1, 2. (a) Ngbanga ti nyen, a si na ambeni ngoi, a yeke ngangu ti bâ Paradis tongana tâ ye? (b) Nyen la alingbi ti mû maboko na e ti mä na bê mingi na azendo ti Nzapa?

MBENI ita-koli so ayeke sara na Jéhovah na bê kue aga na bungbi na lo woko kue. Na yâ ti lango ni so, patron ti lo ason li ti lo, lo yeke gi bê ti lo na ndo ti batango amolenge ti lo nga ndali ti wali ti lo so ayeke na mbeni ngangu kobela. Na ngoi so mozoko ti kozo bia ni ayeke toto, lo wu mbeni pupu ti dengo bê. Lo yeke na ngia so lo yeke na Da ti Royaume, na tere ti aita ti lo ti koli na ti wali. Bia ni ayeke na ndo ti beku ti fini na yâ ti Paradis. Atënë ti yâ ti bia ni asara si lo bâ tere ti lo na yâ ni. Lo ye ka bia so mingi. Na ngoi so lo yeke he bia na tere ti sewa ti lo, beku so adë bê ti lo.

² Mara ti ye tongaso asi na mo awe? A si na mingi ti e. Ye oko, dunia so asara si a yeke ngangu na e ti bâ Paradis so ayeke ga tongana tâ ye. Dunia so e yeke dä, na yâ ti “angoi ti akpale so ayeke ngangu na zo ti kanga bê na yâ ni”, ayeke tâ nde mingi na Paradis (2 Tim. 3:1). Nyen la alingbi ti mû maboko na e ti bâ beku so tongana tâ ye? E hinga biani tongana nyen so Royaume ti Nzapa ayeke duti ande na komandema na ndo ti azo kue? Zia e bâ ambeni prophétie so Jéhovah afa na so awakua ti lo abâ aga tâ tënë lani. Na pekoni, e yeke kiri ti bâ tongana nyen la a-oko prophétie nga na ambeni ayeke ga tâ tënë laso. Na nda ni, teti so mabe ti e akiri akpengba, e yeke bâ mbilimbili tongana nyen la aprophétie so ayeke ga tâ tënë ande.

3. Zendo wa la adë bê ti aJuif so ayeke lani na Babylone?

³ Tara ti bâ gigi ti aJuif so a mû ala lani a gue na ala na Babylone na ngu 607 kozo ti Christ. Angu mingi ahon awe, na mingi ti ala akono kâ, tongana ababâ na amama ti ala, na gigi akpengba na ala. Azo ti Babylone ayeke he ala ndali ti so ala zia bê ti ala na Jéhovah (Ps. 137:1-3). Teti angu mingi, aJuif so ayeke be-ta-zo angbâ ti gbu beku so ngangu: Jéhovah atene lani so lo yeke bungbi awakua ti lo na yâ ti kodoro ti ala. Jéhovah atene so aye ayeke duti nzoni na yâ ni. Lo haka même  kodoro ti Juda so a kiri a leke ni na yaka ti Éden, mbeni paradis! (Diko Ésaïe 51:3.) A yeke polele so a mû lani zendo so ti dë bê ti awakua ti Nzapa, ti zi akite so alingbi ti ga na yâ ti bê ti ala. Tongana nyen? Zia e bâ ambeni prophétie so andu aye so.

4. Tongana nyen la Jéhovah adë bê ti aJuif na ndo ti tënë ti nzoni duti na kodoro ti ala?

⁴ Nzoni duti. A-Juif ni so ayeke kiri na yâ ti tâ paradis pëpe, me na mbeni kodoro so ayo, so azo ayeke na yâ ni ape teti angu 70, so mingi ti ala ade ti bâ ni ape. Abamara ayeke lani mingi na ngoi ni kâ, ambo ti ngonda na aze nga. Mbeni babâ ti sewa alingbi ti hunda tere ti lo, ‘Mbi yeke sara ande tongana nyen si ye asi na wali ti mbi na amolenge ti mbi ape? Ka ataba na abagara, mbi yeke bata ala tongana nyen?’ Gingo bê tongaso ayeke na lege ni. Me bâ fadeso zendo ti Nzapa so ayeke na Ésaïe 11:6-9 nga tongana nyen la adë bê ti zo (Diko ni.) Na lege ti atënë so a tene ni na kode, Jéhovah adë bê ti azo ni so ye ayeke si ande na ala wala na anyama ti ala pëpe. Bamara ayeke te pere, so ti tene lo yeke te abagara ti aJuif ape. Azo so ayeke be-ta-zo ayeke sara mbeto ti mara ti anyama tongaso pëpe. Jéhovah atene so ye ayeke si na awakua ti lo pëpe na yâ ti sese ti Juda, même na yando wala na yâ ti agbako.​—Ézéch. 34:25.

5. Aprophétie wa amû maboko lani na aJuif ti mä na bê biani so Jéhovah ayeke mû na ala aye mingi?

⁵ Aye ayeke mingi. Ambeni gingo bê ni alingbi ti londo. ‘Mbi yeke wara ande lege ti mû kobe na sewa ti mbi na yâ ti kodoro ni so a kiri a leke ni so? E yeke duti ande na ndo wa? Kua ti sarango ni ayeke duti ande dä? A yeke duti ande nzoni ahon ngangu kua so mbi sara na gbe ti azo so ahon e na ngangu?’ Na lege ti aprophétie, Jéhovah akiri tënë na ahunda so nga. Jéhovah atene so azo so amä yanga ti lo ayeke wara ngu-nzapa lakue; tongaso sese ni ayeke woko na “fade kobe awu mingi na yaka”. (És. 30:23) Ti ndo ti lango nga na nzoni kua, Jéhovah amû zendo so: “Fade azo asara da, na ala duti na yâ ni; fade ala lu vigne na yaka, na ala te lê ni. Fade azo asara da si mbeni zo aduti na yâ ni pëpe; fade ala lu ye si mbeni zo ate pëpe”. (És. 65:21, 22). A ye ti tene so, na yâ ti aye mingi, gigi ayeke duti ande nzoni mingi ahon ti so ayeke na Babylone ti apaïen. Ka ti akpale ti ala so ayeke kota ahon atanga ni kue, so asara si a gue na ala lani na Babylone, ayeke tongana nyen?

6. Akpale ti seni wa awakua ti Nzapa ayeke na ni lani teti ngu mingi? Jéhovah atene nyen na aJuif so ayeke kiri na kodoro ti ala?

⁶ Seni na lege ti yingo. Angu mingi kozoni si a gue na ala na Babylone, awakua ti Jéhovah atï kobela na lege ti yingo. Na lege ti prophète Ésaïe, Jéhovah asara tënë so na awakua ti lo: “Li ayeke na kobela kue, na bê ayeke na kobela kue.” (És. 1:5). Na lege ti yingo, ala yeke lani awaziba nga awambongi, ndali ti so ala zia ti mä Jéhovah, ala ke ti bâ ye so lo yeke fa na ala (És. 6:10; Jér. 5:21; Ézéch. 12:2). Tongana mara ti akpale tongaso akiri ti hara aJuif so ayeke kiri, nyen la alingbi ti bata  ala? Jéhovah akiri ti ke ala? Zendo ti Jéhovah so adë bê ti ala: “Na lâ ni kâ, fade awambongi amä tënë ti mbeti ni, na fade A lungula awaziba na yâ ti vuko ndo na bingo ti ala, na fade lê ti ala abâ ndo.” (És. 29:18). Jéhovah ayeke sava ande biani awakua ti lo na lege ti yingo, ala so achangé bê ti ala. Tongana ala ngbâ ti yeda na awango ti lo nga ti mä yanga ti lo, lo yeke fa lege na ala nga lo yeke fa ye na ala.

7. Azendo ti Jéhovah na aJuif aga tâ tënë tongana nyen? Ngbanga ti nyen ye so akpengba mabe ti e?

⁷ Eskê Jéhovah asara ye alingbi na zendo ti lo so? Ye so asi na yâ ti mbaï afa so a yeke tongaso. A-Juif so akiri lani na kodoro ti ala awara kpale pëpe, ala wara gbâ ti aye nga ala wara seni na lege ti yingo. Na tapande, Jéhovah abata ala si amara so angoro ala nga so ala yeke ngangu na ala yeke mingi ahon ala, asara ye na ala pëpe. Anyama ti gonda ahunzi anyama ti aJuif ape. Tâ tënë, aJuif so abâ lani gi kete mbage ti aye so a tene lani na yâ ti aprophétie na ndo ti Paradis. Aprophétie so azo tongana Ésaïe, Jérémie na Ézéchiel asû ni na mbeti. Me aye so aga lani tâ tënë, so awakua ti Jéhovah abâ, azia ngia na bê ti ala nga alingbi na bezoin ti ala na ngoi ni kâ. Na ngoi so e yeke gbu li ti e na ndo ti ye so Jéhovah asara ândö ndali ti awakua ti lo kâ, mabe ti e ayeke kpengba. Atënë ti yâ ti aprophétie so aga tâ tënë kozo na ngoi ni kâ azia ngia na bê ti zo, ka ti kota mbage ni ayeke duti tongana nyen? Zia e bâ ye so Jéhovah asara ndali ti e laso.

8. “Sese” wa la awakua ti Jéhovah laso ayeke na yâ ni?

⁸ Laso, awakua ti Jéhovah ayeke mbeni mara pëpe so ayeke na yâ ti mbeni kodoro oko. Me, aChrétien so a soro ala ti gue na yayu abungbi aga mbeni mara na lege ti yingo, “Israël ti Nzapa”. (aGal. 6:16). Amba ti ala,“ambeni ngasangbaga”, aga na tere ti ala ti duti na yâ ti mbeni “sese” na lege ti yingo so na yâ ni ala yeke voro Jéhovah na yâ ti beoko. Vorongo Nzapa tongaso la ayeke na yâ ti kota mbage ti gigi ti ala (Jean 10:16; És. 66:8). Mara ti “sese” wa la Jéhovah amû ni na e? A yeke mbeni paradis na lege ti yingo. Na yâ ni, aye so Nzapa atene ayeke si na yâ ti Paradis, aga tâ tënë na lege ti yingo. Zia e bâ ambeni tapande ni.

9, 10. (a) Prophétie ti Ésaïe 11:6-9 ayeke ga tâ tënë laso tongana nyen? (b) Nyen la afa polele so siriri ayeke na popo ti awakua ti Jéhovah?

⁹ Nzoni duti. Na yâ ti prophétie so ayeke na Ésaïe 11:6-9, e bâ so mango tere nga na siriri ayeke na popo ti azo na anyama: na popo ti anyama ti ngonda nga na popo ti azo na anyama ti ala. Ye so aga tâ tënë na lege ti yingo laso? En! Na yâ ti versê 9, e hinga ngbanga ti nyen la anyama tongaso ayeke sara sioni wala ayeke futi ye pëpe: “Fade sese ni asi na ndara ti L’Éternel, legeoko tongana kota ngu ti ingo asi na ngu.” Eskê “ndara” ti Jéhovah ayeke changé sarango ye ti anyama? Ên-ën. A yeke azo so ahinga Lo ti Nduzu Ahon Kue, so  amanda ti sara ye na siriri tongana lo, si ayeke changé. Ndani la si na yâ ti paradis ti yingo laso mo lingbi ti bâ tongana nyen la atënë ti prophétie so ayeke ga tâ tënë. Na gbe ti Royaume ti Nzapa, adisciple ti Christ ayeke manda ti zi asioni sarango ye ti ala so ayeke tongana ti anyama na ti duti na siriri nga na mango tere na aita ti ala ti koli na ti wali na lege ti yingo.

¹⁰ Na tapande, na yâ ti mbeti so, e bâ tënë ti dutingo nde na dunia so. E bâ tongana nyen la Mbeti ti Nzapa amû maboko na e ti mä yâ ti tënë so nga e bâ ye ti ngangu so a sara na awakua ti Jéhovah ndali ni. A yeke mbeni ye so apika bê ti bâ so, na yâ ti dunia so aye sarango ye ti ngangu mingi, azo ti mbeni “sese” so akono kamême ake ti mû mbage na yâ ti ye ti ngangu, même na lê ti kua! Ye so afa polele so azo so ayeke na gbe ti Gbia so Nzapa asoro lo ayeke biani na siriri tongana ti so Ésaïe asara tënë ni. Jésus atene so a yeke hinga adisciple ti lo na lege ti ndoye so ayeke na popo ti ala (Jean 13:34, 35). Na yâ ti congrégation, Christ ayeke sara kua yeke yeke na “ngbâa be-ta-zo so ayeke sara ye na ndara” ti fa ye na atâ Chrétien kue ti duti na siriri, ti ye tere nga ti sara ye na nzoni bê.​—Mat. 24:45-47.

11, 12. Kota nzara wa la ayeke na yâ ti dunia laso? Ti e, Jéhovah amû na e gbâ ti aye tongana nyen?

¹¹ Aye ayeke mingi. Dunia so ayeke bâ pasi ti nzara na  lege ti yingo. Bible atene: “Bâ, lâ ni ayeke ga so fade Mbi to boma na sese ni. A yeke boma ti kobe pëpe, wala nzara ti ngu pëpe, me a yeke nzara ti mä tënë ti L’Éternel.” (Amos 8:11). Eskê azo ti Royaume ti Nzapa ayeke bâ pasi ti nzara so nga? Jéhovah afa kangbi so ayeke na popo ti awakua ti lo na awato ti lo: “Fade aboi ti Mbi ate, me i duti na nzara; bâ, fade aboi ti Mbi anyon, me nzara ti ngu asara i; bâ, fade aboi ti Mbi aduti na ngia, me kamene agbu i.” (És. 65:13). Mo bâ awe tongana nyen la atënë so aga tâ tënë?

¹² Kobe ti yingo ayeke sua ndali ti e tongana mbeni kota bale so ayeke kono gi konongo. Ambeti ti e, a-enregistrement ti mango ni nga na avidéo, abungbi nga na akota bungbi ti e nga na aye so ayeke na ndo ti site ti e, kue ayeke tongana ngu na lege ti yingo so ayeke sua na yâ ti mbeni dunia so ayeke kui nzara na lege ti yingo (Ézéch. 47:1-12; Joël 3:18). Tere ti mo anzere ti bâ so azendo so Jéhovah amû, ti mû aye mingi na e, ayeke ga tâ tënë na yâ ti fini ti mo ti lâ oko oko? Mo yeke sara kue ti te kobe lakue na table ti Jéhovah?

13. A lingbi na zendo ti Jéhovah, tongana nyen la mo bâ na lê ti mo so awaziba abâ ndo nga awambongi amä ndo?

¹³ Seni na lege ti yingo. Laso, azo mingi ayeke awaziba nga awambongi na lege ti yingo (2 aCor. 4:4). Me, Christ ayeke sava akobela so laso na ndo kue. Mo bâ lâ oko awe lê ti waziba so azi nga mê ti wambongi so amä ndo? Tongana mo bâ azo so ahinga tâ tënë ti Mbeti ti Nzapa, so azia amvene ti abungbi ti nzapa so akanga lê ti ala nga na mê ti ala ândö, andâ mo bâ awe tâ tënë ti ye so: “Na lâ ni kâ, fade awambongi amä tënë ti mbeti ni, na fade A lungula awaziba na yâ ti vuko ndo na bingo ti ala, na fade lê ti ala abâ ndo.” (És. 29:18). Na yâ ti dunia, azo saki ngbangbo mingi ayeke wara sava na lege ti yingo ngu oko oko. Zo kue so azia Babylone, Ngangu gbata, na lo ga na tere ti e ti voro Nzapa na yâ ti paradis ti yingo, lo yeke bâ so azendo ti Jéhovah ayeke ga tâ tënë!

14. Ye wa la tongana e gbu li ti e na ndo ni ayeke kpengba mabe ti e?

¹⁴ Achapitre oko oko ti buku so afa polele so Christ aga na adisciple ti lo na yâ ti tâ paradis ti yingo na lâ ti nda ni so. Zia e ngbâ lakue ti gbu li ti e na ndo ti aye ti nzoni mingi so e wara na yâ ti paradis so laso. Tongana e sara ni, e yeke kiri ti mä na bê ahon ti kozo na atënë so Jéhovah atene teti kekereke.

15. Ngbanga ti nyen a lingbi e hinga na bê ti e kue so sese ayeke ga ande mbeni paradis?

¹⁵ A yeke ngbene ye giriri la Jéhovah aleke ti tene sese kue aga paradis. Lo zia lani Adam na Ève na yâ ti mbeni paradis, na lo mû yanga na ala ti dü amolenge si ala mû ndo ti sese kue na ala bâ lege ti anyama (Gen. 1:28). Me, Adam na Ève amû peko ti Satan, na ala ke yanga ti Nzapa. Ala zia ahale ti ala na yâ ti siokpari nga na kuâ. Ye oko, ye so Nzapa aleke ti sara achangé lâ oko ape. Tongana lo tene tënë awe, a yeke ga  tâ tënë biani. (Diko Ésaïe 55:10, 11.) Tongaso, e hinga na bê ti e kue so ahale ti Adam na Ève ayeke mû ande ndo ti sese kue, na sese ni ayeke ga na gbe ti ala. Na yâ ti paradis so amû ndo ti sese kue, na ndoye, ala yeke bâ ande lege ti aye so Jéhovah asara. Na ngoi ni kâ ande, atënë ti prophétie so a tene kozoni ndali ti aJuif so ayeke lani na Babylone, so andu paradis, ayeke ga tâ tënë ti ndangba ni! Zia e bâ ambeni tapande ni.

16. Tongana nyen la Bible afa nzoni duti so e yeke wara ande na yâ ti Paradis?

¹⁶ Nzoni duti. Apendere tënë so a fa na Ésaïe 11:6-9 ayeke ga ande tâ tënë kue kue kue. Ye ti sioni ayeke si ande pëpe na akoli, awali na amolenge na ndo kue so ala yeke duti dä na ndo ti sese. Azo wala anyama ayeke ga na ala akpale ape. Tara ti bâ so, na mbeni ngoi, sese kue ayeke ndo ti mo. Mo lingbi ti tï ngu na yâ ti bale, na yâ ti ngu-ingo; mo lingbi ti hon na yâ ti ahoto nga na yâ ti ayaka sân ti gi bê ti mo. Na bï, mo yeke gi bê ti mo ape. Atënë so ayeke na Ézéchiel 34:25 ayeke ga ande tâ tënë si awakua ti Jéhovah alingbi ti “duti na yando na siriri, na ala lango na ngonda.”

17. Ngbanga ti nyen a lingbi e hinga na bê kue so Jéhovah ayeke mû ande aye mingi na e na ngoi so komandema ti Royaume ni ayeke mû ndo ti sese kue?

¹⁷ Aye ayeke mingi. Tara ti bâ mbeni ngoi so na yâ ni aye tongana yere, tengo kobe nzoni ape, kota nzara wala andokua so ayeke bâ lege ti azo ti mawa ayeke dä mbeni pëpe. Gbâ ti kobe ti yingo so awakua ti Nzapa ayeke te laso afa polele so Gbia so Nzapa asoro lo ayeke mû ande biani kobe ti yingo na ti mitele na ala. Lani so Jésus ayeke na ndo ti sese ge, lo fa kete mbage ti ngangu so lo yeke na ni ti sara ye alingbi na atënë ti azendo so. Lo mû kobe na azo saki mingi, so nzara asara ala, gi na lege ti kete mapa na kete susu (Mat. 14:17, 18; 15:34-36; Marc 8:19, 20). Na ngoi so Royaume ti Nzapa ayeke sara kua ti lo na ndo ti sese kue, aprophétie tongana ti so ge ayeke ga ande tâ tënë: “Fade Lo sara si ngu-nduzu apika na ndo le-kobe so i lu na yaka; na fade kobe awu mingi na yaka, a lë mingi na lê ni akono nzoni. Na lâ ni kâ, fade anyama ti i ate kobe na kota be-nyama.”​—És. 30:23.

18, 19. (a) Prophétie so ayeke na Ésaïe 65:20-22 abâ mo tongana nyen? (b) So a tene alâ ti e ayeke duti “tongana lâ ti keke” aye ti tene nyen la?

¹⁸ Laso, a yeke ngangu na azo mingi ti pensé so ala lingbi ti wara mbeni pendere da ndali ti ala wani wala mbeni nzoni kua ti sara. Na yâ ti dunia so aye ayeke kirikiri dä, azo mingi abâ so ala yeke fâ tere ti ala na kua me ye ti pekoni ayeke mingi ape ndali ti ala wani nga ndali ti sewa ti ala; gi azo ti mosoro na azo ti kota bê si ayeke wara ni. Tara ti bâ tongana nyen la prophétie so ayeke ga ande tâ tënë na ndo ti sese kue: “Fade azo asara da, na ala duti na yâ ni; fade ala lu vigne na yaka, na ala te lê ni. Fade azo asara da si mbeni zo aduti na yâ ni pëpe; fade ala lu ye si mbeni zo ate pëpe; fade lâ ti azo ti Mbi ayeke mingi tongana lâ ti keke; na azo ti Mbi so Mbi iri ala, fade ala wara ngia na kusala ti maboko ti ala teti lâ mingi.”​—És. 65:20-22.

 ¹⁹ So a tene alâ ti e ayeke duti “tongana lâ ti keke” aye ti tene nyen la? Tongana mo duti na gbe ti mbeni kota keke na mo yeke hunda tere ti mo na ndo ti ngu so keke so asara, bê ti mo ayeke dö ti bâ so peut-être keke so ayeke kozo si a dü akotara ti mo? Tongana lege ayeke dä ti tene mo ngbâ na yâ dutingo ti mo ti laso, peut-être keke so ayeke ngbâ, me mo yeke kui ti mo na azo agirisa mo. So nzoni si Jéhovah asara na e ti tene na e so na yâ ti Paradis so ayeke ga, gigi ti e ayeke ninga na akpale ayeke na yâ ni pëpe! (Ps. 37:11, 29). Mbeni lango ayeke ga, so na yâ ni, e yeke bâ ande mara ti akeke tongaso tongana senge pere so ayeke ninga ka ape, me e yeke ngbâ na fini lakue lakue.

20. Tongana nyen la azo so angbâ be-ta-zo na gbe ti Royaume ni ayeke wara ande nzoni seni?

²⁰ Seni so ayeke nzoni kue. Laso, kobela na kuâ ayeke sara sioni na azo kue. E lingbi ti tene so e kue e yeke na kobela, kobela so ayeke fâ zo fango, so ayeke siokpari. Oko yorö ti kobela so sandaga so Christ amû ti zi e (aRom. 3:23; 6:23). Na ngoi ti Ngu saki oko, Jésus na azo so ayeke komande na tere ti lo ayeke sara si azo ayeke wara aye ti nzoni kue so aga na peko ti sandaga so. Yeke yeke a yeke zi siokpari kue na tere ti azo so ayeke be-ta-zo. Prophétie ti Ésaïe so ayeke ga tâ tënë kue kue kue: “Fade wakodoro atene pëpe, Mbi yeke na kobela. Fade A pardone sioye ti azo so aduti kâ.” (És. 33:24). Tara ti bâ ngoi so na yâ ni awaziba, awambongi wala awazin ayeke dä oko pëpe. (Diko Ésaïe 35:5, 6.) Mbeni kobela oko tongaso ti kara Jésus ayeke duti ande dä ape. Azo so ayeke be-ta-zo, so ayeke ande na gbe ti Royaume ni ayeke wara seni so ayeke nzoni-kue!

21. Nyen la ayeke si ande na kuâ nyen? Zendo so adë bê ti zo ngbanga ti nyen?

²¹ Me, ka ti kuâ ayeke duti ande tongana nyen? Kuâ ayeke “ndangba wato” ti e, so nyen na nyen lo yeke hon e azo na ngangu (1 aCor. 15:26). Mingi ni, lo yeke ga ka na peko ti kobela, na siokpari la adü lo. Me kuâ ayeke mbeni wato so ayeke kara Jéhovah? Bâ ye so Ésaïe atene ândö: “Lo hunzi kui teti lakue lakue; fade Seigneur L’Éternel ambô ngule na lê ti azo kue”. (És. 25:8). Mo hinga nda ti tënë so? Lungo kuâ, cimetière wala ngu ti lê ti vundu ayeke dä encore ape. Nde na so, ngu ti lê ti e ayeke yuru ande ndali ti so tere ti e ayeke nzere ti bâ tongana nyen apendere zendo ti Jéhovah ti zingo akuâ ayeke ga tâ tënë! (Diko Ésaïe 26:19.) Gbâ ti pasi so kuâ aga na ni ahon kue awe.

22. Nyen la ayeke si ande tongana Royaume so Christ ayeke Gbia ni ahunzi ti sara ye so bê ti Nzapa aye na ndo ti sese?

²² Na hunzingo ti Ngu saki oko, Royaume ni ayeke hunzi ti sara ye so bê ti Nzapa aye na ndo ti sese na Christ ayeke kiri na komandema ni na Babâ ti lo (1 aCor. 15:25-28). Azo so ayeke nzoni-kue alingbi fadeso awe ti luti na gbele ndangba ye so ayeke fa ye so ayeke na yâ ti bê ti ala na ngoi so a yeke zi Satan na yâ ti kota dû so lo yeke dä kozo. Na pekoni, Christ ayeke neka sioni ngbo so nga na azo kue so amû peko  ti lo (Gen. 3:15; Apoc. 20:3, 7-10). Me azo so aye Jéhovah na bê ti ala kue ayeke duti na mbeni pendere beku. Peut-être tënë so alingbi ti fa ye so nzoni mingi ahon atanga ni kue ayeke tënë so Nzapa azia na yâ ti mbeti ti lo: “Liberté ti gloire ti amolenge ti Nzapa.”​—aRom. 8:21.

23, 24. (a) Ngbanga ti nyen la azendo ti Nzapa ayeke ga ande biani tâ tënë? (b) Nyen la mo leke na bê ti mo ti sara?

²³ Azendo so ayeke pëpe ye so zo la aye ni yengo wala senge bango li. Azendo ti Jéhovah ayeke ga biani tâ tënë! Ngbanga ti nyen? Dabe ti mo na atënë ti Jésus so e sara tënë na ndo ni na yâ ti kozo chapitre ti buku so. Lo fa lani na adisciple ti lo ti sambela Jéhovah: “Zia royaume ti mo aga. Zia a sara ye so bê ti mo aye, na yayu legeoko nga na ndo ti sese.” (Mat. 6:9, 10). Royaume ti Nzapa ayeke pëpe mbeni ye so zo agbu li ti lo na ni awe si asigigi na ni. A yeke tâ ye! A komanse kua na yayu awe. A sara angu ngbango oko awe la Royaume so asara si azendo ti Jéhovah aga tâ tënë, so e bâ ni polele na yâ ti congrégation ti aChrétien. Ni la, e hinga biani so azendo ti Jéhovah ayeke ga ande tâ tënë na ngoi so Royaume ti Nzapa ayeke duti ande na komandema na ndo ti sese kue!

²⁴ E hinga so Royaume ti Nzapa ayeke ga ande. E hinga so atënë ti Jéhovah kue ayeke ga tâ tënë. Ngbanga ti nyen? Ngbanga ti so ROYAUME TI NZAPA AKOMANSE KUA AWE! A yeke na zo oko oko ti hunda tere ti lo, ‘Royaume ni ayeke na komandema na ndo ti mbi?’ Zia e kue e sara ngangu ti duti na gbe ti Royaume so laso, si e lingbi ti wara ye ti nzoni so komandema ti lo, so ayeke nzoni-kue nga so ayeke mbilimbili, ayeke ga na ni!