1, 2. (a) Nchifukwa wuli nyengu zinyaki vingaŵa vakusuzga kugomezga kuti Paradayisu wazamuŵaku nadi? (b) Kumbi nchinthu wuli cho chingatiwovya kuti tigomezgengi malayizgu ngaku Chiuta?

TIYERUZGIYI kuti m’bali wakugomezgeka wafika pa maunganu ndipu wavuka ukongwa. Kunchitu bwana waki wamuchitiya phuzu, wafipiya mtima mo wangaphwerere banja laki, kweniso muwolu waki watama. Sumu yakujuliya yichiyamba, wasisiya mtima ndipu wakondwa kuti wafika ku Nyumba ya Ufumu limoza ndi abali ndi azichi ŵaki. Sumu iyi yikonkhoska va umoyu m’charu cha Paradayisu ndipu yikamba kuti wajiwoni kuti nayu we m’charu chenichi. Iyu watiyiyanja ukongwa sumu iyi ndipu asani watumba limoza ndi banja laki, chilindizga cha m’nthazi chitimuchiska chinanga kuti wakumana ndi masuzgu.

² Kumbi venivi vikukuchitikiyanipu? Tanandi vikutichitikiyapu. Kukamba uneneska, masuzgu nga m’charu chidala ichi, ngangatichitiska kuti tileki kugomezga kuti Paradayisu wazamuŵaku nadi. Te ‘m’nyengu zizitu’ ndipu charu ichi chiyanana cha ndi paradayisu. (2 Tim. 3:1) Kumbi nchinthu wuli cho chingatiwovya kuti tije ndi chilindizga chakukho? Kumbi tiziŵa wuli kuti Ufumu waku Chiuta wazamuwusa nadi ŵanthu wosi pambula kuswera yapa? Tiyeni tikambiskani mauchimi ngamanavi ngaku Yehova ngo ŵanthu ŵaki akali anguwona ngachifiskika. Pavuli paki tiwonengi mo mauchimi ngenanga ngafiskikiya mwakuziziswa mazuŵa nganu. Ndipu pakumaliya, tikambiskanengi mo mauchimi ngenanga ngazamufiskikiya so kunthazi.

3. Kumbi ndi layizgu wuli lo linguchiska Ayuda wo ŵenga ku uŵanda ku Babiloni?

³ Ŵanaŵaniyani mo vinthu venge pa umoyu wa Ayuda wo ŵenga ku uŵanda ku Babiloni cha m’ma 500 B.C.E. Mwakuyanana ndi apapi ŵawu, Ayuda anandi angukuliya ku uŵanda kwenuku ndipu asuzgikanga ukongwa. Yiwu anyozgekanga ndi ŵanthu a ku Babiloni chifukwa chakugomezga Yehova. (Sumu 137:1-3) Kweni kwa vyaka vinandi, Ayuda anguleka cha kugomezga layizgu laku Yehova lakuti azamuwere so kucharu chawu. Yehova wangukamba kuti vinthu vazamukuŵa so umampha asani aziwere kwawu. Iyu wangukamba kuti charu cha Yuda chazamuja nge munda wa Edene wo wenga paradayisu!  (Ŵerengani Yesaya 51:3.) Malayizgu ngenanga nganguperekeka kuti ŵanthu aku Chiuta aje ndi chilindizga kweniso kuti aleki kudandawula. M’nthowa wuli? Wonani vo mauchimi nganyaki ngakamba.

4. Kumbi Yehova wanguŵasimikizgiya wuli Ayuda kuti amuja akuvikilirika m’charu chawu?

⁴ Kuvikilirika. Aŵanda ŵenaŵa aziweriyanga kuparadayisu chayiyu cha, kweni kucharu chakutali cho chinguja kwambula ŵanthu kwa vyaka 70, ndipu anandi mwa aŵanda ŵenaŵa aziŵangaku cha. Kali, m’vyaru vo vizumbulika m’Bayibolo, mwenga nkharamu, mphumphi, anyalubwi kweniso vinyama vinandi vakofya. Mwaviyo, anthurumi akuto atenere kuti ajifumbanga kuti, ‘Kumbi ndakuŵavikiriya wuli ŵana ndi muwolu wangu? Nanga mbereri ndi ng’ombi ndakuzivikiriya wuli?’ Penga pakwenere kujifumba mafumbu yanga. Ŵanaŵaniyani mo anguchiskikiya ndi layizgu laku Yehova la pa Yesaya 11:6-9. (Ŵerengani.) M’mazu ngakunozga ngenanga, Yehova wangulayizga Ayuda wo ŵenga ku uŵanda kuti wakuŵavikiriya limoza ndi viŵetu vawu. Lemba ili likamba kuti nkharamu yaziryanga uteka chifukwa chakuti yazibayanga ng’ombi za Ayuda cha. Ŵanthu akugomezgeka aziwopanga vinyama vakofya cha. Yehova wangulayizga kuti ŵanthu ŵaki azijanga akuvikilirika m’charu cha Yuda chinanga ndi m’matundu kweniso m’malisuwa.—Ezek. 34:25.

5. Kumbi ndi malayizgu nanga ngo nganguchitiska kuti Ayuda agomezgi kuti Yehova wazakuŵapaska chakurya chinandi kweniso nyumba?

⁵ Chakurya ndi nyumba. Yiwu atenere kuti ajifumbanga so kuti: ‘Kumbi ndamufiska kuliska banja langu? Tamuja pani? Kumbi tamugwiranga nchitu kwenuku, nanga nchitu zaki zamukuŵa zamamphaku kuluska zo tigwira kunu ku uŵanda?’ Yehova wangumuka so mafumbu ngenanga kuporote m’mauchimi. Yehova wangulayizga kuti ŵanthu ŵaki azamulonde vuwa yamampha, mwaviyo charu chawu chazijanga ndi vakurya “vakunozga ndi vakuzara.” (Yes. 30:23) Pa nkhani ya nyumba ndi nchitu, Yehova wangulayizga ŵanthu ŵaki kuti: “Akazenganga zinyumba akajanga mwaku zo; akapandanga minda ya mphereska ndi kurya vipasu vaki. Kuti akazenganga ndi kujamu munyaki cha; kuti akapandanga kuti waryengi ndi munyaki cha.” (Yes. 65:21, 22) Umoyu wachijanga wakunozga ukongwa kuyeruzgiya ndi mo vinthu venge ku uŵanda. Nanga anguwovyeka wuli pa nkhani yakukhumbika ukongwa yo yinguŵachitiska kuti aluti ku uŵanda?

6. Kumbi kwa nyengu yitali ŵanthu aku Chiuta atamanga matenda wuli, nanga Yehova wanguŵasimikizgiyanji Ayuda wo aweriyanga kucharu chawu?

⁶ Kusopa Yehova. Ŵanthu aku Chiuta anguleka kumusopa kweche vyaka vinandi kuti aluti ku uŵanda. Kuporote mwa mchimi Yesaya, Yehova wangukamba vakukwaskana ndi ŵanthu ŵaki kuti: “Mutu wosi ngwakutama, mtima wosi utufwa chipoyu.” (Yes. 1:5) Mwauzimu, yiwu ŵenga achibulumutiya kweniso ambula kuvwa chifukwa avwiyanga cha ulongozgi wo Yehova waŵapaskanga ndipu akhumbanga cha kuwona ukweru wo iyu waperekanga. (Yes. 6:10; Yer. 5:21; Ezek. 12:2) Kumbi asani Ayuda angulutiriya kutama matenda ngauzimu ngenanga pavuli pakuti aweku ku uŵanda atingi avikilirikengi wuli? Kumbi Yehova watingi waŵajowongi so cha? Wonani layizgu lakuchiska laku  Yehova: “Mu zuŵa liya ŵamgota [ambula kuvwa] ŵakavwanga mazu nga buku, ndipu kutuwa mumunkhorwi wawu ndi mumdima masu nga achibulumutiya ngakalereskanga.” (Yes. 29:18) Yehova wazichizganga mwauzimu ŵanthu ŵaki wo angulapa kutuliya pasi pa mtima. Asani angulutirizga kumuvwiya kweniso kuchita vo iyu wakhumba, Yehova watingi waŵapaskengi ulongozgi wakovya.

7. Kumbi vo Chiuta wangulayizga ŵanthu ŵaki wo ŵenga ku uŵanda vingufiskika wuli, nanga nchifukwa wuli titenere kuchiskika ndi venivi?

⁷ Kumbi Yehova wangufiska malayizgu ngaki? Vo vinguchitika vimuka fumbu lenili. Ayuda wo anguwere kwawu angutumbikika chifukwa ajanga mwakuvikilirika, ŵenga ndi nyumba zamampha kweniso chakurya chinandi ndipuso asopanga Yehova. Mwakuyeruzgiyapu, Yehova wanguŵavikiriya ku mitundu yo ajanga nayu pafupi ya ŵanthu wo ŵenga anandi kweniso anthazi kujumpha yiwu. Vinyama vakofya vingubaya cha viŵetu va Ayuda. Mbuneneska kuti nganyaki mwa malayizgu ngo Yesaya, Yeremiya, Ezekiele kweniso achimi anyaki akulemba ngangufiska ŵaka kamanavi m’nyengu ya Ayuda, kweni vo vingufiskiya ŵanthu aku Chiuta venga vakukondweska ukongwa, chifukwa ndivu akhumbikiyanga. Asani tisambira vo Yehova wanguchitiya ŵanthu ŵaki m’nyengu yakali chivwanu chidu chikho. Asani malayizgu ngamanavi ngenanga ngo ngangufiskika ngenga ngakukondweska, kwe wuli asani ngazifiskika ngosi? Wonani vo Yehova watichitiya mazuŵa nganu.

8. Kumbi ŵanthu aku Chiuta akondwa ‘m’charu’ chamtundu wuli?

⁸ Ŵanthu aku Yehova mazuŵa nganu apanga mtundu chayiwu cha ndipuso aja m’charu chimoza cha. M’malu mwaki, Akhristu wo amuwusiya limoza ndi Yesu apanga mtundu wauzimu wa “Yisraele . . . waku Chiuta”. (Ŵag. 6:16) Yiwu ndi anyawu a “mbereri zinyaki” achitiya vinthu limoza ‘m’charu’ chauzimu pamwenga kuti gulu laki lo litiŵawovya kuti asopengi Yehova Chiuta mwakukoliyana. Nyengu zosi yiwu achita vinthu mwakukoliyana ndi vo agomezga. (Yoh. 10:16; Yes. 66:8) Kumbi Yehova watipaska “charu” chamtundu wuli? Iyu watipaska paradayisu wauzimu. M’paradayisu wauzimu wenuwu tiwona kufiskika kwa malayizgu ngaku Chiuta ngakukwaskana ndi charu change Edene. Wonani vakuwoniyapu ivi.

9, 10. (a) Kumbi uchimi wa pa Yesaya 11:6-9, ufiskika wuli mazuŵa nganu? (b) Kumbi nchinthu wuli cho chilongo kuti ŵanthu aku Chiuta aja mwachimangu?

⁹ Kuvikilirika. Uchimi wa pa Yesaya 11:6-9, ukamba kuti paŵengi chimangu ndi wanangwa pakati pa nyama zakudondu, ŵanthu kweniso viŵetu vawu. Kumbi uchimi wenuwu ufiskika mazuŵa nganu? Hinya! Nchifukwa wuli m’uchimi uwu nyama zakudondu zileka kubaya ŵanthu ndi viŵetu vawu? Vesi 9 limuka kuti: “Pakuti charu chapasi chikazazikanga ndi zeru za Ambuya nge ndimo maji ngazaziya nyanja.” Kumbi nyama zingasintha mijalidu chifukwa cha “zeru za Ambuya” pamwenga kuti kuziŵa Yehova? Awa, ŵanthu ndiwu asintha mijalidu yawu asani asambira vaku Chiuta Wapachanya kweniso kuyezga mijalidu yaki ya chimangu. Ndichu chifukwa chaki tiwona kufiskika  kwa uchimi wenuwu, m’paradayisu widu wauzimu mazuŵa nganu. Mwakuwovyeka ndi Ufumu, Akhristu asambira kuleka mijalidu yawu yakofya ndipu aja mwachimangu ndi abali kweniso azichi ŵawu auzimu.

¹⁰ Mwakuyeruzgiyapu, m’buku ili tasambira vifukwa va m’Malemba vo Akhristu aleke kuchitaku vacharu kweniso tawona masuzgu ngo akumana nangu chifukwa cha venivi. Kumbi nchinthu chakukondweska cha kuti m’charu chachiwawa ichi, mwe “mtundu” umana wa ŵanthu wo akana kuchitaku viwawa vamtundu wewosi chinanga kuti angawofyezgeka kuti abayikengi? Uwu mbukaboni wambula kususkika wakuti ŵanthu wo awusika ndi Ufumu waku Mesiya aja mwachimangu nge mo ukambiya uchimi waku Yesaya! Yesu wangukambiya limu kuti Akhristu azamuziŵika chifukwa cha chanju cho azamulongorana yumoza ndi munyaki. (Yoh. 13:34, 35) M’gulu laki, Khristu wagwiriskiya nchitu ‘muŵanda wakugomezgeka ndi wakuwamu’ kuti wasambizi Akhristu kuja achimangu, achanju kweniso akufwasa.—Mat. 24:45-47.

11, 12. Kumbi ndi nja yamtundu wuli yo ye m’charu mazuŵa nganu, nanga Yehova waŵapaska wuli chakurya chinandi ŵanthu ŵaki?

¹¹ Chakurya. Charu che ndi nja ya mazu ngaku Chiuta. Bayibolo likukambiya limu kuti: “‘Wonani, mazuŵa ngakazanga,’ atiti Ambuya Chiuta, ‘penipo nkhatumanga nja mucharu; kuti ndi nja ya sima cha, pamwenga nyota ya maji; kweni yakuvwiya mazu nga Ambuya.’” (Amosi 8:11) Kumbi ŵanthu wo awusika ndi Ufumu waku Chiuta nawu ŵe ndi nja yeniyi? Yehova wangukambiya  limu mphambanu yo yazamuŵapu pakati pa ŵanthu ŵaki ndi arwani ŵawu, iyu wangukamba kuti: “Ehe, ateŵeti ŵangu akaryanga, kweni imwi mukaŵanga anja; ehe, ateŵeti ŵangu akamwanga, kweni imwi mukaŵanga anyota; ehe, ateŵeti ŵangu akakondwanga, kweni imwi mukalengeskekanga.” (Yes. 65:13) Kumbi mwawona kufiskika kwa mazu ngenanga?

¹² Chakurya chauzimu cho tilonde chenge maji nga m’msinji wandimba kweniso ukulu ukongwa. Mabuku ngidu, vinthu vakuvwisiya, mavidiyo, maunganu ngampingu kweniso ngakulungakulu ndipuso vo visanirika pa Webusayiti yidu ve nge maji ngakusapariya m’charu cha nja ichi. (Ezek. 47:1-12; Yoele 3:18) Kumbi mukondwa cha kuti Yehova wafiska layizgu laki lakuti wazakutipaska chakurya zuŵa lelosi? Kumbi muwonesesa kuti zuŵa lelosi muturya pathebulu laku Yehova?

13. Kumbi mwawona wuli kufiskika kwa layizgu laku Yehova lakuti achibulumutiya akalereskanga ndipu ambula kuvwa akavwanga?

¹³ Kusopa Yehova. Mazuŵa nganu ŵanthu anandi mbambula kuvwa kweniso mbachibulumutiya mwauzimu. (2 Ŵakor. 4:4) Kweni Khristu wachizga matenda ngakupambanapambana pacharu chosi mazuŵa nganu. Kumbi mwawonapu ŵanthu achibulumutiya achilereska kweniso ambula kuvwa achiyamba kuvwa? Asani mwawonapu ŵanthu achiziŵa umampha uneneska wa Mazu ngaku Chiuta ndi kuleka kugomezga maboza nga visopa ngo ngaŵachitiskanga kuti aje ambula kuvwa kweniso achibulumutiya pa uneneska, ndikwesa mwawona kufiskika kwa layizgu lakuti: “Mu zuŵa liya ŵamgota ŵakavwanga mazu nga buku, ndipu kutuwa mumunkhorwi wawu ndi mumdima masu nga achibulumutiya ngakalereskanga.” (Yes. 29:18) Pacharu chosi, ŵanthu masauzandi nganandi achizgika mwauzimu chaka chechosi. Munthu weyosi yo watuwa mu Babiloni Mukulu ndi kwamba kusope nasi limoza m’paradayisu wauzimu, wapereka ukaboni wakuti Yehova wafiska malayizgu ngaki mazuŵa nganu!

14. Kumbi kuŵanaŵaniya vitumbiku vo Yehova watipaska m’paradayisu wauzimu kungatiwovya wuli?

¹⁴ Mutu wewosi m’buku ili upereka ukaboni wanthazi wakuti Khristu wawovya ŵanthu ŵaki kuti aje m’paradayisu wauzimu m’mazuŵa nganu ngakumaliya. Tiyeni tilutirizgi kuŵanaŵaniya vitumbiku vakupambanapambana vo talonde m’paradayisu mwenuyu mazuŵa nganu. Asani tichitengi venivi, tijengi ndi chigomezgu chakukho chakuti Yehova wazamufiska malayizgu ngaki kunthazi.

15. Nchifukwa wuli tingasimikizga kuti charu chazamuja paradayisu?

¹⁵ Kwamba kali chilatu chaku Yehova nchakuti charu chije paradayisu. Iyu wanguŵika Adamu ndi Eva m’munda wa paradayisu, ndipu wanguŵapaska dangu lakuti abalani ndi kuzaza charu chapasi kweniso kuti aphwere vamoyu vosi. (Chiy. 1:28) M’malu mwaki, Adamu ndi Eva anguvwiya Satana ndipu anguchitiska kuti ŵana ŵawu aje ambula kufikapu, akubuda kweniso kuti afwengi. Kweni chilatu chaku Yehova chingusintha cha. Nyengu zosi asani iyu walongoro, mazu ngaki ngafiskika.  (Ŵerengani Yesaya 55:10, 11.) Mwaviyo, tingasimikizga kuti m’paradayisu wa pacharu chosi, ŵana aku Adamu ndi Eva azamuzaza charu chapasi, ndipu azamuphwere mwachanju vinthu vo Yehova wakulenga. Pa nyengu yeniyi, malayizgu ngosi ngo Yehova wangulayizga Ayuda wo ŵenga ku uŵanda ngakukwaskana ndi umoyu wamampha ngazamufiskika! Ŵanaŵaniyani vakuyeruzgiyapu ivi.

16. Kumbi Bayibolo likonkhoska wuli mo tazamuvikilirikiya m’Paradayisu?

¹⁶ Kuvikilirika. Pakumaliya, malayizgu ngosi ngo ngakulembeka pa Yesaya 11:6-9 ngazamufiskika. Anthurumi, anthukazi kweniso ŵana azamuvikilirika kwekosi ko angaluta pacharu. Palivi nyama pamwenga munthu yo wazamuwofyeza anyaki. Ŵanaŵaniyani nyengu yo mwazamuja mwachimangu pacharu ndipu mwazamusambiranga m’misinji kweniso m’nyanja, mwazamukweranga m’mapiri, kweniso kwenda m’dondu kwambula kopa. Ndipu asani kwafipa, mwazamufipanga mtima cha. Mazu nga pa Ezekiele 34:25, ngazamufiskika, mwakuti ŵanthu aku Chiuta azamuja ‘mwakufwasa m’bozwa ndi kugona’ m’matundu.

17. Nchifukwa wuli tisimikizga kuti Yehova wazamupereka vakukhumbika vosi asani Ufumu waki waziyamba kuwusa charu chosi?

¹⁷ Chakurya ndi nyumba. Ŵanaŵaniyani nyengu yo kwazamuŵavi ukavu, nja, kweniso malu ngakuphweriyaku ŵanthu. Chakurya chauzimu chakuzara cho ŵanthu aku Chiuta alonde mazuŵa nganu, mbukaboni wakuti Ufumu waku Mesiya wazamuliska ŵanthu ŵaki wosi. Pa nyengu yo Yesu wenga pacharu, wangulongo kuti wazamufiska malayizgu ngenanga chifukwa iyu wanguliska ŵanthu masauzandi nganandi ndi tisomba timanavi kweniso tiviŵandi. (Mat. 14:17, 18; 15:34-36; Marko 8:19, 20) Po Ufumu waku Chiuta wazamuyambiya kuwusa charu chosi, wazamufiska malayizgu nge ili: “Akapaskanga vuwa pa mbutu [mbewu] yo mumija panyata, ndi vakurya, vakume munyata, vo vikaŵanga vakunozga ndi vakuzara. Muzuŵa liya viŵetu vinu vikaryanga muvipozwa vikulu.”—Yes. 30:23.

18, 19. (a) Kumbi uchimi wa pa Yesaya 65:20-22 ung’anamuwanji kwaku yimwi? (b) Kumbi mazu ngakuti mazuŵa ngidu ngazamukuŵa nge “mazuŵa nga chimiti,” ngang’anamuwanji?

¹⁸ Mazuŵa nganu ŵanthu anandi awona kuti mphakusuzga kuja ndi nyumba yamampha kweniso kusaniya nchitu yamampha. M’charu chiheni ichi, ŵanthu anandi agwira nchitu yakufyo kwa nyengu yitali kweni atondeka kujiphwere kweniso kuphwere mabanja ngawu chifukwa malipiru ngawu ngatuŵa ngamana ukongwa, penipo akukhupuka akhupukiyakhupukiya chifukwa cha mbunu. Ŵanaŵaniyani mo vinthu vazamuŵiya pacharu chosi asani layizgu ili lazifiskika: “Akazenganga zinyumba akajanga mwaku zo; akapandanga minda ya mphereska ndi kurya vipasu vaki. Kuti akazenganga ndi kujamu munyaki cha; kuti akapandanga kuti waryengi ndi munyaki cha; pakuti nge ndi mo ngaliri mazuŵa nga chimiti ndimu ngakaŵiyanga mazuŵa nga ŵanthu ŵangu, ndipu akusankhika ŵangu akakondwanga nyengu yitali ndi nchitu ya manja ngawu.”—Yes. 65:20-22.

¹⁹ Kumbi mazu ngakuti mazuŵa ngidu ngazamukuŵa nge “mazuŵa nga chimiti” ngang’anamuwanji? Asani mwama musina  mwa chimiti chikulu, kumbi mukuŵanaŵanapu kuti chimiti cho chaja vyaka vilinga? Vingachitika kuti ambuyawu ŵa ambuyamwi akuchisaniya. Kukamba uneneska, chinanga imwi mungalutiriya kuja ndi umoyu m’charu chakali ichi, yifikengi nyengu yo imwi mufwengi, kweni chimiti cho chilutiriyengi kukuwa kwa vyaka vinandi akhumba mpaka pa nyengu yo ŵanthu aluŵiyengi kuti imwi mwengaku. Yehova wakutilongo lisungu pakutilayizga kuti tazamuja ndi umoyu kwa nyengu yitali kweniso mwachimangu m’Paradayisu! (Sumu 37:11, 29) Yituza nyengu yo tazamuja ndi umoyu kwamuyaya ndipu tazamuwonanga vimiti vichikuwa kwa nyengu yitali ndi kufwa nge mbuteka!

20. Kumbi ŵanthu akugomezgeka ku Ufumu azamuja ndi umoyu wamtundu wuli?

²⁰ Umoyu wambula kutama. Mazuŵa nganu, munthu weyosi watama ndipuso wangafwa nyengu yeyosi. Tosi te akubuda ndipu yeniyi ndi nthenda yikulu ukongwa. Munkhwala wa nthenda iyi ndi sembi ya uwombozi yaku Khristu pe. (Ŵar. 3:23; 6:23) Mu Muwusu waki wavyaka 1,000, Yesu ndi wo wazamuwusa nawu azamuwovya ŵanthu kuti ayanduwi ndi sembi yeniyi kweniso azamutuzgapu vinthu vosi vo ŵanthu akumana navu chifukwa cha ubudi. Pa nyengu iyi uchimi waku Yesaya uwu wazamufiskika: “Pakaŵangavi wakujamu mumuzi wo yo wakakambanga kuti, ‘Ndatama’; ŵanthu ŵakuja mwenimuwa ŵakagowokerekanga mauheni ngawu.” (Yes. 33:24) Ŵanaŵaniyani nyengu yo pazamuŵavi munthu wambula kuwona, wambula kuvwa pamwenga wakupunduka. (Ŵerengani Yesaya 35:5, 6.) Pazamuŵavi matenda ngo Yesu wazamutondeka kuchiza, kaya nkhupunduka, kufuntha pamwenga kusuzgika maŵanaŵanu. Ŵanthu wosi akugomezgeka ku Ufumu azamuja ndi umoyu wambula nthendewuzi!

21. Kumbi nchinthu wuli cho chazamuchitikiya nyifwa, nanga muchiskika wuli ndi layizgu lenili?

²¹ Nanga nchinthu wuli cho chazamuchitikiya nyifwa? “Wamawongu [widu] wakumariya” ndi nyifwa, ndipu munthu weyosi wambula kufikapu wathera ku murwani mwenuyu. (1 Ŵakor. 15:26) Kweni kumbi Yehova wangatondeka kuzituzgapu nyifwa? Wonani vo Yesaya wangukambiya limu: “Akameziyanga limu nyifwa muyaya, ndipu Ambuya Chiuta akaleskanga masozi ku visku vosi.” (Yes. 25:8) Kumbi mutiyiwona nyengu yeniyi mumaŵanaŵanu mwinu? Pa nyengu iyi, kwazamuŵavi nyifwa, masanu kweniso kuliya! Kweni ŵanthu azamutuzga masozi ngalikondwa chifukwa Yehova wazamufiska layizgu laki lakuti wazamuyuska akufwa! (Ŵerengani Yesaya 26:19.) Pakumaliya, masuzgu ngosi ngo ngatuza chifukwa cha nyifwa ngazamumala.

22. Kumbi nchinthu wuli cho chazamuchitika asani Ufumu wazifiska khumbu laku Chiuta panu pacharu chapasi?

²² Uchimala Muwusu wavyaka 1,000, Ufumu wazamuja kuti wafiska khumbu laku Chiuta pacharu ndipu Khristu wazamupereka Ufumu kwa Awiski. (1 Ŵakor. 15:25-28) Pa nyengu iyi, ŵanthu wosi azamuja akufikapu kweniso akunozgeka kuyeseka kakumaliya ndi Satana yo wazamutuzgika m’chizenji. Pavuli paki, Khristu wazamuphwanya chinjoka kweniso gulu laki losi. (Chiy. 3:15; Chiv. 20:3, 7-10) Kweni ŵanthu wosi wo atanja  Yehova azamukondwa ndi umoyu. Bayibolo pe ndilu likonkhoska umampha mo umoyu wazamuŵiya. Bayibolo lilayizga kuti ŵanthu akugomezgeka azamusaniya “wanangwa wa unkhankhu wa ŵana ŵaku Chiuta.”—Ŵar. 8:21.

23, 24. (a) Nchifukwa wuli tikayika cha kuti malayizgu ngaku Chiuta ngazamufiskika? (b) Kumbi mwasimikizga mtima kuchitanji?

²³ Malayizgu yanga kuti ngakambika chifukwa cha kukhumbira pamwenga kulota ŵaka cha. Kufiskika kwa malayizgu ngaku Yehova nkhwambula kukayikiska! Chifukwa wuli? Kumbukani mazu ngaku Yesu ngo tingukambiskana m’mutu wakwamba wa buku ili. Iyu wangusambiza akusambira ŵaki kuti arombengi kwaku Yehova kuti: “Ufumu winu uzi. Khumbu linu lichitiki, panu pasi nge ndiko kuchanya.” (Mat. 6:9, 10) Ufumu waku Chiuta ndi maŵanaŵanu ŵaka nga munthu cha, kweni uliku nadi! Po tikambiya panu uwusa kuchanya. Sonu wawusa kwa vyaka 100 ndipu wafiska malayizgu ngaku Yehova ngakupambanapambana ngo tiwona m’mpingu wachikhristu. Mwaviyo, titenere kusimikizga kuti malayizgu ngaku Yehova ngosi ngazamufiskika asani Ufumu waku Chiuta waziyamba kuwusa charu chosi!

²⁴ Tiziŵa kuti Ufumu waku Chiuta uzengi. Tiziŵa so kuti malayizgu ngosi ngaku Yehova ngazamufiskika. Chifukwa wuli? Chifukwa chakuti UFUMU WAKU CHIUTA UWUSA! Weyosi wangachita umampha kujifumba kuti, ‘Kumbi Ufumu waku Chiuta utindiwusa?’ Tiyeni tosi tiyesesi kuchita vo tingafiska kuti tilutirizgi kuja akugomezgeka ku Ufumu waku Chiuta ndi chilatu chakuti tiziyanduwi ndi Ufumu wenuwu kwamuyaya m’charu chambula masuzgu!