1, 2. (a) Mambo ka o kyafwainwa kukatezha kuketekela kuba’mba Paladisa ukekalako? (b) Ñanyi bintu byakonsha kukosesha lwitabilo lwetu mu milaye ya Lesa?

MULONGO wa kishinka wafika ku kipwilo, wakoka panyuma ya kwingila. Baji kumukatazhanga ku bakulumpe ba nkito, makatazho o abena kupitamo pa kulama kisemi kyanji ne kijikila na mambo a kikola kya bakazhi. Lwimbo wa kushinkwila kupwila byo atendeka, waumvwa bulongo mambo uji pa Nzubo ya Bufumu na balongo ne banyenga. Lwimbo ubena kwamba pa luketekelo lwa kwikala mu Paladisa, kabiji byambo bya mu lwimbo bibena kumulengela kufwanyikizha kuba’mba uji monka. Wamutemwa bingi uno lwimbo kabiji pa kwimbila pamo na kisemi kyanji, watundaikwa kwikala na luketekelo lwa kulutwe.

² Nanchi ne anweba mwakyumvwapo kala bino nyi? Atweba bavula byobyo twiumvwa. Kya kine, bintu mu ino ntanda byakonsha kwitulengela kukankalwa kuketekela kuba’mba Paladisa ukekalako. Mu ntanda mo tubena kwikala kechi muji nobe Paladisa ne, mambo ke “bimye byakatazha.” (2 Timo. 3:1) Ñanyi kintu kyakonsha kwitukwasha kwikala na luketekelo lwa kine? Pano, twayuka byepi kuba’mba Bufumu bwa Lesa katataka bulamenga bantu? Twayai twisambe pa bungauzhi bumo bwa kwa Yehoba abo bantu banji bo bemwenejile na kufika mu kimye kya kala. Kabiji tusa kwisamba ne pa buno bungauzhi ne bukwabo byo bubena kufika mu ano moba. Kabiji mu kupelako, tusa kwisamba ne byo bukosesha lwitabilo lwenu, kabiji ne buno bungauzhi byo bukoba mu kimye kya kulutwe.

3. Ñanyi mulaye watekeneshe Bayudea bajinga mu buzha mu Babilona?

³ Fwanyikizhai bwikalo bwa Bayudea byo bwajinga saka baji mu buzha mu Babilona mu kitota kya myaka kya bu 6 B.C.E. Bavula bakomejile mu buzha, ne bansemi yabo pamo kabiji bwikalo bwakatezhe. Bena Babilona bebendelekanga na mambo a kwikala na lwitabilo mwi Yehoba. (Sala. 137:1-3) Pa myaka yavula, Bayudea bakishinka batwajijile kwikala na luketekelo, mambo Yehoba wibalayile kuba’mba  ukebabwezha mu ntanda yabo. Yehoba waambile’mba bwikalo bwabo bukawama bingi. Waesakenye ne kyalo kya Yudea ku bujimi bwa Edena, ko kuba’mba paladisa! (Tangai Isaya 51:3.) Ino milaye yaikajileko kukwasha bantu ba Lesa kwikala na luketekelo kwakubula kuzhinaukanga. Mu ñanyi jishinda? Twayai twisambe pa bungauzhi bumo.

4. Nga Yehoba walengejile byepi Bayudea kuketekela kuba’mba bakazhikijilwa mu ntanda yabo?

⁴ Luzhikijilo. Bano bazha babwelele ku ntanda ya kwalepa yabujile kwikala paladisa, yajinga masala pa myaka 70 kabiji yo babujile kumonapo bavula ne. Mu kimye kyanembejilwemo Baibolo, mabokwe, misuka, bisumpa ne bijanyi bikwabo byavujile bingi mu ntanda. Mwanamulume uji na kisemi wakonsha kulanguluka amba, ‘Nkazhikijila byepi mukazhami ne baana bami? Nga mikooko ne bañombe, nkebizhikijila byepi?’ Kyajingatu bulongo kulanguluka bino. Akilangulukai pa mulaye wa Lesa wanembwa pa Isaya 11:6-9 ne byo atekeneshanga bantu pa kyokya kimye. (Tangai.) Na bino byambo, Yehoba walengejile bano bazha kwikala na luketekelo lwa kuba’mba abo ne bilelwa byabo bakazhikijilwa. Bokwe ukajanga nsono, ko kuba’mba kechi ukaja bañombe ba Bayudea ne. Aba bajinga na luketekelo kechi bafwainwe kuchiina bino bijanyi ne. Yehoba walayile bantu banji kuba’mba bakekala mu mutende mu ntanda ya Yuda, nangwatu mu kiselebwa ne mu jisaka.—Ezi. 34:25.

5. Ñanyi bungauzhi bwakwashishe bazha babwelele kuketekela kuba’mba Yehoba ukebapa bintu byavula byo bakebelenga?

⁵ Kuvula kwa Bintu. Bakonsheshe ne kwakamwa na bintu bikwabo. ‘Nanchi nkakonsha kujisha kisemi kyami umvwe naya na kwikala mu yoya ntanda yo bawamisha nyi? Tukekalanga kwepi? Nanchi mingilo ne bwikalo bikawama kukila byo twaikalanga mu buzha nyi?’ Kupichila mu bungauzhi bwa Lesa, Yehoba wakumbwile ano mepuzho. Yehoba walayile bantu banji bamukookela amba ukebapa mvula mu ntanda mo bakaya kabiji “kajo kakafuma mu mushiji kakavula bingi ne kuwama.” (Isa. 30:23) Pa kwamba pa mingilo ne mwa kulaala, Yehoba walayile bantu banji amba: “Bakashimika mazubo ne kwikalamo, kabiji bakajimba miñanzañanza ne kuja bipangwa byayo. Kechi bakashimika mazubo kya kuba muntu ungi waikalamo ne, kabiji kechi bakajimba miñanzañanza ne muntu ungi waja bipangwa byayo ne.” (Isa. 65:21, 22) Kwambatu kine, bwikalo bwawamine kukila byo baikalanga mu buzha mu Babilona mo bapopwelanga balesa bangi. Pano ibyepi pa makatazho ebalengejile kwikala bazha?

6. Kufumatu ne kala, bantu ba Lesa bapita mu ñanyi makatazho, kabiji Yehoba wakwashishe byepi bano bazha babwelele kwabo?

⁶ Bulunda bwawama ne Lesa. Saka bakyangye kuya mu buzha, bantu ba Lesa bajinga na bulunda bwatama ne Lesa. Kupichila mwi ngauzhi Isaya, Yehoba waambile pa bantu banji amba: “Mutwe yense ubena kukola, ne muchima yense naye ubena kukola.” (Isa. 1:5) Ku mupashi, bajinga ba mpofu kabiji ba bishinka matwi, mambo bashinkile matwi abo ne kupofula meso ku malamuna a Yehoba. (Isa. 6:10; Yele. 5:21; Ezi. 12:2)  Umvwe kya kuba ano o makatazho ajinga na bazha babwelelenga, nanchi inge bazhikijilwe nyi? Nanchi inge kechi bafichishe Yehoba ku muchima jikwabo nenyi? Mulaye wa Yehoba wibakoseshe ke wa kuba’mba: “Pa joja juba, bashinka matwi bakomvwa byambo bya mu yewa buku, Kabiji meso a bampofu akamona mu mfishi yafiitatu bwii.” (Isa. 29:18) Yehoba inge wibabukile ku mupashi aba bantu balapijile. Inge batwajijile kukookela, inge wibatangijile ne kwibakosesha pa kuba’mba bakekalenga bulongo.

7. Nga Lesa wafikizhe byepi milaye yanji ku bantu banji bajinga mu buzha, kabiji mambo ka kuno kufika o kwafwainwa kwitukosesha?

⁷ Nanchi Yehoba wafikizhe milaye yanji nyi? Bishinka bya kala byo bisa kwitubula byo kyajinga. Bayudea babwelele mu ntanda yabo, bazhikijilwe, bajinga na bintu byavula, kabiji bajinga na bulunda bwawama ne Lesa. Kyakumwenako, Yehoba wibazhikijile ku bantu bebazhokolokele bajinga na bulume kabiji bavujile kwibakila. Bijanyi kechi byajile bilelwa bya Bayudea ne. Kya kine, Bayudea bamwenekotu pacheche kufika kwa bungauzhi bwaamba pa paladisa bwanembele Isaya, Yelemiya ne Ezikyo. Bino bungauzhi bwamwene bantu ba Lesa bwibatundaikile bingi kabiji bo bwakebewenga pa kyokya kimye. Byo tubena kulanguluka pa bintu Yehoba byo aubijile bantu banji pa kyokya kimye, lwitabilo lwetu lukakoselako. Inge kufika kutanshi kwa buno bungauzhi kwalengejile bantu kwikala na lusekelo, ko kuba’mba kufika kwa bungauzhi ku kapelako nako ku kaleta lusekelo bingi. Akimonai Yehoba byo etubila mu ano moba.

8. Bantu ba Lesa lelo jino baji mu “ntanda” ya mutundu ka?

⁸ Bantu ba Lesa ano moba kechi bekalatu mu kyalo kimo ne. Bino, bena Kilishitu bashingwa balenga kisaka kya ku mupashi ko kuba’mba “bena Isalela ba Lesa.” (Nga. 6:16) Balunda nabo ba mu “mikooko ikwabo” bekala mu “ntanda,” ya ku mupashi mo bapopwela Yehoba Lesa saka bakwatankana. Kupopwela Lesa ya muteeto wabo. (Yoa. 10:16; Isa. 66:8) Ñanyi mutundu wa “ntanda” yo etupa Yehoba? Ke paladisa wa ku mupashi. Mu ino ntanda, milaye ya Lesa yaamba pa bintu byonka byo byajinga mu bujimi bwa Edena ibena kufika ku mupashi lelo jino. Akimonai byakumwenako bimo.

9, 10. (a) Nga bungauzhi buji pa Isaya 11:6-9 bubena kufika byepi mu ano moba? (b) Ñanyi bintu bimwesha kuba’mba mu bantu ba Lesa muji mutende?

⁹ Luzhikijilo. Mu bungauzhi bwanembwa mu Isaya 11:6-9, muji byambo byawama byaamba pa mutende pakachi ka banyama ba mungye ne bantu na banyama babo bakulela. Nanchi bino byambo bibena kufika lelo jino nyi? Ee! Mu kyepelo 9, tufunda ene mambo bano banyama o bakabujila kukozhañana mambo paamba’mba: “Mambo pano pa ntanda pakakumbana maana a kuyuka Yehoba byonkatu mema byo akumbana mu kalunga ka mema.” Nanchi “maana a kuyuka Yehoba” alengela banyama kupimpula byubilo byabo nyi? Ine. Bantu bo bapimpula byubilo byabo kupichila mu kuyuka Lesa  Mwine Wakila ne kulondela mashinda anji a mutende. O ene mambo, mu paladisa wetu wa ku mupashi lelo jino tumona kufika kwa buno bungauzhi. Mu bukalama bwa Bufumu, baana ba bwanga ba kwa Kilishitu babena kufunda kuleka byubilo byatama bya bunyama ne kwikala mu mutende pamo na balongo ne banyenga.

¹⁰ Kyakumwenako, mu uno buku twisamba pa bena Kilishitu byo babula kwivwanga mu bya pano pa ntanda, ko kuba’mba kumvwisha Binembelo ne kumanyikwa kwa bantu ba Lesa na mambo a kubula kwivwanga mu bya pano pa ntanda. Nanchi kechi kya kukumya kuba’mba mu ntanda muji bantu ba malwañano muji ne “kisaka” kya bantu bakana kwivwanga mu malwañano nangwa bakeba kwibepaya nenyi? Kino kimwesha kuba’mba bangikazhi ba Mfumu wa Bumesiasa babena kwikala mu mutende byonka byaamba Isaya. Yesu waambile kuba’mba baana banji ba bwanga bakayukanyikilwa ku butemwe buji pakachi kabo. (Yoa. 13:34, 35) Mu kipwilo, Kilishitu ubena kwingijisha “kalume wa maana kabiji wa kishinka” kufunjisha bena Kilishitu ba kine kwitemwa ne kwikala ba mutende.—Mat. 24:45-47.

11, 12. Ñanyi kipowe kya nzala kiji mu ntanda lelo jino, kabiji Yehoba ubena kujisha byepi bantu banji?

¹¹ Kuvula kwa Bintu. Mu ino ntanda, muji kipowe kya nzala ya ku mupashi. Baibolo wajimwineko amba: “‘Umvwai!  Moba abena kwiya, byo nkatuma kipowe kya nzala mu kyalo, kechi kipowe kya nzala ya kajo nangwa kilaka kya mema ne, bino kya kukeba kumvwa byambo bya Yehoba.’” (Amo. 8:11) Nanchi ne bangikazhi ba Bufumu bwa Lesa nabo baji na kipowe kya nzala ya ku mupashi nyi? Yehoba waambijile jimo lupusano luji pakachi ka bantu banji ne balwanyi banji amba: “Bakalume bami bakekalanga na bya kuja, pakuba anweba mukafwanga nzala. Bakalume bami bakekalanga na bya kutoma, pakuba anweba mukafwanga kilaka. Bakalume bami bakasangalalanga, pa kuba anweba kikemulenga bumvu.” (Isa. 65:13) Nanchi mwamona kufika kwa bino byambo nyi?

¹² Kajo ka ku mupashi keya kimye kyonse nobe mukola upita kimye kyonse. Mabuku alumbulula Baibolo, mavidyo ne byambo byo bakopela pa maselechi, kupwila kwa kipwilo, kushonkena ne mabuku o babika pa Keyala wetu wa Intaneti, byonse bino ke kajo kavula ka ku mupashi mu ino ntanda muji bantu babena kufwetuka na nzala ya ku mupashi. (Ezi. 47:1-12; Yoe. 3:18) Nanchi kechi mumvwa bulongo pa kumona kufika kwa milaye ya Yehoba yaamba pa kajo ka ku mupashi kavula mu bwikalo bwenu ne nyi? Nanchi muja kimye kyonse pa tebulu wa Yehoba nyi?

13. Mubena kumona byepi kufika kwa mulaye wa Yehoba waamba pa bampofu kulaba ne bakishinka matwi kumvwa?

¹³ Bulunda bwawama ne Lesa. Bumpofu ne bukamama bwa ku mupashi bwasampukila ne pa katele lelo jino. (2 Ko. 4:4) Bino, Kilishitu ubena kubuka balemana ne bikola mu ntanda yonse. Nanchi mubena kumona bampofu kulaba ne bakamama kwamba nyi? Inge mwamona bantu babena kukeba kuyuka pa Mambo a Lesa a bukine, kuleka bubela bwa mu bupopweshi bwibalengejile kwikala bampofu ne bukamama ku bukine, ko kuba’mba mwamona uno mulaye byo abena kufika wa kuba’mba: “Pa joja juba, bashinka matwi bakomvwa byambo bya mu yewa buku, Kabiji meso a bampofu akamona mu mfishi yafiitatu bwii.” (Isa. 29:18) Mu ntanda yonse, bantu bavula pa mwaka pa mwaka babena kubukwa ku mupashi. Bantu bafuma mu Babilona Mukatampe ne kwiya na kupopwela mu paladisa wa ku mupashi bamwesha kuba’mba kya kine milaye ya Yehoba ibena kufika!

14. Ñanyi bishinka byo twafwainwa kulanguluka langulukangapo bikalengela lwitabilo lwetu kukosa?

¹⁴ Bitango byonse biji mu uno buku muji bishinka bibena kumwesha kuba’mba Kilishitu walengela baana banji ba bwanga kwikala mu paladisa wa ku mupashi wa kine mu kino kimye kya kupelako. Twayai tutwajijile kulanguluka languluka pa mashinda apusana pusana mo betupeshesha mu paladisa wa ku mupashi lelo jino. Umvwe ke tube bino, lwitabilo mu milaye ya Yehoba ya kulutwe lukatwajijila kukoselako.

15. Mambo ka o twafwainwa kushiinwa kuba’mba ino ntanda ikekala ke paladisa?

¹⁵ Kufumatu ne kala, kyaswa muchima wa Yehoba ke kwalula ino ntanda kwikala paladisa. Wabikile Adama ne Evwa  mu paladisa kabiji wibakambizhe ne kuyuzha ntanda na baana babo ne kulama bilengwa byonse. (Nte. 1:28) Pano bino, Adama ne Evwa balondejile Satana wasatukile ne kulengela baana babo kwikala babula kulumbuluka, bandengamambo ne lufu. Nangwa byonkabyo, kyaswa muchima wa Lesa kechi kyapimpwilwe ne. Lesa inge waamba byambo, byafwainwa kufika. (Tangai Isaya 55:10, 11.) Twakonsha kuketekela kuba’mba baana ba kwa Adama ne Evwa bakayuzha ne kukokesha ino ntanda, ne kulama bulongo bilengwa bya kwa Yehoba bikekala mu paladisa. Pa kyokya kimye, bungauzhi bwaambile pa Bayudea bajinga bazha bwa kwikala mu paladisa bukafika kya kine! Akimonai bino byalondelapo.

16. Baibolo walumbulula byepi luzhikijilo lo tukekala nalo mu Paladisa?

¹⁶ Luzhikijilo. Mu kupelako, byambo biji pa Isaya 11:6-9 popo bikafika kya kine kine. Banabalume, banabakazhi ne banyike bakazhikijilwa konse ko bakekalanga pano pa ntanda. Kafwako kilengwa, muntu nangwa nyama ukalengela mukwabo kuchiina ne. Akifwanyikizhai kimye ino ntanda byo ikekala ke muzhi wenu, kowa mu mikola, mu bizhiba, mu tulunga, kwenda mu mitumba, ne kwenda mu jisaka kwa kubula kuchiina. Kabiji inge bwayila kechi mukomvwanga moyo ne. Byambo biji mu Ezikyo 34:25 bikafika, pa kuba’mba bantu ba Lesa bakekale mu “mutende mu kiselebwa ne kulaala mu jisaka.”

¹⁷ Kuvula kwa Bintu. Fwanyikizhai kimye kyo kukabula buyanji, bikola bya nzala, bipowe bya nzala nangwa makondo. Kuvula kwa bintu bya ku mupashi ku bantu ba Lesa lelo jino kumwesha kuba’mba Mfumu wa Bumesiasa ukajiisha bangikazhi banji mu bintu byonse. Yesu byo ajinga pano pa ntanda, wamwesheshe byo akafikizha milaye ya uno mutundu, mambo wajishishe bantu bavula bajinga na nzala na bashinkwa ne masabi. (Mat. 14:17, 18; 15:34-36; Mako 8:19, 20) Inge Bufumu bwa Lesa bwatendeka kulama ntanda yonse, bungauzhi nabiji buno bukafika kya kine kine bwa kuba amba: “Aye ukanokesha mvula wa kumenesha kajo ko mwabyala mu mushiji, kabiji kajo kakafuma mu mushiji kakavula bingi ne kuwama. Pa joja juba, banyama benu ba kulela bakajiilanga mu mpunzha muji nsono yavula.”—Isa. 30:23.

18, 19. (a) Bungauzhi bwanembwa mu Isaya 65:20-22 bwalumbulula ka kwi anweba? (b) Mu ñanyi jishinda moba etu mo akavujila “byonka bivula moba a bichi”?

¹⁸ Lelo jino, bantu bavula kechi baji na mazubo awama bulongo nangwa nkito yawama ya kumwenamo mfweto ne. Mu ino ntanda muji mazhikakanwa, bavula bengila maola avula bino mfweto yakepa kya kuba kechi bakonsha kujisha ne kisemi ne, bino banonka ne bantu betemwa bo batambula mfweto yabo. Akifwanyikizhai kimye kikafika buno bungauzhi bwa kuba’mba: “Bakashimika mazubo ne kwikalamo, kabiji bakajimba miñanzañanza ne kuja bipangwa byayo. Kechi bakashimika mazubo kya kuba muntu ungi waikalamo ne, kabiji kechi bakajimba miñanzañanza ne muntu ungi waja bipangwa byayo ne. Mambo moba a bantu bami akavulatu byonka bivula  moba a bichi, kabiji bantu bami basalwa bakamwenamo lusekelo mu mingilo yo bakengilanga.”—Isa. 65:20-22.

¹⁹ Byambo bya kuba’mba moba etu akekala “byonka bivula moba a bichi,” bilumbulula ka? Inge mwaimana munshi ya kichi kikatampe, nanchi kimulengela kulanguluka pa moba aikala kyokyo kichi, kampe ne bankambo ya bankambo yenu saka bakyangye kusemwa nyi? Kampe na mambo a kwikala bambulwakulumbuluka, kino kichi kyakonsha kwikala myaka yavula kwimukila saka kyatwajijilatu na kutenkuma kufika ne byo mufwa. Yehoba wa lusa mambo walaya kuba’mba moba etu mu paladisa akekala avula kabiji a mutende. (Sala. 37:11, 29) Kimye kikafika bichi bikala myaka yavula kyo bikamwekanga nobe nsono yuma kabiji pamena ikwabo, bino atweba tukatwajijilatu kwikala myaka ne myaka!

20. Nga bangikazhi bakishinka ba Bufumu bakeyowa byepi bumi bwawama?

²⁰ Bumi bwawama. Lelo jino, bikola ne lufu bijitu konse. Kwambatu kine, bonse tuji na kikola kibula kupwa kitelwa amba bundengamambo. Bukuzhi bwa kwa kilishitu bo bwakonshatu kupwisha kino kikola. (Loma 3:23; 6:23) Mu Bukalama bwa Myaka Kiumbi, Yesu ne bo akalamanga nabo bakakwasha bantu kumwenamo mu buno bukuzhi kupichila mu kufumyapo bundengamambo ku bantu bakishinka. Bungauzhi bwa kwa Isaya popo bukafika kya kine bwa kuba’mba: “Kafwako muntu nangwa umo ukekala mu kyalo ukamba’mba: “Nakolwa ne.” Bantu bakekalamo bakebalekelako mambo abo.” (Isa. 33:24) Fwanyikizhai kimye kyo kukabula nangwa umo mpofu, washinka matwi nangwa walemana. (Tangai Isaya 35:5, 6.) Kafwako kikola Yesu kyo akankalwa kubuka ne. Bangikazhi bakishinka ba Bufumu bakekala na bumi bwawama!

21. Ki ka kikamweka ku lufu, kabiji uno mulaye wimutundaika byepi?

²¹ Ibyepi pa bifuma mu bundengamambo ne kukolwa, ko kuba’mba lufu? Uno ye “mulwanyi wapelako,” mulwanyi usenda bantu bambulwakulumbuluka. (1 Ko. 15:26) Nanchi Yehoba wakonsha kukankalwa kufumyapo uno mulwanyi ko kuba’mba lufu nyi? Monai byaambijile jimo Isaya amba: “Lesa ukamina lufu myaka ne myaka, kabiji Nkambo Mfumu Yehoba ukashiimuna mipolo ku meso a bantu bonse.” (Isa. 25:8) Nanchi mwakonsha kufwanyikizha kino kimye nyi? Kechi kukekala bijilo, manda nangwa mipolo ya bulanda ne! Kupusanako na bino, kukekala mipolo ya lusekelo Yehoba byo akafikizha mulaye wanji wa kusangula bafwa! (Tangai Isaya 26:19.) Ne ku mpelo, byonse byaleta lufu bikekala ke kafwako.

22. Ki ka kikobiwa umvwe Bufumu bwa Bumesiasa bwapwisha kufikizha kyaswa muchima wa Lesa pano pa ntanda?

²² Ku mpelo ya Myaka Kiumbi, Bufumu bukapwisha kwingila mingilo ya kuba kyaswa muchima wa Lesa pano pa ntanda, kabiji Kilishitu ukabwezha bukalama kwi Shanji. (1 Ko. 15:25-28) Bantu balumbuluka ku mpelo bakenengezha ku kwesekwa japelako kwi Satana byo bakamukasulula kufuma mu kalengwa kabula kupela. Panyuma ya bino,  Kilishitu ukonauna uno muloolo ne bonse bamutundaika. (Nte. 3:15; Lum. 20:3, 7-10) Bino bonse batemwa Yehoba bakekala mu mutende. Kampe kafwako byambo byafwainwa kulumbulula bulongo bino byambo byanembelwe na mupashi bitanwa mu Baibolo ne. Ke mulaye ukamona bantu bakishinka wa “kwikala na bwana bwa bene bwa lukumo lwa baana ba Lesa.”—Loma 8:21.

23, 24. (a) Mambo ka o twafwainwa kuketekela mu milaye ya Lesa kuba’mba ikafika? (b) Mwafuukulapo kuba byepi?

²³ Ino milaye kechi bintu bya bubela nangwa bilototu ne. Milaye ya Yehoba, kya kine ikafika! Mambo ka? Vulukai byambo bya kwa Yesu byo twisambilepo mu kitango kitanshi kya uno buku. Wafunjishe baana banji ba bwanga kulomba kwi Yehoba amba: “Bufumu bwenu bwiye. Kyaswa muchima wenu kyubiwe pano pa ntanda, byonka byo kibena kubiwa mwiulu.” (Mat. 6:9, 10) Bufumu bwa Lesa kechi kintu kya kufwanyikizhatu muntu ne. Ke kintu kya kine! Pa kino kimye, bubena kulama mwiulu. Pa myaka 100 yapitapo, bwafikizha milaye ya Yehoba yo tubena kwimwena mu kipwilo kya bena Kilishitu. Twaketekela kuba’mba milaye ya Yehoba yonse ikafika inge Bufumu bwa Lesa bwatendeka kulama pano pa ntanda!

²⁴ Twaketekela kuba’mba Bufumu bwa Lesa bukeya. Twayuka kuba’mba milaye ya Yehoba yonse ikafika. Mambo ka? Mambo BUFUMU BWA LESA BUBENA KULAMA! Bwipuzho bo twafwainwa kwishikisha pa muntu pa muntu ke bwa kuba’mba, ‘Nanchi mbena kulamwa na Bufumu nyi?’ Twayai tutwajijile kwibikako kwikala bangikazhi bakishinka ba Bufumu lelo jino, pa kuba’mba tukamwenemo mu bukalama bwaoloka bwa myaka ne myaka!