1, 2. (a) Omena ratjike povikando tjiva tje ri ouzeu okukambura kutja Oparadisa otjiṋa tja tjiri? (b) Otjikeṋa tji matji tu vatere okuyanḓiparisa ongamburiro yetu momakwizikiro waMukuru?

 OMURUMENDU omukambure nu omuṱakame we ya kombongarero yombongo, a urwa tjinene mena reyuva ezeu nda ri na ro. Eye wa tjindwa navi i omuhona we, u nongendo ohunga nouzeu wokuṱakamisa eṱunḓu re, nu wina wa kurungisiwa i ouvere womukazendu we. Indu omusiki weimburiro rokuuta ombongarero tji wa utu, eye arire tja suvana kaṱiṱi orondu u nondjoroka okukara puna ovakambure ovakwao pEtuwo rOmerikotameneno. Eimburiro mari hungire ohunga nomaundjiro wOparadisa, nu omambo weimburiro ndi, maye mu tunduuza kutja me rimune aayo eye u ri mOparadisa. Indi eimburiro nda suvera nu otja tji ma imbura puna eṱunḓu re, arire tja huhumiṋwa i omaundjiro woruyaveze ngo.

² Ove wa rora okukara mongaro otja indjo poo indee? Ovengi vetu va rora. Ouhumandu, ongaro yehupo mouye mbwi i tjita kutja ma rire ouzeu ku eṱe okumuna kutja oparadisa tjiri mai ya. Itwi “otuveze otuzeu” nu ouye mu tu hupa mbwi kau ri tjimuna oparadisa oparukaze. (2 Tim. 3:1) Otjikeṋa tji matji tu vatere okumuna omaundjiro wetu nga otjotjiṋa tjatjiri? Nu hapo matu tjiwa vi kutja Ouhona waMukuru tjiri mau yekuhonaparera ovandu avehe? Ngatu tare ku tjiva womakwizikiro waJehova ovakarere ve varukuru ngu va muna amaye yenenisiwa. Okuzambo matu katara kokutja omakwizikiro ngo na warwe nga sana ngo ye yenenisiwa vi ndino. Nu korusenina, ongamburiro yetu tji ya yanḓiparisiwa, matu kayandja ombango kokutja omakwizikiro ngo ye notjiṋa tjaye noruyaveze rwetu.

3. Omakwizikiro yeṋe nga huhumiṋa Ovajuda mba ri moBabilon otjovahuurwa?

³ Ripura ohunga nongaro yehupo rOvajuda mbaave kara otjovahuurwa moBabilon meserewondo 6 Komurungu waKristus. Ovengi vawo ve kurira mouhuura tjimuna ovanene vawo nu ehupo ra ri ezeu. Ovature vaBabilon aave ve tatumisa mena rongamburiro yawo mu Jehova. (Eps. 137:1-3) Mozombura azehe nḓo, Ovajuda ovaṱakame va kakatera komaundjiro Jehova nga kwizika wokutja ma yarura ovandu ve kehi rawo. Jehova wa tja owo mave kakara mozongaro ozombwa koṋa ngo. Eye  nandarire wa sasaneka ozongaro zaJudea kuna otjikunino tjaEden otjo tji tja ri oparadisa! (Lesa Jesaja 51:3.) Omakwizikiro otja ingo tjiri ya tjitirwe kutja ovakarere vaMukuru ve kare nomaundjiro, nokuisa po omakeyakeyero ngamwa nga ri momitima vyawo. Omomuano uṋe? Ngatu tare komakwizikiro tjiva.

4. Otjikeṋa Jehova tja kwizikira Ovajuda ohunga nondjeverero mehi rawo?

⁴ Ondjeverero. Ovahuurwa mba kaave yaruka koparadisa nungwari aave yaruka kehi nda isirwe etundu oure wozombura 70 nu ovengi vawo kavena pu va rora okumuna ehi ndi. Moruveze rwOmbeibela, ozongeyama, ozombungu ovitotongwe novipuka vyarwe ovinyondorore vya takavarere. Oviuru vyomaṱunḓu ngahino aavi ripura kutja, ‘Me tjevere vi omukazendu wandje novanatje? Me tjevere vi ozonḓu zandje nozongombe?’ Kanavi okukara nozongendo otja inḓo. Nambano ripura ohunga nomakwizikiro waMukuru nga tjangwa mu Jesaja 11:6-9 nokutja owo ya ri omahuhumiṋe pu pe ṱa pi. (Lesa.) Nomambo omawa ngo, Jehova wa yandja ongamburiro kovakarere ve ovahuurwa kutja owo novinamuinyo vyawo mavi kara mondjeverero. Ongeyama mai ri ehozu, pu mape hee kutja kai nokurya ozongombe zOvajuda. Imba ovaṱakame kaave hepa okurikenda ohunga novipuka ovinyondorere mbyo. Jehova wa kwizika kutja ovakarere ve mave kara mondjeverero mehi raJudea nandarire mokuti ongaango na mokuti ku kwa pota tjinene.—Esek. 34:25.

5. Omakwizikiro yeṋe nga vatera Ovajuda mbaave yaruka konganda okukara nongamburiro kutja Jehova me ke ve pa avihe mbi mave hepa?

⁵ Ondaya oyingi. Ozongendo zarwe ngahino za ri nḓa, ‘Hapo me kayenena okuparura eṱunḓu randje tji twa i kehi ndo? Matu kakara pi? Mape kakara oviungura nu mavi karira ovisemba pu imbi ovizeu mbi tu ungura mouhuura kehi yovanauvara poo indee?’ Okupitira momakwizikiro we nge ri mOmbeibela, Jehova wa zira omapuriro aehe ngo wina. Jehova wa kwizika kutja ma karokisa ombura kovakarere ve mbe nonḓuviro nu oyo mai tjiti kutja ehi ri hape nawa nu pe kare “omakondero omengi” wovihape. (Jes. 30:23) Jehova wa kwizikira ovakarere ve ohunga neha noviungura ovisemba, na tja, “Ovandu mave tungu ozondjuwo nave tura mo oveni; mave kunu omivite nave ri ovihape vyavyo. Owo kave nokutungira omundu warwe ondjuwo kutja a ture mo; kave nokukunina omundu warwe omuvite kutja a rye ku wo.” (Jes. 65:21, 22) Otjiperi kutja, ehupo rawo mari karira ewa tjinene momiano omingi kombanda ya indi rouhuura moBabilon. Nu hapo ouzeu wawo ounene mbwe ve twara kutja ve karire ovahuurwa moBabilon mau tjitwa vi?

6. Omitjise viṋe mbya kondjisa ovakarere vaMukuru oure woruveze orure nu Jehova wa kwizika tjike kOvajuda mbaave yaruka kehi rawo?

⁶ Oupanga ouwa kuna Jehova. Ngunda ave hiya ya mouhuura ovakarere vaMukuru va ri noupanga oungundi kuna ye. Okupitira momuprofete Jesaja, Jehova wa tja nai ohunga notjiwaṋa tje: “Oviuru vyeṋu vya usuka novirwaro, nomitima vyeṋu vya vera.” (Jes. 1:5) Owo va sanene aayo va poṱupara nu va ri ozomboro moupanga wawo kuna Jehova orondu owo kaave puratene komarakiza waJehova nu kaave tara kombatero Jehova ndjaa yandja. (Jes. 6:10; Jer. 5:21; Esek. 12:2) Tji va wirwa i ouzeu mbwi rukwao, owo mape ya ave kakara nondjeverero? Kave nokupandjara  oupanga wawo kuna Jehova rukwao nao? Omakwizikiro waJehova nga tjiri ya ri omahuhumiṋe: “Eyuva ndo tji re ya, omboro mai yenene okuzuva embo ndi mari lesewa, nomupoṱu nguya kara monḓorera ma yenene okumuna.” (Jes. 29:18) Otjiperi kutja, Jehova ma kohorora ovandu ve mombepo mbe ritanaura komauvi wawo. Tji va yakura omaronga we nave kara nonḓuviro ku Jehova, eye me ve pe omuhunga nondjiviro ndji mave hepa.

7. Omakwizikiro waMukuru kovakarere ve mba huurirwe ya yenenisiwa vi nu ongwaye tji matu sokuvara omayenenisiro ngo otjotjiṋa otjiyanḓiparise tjongamburiro?

⁷ Jehova wa yenenisa omakwizikiro nga poo indee? Oviṋa mbya tjitwa morukapitaveze ombi mavi ziri epuriro ndo. Ovajuda mba yaruka kehi rawo va kakara mondjeverero, va serwa ondaya onyingi nu va kakara noupanga ouwa kuna Jehova. Okutara kotjihorera, Jehova we ve tjevera koviwaṋa oviraranganda mbya ri ovinamasa nu mbya ri novandu ovengi pu wo. Ovipuka ovinyondorore kavina pu vya rya ovinamuinyo vyOvajuda okumana. Otjiperi kutja, Ovajuda mbwo kave munine omayenenisiro aehe womakwizikiro woviṋa avihe Jesaja, Jeremia na Esekiel mbi va tjanga, posi yokutja omayenenisiro ovakarere vaMukuru ngu va muna ya ri omawa tjinene nu ongaa ve hepa oruveze ndwo. Otja tji matu ripura ohunga noviṋa Jehova mbya tjitira ovakarere ve oruveze ndwo, ongamburiro yetu mai harere ko omasa. Ndovazu oviṋa mbya yenenisiwa ohinga uriri vya eta ondjoroka ndji ṱa mbo, nambano mape kara vi indu tji vya yenenisiwa okuura? Ngatu tare koviṋa Jehova mbye tu tjitira ndino.

8. “Ehi” riṋe ovakarere vaMukuru ndi ve yorokera ndino?

⁸ Ovakarere vaJehova ndino kave ya za momuhoko umwe uriri, nu kave ri mehi rimwe uriri. Posi yokutja, Ovakriste ovatwirisiwa va zikama motjiwaṋa tjimwe tji tji isanewa ‘oIsrael jaMukuru.’ (Gal. 6:16, EEP) Ovakarere ovakwao mbe ri ‘ozonḓu zarwe’ mave kara puna wo ‘mehi’ ropambepo, ndi kuramena po ondyero ndji ri po kutja ovakarere vaMukuru ve rikotamene ku Jehova Mukuru mombwaneno. Omerikotameneno ngo ongaro yawo yehupo. (Joh. 10:16; Jes. 66:8) Nu hapo Jehova we tupa ‘ehi’ ndi ri vi? Oro oparadisa yopambepo. Moparadisa ndji, omakwizikiro ohunga noruyaveze oruwa ya yenenisiwa popambepo. Ngatu tare kovihorera tjiva.

9, 10. (a) Omakwizikiro nge ri mu Jesaja 11:6-9 ye yenenisiwa vi ndino? (b) Otjiraisiro tjiṋe ohunga nohange, tji tu muna mokati kovakarere vaMukuru ndino?

⁹ Ondjeverero. Momakwizikiro nge ri mu Jesaja 11:6-9, tu lesa ohunga nohange nombwaneno ndji ri pokati kovipuka vyokuti na pokati kovandu novinamuinyo vyawo. Omakwizikiro ngo ye nomayenenisiro wopopambepo ndino poo indee? Ii, ye na wo! Mezeva 9, matu rihongo kutja ongwaye ovipuka mbi, tji vi hi nokutjita otjipo poo onyoneno: “Ehi mari ura nondjiviro yaMuhona tjimuna okuvare tji kwe ura nomeva.” Nu hapo ‘ondjiviro yaMuhona’ i rundurura ongaro yovinamuinyo poo indee? Kako, ovandu ombe rundura ongaro yawo indu tji va zu nokutjiwa Mukuru wOkombandambanda nave rihongo okuhorera  komiano vye vyohange. Kunao, opu tu zokumuna omayenenisiro womakwizikiro ngo moparadisa yetu yopambepo ndino. Kehi yOuhona waMukuru, ovakongorere vaKristus ve rihonga okuisa ozongaro ozombi zoutwe nokuisa okuritjinda otjovipuka kutja ve hupe mohange nombwaneno pu novakambure ovakwao.

¹⁰ Okutara kotjihorera, membo ndi twe rihongo ohunga nokuhina okutoorora omunda, nu mena romukambo mbwa zikamena kOmbeibela mbu twa toora mbwi, ovakarere vaMukuru ovengi va tatumisa. Katjiṋa otjiwa nao kutja nandarire mouye woutwe mbwi pe ‘notjiwaṋa’ tji tji toorora okuhina okukara norupa movitjitwa vyoutwe nandarire kutja mave zepewa indu tji ve ha tjitire nao? Ihi otjiraisiro otjikahu kutja ovakongorere vOmbara Messias ve nohange otjingeyo ndji Jejasa ndja hungira! Jesus wa tja ovemukongorere mave tjiukirwa korusuvero ndu va ri na rwo mokati kawo. (Joh. 13:34, 35) Mombongo Kristus u ungurisa “omukarere omuṱakame nomunazondunge”, okuhonga Ovakriste avehe okukara nohange, ve suverasane nu ve rire ovapore.—Mat. 24:45-47.

11, 12. Ouhepe waye mbu ri mouye ndino, posi yokutja omomuano uṋe Jehova ma yandja ovingi kovakarere ve?

¹¹ Ondaya onyingi. Ouye kau nondjiviro yaMukuru. Ombeibela ya rakiza nai tja: “Tara, omayuva maye ya Ami mu me hindi ondjara mehi, nu kandjara yomboroto nu kayonyota yomeva, nungwari oyokuvanga okuzuva embo raMuhona. Ami, ngu  mbi ri Muhona Ndjambi, mba hungire.” (Amos 8:11) Ovature vOuhona ve nouhepe mbwi wina poo indee? Jehova wa kwizika ohunga nombangu ndji mai kara pokati kovakarere ve novanavita na ye indu tja tja: “Imba mbe rikotamena nokukara nonḓuviro ku Ami mave kara novingi okurya nokunwa, nungwari eṋe mamu ṱondjara nonyota. Owo mave yoroka, nungwari eṋe mamu ṱisiwa ohoṋi.” (Jes. 65:13) Ove wa rora okumuna omayenenisiro womambo ngo?

¹² Ovikurya vyombepo vi tu pupira tjimuna onḓonḓu ndji ririra ko onene nongoto eyuva arihe. Omambo wetu nga zikamena kOmbeibela, novipuratenwa nozovidio, ozombongarero zetu nomaworonganeno wotukondwa noviṋa mbi pitisiwa morungovi rwetu, avihe mbi ovikurya mbi tu vatera okukara noupanga ouwa kuna Jehova ngunda ovandu mouye ave hi noupanga mbwo. (Esek. 47:1-12; Joel 3:18) Katjiete tjondjoroka nao okumuna omayenenisiro womakwizikiro waJehova ohunga nokuserwa ondaya onyingi eyuva arihe? Ove hapo u rya potjiriro tjaJehova eyuva arihe poo indee?

13. Omomuano uṋe mu wa muna omayenisiro womakwizikiro waJehova wokutja ovapoṱu mave munu nokutja ozomboro maze zuu?

¹³ Oupanga ouwa kuna Jehova. Ovandu ovengi ndino va sana aayo va twika nu ozomboro orondu kave noupanga ouwa kuna Jehova. (2 Kor. 4:4) Nungwari Kristus u verura omitjise ngamwa avihe mouye. Ove wa rora okumuna omupoṱu ama munu nomboro amai zuu? Ndovazu wa rora okumuna ovandu amave ya kondjiviro youatjiri wEmbo raMukuru, nave isa ovizeze mbyaa ve hongwa nu mbye ve poṱuparisire nokuveworoparisa, okutja wa muna omayenenisiro womakwizikiro nga: “Eyuva ndo tji re ya, omboro mai yenene okuzuva embo ndi mari lesewa, nomupoṱu nguya kara monḓorera ma yenene okumuna.” (Jes. 29:18) Mouparanga wouye, ovandu ovengi ve verukisiwa momuano mbwi nu ve hara oupanga ouwa kuna Mukuru. Omundu auhe ngwa piti mu Babilon otjinene ne rikutu kuna eṱe moparadisa ndji u raisa kutja omakwizikiro waJehova ya rira ouatjiri!

14. Otjikeṋa tji matu sokuripurira ko kutja tu yanḓiparise ongamburiro yetu?

¹⁴ Ekondwa arihe rembo ndi mari raisa kutja Kristus wa twa ovemukongorere moparadisa yombepo momayuva omasenina nga. Ngatu kayende komurungu okuripurira kozondaya ozengi nḓu twa muna moparadisa ombwa ndjo ndino. Otja tji matu tjiti nao, ongamburiro yetu momakwizikiro waJehova woruyaveze mai harere ko omasa.

15. Ongwaye tji matu yenene okukara nongamburiro kutja ehi mari rire oparadisa?

¹⁵ Ondando yaJehova okuza korukuru ya ri oyokutja ehi arihe ri rire oparadisa. Eye wa twa Adam na Eva motjikunino nu e ve pe erakiza rokutja ve urise otjikunino ho norukwato rwawo nu ve tjevere ovipuka avihe. (Gen. 1:28) Moruveze rwokutjita nao, Adam na Eva va kongorera Satan mokupirukira Mukuru nu mokutjita nao, owo va tjita kutja ovanatje vawo avehe ve rire ovahahomonena, ve kare nouvi nu ve ṱe. Posi yokutja ondando  yaMukuru kaina pu ya runduruka. Jehova tja hungire embo, aruhe ri yenenisiwa. (Lesa Jesaja 55:10, 11.) Okutja matu yenene okukara nongamburiro kutja ozondekurona zaAdam na Eva maze tura mehi ndi naze urisa ro, amaze tjevere oviutwa vyaJehova moparadisa mouye auhe. Moruveze ndwo, omakwizikiro ohunga nozongaro ozombwa kotjirutenga nga yandjerwe kOvajuda mba ri ovahuurwa maye yenenisiwa okuura! Ngatu tare kovihorera mbi mavi kongorere mba.

16. Ombeibela i kahurura vi ondjeverero ndji matu kakara na yo mOparadisa?

¹⁶ Ondjeverero. Korusenina, omakwizikiro nge ri metjangwa raJesaja 11:6-9 maye kayenenisiwa okuura. Ovarumendu novakazendu novanatje mave kara mondjeverero kombanda yehi apehe pu mave i. Kape notjiutwa natjimwe, kutja ovandu poo ovipuka, mbi mavi ve etere oumba. Ripura noruveze indu ove tji mo kamuna ehi arihe otjomaturiro woye, ove pu mo yenene okutjaara mozonḓonḓu, omarindi na mokuvare; okukondoroka ozondundu; nokuryanga mokuti nondjeverero. Nu tji kwa zorere ove kamoo katira ooma. Omambo nge ri mu Esekiel 34:25 maye yenenisiwa, kutja ovakarere vaMukuru poo ozonḓu ze, ze yenene ‘okukara nokuhinooma momaryo, nokutja ze wombe momahwa.’

17. Ongwaye tji matu yenene okukara nongamburiro kutja ovihepwa vyetu mavi kayenenisiwa indu Ouhona tji mau kahonaparera ehi arihe?

¹⁷ Ondaya onyingi. Ripura noruveze tji pe hina okukara oviṋa tjimuna ousyona, ondjara poo ozonamiti. Ovikurya vyombepo ovingi ovakarere vaMukuru mbi ve muna ndino, otjiraisiro otjikahu tjokutja Ombara Messias mai parura imba mbe riwisa kehi yayo momiano avihe. Jesus tja ri kombanda yehi, eye wa raisa kutja u nomasa wokuyenenisa omakwizikiro nga, indu eye tja parura ovandu omayovi mba ri nondjara nozomboroto ozonḓiṱi uriri nomahundju. (Mat. 14:17, 18; 15:34-36; Mar. 8:19, 20) Indu Ouhona waMukuru tji wa utu okuhonapara kombanda yehi, omakwizikiro omengi maye yenenisiwa okuura, tjimuna inga ngu maye tja: “Nu aruhe tji mo kunu ozondwi zoye, Muhona ma rokisa ombura, ndji mai hapisa ozondwi nḓa, nEye me ku pe omakondero omengi wovihape ngu maye ku parura, novinamuinyo vyoye mavi kara nomaryo omengi.”—Jes. 30:23.

18, 19. (a) Omakwizikiro nge ri mu Jesaja 65:20-22 ye nomaheero watjike kove? (b) Omomuano uṋe mu matu “hupu otja omiti”?

¹⁸ Ovandu ovengi ndino kave kambura kutja mave yenene okukara nonganda ombwa poo nandarire oviungura oviwa mbi mavi ve pe ondjoroka. Mouye mbwa zunḓaka mbwi, ovengi ve muna kutja ve ungura ozoiri ozengi nu ve ungura oukukutu, posi yokutja kave nouwa mbu ve muna mo. Ovandu imba ovatumbe na imba vominenetima ombe tumbira ko. Ripura uriri kutja maku kara vi indu omakwizikiro nga tji ya yenenisiwa mouye auhe: “Ovandu mave tungu ozondjuwo nave tura mo oveni; mave kunu omivite nave ri ovihape vyawo. Owo kave nokutungira omundu warwe ondjuwo kutja a ture mo; kave nokukunina omundu warwe omuvite kutja a rye ku wo, indee. Ovandu votjiwaṋa tjandje mave hupu otja omiti. Owo oveni mave ri imbi mbi va ungura nomake wawo oveni.”—Jes. 65:20-22.

¹⁹ Omambo wokutja matu “hupu otja omiti” maye hee tjike?  Indu tji wa kurama meṋe yomuti omunene tjinene, mape ya u tjaterwa tji mo ripura kutja omuti mbwo hapo wa kara mbo oure wozombura ngapi. Nu mape ya oripura kutja ngahino wa kara ozombura ozengi tjinene, nandarire ngunda ovakuru voye ave hiya kwatwa. Ove ngahino mo utu okuripura kutja mongaro mu uri nai youhahomonena, omuti mbwo mape ya au hupu orure kombanda yoye. Ove ngunda awa zembwa rukuru, owo mau kayenda komurungu okuhapa. Jehova tjiri omuwa mokutukwizikira kutja mOparadisa ndji mai ya, eṱe wina matu yenene okukahupa orure nu mohange! (Eps. 37:11, 29) Eyuva mari ya indu tji matu utu okumuna omiti otja omahozu uriri ngu maye hapa nokukoka ngunda eṱe amatu kayenda komurungu okuhupa nga aruhe!

20. Ovayandjaruvara vOuhona ovaṱakame mave kayorokera vi ouveruke ouwa?

²⁰ Ouveruke ouwa. Kundino, omitjise nonḓiro vi ṱuna kovandu avehe. Matu yenene okutja eṱe atuhe twa vera omutjise omuzepe owo mbu ri ouvi. Omaverukisiro ayeerike nge ri po otjisuta tjaKristus tjonguturiro. (Rom. 3:23; 6:23) Indu Jesus novahonaparere va puna ye tji mave kahonaparera ovandu oure wozombura 1 000, owo mave kavatera ovandu avehe okumuna ombatero ndji za mombunguhiro ndjo, nu korusenina owo mave kavatera ovandu avehe ovaṱakame kutja ave ha kara nouvi rukwao. Omakwizikiro waJesaja maye kayenenisiwa okuura, ngu maye tja: “Nu kape nomundu ngwa tura mehi retu, ngu ma unauna rukwao kutja eye wa vera, nomauvi aehe maye isirwa.” (Jes. 33:24) Ripura noruveze indu tji pe hi nomundu ngu ma rire omupoṱu, omboro poo omuremane. (Lesa Jesaja 35:5, 6.) Kape nomutjise mbu mau rire omuzeu ku Jesus okuverura, kutja omutjise wokorutu, momeripura poo womomuinyo. Ovayandjaruvara vOuhona mbe ri ovaṱakame mave yorokere ouveruke ouwa!

21. Onḓiro mai katjitwa vi, nu ongwaye omakwizikiro ngo tji maye ku huhumiṋa?

²¹ Nu hapo maku katjitwa tjike konḓiro, oyo ndji kongorera komitjise? Onḓiro oyo ‘omunavita omusenina’ wovandu avehe, orondu oyo i ṱuna kovandu avehe. (1 Kor. 15:26) Nu hapo onḓiro omunavita waJehova wina poo indee? Yandja ombango komakwizikiro waJesaja nga: “Muhona Ndjambi ma nyono onḓiro nga ko nga aruhe! Eye ma pyoṋa omahoze momeho waauhe.” (Jes. 25:8) Ripura ohunga nozongaro nḓu maze kakara ko moruveze ndwo. Kape nokukara ozonḓiro, omayendo nomundu ngu noruhoze rukwao. Moruveze rwanao, mape kakara omahoze wondjoroka, otja Jehova tji ma yenenisa omakwizikiro we wokupendura ovaṱi komuinyo rukwao! (Lesa Jesaja 26:19.) Korusenina, omitima ovingi mbya nyaika mena ronḓiro mavi verurwa.

22. Ouhona waMukuru mbu honaparerwa i Messias tji wa zu nokuyenenisa ombango yaMukuru kombanda yehi mape tjitwa tjike?

²² Komaandero wozombura 1 000, tjandje Ouhona waMukuru wa yenenisa ombango yaMukuru kombanda yehi, nu Kristus ma yarura ouvara ku Ihe. (1 Kor. 15:25-28) Ovandu nambano mba ririsiwa ohomonena, mave rirongerere okurorwa i Satan otjikando otjisenina indu tja zu nokupitisiwa morutjiva rwokehi yehi. Kombunda yanao, Kristus ma kayandeka onyoka ombi  ndjo novakongorere vayo nga aruhe. (Gen. 3:15; Omavan. 20:3, 7-10) Nungwari ovandu avehe mba suvera Jehova mave kara nomaundjiro omawa. Kape nomambo ngu maye yenene okukahurura otjiṋa hi nawa, pendje nomambo nge ri mOmbeibela. Owo omakwizikiro wokutja ovandu ovaṱakame avehe mave “kara norupa monguturiro onandjozikiro yovanatje vaNdjambi.”—Rom. 8:21.

23, 24. (a) Omena ratjike omakwizikiro waMukuru tji maye yenenisiwa? (b) Ove we rimanene okutjita tjike?

²³ Omakwizikiro ngo katuroto uriri. Omakwizikiro waJehova ngo tjiri maye yenenisiwa! Omena ratjike? Zemburuka omambo waJesus ku twa hungirira mekondwa 1 rembo ndi. Eye wa honga ovahongewa ve okukumba ku Jehova kutja, “Ouhona woye ngau ye; ombango yoye ngai tjitwe na kombanda yehi otja meyuru.” (Mat. 6:9, 10) Ouhona waMukuru katjiṋa tji tji ri mouripura womundu kaaṋi porwe. Owo otjiṋa tjatjiri! Owo nai u honapara meyuru. Oure wozombura 100 nai, owo wa yenenisa omakwizikiro waJehova momiano mbi tu muna oukahu mombongo yOvakriste ndino. Okutja, ngatu kare nongamburiro kutja omakwizikiro waJehova aehe maye yenenisiwa indu Ouhona waMukuru tji we yekuhonaparera ehi!

²⁴ Matu tjiwa kutja Ouhona waMukuru mau ya. Matu tjiwa kutja omambo aehe Jehova nga kwizika maye yenenisiwa. Omena ratjike? Omena rokutja OUHONA WAMUKURU U HONAPARA! Epuriro auhe wetu ndu ma sokuripura orondi rokutja, ‘Hapo ami mbi honaparerwa i Ouhona waMukuru poo indee?’ Nai ngatu kayende komurungu okuriwisa kehi yOuhona nouṱakame, kutja tu mune ouwa mouhonapare wawo ouwa nousemba nga aruhe!