aroia au tiibu ma au kao, N na kangaa ni kamanoia?’ Bon akanne raraoma aika kona n riki. Iangoa ngkanne ana berita te Atua ae n Itaia 11:6-9 ao aroni kabebetean te nano ae kona n reke iai. (Warekia.) E karaui nanoia taenikai Iehova n taeka ni kario aika tamaroa aikai, bwa a na boni mano raoi ma aia nanai ni man. E na kang uteute te raian ae nanona bwa e nang aki kabwauta aia kao I-Iutaia. A nang toki maakakia maan ni kaakang aikai irouia aomata aika kakaonimaki. E berita Iehova bwa a na mano ana aomata n te aba are e a manga kaokaki nakon arona are Iuta, ao a na mano naba n taian rereua ke n taiani buakonikai.—Etek. 34:25.

5. Baikara taetae ni burabeti aika buokiia taenikai ake a oki, bwa a na aki nanokokoraki bwa Iehova e na boni katauraoi baika bati aika a kainnanoi?

⁵ E na bati te amwarake. A na bae n ueke raraoma riki tabeua. ‘N na kona ni karekei kanaia au utu n te aba are e na manga kaokaki nakon arona? Ti na maeka ia? E na iai te mwakuri, ao e na tamaroa riki nakon te tautoronaki i aani baia taani kataenikaira?’ E kaekai raoi naba titiraki akanne Iehova rinanon taetae ni burabeti ake e kairi koreaia. E beritanna Iehova bwa e na teimatoa bwakan te karau ibukia ana aomata aika ongeaba, ao ibukin anne e na karikii amwarake aika ‘bati ma ni kangkang’ aontano. (Ita. 30:23) E beritana ae kangai Iehova ibukia ana aomata ni kaineti ma te tabo ni maeka ao te mwakuri ae uaana: “A na katei auti ao a na maeka i nanoia, ao a na uniki kureebe ni nne ni kureebe ao ni kang uaaia. A na aki katea ae e na maeka iai temanna, ao a na aki naba unika ae a na kanna tabemwaang.” (Ita. 65:21, 22) Eng, e na rangi n tamaroa te maiu n aanga aika bati, ni kabotauaki ma aroia ngke a kataenikaiaki i Baburon ae aia tabo beekan. Ma tera aron aia kangaanga ake a rangi ni kakaiaki riki, ake a karika kairaianako bwa taenikai n te moantai?

6. Te aeka n aoraki raa are a a maan n tia n rotaki iai ana aomata te Atua, ao tera ae e karaui iai nanoia taenikai ake a oki Iehova?

⁶ Te marurung n te onimaki. E a maan ni kekerikaaki marurungia n te onimaki ana aomata te Atua imwain rikia bwa taenikai. E taekinia ana aomata Iehova rinanon te burabeti ae Itaia ni kangai: “E a aoraki te atu, ao e a nimwaoraki te nano.” (Ita. 1:5) A mataki ao a bonotaninga ni kaineti ma te onimaki, bwa a teimatoa ni kaini taningaia nakon ana reirei ni kairiri Iehova, ao ni kamaki mataia nakon te rabakau are e anga. (Ita. 6:10; Ier. 5:21; Etek. 12:2) A na kangaa ni mweraoi naake a oki man te taenikai ngkana e na manga reke naba kaia n aeka ni kangaanga akanne? Tiaki a  na manga kabuaa naba akoaia iroun Iehova? Ai karaunanora ana berita Iehova ae kangai: “N te bong anne ao akana bonotaninga a na ongo taeka ake n te boki, ao a na noraaba mataia akana mataki man te roo ao te rotongitong.” (Ita. 29:18) Eng, e na boni kakorakorai aia onimaki Iehova ana aomata aika itiaki aika rairi nanoia. E na katauraoa te kaetieti ae reke iai te maiu ao te rabakau, tii ngkana a teimatoa n ongongo irouna ao n ongeaba.

7. A kangaa ni kakoroaki bukin ana berita te Atua nakoia ana aomata ake taenikai, ao bukin tera bwa e riai ni kakorakoraaki iai ara onimaki?

⁷ E kakakoroi bukin ana berita Iehova? E kaekaaki anne ni baike a riki rimoa. A kakabwaiaaki I-Iutaia ake a okiri abaia bwa a a mweraoi, e a bati te amwarake ibukia, ao a a marurung n te onimaki. N te katoto, e kamanoia Iehova mairouia botannaomata ake kaain rarikia ake a korakora riki ao a rangi ni bati riki nakoia. A aki bane ni kamateaki aia nanai ni man I-Iutaia irouia maan ni kakang. Bon tii tabeua baika a nori I-Iutaia aikai ni kaineti ma kakororaoan taetae ni burabeti ibukin te bwaretaiti, ake a koreaki taekaia irouia mwaane n aron Itaia, Ieremia, ao Etekiera. Ma baike a kakororaoaki ake a nori ana aomata te Atua, a boni kakukurei ao boni baika a kainnanoi n te tai arei. E na kakorakoraaki riki ara onimaki ngkai ti iaiangoa te bwai are e karaoia Iehova ibukia ana aomata n taai akekei. Ngkana a rangi ni kakukurei kakoroani bukin tabeua taetae ni burabeti ake n te moantai, tiaki e na kakukureira riki ngkanne ae e nang kakoroaki bukina? Iangoa te bwai ae e a tia ni karaoia Iehova ibukira ni boong aikai.

8. Te aeka n “aba” raa ae reke irouia ana aomata te Atua ni boong aikai?

⁸ A aikoa ngkai nako ana aomata Iehova man te natannaomata teuana, ao a aikoa naba bane ni maeka n te aba ae tii teuana. Ma a a riki Kristian aika kabiraki bwa te natannaomata n taamnei teuana, ae “ana Iteraera te Atua.” (IKar. 6:16) A raonaki irouia raoia ake “tiibu tabemwaang” n te “aba” n taamnei are a katiteuanaaki iai n taromauria Iehova ae te Atua. A maiuakina taromaurian Iehova. (Ioa. 10:16; Ita. 66:8) Te aeka n “aba” raa ae e a tia n anganira Iehova? Bon te bwaretaiti n taamnei. A a tia ngkai ana taetae ni burabeti te Atua are e beritana iai te maiu ae aekakin are i Eten ngkoa, ni kakororaoaki nanoia ni kaineti ma te onimaki n te aro ae tamaroa ao n rianako. Iangoi katoto tabeua.

9, 10. (a) E kangaa ni kakoroaki bukin te taetae ni burabeti are n Itaia 11:6-9 ni boong aikai? (b) Tera te bwai ni kakoaua ibukin te rau, ae ti kona n noria irouia ana aomata te Atua?

⁹ Te mweraoi. N te taetae ni burabeti are koreaki n Itaia 11:6-9 ao ti nora iai te taamnei ae tamaroa ae oti iai te katiteuanaaki ao te rau i marenaia maan aika moaanti ma aomata ao aia man aika manana. E noraki naba kakoroani bukin te taamnei aei ni boong aikai, ni kaineti ma te onimaki? Eng! N te kibu 9 ao ti reiakina bukina ngkai aeka ni man aikai a nang aki karaoa te kaikoaki ke baika karuanikai: “Ibukina bwa e na boni buta te aonnaba n ataakin Iehova, n aron taari ngkai e kabutaa marawa.” Te koaua bwa e bitaki naba aroia maan n “ataakin Iehova”? E aki, ma bon aomata aika bitaki man ataakin te Atua ae Moan te Rietata ao man reiakinan te kakairi n arona aika karika te rau. Anne bukina ae ti kona n nora kakoroani bukin te taetae ni burabeti anne ae  kaunganano n ara bwaretaiti n taamnei ni boong aikai. I aan ana kairiri te Tautaeka n Uea ao a a kona ngkai taan rimwini Kristo ni katoka aroia ae te unun ae kangaa aroia maan, ao a a maeka ma te rau ao te boonnano ma tariia ao mwaaneia n te onimaki.

¹⁰ N te katoto, ti a tia ni maroroakina teia Kristian i nuka n te boki aei. Ti maroroakina naba iai otara ae aanaki man te Baibara, ao te bwainikirinaki naba ae a kaitaraa ana aomata te Atua ibukin teia i nuka. E aki ngkanne kamimi ae iai n te aonnaba ae korakora iai te iowawa aei, te koraki aika ai aron te natannaomata ae bubura ae a rarawa n irekereke ma aeka n iowawa nako, e ngae naba ngkana e na ruanikai iai maiuia? Ai rianakora te bwai ni kakoaua aei ae ana aomata te Uea ae te Mesia a bon namakina te rau n aron are e kabwarabwaraaki iroun Itaia! E taekinna Iesu bwa a na kinaaki taan rimwina ngkana a itangitangiri. (Ioa. 13:34, 35) I nanon te ekaretia ao e teimatoa Kristo n reireinia ni kabane Kristian ni koaua rinanon ana “toro ae kakaonimaki ma ni wanawana,” bwa a na bwaina te rau, te tangira, ao te nimamannei.—Mat. 24:45-47.

11, 12. Te aeka n rongo raa ae e a rotaki iai te aonnaba ni boong aikai, ma e kangaa Iehova ni katauraoi baika bati ibukia ana aomata?

¹¹ E na bati te amwarake. E rotaki te aonnaba n te rongo ni kaineti ma te onimaki. E anga te kauring te Baibara ni kangai: “‘Noria! A a roko boong,’ bon ana taeka te Uea ae Moan te Rietata ae Iehova, ‘ike N na kanakoa iai te rongo nako aon te aba, ae tiaki te rongo n te amwarake ke te taka n te ran, ma te rongo ni kan  ongo ana taeka Iehova.’” (Amota 8:11) A rotaki naba kaain ana Tautaeka n Uea te Atua n te rongo? E a kaman taekina te kaokoro Iehova i marenaia ana aomata ao taani kairiribai nakoina, ni kangai: “A na amwarake au toro ma ngkami kam na baki. Noria! A na moi au toro, ma ngkami kam na taka. Noria! A na kimwareirei au toro, ma ngkami kam na kamaamaeaki.” (Ita. 65:13) Ko a tia n nori kakoroani bukin taeka akanne?

¹² A a raanga nakoira baika katauraoaki ibukin ara onimaki, n aron te karaanga ae rangi n raababa ma n nano. A riki ara boki aika aanaki n te Baibara, ma bwanaa aika raweaki ao birim, ara bobotaki ma ara bwabwaro, ao ai bwaai aika katokaaki n ara atureti n te Intanete, bwa amwarake n taamnei aika ai aron te ran ae teimatoa n raanganako n te aonnaba ae a baki kaaina aei ni kaineti ma te onimaki. (Etek. 47:1-12; Ioera 3:18) Ko aki kukurei n nori kakoroani bukin ana berita Iehova aika rangi ni bati ni maium ni katoabong? Ko taraia raoi bwa ko na amwamwarake n ana taibora Iehova?

13. Ko kangaa n tia n nora kakoroani bukin ana berita Iehova, ni kaineti ma kaureani mataia akana mataki ao kaukan taningaia akana bonotaninga?

¹³ Te marurung n te onimaki. E a taabangaki ni boong aikai te aoraki ae te mataki ao te bonotaninga ni kaineti ma te onimaki. (2Kor. 4:4) Ma e ngae n anne, e kamarurungia aika mwauku ao aika aoraki ni katobibia te aonnaba Kristo. Ko a tia n noriia aomata aika kaureaki mataia ao aika kaukaki taningaia? Ngkana ko a tia n noriia aomata aika karekea te atatai ae eti i aon te koaua man ana Taeka te Atua, ake a kainaomataaki man ana kewe nako te Aro are karikiia ngkoa ni mataki ao ni bonotaninga nakon te koaua, nanona ngkanne bwa ko a tia n nora kakoroani bukin te berita aio: “N te bong anne ao akana bonotaninga a na ongo taeka ake n te boki, ao a na noraaba mataia akana mataki man te roo ao te rotongitong.” (Ita. 29:18) Ni katobibia te aonnaba ao bubua ma bubua tenga aomata ake a karekea te aeka ni kakamaiu ni kaineti ma te onimaki aei ni katoa ririki. A a riki aomata n tatabemania nako ake a kitana Baburon ae Kakannato ao n raonira n taromauri n ara bwaretaiti n taamnei, bwa te bwai ni kakoaua ae a boni kokoro bukin ana berita nako Iehova!

14. Iaiangoan te bwai ni kakoaua raa ae e na kakorakoraa ara onimaki?

¹⁴ E oti ni mwakoron nako te boki aei te bwai ni kakoaua ae aki kona ni kakeweaki bwa e a tia Kristo ni kairiia taan rimwina nakon te bwaretaiti n taamnei ni koaua n tain te toki aei. Ti bia teimatoa n iaiangoi baika bati aika ti kakabwaiaaki iai n te bwaretaiti anne ni boong aikai. Ni karaoan aei iroura, e na ririkirake iai ni korakora onimakinan ana berita Iehova ibukin taai aika a na roko.

15. Bukin tera ngkai ti kona ni kakoauaa bwa e na bon riki te aonnaba aei bwa te bwaretaiti?

¹⁵ Ai kaman ana kantaninga Iehova bwa e na karaoa te aonnaba aei ni kabutaa bwa te bwaretaiti. E katikuia Atam ma Ewa n te onnaroka ae te bwaretaiti, ao e tua nakoia bwa a na kaona te aonnaba irouia kanoaia ao n tararuaiia maan ni kabane ake iai. (KBwaai 1:28) Ma a kakairi Atam ma Ewa n ana karitei Tatan ao ni karekea nakoia kanoaia te aki kororaoi, te bure, ao te mate. Ma  e ngae n anne, e bon aki bitaki ana kantaninga te Atua. E kokoro bukin ana taeka are e a tia n taekinna. (Wareka Itaia 55:10, 11.) Ti kona ni kakoauaa ngkanne bwa e na bon on te aonnaba aei ni kanoaia Atam ao Ewa ao a na taua taekana, ao n tararuai ana karikibwai Iehova ma te tangira n te bwaretaiti ae kabutaa te aonnaba. N te tai anne ao a nang kakoroaki bukin taian taetae ni burabeti ibukin te maiu n te bwaretaiti, ake a taekinaki ngkoa nakoia I-Iutaia ake a kairaki bwa taenikai! Iangoi katoto aikai.

16. E kangaa te Baibara ni kabwarabwaraa te mweraoi ae ti na karekea n te Bwaretaiti?

¹⁶ Te mweraoi. N tokina ao a nang kakoroaki raoi bukin taeka aika kaunganano ake n Itaia 11:6-9. A nang namakina te mano ao te mweraoi mwaane, aine, ao ataei, n taabo ake a nako iai n te aonnaba. Akea te bwai ae karikaki ae tao te aomata ke te man ae e na manga karika te kangaanga teuana. Iangoa te tai ae ko nang taraa iai te buraneti aei ni kabutaa bwa mwengam, ae ko kona n uaua iai n taiani karaanga, n taian nama, ao i taari, ko mwamwananga n taabo aika maungaunga, ao n nakonako n taabo aika bati iai uteute n akea te kangaanga. Ao ko na aki raraoma naba ngkana e a tairiki. A na boni koro bukin taeka ake n Etekiera 34:25, ike a nang kona iai ana aomata te Atua ni “maeka ma te mweraoi n te rereua ao ni matu n taiani buakonikai.”

17. Bukin tera bwa ti kona ni kakoauaa ae Iehova e na boni katauraoi baika bati aika ti kainnanoi, ngkana e a roko mwaakan ana kairiri te Tautaeka n Uea n te aonnaba ni kabutaa?

¹⁷ E na bati te amwarake. Iangoa te tai ae e nang akea iai te maiu ni kainnano, te aoraki ae te bakitaia, te rongo, ke waaki ibukini buokaia aomata aika kainnano. Reken te kaubwai ae bati ni kaineti ma te onimaki irouia ana aomata te Atua ni boong aikai, boni kakoauaan ae e na kanuaiia ana aomata nako n itera aika kakaokoro te Uea ae te Mesia. Ngke e mena n te aonnaba Iesu ao e kaotia teutana ae e kona ni kakoroi bukin aeka ni berita akanne, bwa e kaamwarakeia nga ma nga aomata n tabeua te kariki ao te ika. (Mat. 14:17, 18; 15:34-36; Mareko 8:19, 20) Ngkana e a kairiri ana Tautaeka n Uea te Atua n te aonnaba ni kabutaa, ao a nang kakoroaki bukin taetae ni burabeti aika ai aron aei: “E na anga te karau ibukini koraa ake kam uniki i aontano, ao e na bati te amwarake ae uaan aontano ma ni kangkang. N te bong anne, ao a na amwarake ami nanai ni man n taian tawaana aika mwawaawa.”—Ita. 30:23.

18, 19. (a) Tera ae nanonaki ibukim n te taetae ni burabeti are koreaki n Itaia 65:20-22? (b) Tera ae nanonaki n ae ara bong a na riki “n aron abwabwakin ana bong te aroka”?

¹⁸ Ni boong aikai ao a bati aomata aika e kangaanga irouia iangoan ae e na reke mwengaia ae kamwengaraoi ke e na uaana ma ni materaoi te mwakuri are a karaoia. N te waaki ae mangaongao aei ao a bati aika noria bwa a mwakuri n te tai ae maan ma te korakai, ma e karako te kakabwaia nakoia ke aia utu, ma a bati kakabwaiaaia aomata aika kaubwai ma n nanonrang. Iangoa aron te maiu ae nang riki ngkana e a kakoroaki bukin te taetae ni burabeti aei ni katobibia aonnaba: “A na katei auti ao a na maeka i nanoia, ao a na uniki kureebe ni nne ni kureebe ao ni kang uaaia. A na aki katea ae e na maeka iai temanna, ao a na aki naba unika ae a na kanna tabemwaang. Bwa a na abwabwaki aia bong au aomata n aron abwabwakin ana bong te aroka, ao a na bati kimwareireia au aomata aika rineaki n aia mwakuri baia.”—Ita. 65:20-22.

¹⁹ Tera ae nanonaki n ae ara bong a na riki “n aron abwabwakin  ana bong te aroka”? Ngkana ko tei i oin te aroka ae totoakaei, ko aki namakinna ae ko taonakinako n te miroaroa ngke ko a iaiangoia bwa ai maanra maiun te aroka anne n tei ikanne, bwa tao e a kamani maiu riki imwaini bungiakia tibutorum? Ko na bae n iangoia ae ngkana arona bwa ko bon teimatoa naba n aki kororaoi, ao e na bae n abwabwaki riki maiun te aroka anne nakoim, ao e na teimatoa ni maiureirei n akea ana kangaanga, imwin naba maanim ni bua man te maiu aei. Ai akoira Iehova ngkai e karaui nanora bwa ngkana e roko te Bwaretaiti ao a nang abwabwaki maiura ao n rau! (TaiAre. 37:11, 29) E nang roko te bong are ti nang tarai iai aroka aika maiu i nanon te tai ae maan bwa kaanga ai aron uteute aika kai mauna, a roko ao a a manga nako, ao ngaira ti nangi maiu n aki toki!

20. N te aro raa ae a na karekea iai te marurung ae kororaoi ana aomata aika kakaonimaki ni koaua te Tautaeka n Uea?

²⁰ Te marurung ae kororaoi. Ni boong aikai ao a rotaki aomata ni kabane n te aoraki ao te mate. Ti boni bane n aoraki, bwa ti ituaki n te aoraki ae kamamate ae aranaki bwa te bure. Bon tii teuana te bwainnaoraki ibukina, ae ana karea ni kaboomwi Kristo. (IRom 3:23; 6:23) I nanon te tai n Tautaeka ae Maanna Tenga te Ririki ao Iesu ma raona n tautaeka a na buokiia aomata bwa a na kakabwaiaaki raoi man te karea anne, ao a na kamauna mairouia aomata aika kakaonimaki mwin nako te bure, teutana imwin teutana. E na boni koro raoi bukin ana taetae ni burabeti Itaia aei: “Akea te tia maeka iai ae e na kangai: ‘I aoraki.’ A na kabwaraaki aia bure aomata aika maeka n te aba.” (Ita. 33:24) Iangoa te tai ae e nang akea iai ae e mataki, e bonotaninga, ke e mwauku. (Wareka Itaia 35:5, 6.) Akea te aoraki ae e na aki kona ni katokaki iroun Iesu, n aron aorakin te rabwata, te iango, ke te nano. A na karekea te marurung ae kororaoi ana aomata aika kakaonimaki ni koaua te Tautaeka n Uea!

21. Tera ae e na riki nakon te mate, ao bukin tera bwa e karaunano nakoim te berita anne?

²¹ Ma tera ngkanne ae e na riki nakon te mate, ae te bwai ae e riiriki ibukin te aoraki ao uaan te bure? Anne bon ara “kairiribai are te kabane,” ae e kaaitaraia aomata ni kabane aika aki kororaoi ao e tokanikai i aoia aomata ni kabane. (1Kor. 15:26) Ma te koaua bwa e kangaanga te tokanikai i aon te mate iroun Iehova? Nora ae e a kaman taekinna Itaia ae kangai: “E na onga te mate n aki toki, ao e na kaoi rannimata mani maata ni kabane te Uea ae Moan te Rietata ae Iehova.” (Ita. 25:8) Ko kona ni kataamneia te tai anne? A nang akea taiani botaki n taunimate, a nang akea taian ruanimate, ao e nang toki te tang ibukin te rawawatannano! E nang oneaki mwina n te tang ni kukurei bwa e nang kakoroa bukin ana berita Iehova ae kakukurei ae kautakia maate! (Wareka Itaia 26:19.) N tokina ao e nangi bon toki mwin te maraki ao te uruakinnano ae bati ae reke man te mate.

22. Tera ae e na riki ngkana e a tia te Tautaeka n Uea iroun te Mesia ni karaoa nanon te Atua n te aonnaba?

²² N tokin Ririki ake Tenga ao e nang tia karaoan nanon te Atua n te aonnaba iroun te Tautaeka n Uea, ao Kristo e nang kaoka te tautaeka nakon Tamana. (1Kor. 15:25-28) A nang tauraoi aomata aika kororaoi ni kaitaraa te kabanea ni kataaki ngkana e a kaotinakoaki Tatan man te kinono are akea te mwakuri ae kona ni karaoaki iai. Imwin anne ao Kristo e nang kamanatuaa te naeta  ane buakaka anne ao taani boutokaia ni kabane. (KBwaai 3:15; TeKao. 20:3, 7-10) Ma a na karekea te kantaninga ae kakukurei te koraki nako ake a tangira Iehova ni koaua. Tao akea riki te taeka teuana ae kona ni kataamneia te taamnei ae raoiroi riki nakon taeka ake ti kunei n te Baibara. Bon te berita ibukia akana kakaonimaki bwa a na karekea “te inaomata ae rianako arona ae reke irouia natin te Atua.”—IRom 8:21.

23, 24. (a) Bukin tera bwa a na boni kakoroaki bukin ana berita te Atua? (b) Tera ae ko motinnanoia bwa ko na karaoia?

²³ Berita aikai bon tiaki tii taiani karekeiango, ke baika karioaki, ke kanoa ni mii. A na boni kakoroaki bukin ana berita Iehova! Bukin tera? Uring ana taeka Iesu ake ti maroroakin ni moani mwakoron te boki aei. E reireinia taan rimwina bwa a na tataro nakon Iehova ni kangai: “E bia roko am Tautaeka n Uea. E na kakororaoaki nanom i karawa ao n te aonnaba naba.” (Mat. 6:9, 10) Ana Tautaeka n Uea te Atua bon tiaki te bwai ae memena n ana iango te aomata. Bon te tautaeka ni koaua! E a kairiri ngkai i karawa. I nanon ririki aika tebubua n nako, ao e a tia ni kakoroi bukin ana berita Iehova n aanga aika ti kona n nori raoi n te ekaretia ni Kristian. Ti kona ni kakoauaa ngkanne bwa a na boni bane ni koro bukin ana berita Iehova ngkana e a karokoa mwaakana n te aonnaba ana Tautaeka n Uea te Atua!

²⁴ Ti ataia bwa e na bon roko ana Tautaeka n Uea te Atua. Ti ataia bwa a na boni koro bukin ana berita Iehova. Bukin tera? Ibukina bwa E A KAIRIRI ANA TAUTAEKA N UEA TE ATUA! Aio te titiraki ae ti riai n titirakinira n tatabemanira nako, ‘E oti bwa e kairiri i aoni maiuu te Tautaeka n Uea?’ Ti bia karaoa ara kabanea ni konaa n riki bwa ana aomata te Tautaeka n Uea anne aika kakaonimaki ni koaua ngkai, bwa ti aonga ni kona ni kakabwaiaaki n aki toki man ana kairiri ae kororaoi ma n raoiroi!