1, 2. (a) Nkaambo nzi zimwi ziindi cilakonzya kuyuma kusyoma kuti Paradaiso njancobeni? (b) Ncinzi cikonzya kutugwasya kuyumya lusyomo lwesu muzisyomezyo zya Leza?

MUKWESU uusyomeka wasika kumuswaangano kakatede kapati kuzwa kumulimo. Bapati bamulimo tabamweendelezyi kabotu, alimwi ulijisi buyumuyumu bumwi mukulanganya mukwasyi wakwe, alimwi ulalibilika akaambo kabakaintu bakwe ibaciswa bulwazi bumwi. Mbolwatalikila buyo kulila lwiimbo lwakujalula miswaangano, waswa ciya akulimvwa kukatalukwa alimwi akukkomana nkaambo wajanika ku Ŋanda ya Bwami antoomwe abakwesu abacizyi. Lwiimbo lujatikizya bulangizi bwabuumi mu Paradaiso, alimwi majwi aalwiimbo apa kuti mukwesu ooyu ayezyeezye kuti uli mu Paradaiso. Ulaluyanda kapati lwiimbo oolu, alimwi ulatobelezya kwiimba antoomwe amukwasyi wakwe, alimwi bulangizi bwabuumi bwakumbele bwamuumbulizya.

² Sena kuli nomwakalimvwide boobu? Tobanabunji twakalimvwa kale oobu. Nokuba boobo, buumi bwamubweende oobu bulakonzya kupa kuti cituyumine kubusyoma bulangizi bwakuti kuyakuba Paradaiso kumbele. ‘Nziindi zikatazya ncobeni,’ alimwi buumi munyika eeyi motukkala tabukonzyi kweelana abuumi bwamu paradaiso. (2 Ti. 3:1) Ncinzi cikonzya kutugwasya kusyoma kuti bulangizi bwesu mbwancobeni? Ino tuzyi buti kuti lino-lino Bwami bwa Leza buyakubalela bantu boonse? Atulange-lange businsimi bwa Jehova bumwi bantu bakwe bakaindi mbobakabona kabuzuzikizyigwa. Mpoonya tulabona businsimi oobo abusinsimi bumwi bukozyene mbobuli mukuzuzikizyigwa mazuba aano. Mpoonya kumamanino lusyomo lwesu lwayumizyigwa, tulalanga-langa businsimi oobo mbobubujatikizya buumi bwesu bwakumbele.

3. Ncisyomezyo nzi icakali kubaumbulizya ba Juda ibakali mubuzike ku Babuloni?

³ Amuyeeye buyo buumi mbobwakabede kaindi kuba Juda ibakali mubuzike ku Babuloni mumwaanda wamyaka wacisambomwe B.C.E. Banji bakakomenena mubuzike mbubwenya mbuli bamazyali babo bamwi, alimwi buumi bwakali kukatazya. Bana Babuloni bakali kubafwubaazya akaambo kalusyomo  lwabo muli Jehova. (Int. 137:1-3) Kwamyaka minji, ba Juda basyomeka bakazumanana kukakatila kubulangizi bwabo bubotu bwakuti: Jehova wakasyomezya kupilusya bantu bakwe kucisi cabo. Jehova wakabasyomezya kuti buumi bwakali kuyakuba kabotu. Mane buya wakakozyanisya kubukulusyigwa kwamunzi wa Juda kumuunda wa Edeni—paradaiso! (Amubale Isaya 51:3.) Zisyomezyo eezyo zyakali zyakuyumya-yumya bantu ba Leza, kutegwa bacileke kudooneka nkobakali kukonzya kuba ankuko mumyoyo yabo. Munzila nzi? Atulange businsimi bumwi cacigaminina.

4. Ncisinizyo nzi Jehova ncaakapa ba Juda kujatikizya kukwabililwa nkobakali kuyakujana mucisi cabo?

⁴ Kukwabililwa. Bantu ibakali mubuzike bakali kuyakupiluka, ikutali ku paradaiso iini, pele kunyika iyakali kulamfwu yalo iyakali matongo myaka 70, nyika yalo bantu banji njobatakazyi. Muciindi icakali kulembwa Bbaibbele, basyuumbwa, baumpe, basiluwe alimwi abanyama bamwi bamusyokwe ibaluma bakali banji. Silutwe wamukwasyi ulakonzya wakali kulibuzya kuti: ‘Ino mbuti mbondiyakukwabilila bakaintu alimwi abana bangu? Mbuti kujatikizya mbelele aŋombe—ino ndiyakuzikwabilila buti?’ Kulibilika kuli boobo tiikwakalubide pe. Nokuba boobo, amuyeeye cisyomezyo ca Leza cilembedwe mulugwalo lwa Isaya 11:6-9 akubona mbocakali kuyakubaumbulizya. (Amubale.) Kwiinda mumajwi aaya aakweema, Jehova wakasyomezya bantu ibakali mubuzike kuti balo alimwi azivwubwa zyabo bakali kuyakukwabililwa. Syuumbwa wakali kuyakulya bwizu ikutali kuluma ŋombe zyaba Juda. Bantu basyomeka tiibakali kuyakuyoowa munyama uuli woonse uuluma. Jehova wakabasyomezya kuti bakali kuyakukwabililwa munyika ya Juda iyakali kuyakubukulusyigwa, nomuba munkanda naa musyokwe.—Ezk. 34:25.

5. Mbusinsimi nzi ibwakagwasya bantu ibakapiluka kuzwa mubuzike kusyoma kuti Jehova wakali kuyakulanganya nzyobakali kuyandika?

⁵ Zintu zinji. Kwakali kukonzya kuba akulibilika kumbi. ‘Sena ndiyakucikonzya kusanina mukwasyi wangu munyika iibukulusyidwe? Ino tuyakukkala kuli? Sena kuyakujanika milimo, alimwi sena inakuli mibotu kwiinda milimo mibi yamubuzike yakweendelezyegwa abasikutuzunda?’ Kwiinda mubusinsimi ibwakasololelwa amuuya, Jehova wakaiingula mibuzyo eeyo ayalo. Jehova wakasyomezya kuti bantu bakwe basyomeka bakali kuyakuba aamvwula mbotu; akaambo kaceeci, nyika yakali kuyakubapa ‘cakulya cinji alimwi cinona.’ (Is. 30:23) Kujatikizya maanda alimwi amulimo, Jehova wakabasyomezya kuti: “Lino bayooyaka maanda akukala mulingao, bayoobyala myuunda yamisaansa akulya micelo yayo. Maanda ngebayaka taakooyookalwa umbi, amicelo njibabyala tiikooyooligwa umbi pe.” (Is. 65:21, 22) Inzya, munzila zinji kapati, buumi bwakali kuyakubota ikuti tweelanya ambobwakabede mubuzike mu Babuloni cisi cabantu batakali kukomba Leza. Pele mbuti kujatikizya mapenzi aainda kubija—alo aakapa kuti batolwe mubuzike?

6. Mapenzi nzi aali kubakatazya bantu ba Leza kuzwa kaindi, alimwi ncinzi ncaakabasyomezya Jehova bantu ibakapiluka kuzwa mubuzike?

⁶ Buumi bwakumuuya. Kaindi, kabatanaunka mubuzike, bantu ba Leza bakali kuciswa kumuuya. Kwiinda mumusinsimi Isaya, Jehova wakaambila bantu bakwe kuti: “Mutwe woonse ulaciswa,  awalo moyo woonse ulalengauka.” (Is. 1:5) Bakali boofwu alimwi basinke matwi kumuuya, nkaambo bakazumanana kuunduluzya lulayo lwa Jehova alimwi tiibakali kubona kumunika nkobakali kumunikilwa. (Is. 6:10; Jer. 5:21; Ezk. 12:2) Ikuti naa mapenzi aaya akali kuyakubasikila bantu ibakali kuyakuzwa mubuzike, ino bakali kuyakukwabililwa buti? Sena tiibakali kunga bacileka kukkomaninwa a Jehova alimwi? Eelo kaka cakali kuyumya-yumya cisyomezyo ca Jehova cakuti: “Lino mubuzuba obo basinkematwi bayoomvwa majwi aabbuku, ameso aaboofu ayoobona kuzwa kumudima uusia mubabede.” (Is. 29:18) Inzya, Jehova wakali kuyakubaponya kumuuya bantu bakwe mbaakasubula pele ibakeempwa. Kufwumbwa buyo kuti bakali kuyakuswiilila akumvwida, wakali kuyakubapa malailile aabuumi akubamunikila.

7. Ino zisyomezyo zya Leza kujatikizya bantu bakwe ibakali mubuzike zyakazuzikizyigwa buti, alimwi nkaambo nzi eeci ncociyumya lusyomo lwesu?

⁷ Sena Jehova wakazizuzikizya zisyomezyo zyakwe? Zintu zini zyakacitika musyule zilawiingula mubuzyo ooyu. Ba Juda ibakapiluka kucisi cabo bakalongezyegwa kapati akukwabililwa, azintu zinji alimwi abuumi bwakumuuya. Mucikozyanyo, Jehova wakabakwabilila kuzwa kubantu banji ibakabazingulukide alimwi ibakajisi nguzu kwiinda mbabo. Banyama baluma kunyina nobakaluma zivwubwa zyabo. Masimpe, ba Juda aabo bakabona buyo kuzuzikizyigwa kusyoonto kwabusinsimi bwa paradaiso ibwakalembwa abaalumi ibali mbuli Isaya, Jeremiya, alimwi a Ezekieli—pele kuzuzikizyigwa nkobakabona bantu ba Leza kwakali kukkomanisya kapati alimwi kwakacitika aciindi ceelede. Ciindi notulanga-langa Jehova ncaakacitila bantu bakwe musyule, lusyomo lwesu lulayuma kapati. Ikuti naa kuzuzikizyigwa kusyoonto kwabusinsimi oobu kwakali kukkomanisya, ino ciyakuba buti bwaakuzuzikizyigwa cakumaninina? Atulange-lange Jehova ncaatucitila mazuba aano.

8. Ino bantu ba Leza mazuba aano bali ‘mucisi’ cili buti?

⁸ Bantu ba Jehova mazuba aano tabali cisi cini alimwi tabakkali mucisi comwe. Muciindi caboobo, Banakristo bananike bapanga cisi cakumuuya caba “Isilayeli ba Leza.” (Gal. 6:16) Beenzinyina iba “mbelele zimbi” balabasangana mu “cisi” cakumuuya, mwalo mobakomba Jehova Leza calukamantano. Bukombi oobu nenzila yabuumi bwabo. (Joh. 10:16; Is. 66:8) Pele ‘ncisi’ cili buti Jehova ncaatupa? Niparadaiso yakumuuya. Mucisi eeci, zisyomezyo zya Leza zya paradaiso mbuli mbocakabede mu Edeni, zyazuzikizyigwa kumuuya. Atulange-lange zikozyanyo zimwi.

9, 10. (a) Mbuti businsimi buli mulugwalo lwa Isaya 11:6-9 mbobuzuzikizyigwa mazuba aano? (b) Mbumboni nzi bwaluumuno ibujanika akati kabantu ba Leza?

⁹ Kukwabililwa. Mubusinsimi bulembedwe mulugwalo lwa Isaya 11:6-9, tujana bukkale bwaluumuno ibukkomanisya—ibuli akati kabanyama bamusyokwe alimwi abantu azivwubwa zyabo. Sena zintu eezyi zyazuzikizyigwa munzila yakumuuya mazuba aano? Inzya! Mukapango 9, tujana kaambo banyama bamusyobo ooyu ncobayakucileka kuyoosya naa kuluma: “Nkaambo  nyika iyoozula luzibo lwa-Jehova mbubonya mbuli maanzi mbwaazuzya lwizi.” Sena “luzibo lwa-Jehova” lulacinca mbobalilemeka banyama? Peepe, mbantu bacinca kwiinda mukuzyiba Leza Mupatikampatila alimwi akwiiya nzila zyakwe zyaluumuno. Nkakaambo kaako mu paradaiso yesu yakumuuya mazuba aano, tulakonzya kubona kuzuzikizyigwa kwabusinsimi oobo ikukkomanisya kapati. Ansi aabulelo bwa Bwami, basikutobela Kristo baiya kuleka bukali, bube ibuli mbuli bwabanyama baluma, akupona muluumuno abukkale bubotu a Banakristonyina.

¹⁰ Mucikozyanyo, mubbuku eeli twabandika twaambo tujatikizya kutatola lubazu mutwaambo twacisi—kujatikizya ncotusyoma kweelana a Magwalo ncaamba alimwi akupenzyegwa kwabantu ba Leza akaambo kakutatola lubazu mutwaambo twacisi. Sena tacigambyi kubona kuti munyika eeyi iizwide nkondo, kuli kakamu ‘kacisi’ cabantu ibakaka kutola lubazu munkondo munzila iili yoonse nociba ciindi nobakongwa kuti balajaigwa? Eelo kaka mbumboni bugambya bwakuti balelwa ba Mwami Mesiya balikkomene muluumuno kweelana ancaakaamba Isaya! Jesu wakaamba kuti basikumutobela bakali kuyakuzyibwa akaambo kaluyando ndobatondezya kuli umwi aumwi. (Joh. 13:34, 35) Mumbungano, cakukkazika moyo, Kristo ubelesya “muzike musyomesi uucenjede” kuyiisya Banakristo boonse kuti babe basiluumuno, basiluyando alimwi akuba babombe.—Mt. 24:45-47.

11, 12. Ino bantu munyika mazuba aano bafwide nzala yamusyobo nzi, pele mbuti Jehova mbwaabasanina bantu bakwe acakulya cinji?

 ¹¹ Zintu zinji. Nyika ilijisi nzala yakumuuya. Bbaibbele lyaamba kuti: “Amubone! Mazuba aleza, mbwaamba Mwami Jehova, ngensi tumine nyika inzala. Teensi kwaamba kuti ninzala yansima nanka nyota yamaanzi pe. Ninzala yakuswiilila majwi aa-Jehova.” (Am. 8:11) Sena balelwa ba Bwami bwa Leza abalo balaanzala? Jehova wakaambila limwi kwiindana kuli akati kabantu bakwe alimwi abasinkondonyina naakati: “Balanda bangu bayoolya, pele inywe muyoofwa inzala. Balanda bangu bayoonywa, pele inywe muyoofwa nyota. Balanda bangu bayoosekelela, pele inywe muyoousa insoni.” (Is. 65:13) Sena mwakubona kuzuzikizyigwa kwamajwi aaya?

¹² Tulatambula cakulya cakumuuya cinji kapati ciyaabuvwula icili mbuli kalonga kayaabukomena kusikila kaba mulonga mupati. Mabbuku eesu aamba zya Bbaibbele alimwi azyakuswiilila zyakalekkodwa amavidiyo, miswaangano yesu alimwi amiswaangano yacooko, alimwi azyeezyo zimwaigwa a Web site yesu—zyoonse eezyi ncakulya cakumuuya icipa buumi munyika iijisi nzala yakumuuya icikunka mbuli maanzi aacilobe. (Ezk. 47:1-12; Joel 3:18) Sena tamukkomene kubona kuzuzikizyigwa kwazisyomezyo zya Jehova zyabuvwubi bwakumuuya mubuumi bwanu bwabuzuba abuzuba? Sena mulasinizya lyoonse kuti mulida atebulu lya Jehova?

13. Mbuti mbomwabona kuzuzikizyigwa kwacisyomezyo ca Leza kujatikizya boofwu kababona alimwi abasinke matwi kabatalika kumvwa?

¹³ Buumi bwakumuuya. Bantu banji mazuba aano mbasinke matwi alimwi mboofwu kumuuya. (2 Ko. 4:4) Nokuba boobo, Kristo ulimukuponya malwazi nyika yoonse mbwiizulwa. Sena mwabona kuti batalangi batalika kubona abasinke matwi batalika kumvwa? Ikuti naa mwabona bantu kabazyiba kasimpe kamu Jwi lya Leza, kabasiya zikombelo zyakubeja zyalo izyakali boofwazide akubasinka matwi kuti batamvwi kasimpe, nkokuti mwacibona cisyomezyo eeci kacizuzikizyigwa, cisyomezyo cakuti: “Lino mubuzuba obo basinkematwi bayoomvwa majwi aabbuku, ameso aaboofu ayoobona kuzwa kumudima uusia mubabede.” (Is. 29:18) Nyika yoonse mbwiizulwa, bantu banji balaponesyegwa kumuuya mwaka amwaka. Muntu uuli woonse uuzwa muli Babuloni Mupati akutusangana mukukomba kwesu mu paradaiso yakumuuya, mbumboni bwakuti zisyomezyo zya Jehova zyazuzikizyigwa!

14. Mbumboni nzi bukonzya kuyumya lusyomo lwesu ikuti twazinzibala kuyeeya kujatikizya mbubo?

¹⁴ Cibalo cimwi acimwi mubbuku eeli cijisi bumboni bwakuti Kristo wababunganya basikumutobela mu paradaiso yakumuuya iini-ini muciindi eecino camamanino. Atuzumanane kuzinzibala kuyeeya nzila zinji motwalongezyegwa mu paradaiso eeyi mazuba aabo. Notucita boobo, lusyomo lwesu muzisyomezyo zya Jehova zyakumbele lulazumanana kuyuma kapati.

15. Nkaambo nzi ncotukonzya kuba masimpe kuti nyika iyakuba paradaiso?

¹⁵ Kuzwa kaindi, makanze aa Jehova ngakupanga nyika kuba paradaiso. Wakabikka Adamu a Eva mumuunda wa paradaiso, akubapa mulawo wakuzuzya nyika abana babo alimwi  akulanganya zilenge zyoonse zyaanyika. (Matl. 1:28) Muciindi caboobo, Adamu a Eva bakatobela Saatani mukuzanga calo icakapa kuti bana babo boonse babe bantu batalondokede, kabajisi cibi alimwi kabafwa. Nokuba boobo, makanze aa Leza taakwe naakacinca pe. Ikuti waamba kale, lyoonse ulazuzikizya majwi aakwe. (Amubale Isaya 55:10, 11.) Aboobo, tulakonzya kuba masimpe kuti bana ba Adamu a Eva bayakwiizuzya nyika akwiibombya, akuzilanganya caluyando zilenge zya Jehova mu paradaiso. Aciindi eeco, businsimi ibwakasaanguna kwaambwa kuba Juda ibakali mubuzike ikujatikizya buumi mu paradaiso, buyakuzuzikizyigwa cakumaninina. Atulange-lange zikozyanyo zitobela.

16. Ino Bbaibbele lilupandulula buti kukwabililwa nkotuyakukkomanina mu Paradaiso?

¹⁶ Kukwabililwa. Kumamanino, majwi aakkomanisya aali mulugwalo lwa Isaya 11:6-9 ayakuzuzikizyigwa munzila yakumubili cakumaninina. Baalumi, bamakaintu, alimwi abana banakukwabilidwe munyika kufwumbwa nkobaunka. Taakwe cilenge cili coonse ciyakuyoosya ceenzinyina, abe muntu naa munyama. Amuyeeyele buyo ciindi mwaakubona nyika imunzi wesu, momukonzya kusaya naa kuyamba mumilonga, amulwizi; kukkwela malundu, alimwi akweendeenda munyika kamukwabilidwe cakumaninina. Alimwi masiku, tamukalibiliki cili coonse. Majwi aajanika mulugwalo lwa Ezekieli 34:25, ayakuzuzikizyigwa, kutegwa bantu ba Leza “bakakale cakuliiba munkanda akoona mucisaka.”

17. Nkaambo nzi ncotukonzya kuba masimpe kuti Jehova uyakutupa zintu zinji nzyotuyandika ciindi Bwami bwaakulela nyika yoonse?

¹⁷ Zintu zinji. Amuyeeyele buyo ciindi nokutakabi zintu mbuli bucete, kubula zyakulya zitajisi busani, nzala, naa nokutakabi mbunga zigwasya bacete naa baciswa. Cakulya cakumuuya ncobatambula bantu ba Leza mazuba aano ncisinizyo cakuti Mwami Mesiya uyakubasanina balelwa bakwe munzila iili yoonse. Ciindi Jesu naakali anyika wakatondezya asyoonto kuti ulakonzya kuzuzikizya zisyomezyo zili boobu ciindi naakasanina bantu bakafwide nzala kwiinda mukubelesya zinkwa answi buyo zisyoonto. (Mt. 14:17, 18; 15:34-36; Mk. 8:19, 20) Ciindi Bwami bwa Leza nobunakulela nyika yoonse, businsimi ibuli mbuli boobu buyakuzuzikizyigwa munzila yakumubili, ibusinsimi bwakuti: “Uyootuma imvula zyakumeneka imbuto zyako nzyobyala munyika, akukupa cilyo, micelo yamunyika, cinone akuvula. Mubuzuba obo iŋombe zyako ziyoocela mumacelelo mapati.”—Is. 30:23.

18, 19. (a) Ino businsimi bulembedwe mulugwalo lwa Isaya 65:20-22 bwaamba nzi kulindinywe? (b) Muunzila nzi mazuba eesu mbwaayakuba “mbuli mazuba aamusamu”?

¹⁸ Bantu banji mazuba aano cilakonzya kubayumina kuyeeyela kuyakuba amaanda naa kuyakuba aamulimo mubotu uupa kukkutila. Mubweende oobu bubyaabi, banji balimvwa kuti balabeleka ciindi cilamfwu alimwi canguzu pele bagwasyigwa buyo asyoonto kakuli bantu bavwubide alimwi balyato mbabajana zintu zinji kapati. Amuyeeye buyo mbociyakuba ciindi businsimi oobu bwaakuzuzikizyigwa, ibusinsimi bwakuti: “Lino bayooyaka maanda akukala mulingao, bayoobyala myuunda yamisaansa akulya micelo yayo. Maanda ngebayaka taakooyookalwa umbi,  amicelo njibabyala tiikooyooligwa umbi pe, nkaambo mazuba aabantu bangu ayooba mbuli mazuba aamusamu, abantu mbensalide bayoongozya milimo yamaanza aabo.”—Is. 65:20-22.

¹⁹ Ino caamba nzi kwaamba kuti mazuba eesu ayakuba “mbuli mazuba aamusamu”? Ikuti mwaima ansi aacisamu cimwi cipati, sena mulagambwa ciindi nomuyeeya ciindi cilamfwu ncocakkala cisamu eeco—andiza bamasyaanyookulu kabatanazyalwa? Cilakonzya kumwiinda myaka cisamu eeco ikuti mwazumanana kamutalondekede, pele calo inga cazumanana kubako kwamyaka minji nywebo kamufwide kale. Eelo kaka cilakkomanisya kuzyiba kuti Jehova watusyomezya kuti mu Paradaiso tuyakupona kwaciindi cilamfwu alimwi muluumuno! (Int. 37:11, 29) Ciindi ciyakusika masamu mapati aakkala myaka minji naayakuboneka kuti akkala buyo kwaciindi cisyoonto akumana mbuli bwizu, pele swebo tuyakuzumanana kupona kukabe kutamani!

20. Mbuti balelwa ba Bwami basyomeka mbobayakukkomana abuumi bulondokede?

²⁰ Buumi bulondokede. Mazuba aano, kuciswa alimwi alufwu zilabalwana bantu boonse nyika yoonse mbwiizulwa. Munzila imwi inga twaamba kuti, toonse tulicisidwe—tuciswa bulwazi bujaya, nkokuti cibi. Cintu cilikke cikonzya kutuponya ncituuzyo cacinunuzyo ca Kristo. (Lom. 3:23; 6:23) Mu Bulelo bwa Myaka Iili Cuulu, Jesu abasikulelanyina bayakupa kuti bantu bagwasyigwe ampindu yacinunuzyo, buce-buce bayakugwisya tumpenda twacibi toonse mubantu basyomeka. Businsimi bwa Isaya buyakuzuzikizyigwa cakumaninina, businsimi bwakuti: “Takukooyooba naba omwe akati kabantu banyika uuamba kuti, Ndaciswa. Bantu boonse bakede mulinjiyo bayoolekelelwa milandu yabo.” (Is. 33:24) Amuyeeye buyo ciindi nokutakabi muntu moofwu, musinke matwi, naa mulema. (Amubale Isaya 35:5, 6.) Taakwe bulwazi ibuyakumwaalila kumana Jesu—bube bwakuciswa mubili, naa mumizeezo. Balelwa ba Bwami basyomeka bayakukkomana abuumi bulondokede!

21. Ino lufwu luyakucitwa buti, alimwi nkaambo nzi cisyomezyo eeci ncocimuumbulizya?

²¹ Mbuti kujatikizya cintu citakonzyi kweelebwa—ilufwu? Lufwu ‘ngosinkondo wamamanino,’ sinkondo walo uujisi nguzu kwiinda bantu boonse. (1 Ko. 15:26) Pele sena lufwu ngusinkondo mupati kuli Jehova? Amubone ncaakaamba Isaya naakati: “Lufu walumenenena mane kukabe kutamani. Mwami Jehova uyoosindula misozi kumasyu oonse.” (Is. 25:8) Sena mulakonzya kweezyeezya ciindi eeco? Takukabi limbi madilwe, takukabi zyuumbwe, takukabi limbi kulila kwabuumba! Mukwiindana—kuyakuba kulila kwakukkomana ciindi Jehova aakuzuzikizya cisyomezyo cakwe cibotu cakubusya bafwide! (Amubale Isaya 26:19.) Kumamanino, kucisa koonse ikuletwa alufwu kuyakumana.

22. Ncinzi ciyakucitika Bwami bwa Mesiya bwaakumanizya kuzuzikizya kuyanda kwa Leza anyika?

²² Kuzikusika kumamanino aamyaka iili Cuulu, Bwami bunakuli bwamanizya kucita kuyanda kwa Leza anyika, mpoonya Kristo uyakupilusya bweendelezi kuli Bausyi. (1 Ko. 15:25-28) Bantu kabalondokede, banakuli balibambila kusunkwa a Saatani ciindi camamanino ciindi Saatani aakugwisyigwa mumulindi  uutagoli mwalo mwaakali muciimo calufwu. Kumamanino, Kristo uyakwiipwayaula inzoka mbyaabi abasikutobela banjiyo. (Matl. 3:15; Ciy. 20:3, 7-10) Pele aabo boonse ibamuyanda Jehova cakusyomeka bayakuba abuumi bubotu. Ambweni taakwe majwi aakonzya kucaamba munzila iinda kubota kunze aamajwi aajanika mu Bbaibbele. Ncisyomezyo cakuti bantu basyomeka bayakuba “alwaanguluko lwabulemu bwabana ba Leza.”—Lom. 8:21.

23, 24. (a) Nkaambo nzi kuzuzikizyigwa kwazisyomezyo zya Leza ncokusinizyide? (b) Ino mukanzide kucita nzi?

²³ Zisyomezyo eezyi tazili zyakuyeeyela, ikulombozya naa kulota buyo pe. Zisyomezyo zya Jehova ziyakuzuzikizyigwa ncobeni! Ino nkaambo nzi? Mutaalubi majwi aa Jesu ngotwakabandika mucibalo cakusaanguna mubbuku eeli. Wakayiisya basikumutobela kupaila kuli Jehova kuti: “Abuboole Bwami bwako. Akucitwe kuyanda kwako ansi aano mbubonya mbuli kujulu.” (Mt. 6:9, 10) Bwami bwa Leza tabuli bwakuyeeyela buyo pe. Mbwancobeni! Bulalela kujulu lino. Kwamyaka iili 100 lino, bwazuzikizya zisyomezyo zya Jehova munzila nzyotukonzya kubona mumbungano ya Banakristo. Aboobo, tulakonzya kuba masimpe kuti zyoonse zisyomezyo zya Jehova ziyakuzuzikizyigwa ciindi Bwami bwaakuboola anyika ikutondezya nguzu nzyobujisi!

²⁴ Tulizyi kuti Bwami bwa Leza buyakuboola. Tulizyi kuti kufwumbwa ncaamba Jehova ciyakuzuzikizyigwa. Ino nkaambo nzi? Nkaambo BWAMI BWA LEZA BULALELA LINO! Mubuzyo umwi aumwi wesu ngwaelede kulibuzya ngwakuti: ‘Sena ndeendelezyegwa a Bwami? Atucite cili coonse ncotukonzya lino kutegwa tupone mbuli balelwa ba Bwami oobo, kutegwa tukagwasyigwe abweendelezi bulondokede, alimwi bululeme kukabe kutamani!