1, 2. (a) Muloñadi chichatukalilaña mpinji yikwawu kwiluka netu Paradisa yikekala kwoku? (b) Chumanyi chikutukwasha kukolesha chikuhwelelu chetu muyikaninu yaNzambi?

MANAKWETU washinshika nenzi kukupompa, nazeyi muloña wanyidimu. Anamuzatishi kudi mukulumpi wamudimu, nakutoñojoka chatela kuhembayi chisaka chindi nawa nadakameni nayikatu yamwinikwindi. Hampinji yinakutachika kamina kakwenzunwina kupompa, hakutulisha muchima, nazañalali kwikala Hetala daWanta nawamanakwindi niahela. Kamina kanakuhosha hakuchiñeja kwakushakama muParadisa, mazu akamina anakumuleja kufwikija wudi mwituña dadiha. Aka kamina wakakeña, chinakukimbayi nachisaka chindi, nsañu yakuchiñeja hiyikumuzañalesha nankashi.

² Mwatiyahu dehi muniyi njila? Etu amavulu dichitwatiyaña. Eña, nshakaminu mudinu ituña datama yinakutama chakwila yaleteshaña tutachiki kujinooka netu kwiji Paradisa yikekala kwoku. Ayinu ‘himpinji yakala,’ nawa kaayi kitunakushakamamu hiparadisaku. (2 Tim. 3:1) Chumanyi chikutukwasha kwiluka netu paradisa yikekalaku? Ndochu tweluka ñahi netu Wanta waNzambi keña wutachiki kuyuula antu ejima? Tuhanjekenu hawuprofwetu wahosheliyi Yehova washikijeweli kushankulu wamweni antu jindi. Kuhiñahu, tukuhituluka muniwu wuprofwetu niwuprofwetu wukwawu chiwunakushikijewa makonu. Chineli chikuhwelelu chetu chinakoli, tukushinshika hawuprofwetu weniwu chiwakatukwasha kumbidi.

3. Chikaninwinyi chayizañalesheli aYudeya muwuduñu muBabiloni?

³ Fwikijenu chahandileñawu aYudeya adiñi muwuduñu muBabiloni muma 500 B.C.E. Amavulu akulilili muwuduñu neyi anvwali jawu nawa akabakeneña. AkwaBabiloni ayisupishileña muloña amukuhweleli Yehova. (Mas. 137:1-3) Muyaaka yadiñawu muwuduñu, aYudeya ashinshika ashili muchima hanichi chikaninu chakwila nawu, Yehova wakafuntisha antu jindi kumukala wawu. Yehova wayilejeli nindi chihandilu chikawaha. Wafwanishili ituña daYudeya dayishikiliyi  antu jindi netempa daEdeni, yadiña paradisa. (Tañenu Isaya 51:3.) Yikaninu yeniyi yayikwashili antu jaNzambi kuleka kujinoka munyichima. Munjilanyi? Talenu chayishiikiliwu.

4. Mazwinyi ahosheliyi Yehova hakuleja aYudeya nindi akashakamaña chiwahi neyi anafunti kumukala wawu?

⁴ Kubula kwakama. Ana aYudeya adiñi muwuduñu, hiyafuntili muparadisa yayeniku, ilaña ateleli kufunta kwituña dakwakulehi dasheli mahembi hadi yaaka 70, dabulili kumonawu amakwawu. Hayina mpinji, anyitupa, atuñwidi, ayisumpa nianyama ayisumi adiña amavulu. Anvwali awamayala atela adihwileña nawu, ‘Nateli kukiña ñahi ñodami nianyanami? Ndochu anyikoku niañombi jami nikuyikiña ñahi?’ Muntu wejima nateli kwakama muniyi njila. Toñojokenu hachikaninu chaNzambi, chidi haIsaya 11:6-9 chichayizañalesheli. (Tañenu.) Awa mazu amawahi ahosheliyi Yehova atela ayikolesheli ana anduñu kwiluka nawu wena niyimuna yawu akayikiña. Mutupa wakadaña matahu muloña hakada añombi jawaYudeyaku. Antu ashinshika hiyakayitiyaña anyama ayisumi womaku. Yehova wayishiikili antu jindi nindi akakamaña wanyi muYuda mwakayifuntishayi nimuchinkalampata nimumasaña.—Ezek. 34:25.

5. Wuprofwetwinyi wayikwashili aYudeya afumineña muwuduñu kukuhwelela nawu Yehova wakayinka yuma yakeñeleñayi?

⁵ Kuvula Kwayakuda. Hadaha adiña nakwakamena yuma yidi neyi iyi: ‘Nakatwesha ñahi kudiisha chisaka chami mwituña mutwakafunta? Twakashakamaña kudihi? Twakazataña nyidimu, yakawaha kubadika nyidimu yamashi mumazulu yatukajikijileñawu kuzata muwuduñu?’ Yehova wakwila awa malwihu kuhitila muwuprofwetu wonenenuwu. Yehova wayishiikili antu jindi ovwahila nindi wakayinka nvula yayiwahi nawa iseki dikedisha yakuda ‘yayivulu nawa yayiwahi.’ (Isa. 30:23) Yehova wayikanini cheñi antu jindi nindi kutalisha hansañu yamatala ninyidimu nindi: “Akatuña matala, akashakamamu. Akadima matempa anyivinyu, akadya nyikabu yayu. Hiyakela atuña, mushakama acheñuku; adima, ayidya kudi acheñuku.” (Isa. 65:21, 22) Nshakaminu yakawaha nankashi kubadika chiyadiña muduñu muBabiloni. Indi hakutalisha hakukala kwadiñawu naku kweneni, kukala kwayileñeleli ayitwali muwuduñu?

6. Kukalanyi kwamweneñawu antu jaNzambi, nawa Yehova wayilejeli nindidi aYudeya afuntileña?

⁶ Kwikala nawubwambu naNzambi. Henohu kanda ayitwali muwuduñu, antu jaNzambi hiyadiña nawubwambu wakola naNzambiku. Yehova wayilejeli antu kuhitila mudi kaprofwetu Isaya nindi: “Mutu wejima wakata, muchima wejima wazeya.” (Isa. 1:5) Antu adiña amputa mesu nawa ajika matu kuspiritu muloña alekeli kutiyilila kufumba kwaYehova nawa alekeli kulondela yuma yayilejeleñayi. (Isa. 6:10; Yere. 5:21; Ezek. 12:2) Neyi antu afumini muwuduñu atwalekelihu kwila yuma yamuchidiwu, Yehova wadi kuyikiña ñahi? Komana adi kwikala cheñi nankisu jaYehova? Yehova wayikolesheli nachikaninu chakwila nawu: “Dena ifuku odu wajika matu wakatiya mazu amukandowu, mesu  awamputamesu akamona mukabwidibwidi nimumwidima.” (Isa. 29:18) Eñañi, Yehova wadi kuyuuka kuspiritu antu jindi akwashiliyi nawa abalumukili munyichima yawu. Chakala hohu neyi atwalekahu kwovwahila nikwila mwayilejeleñayi, wadi kutwalekahu kuyilombola nikuyidizisha.

7. Indi yikaninu yaNzambi yakaniniyi antu jindi yashikijeweli ñahi, nawa yatela kukolesha ñahi chikuhwelelu chetu?

⁷ Komana Yehova washikijili yikaninu yindi? Ñakwilu yanilu lwihu yekala munsañu yanyaaka. A Yudeya afuntili kumukala wawu ayikiswilili muloña ashakamineña chakubula kwakama, adiña nayakuda yayivulu nawa adiñi nawubwambu wakola naNzambi. Chakutalilahu, Yehova wayikiñili kudi antu akola adikumashaninuwu nawu nawa amavulu kubadika wena. Ayisumi amanishili wanyi yimuna yawaYudeya. Eña, ana aYudeya amweni hohu yuma yantesha yashikijili wuprofwetu wahosha haparadisa wasonekeliwu kudi antu adi neyi Isaya, Yeremiya niEzekeli, ilaña yuma yamweniwu antu jaNzambi yadiña yayiwahi nawa diyu yakeñekeleña hayina mpinji. Chitukushinshika hayuma yakoñeleliyi Yehova antu jindi kunyima, chikuhwelelu chetu chikukolelaku nankashi. Neyi wuprofwetu washikijeweli kunyima wayizañalesheli antu jaNzambi, kushikijewa kweneni kukaswejelaku. Toñojokenu hayuma yinatukoñeliyi Yehova makonu.

8. Indi antu jaNzambi makonu adiluñishaña “ituña”damuchidinyi?

⁸ Antu jaYehova makonu hiyekala muza waweniku nawa hiyashakamaña iluña dimuku. Ilaña akwaKristu awayishewa ekala muza wumu wakuspiritu, dikwila nawu “aIsarela aNzambi.” (Ñal. 6:16) Akwawu “anyikoku amakwawu” niwena adibombaña hamu nawu “mwituña,” ituña dakuspiritu mwadifukulañawu kudi Yehova Nzambi mukunuñañañana. Iku kudifukula dichihandilu chawu. (Yow. 10:16; Isa. 66:8) Indi “ituña” damuchidinyi datwinkayi Yehova? Watwinka paradisa yakuspiritu. Munidi ituña, yikaninu yaNzambi yahoshaña chadiña yuma muEdeni yinakushikijewa munjila yayiwahi kuspiritu. Talenu yakutalilahu.

9, 10. (a) Indi wuprofwetu wasonekawu haIsaya 11:6-9 wunakushikijewa ñahi makonu? (b) Wunsahwinyi wamwekeshaña nawu antu jaNzambi ekala mukuwunda?

⁹ Kubula kwakama. Muwuprofwetu wasonekawu haIsaya 11:6-9, hekala nsañu yayiwahi yashimuna hakuwunda kwakekala hadi anyama nawantu niayimuna. Komana iwu wuprofwetu wunakushikijewa makonu? Eña. Muvasi 9, twadizaña muloña waleñelaña awa anyama chikabulilañawu kuleta wubanji nawu: “Muloña iseki dejima dakawanina kumwiluka Yehova, neyi chabutaña meji hakaluñalwiji.” Komana “kumwiluka Yehova” kunateli kuhimpa anyama? Inehi, antu diwu ahimpaña neyi anamwiluki Nzambi Mukwakubadika nikwimbujola njila jindi jakuwunda. Chumichi dichaleñelaña tumoneña kuwunda kwahanañayi Yehova kudi antu jindi makonu. Muchiyuulu chaWanta, atumbanji twaKristu  anakudiza kuleka kuzuwa niyililu yatama nakushakama mukuwunda nawamanakwawu niahelawu.

¹⁰ Chakutalilahu, muwunu mukanda tunadizi akwaKristu chabulilañawu kudiñi munsañu yamatuña nichaleteshaña tukaaneña kwesekeja nachahosha Nsona niyihuñu yamonañawu antu jaNzambi hamuloña wakubula kudiñija mujamatuña. Komana hitwazañalalañaku hakumona netu mukanu kaayi kanenzali mandombu mwekala antu akaanaña kudiñija mumapumba adi ejima hela chakwila anakuyichinisha nawu akufwa? Iwu hiwunsahu wunakumwekesha chikupu nawu antu akayuulañawu kudi Mwanta wawuMesiya anakudiluñisha kuwunda kwashimwiniwu kudi Isaya. Yesu washimwini dehi nindi atumbanji twindi akayilukila kukukeñañana kwamwekeshañawu hakachi kawu. (Yow. 13:34, 35) Muchipompelu, Kristu nadiwunjiki hakuzatisha “nduñu wamaana nikashinshi” kulonda yadizishi akwaKristu alala ejima kwikala awunda, akeñañana nawa amwovu.—Mat. 24:45-47.

11, 12. Nzala yamuchidinyi yinakufwawu antu mukaayi, nawa Yehova wayidiishaña ñahi antu jindi?

¹¹ Kuvula Kwayakuda. Antu mukaayi anakufwa nzala yakapwelendendi yakuspiritu. Bayibolu yashimwini nawu: “Mwanta Yehova nindi, Tiyenu, kwakenza mafuku inakaleta nzala mwituña, hinzala yayakudyaku, hela mpwila yamejuku,  yakela nzala yakutiya mazu aYehova.” (Amosa 8:11) Komana enimbu amuWanta waNzambi niwena afwaña nzala yakapwelendendi? Yehova washimwineñahu dehi chaambu chikekala hakachi kawantu jindi nawayilumbu jindi nindi: ‘Tiyenu, ambuñami akadaña, hakwila enu mwakatiyaña nzala. Tiyenu, ambuñami akanwaña, hakwila enu mwakatiyaña mpwila. Tiyenu, ambuñami akatiyaña kuwaha, hakwila enu mwakatiyaña nsonyi.” (Isa. 65:13) Komana munamoni chinashikijewi iwu wuprofwetu?

¹² Yakuda yakuspiritu yinakuvula neyi chavulaña menji mukaloña keneni nawa kakunama. Nyikanda yetu yashindamena haBayibolu, mazu akukwata nimavidiyo, kupompa kwetu kwahachipompelu, kupompa kwamaneni ninsañu jikwawu jekala haWebu Sayiti yetu hiyakuda yayivulu nankashi yitunakutambwila mukanu kaayi mudi antu adi nanzala yakuspiritu. (Ezek. 47:1-12; Yoweli 3:18) Himwazañalalañaku hakumona yikaninu yaYehova yakuyinka yakuda mafuku ejima chiyinakushikijewa? Mwazataña nañovu kulonda mudeña kumesa yaYehova mafuku ejima?

13. Yumanyi yimunamoni yinakumwekesha kushikijewa kwachikaninu chaYehova wakwila nawu amputamesu akamona nianjika matu akatiya wunakushikijewa?

¹³ Kwikala nawubwambu naNzambi. Makonu antu anaputi mesu kuspiritu nawa anajiki matu. (2 Kor. 4:4) Ilaña Kristu nakuuka antu akata mukaayi kejima. Munakumona mesu awamputamesu chinakutonawu nimatu awanjika matu chinajikukiwuku? Neyi munakumona antu anadizi chalala Chezu daNzambi nikuleka yuma yamunsakililu yakutwamba yayileñeleleli ekali amputa mesu nawa anjika matu kunsañu yalala, dikwila nawu munamoni chinashikijewi ichi chikaninu chakwila nawu: “Dena ifuku odu wajika matu wakatiya mazu amukandowu, mesu awamputamesu akamona mukabwidibwidi nimumwidima.” (Isa. 29:18) Antu amavulu mukaayi kejima chaaka nichaaka anakuukewa kuspiritu. Muntu wejima wukufuma muBabiloni muneni nakwinza nakudibomba nanetu mukudifukula kwalala hiwunsahu wunakumwekesha nawu yikaninu yaYehova yinakushikijewa.

14. Yumanyi yitwatela kutoñojoka yatela kukolesha chikuhwelelu chetu?

¹⁴ Tupetulu twejima muwunu mukanda tunakumwekesha wunsahu wakwila nawu Kristu napompeshi atumbanji twindi alala kwikala mukudifukula kwalala munanu mafuku akukuminina. Tutwalekuhu nakutoñojoka chikupu hanjila jajivulu mutunakutambwila nkisu makonu. Neyi twila mwenimu tukusweja kukuhwelela muyikaninu Yehova yatukanayi.

15. Muloñadi chitwatela kukuhwelela netu iseki dikekala paradisa?

¹⁵ Kufuma tuhu kunyaaka, nkeñelu yaYehova yekala yakubalumuna iseki dejima kwikala paradisa. Wamushili Adama naEva mwitempa daparadisa nawa wayinkeli lushimbi  lwakuwanisha iseki dejima nawanyanawu nikwakamena yileñaleña yejima. (Kutach. 1:28) Ilaña Adama naEva alondeleli Satana wadikañili nawa chumichi chaleñeleli anyanawu ejima aswani kubula kuwanina, nshidi nikufwa. Hela chochu, nkeñelu yaNzambi hiyahimpaku. Mazu ejima ahoshañayi chiña ashikijewa. (Tañenu Isaya 55:10, 11.) Dichi tunakuhweleli chikupu netu anyana kaAdama niEva akenzesha iseki dejima nawa akakamenaña chiwahi yileñaleña yaYehova yejima heseki. Hayina mpinji, wuprofwetu wasambilili kuyilejawu aYudeya afumineña muwuduñu kutalisha hayuma yakekala muparadisa wukashikijewa chikupu. Talenu iyi yakutalilahu.

16. Indi Bayibolu yashimuna nawudi hakuwunda kwakekala muParadisa?

¹⁶ Kubula kwakama. Nkumininaku, mazu amawahi ekala haIsaya 11:6-9 akashikijewa. Amayala, ambanda nianyana ejima hiyakakamenañaku kudi kwejima kwakayañawu hanu heseki. Kwosi yuma yikatuchinishaña hela antu hela atunyamaku. Toñojokenu chimwakatiyaña hampinji yimwakabula woma wakuya kwejima hanu hamaseki chakwila mwakayaña nakuwela mutuloña, mumajiya, mutuluñalwiji; nikukandama jimpidi nakuhitañana mumasaña chakubula kwakama. Neyi wufuku wuneli, himwakatiyaña womaku. Mazu ekala haEzekeli 34:25 akashikijewa, chakwila antu jaNzambi “akashakamaña mwisaña chakadi kwakama, akakamaña tulu mulusesa.”

17. Muloñadi chitwatela kukuhwelela netu Yehova wakatwinkaña yuma yejima yitwakeñaña neyi Wanta wunatachiki kuyuula iseki dejima?

¹⁷ Kuvula Kwayakuda. Fwikijenu mpinji yikwakabula wuzweñi, chipilu, nzala hela nyitayi yakukwasha akabakanaña. Yakuda yayivulu yakuspiritu yinakutambwilawu antu jaNzambi makonu yinakumwekesha nawu Mwanta wawuMesiya wakadiisha antu akayuulañayi. Hampinji yadiñiyi Yesu hamaseki, wamwekesheli chantesha nindi nateli kushikija yikaninu yamuchidiwu, muloña wadiishili antu amavulu adiña nanzala namankendi antesha ninshi. (Mat. 14:17, 18; 15:34-36; Maku 8:19, 20) Wanta waNzambi chiwukayuulaña iseki dejima, wuprofwetu wudi neyi iwu wakashikijewa chikupu: “Wakakwinka nvula yambutu jeyi jiwakatumba heseki; niyakudya yikusoña heseki yakekala yamanji yakasweja nikuvula. Dena ifuku odu yimuna yenu yakadiila mumawudiilu amaneni.”—Isa. 30:23.

18, 19. (a) Mwakahetelamu ñahi muwuprofwetu wahaIsaya 65:20-22? (b) Indi mafuku etu akekala ñahi “neyi mafuku amutondu”?

¹⁸ Makonu antu akañanyaña kufwikija nawu akweti itala dadiwahi, mudimu walumbwa wakuyizañalesha. Mukanu kaayi katama, antu amavulu azataña maora amavulu ilaña wena niyisaka yawu yahetelañamu wanyi, asamaheta nawa akwalwisu diwu ahetelañamu. Fwikijenu chakatiyawu hampinji yakashikijewa iwu wuprofwetu mukaayi kejima: “Akatuña matala, akashakamamu. Akadima matempa anyivinyu, akadya nyikabu yayu. Hiyakela atuña, mushakama acheñuku; adima, ayidya kudi acheñuku. Muloña mafuku awantu  ami akekala neyi mafuku amutondu, antu ami inatonda akaluña luñe-e nanyidimu yamakasawu.”—Isa. 65:20-22.

¹⁹ Indi nhoshelu yakwila nawu mafuku etu akekala “neyi mafuku amutondu” yatalisha mudihi? Neyi mwimana mwishina damutondu weneni, komana mwahayamaña wanyi hakumona chinashimbuli owu mutondu, hadaha wameneni henohu anvwali jawankaaka jenu kanda avwaliki? Hadaha mukutoñojoka nenu neyi mutwalekahu kwikala abula kuwanina, mukufwa iwu mutondu wukushala, nawa wukutwalekahu kwikalaku henohu enu mwafwa dehi. Mwamweni, Yehova himuwahi watukwasha kukuhwelela netu muParadisa tukashakamaña yaaka yayivulu mukuwunda. (Mas. 37:11, 29) Mpinji yinakwinza yitwakashakamaña nyaaka yayivulu chakwila ninyitondu yashakamaña nyaaka yayivulu yikamwekanaña neyi yinashakami mafuku anti neyi matahu.

20. Indi enimbu ashinshika aWanta akekala ñahi nachihandilu chakadi yikatu?

²⁰ Twakakataña wanyi. Makonu, antu anakukata nawa anakufwa. Munjila yikwawu, wejima wetu twakata chikatu chakadi kuuka chatenañawu nawu nshidi. Mulambu wefutu danyiloña daKristu diwu hohu wunateli kutuuka. (Rom. 3:23; 6:23) Muyaaka Ikombakaji, Yesu niakwawu anyuuli akazatisha mulambu wefutu, akafumisha chovu-chovu yuma yatama yejima yenza hamuloña wanshidi mudi antu. Wuprofwetu waIsaya wukashikijewa chikupu wakwila nawu: “Mwenimbu hakahosha nindi, Ami nakataku; antu ashakamamu akayanakena kuluwa kwawu.” (Isa. 33:24) Fwikijenu mpinji yikwakabula amputamesu, anjika matu hela ayifwayi. (Tañenu Isaya 35:5, 6.) Kwosi chikatu nichimu chakakañanyayi Yesu kuuka, chili mumujimba, kuwoñu hela muyitoñojoka. Antu ashinshika akayuulañawu kudi Wanta akakataña wanyi.

21. Kufwa akakwiladi, nawa ichi chikaninu chayikundejaña ñahi?

²¹ Ndochu kufwa akakwila ñahi? Kufwa ‘hichilumbu wakukumishaku’ wakabishaña antu abula kuwanina. (1 Kor. 15:26) Komana Yehova wukukañanya kufumishahu kufwa? Shinshikenu chashimwineñahu dehi Isaya nindi: ‘Naminyi dehi kufwa chahaya nyaaka; Yehova wakakombola madilu mumesu awantu ejima.’ (Isa. 25:8) Fwikijenu yuma chiyakekala? Hikwakekala yipenji, majamu hela kudila madilu awushonaku. Ilaña kwakekala madilu amuzañalu hakumona Yehova chakashikijayi chikaninu chindi chachiwahi chakusañula afu. (Tañenu Isaya 26:19.) Nkumininaku, kutama kutwatiyaña hamuloña wakufwisha kwakamana.

22. Yumanyi yikamwekana neyi Wanta wawuMesiya wunamanishi kwila nkeñelu yaNzambi heseki?

²² Hakumana kwaYaaka Ikombakaji, Wanta wakamanisha kwila nkeñelu yaNzambi hanu heseki nawa Kristu wakahana chiyuulu kudi Tata yindi. (1 Kor. 15:25-28) Nkuminaku, neyi antu ejima anekali dehi awanina, akayeseka kakukumishaku kudi Satana hampinji yakamufumishawu mwikela. Kuhiñahu, Kristu wakamuchika kapela niantu ejima  amukwashaña. (Kutach. 3:15; Chim. 20:3, 7-10) Ilaña antu ejima amukeña Yehova namuchima wumu akaluña. Hadaha kwosi mazu amawahi atela kulumbulula chiwahi chikawaha yuma anabadiki ekala muBayibolu. Hichikaninu chakwila nawu antu ejima ashinshika akekala “mukulema kwawanyana kaNzambi.”—Rom. 8:21.

23, 24. (a) Muloñadi chitwakuhwelela netu yikaninu yaNzambi yikashikijewa? (b) Chumanyi chimunakufwila kwila?

²³ Iyi yikaninu yalala bayi neyi hituhekaku. Yikaninu yaYehova yikashikijewa. Muloñadi? Anukenu mazu aYesu itwahanjekelihu mukapetulu katachi kawunu mukanda. Wayilejeli atumbanji twindi kulomba kudi Yehova nawu: “Wanta weyi winzi. Nkeñelu yeyi ayili hamaseki neyi chayilañawu mwiwulu.” (Mat. 6:9, 10) Wanta waNzambi bayi nehi hichuma chakufwikijaku. Wekala kwoku. Wunakuyuula mwiwulu chayinu mpinji. Hadi yaaka 100 yiwunayuuli, wunashikiji yikaninu yaYehova munjila jashiyashana muchipompelu chawakwaKristu. Tunateli kukuhwelela netu yikaninu yaYehova yejima yikashikijewa neyi Wanta waNzambi wunatachiki kuyuula iseki dejima!

²⁴ Tuneluki netu Wanta waNzambi wunakwinza. Tuneluki netu Yehova wukashikija yuma yejima yashiikayi. Muloñadi? Muloña WANTA WANZAMBI WUNAKUYUULA! Twatela kudihula wejima wetu netu, ‘Komana Wanta wunakuyuula mudi ami?’ Dichi tuzatenu nañovu jetu jejima kulonda twikali enyimbu ashinshika aWanta chayinu mpinji, kulonda tukaheteli muchiyuulu chaWanta chaloña chikayuulaña haya nyaaka!