1, 2. (a) Ndi ngani nga zwiṅwe zwifhinga zwi tshi nga konḓa u dzhia Paradiso i ya vhukuma? (b) Ndi mini zwine zwa nga ri thusa u khwaṱhisa lutendo lwashu kha mafulufhedziso a Mudzimu?

 MUṄWE wahashu wa tshinnani a fulufhedzeaho u swika muṱanganoni o neta vhukuma nga murahu ha u tsikeledzea ḓuvha ḽoṱhe mushumoni. Ho ngo farwa zwavhuḓi nga mutholi wawe ane konḓisa zwithu, o tsikeledzea nga khaedu dza u ṱhogomela muṱa wawe nahone u khou vhilaedziswa nga vhulwadze vhune ha khou tambudza mufumakadzi wawe. Musi muzika wa u vula muṱangano u tshi thoma, u a femuluwa nahone o takala ngauri u vhukati ha vhahawe vha tshinnani na vha tshisadzini Holoni ya Muvhuso. Lwonolwo luimbo lu amba nga ha fulufhelo ḽa vhutshilo Paradisoni nahone maipfi alwo a mu ṱuṱuwedza uri a vhone ḽeneḽo fulufhelo nga iṱo ḽa muhumbulo na u ḓivhona e henefho. Holu luimbo u a lu funa nahone musi a tshi lu imba e na muṱa wawe, fulufhelo ḽa vhumatshelo ḽi a mu khuthadza.

² Naa no no vhuya na ḓipfa nga yeneyo nḓila? Vhunzhi hashu ro no ḓipfa nga u ralo. Naho zwo ralo, ngoho ndi ya uri vhutshilo kha ano maitele a zwithu vhu nga ita uri zwi ri konḓele u vhona Paradiso ine ya khou ḓa i ya vhukuma. Hezwi ndi “zwifhinga zwi lemelaho zwi konḓaho u sedzana nazwo” nahone shango ḽine ra khou tshila khaḽo a si paradiso. (2 Tim. 3:1) Ndi mini zwine zwa nga ri thusa uri ri dzhie fulufhelo ḽashu ḽi ḽa vhukuma? Ri zwi ḓivha hani uri hu si kale Muvhuso wa Mudzimu u ḓo vhusa vhathu vhoṱhe? Kha ri ṱolisise vhuporofita ha Yehova vhu si gathi he vhathu vhawe vha vhu vhona vhu tshi khunyelela tshifhingani tsho fhiraho. Nga murahu, ri ḓo vusulusa nḓila ine honoho vhuporofita na vhu fanaho naho, ha khou khunyelela ngayo nga nḓila i nyanyulaho zwa zwino. Mafheleloni, musi lutendo lwashu lwo no khwaṱhiswa, ri ḓo livhisa ṱhogomelo kha zwine vhuporofita ho raloho ha amba zwone nga vhumatshelo hashu.

3. Ndi fulufhedziso ḽifhio ḽe ḽa khuthadza Vhayuda vhe vha vha vhe vhuthubwani ngei Babele?

³ Edzani u humbula nḓila ye vhutshilo ha Vhayuda ha vha vhu ngayo musi vhe vhuthubwani ngei Babele ḓanani ḽa vhurathi ḽa miṅwaha B.C.E. Vhunzhi havho vho alutshela henefho vhuthubwani, u fana na vhabebi vhavho nahone vhutshilo ho vha vhu tshi khou konḓa. Vhababele vho vha holedza nga nṱhani ha u vha havho na lutendo kha Yehova. (Ps. 137:1-3) Mahumini a miṅwaha, Vhayuda vha fulufhedzeaho vho dzula vho farelela kha fulufhelo ḽavhuḓi ḽa uri  Yehova u ḓo vhuyedzedza vhathu vhawe shangoni ḽa havho. Yehova o vha vhudza uri vha ḓo tshila zwavhuḓi musi vho no vhuyelela shangoni ḽa havho. O ita na u vhambedza shango ḽa Vhayuda ḽo vusuluswaho na tsimu ya Edeni—paradiso! (Vhalani Yesaya 51:3.) Zwi khagala uri eneo mafulufhedziso o vha o itelwa u khwaṱhisedza vhathu vha Mudzimu, u itela uri vha si timatime mbiluni dzavho. Nga nḓila-ḓe? Ṱhogomelani vhuṅwe vhuporofita ho livhaho.

4. Yehova o khwaṱhisedza hani Vhayuda uri u ḓo vha tsireledza shangohaya ḽavho?

⁴ U tsireledzea. Vhenevho vhathubwa vho vha vha sa ḓo vhuyelela paradisoni ya vhukuma, fhedzi vho vha vha tshi ḓo vhuyelela shangoni ḽi re kule ḽe ha fhela miṅwaha ya 70 ḽi shubi, shango ḽe vhunzhi havho vha vha vha sa athu vhuya vha ḽi vhona. Ndau dzo vha dzo anda mashangoni o bulwaho Bivhilini zwenezwo kale, khathihi na dziphele, dzinngwe, na zwiṅwe zwivhanda. Munna-muḓi o vha a tshi nga kha ḓi ḓivhudzisa uri, ‘Ndi ḓo tsireledza hani mufumakadzi wanga na vhana’nga? Hu pfi mini nga nngu na kholomo dzanga—ndi ḓo zwi tsireledza hani?’ Zwo vha zwi zwa nzulele uri muthu a vhilaedziswe nga zwenezwo zwithu. Humbulani nga fulufhedziso ḽa Mudzimu ḽi re kha Yesaya 11:6-9 na nḓila ye ḽa vha ḽi tshi khuthadza ngayo. (Vhalani.) Nga eneo maipfi avhuḓi a vhurendi, Yehova o khwaṱhisedza vhathubwa uri u ḓo vha tsireledza kathihi na zwifuwo zwavho. Ndau i ḓo fula muhwane zwi tshi ambela uri a i nga ḓo ḽa kholomo dza Vhayuda. Vhane vha fulufhedzea a vha nga ofhi zwenezwo zwivhanda. Yehova o fulufhedzisa uri vhathu vhawe vha ḓo vha vho tsireledzea shangoni ḽo vusuluswaho ḽa Yuda, na musi vhe sogani khathihi na maḓakani.—Hesek. 34:25.

5. Ndi vhuporofita vhufhio he ha thusa vhathu vha bvaho vhuthubwani uri vha vhe na vhungoho ha uri Yehova u ḓo vha ṋea zwishaiwa zwavho nga vhuḓalo?

⁵ Muḓalo wa zwithu. Hu nga takuwa dziṅwe mbilaelo. ‘Naa ndi ḓo kona u fusha muṱa wanga nga zwiḽiwa musi ndi kha shangohaya ḽo vusuluswaho? Ri ḓo dzula ngafhi? Ndi ḓo wana mushumo, nahone u ḓo vha wavhuḓi u fhira we nda vha ndi tshi u ita musi ndi ngei vhuthubwani ndo tsikeledzwa nga vhathu vhe vha ri kunda?’ Yehova o dovha a fhindula na dzenedzo mbudziso, a tshi shumisa vhuporofita ho hevhedzwaho. Yehova o fulufhedzisa uri vhathu vhawe vha thetshelesaho vho vha vha tshi ḓo wana mvula nga tshifhinga tsho teaho; zwenezwo zwo vha zwi tshi ḓo ita uri mavu a bveledze vhuswa vhu ‘fushaho na vhu khwaṱhisaho.’ (Yes. 30:23) Musi zwi tshi ḓa kha vhudzulo na mushumo u re na ndivho, Yehova o fulufhedzisa vhathu vhawe zwi tevhelaho: “Vha ḓo fhaṱa dzinnḓu vha dzula khadzo; vha ḓo sima miṱokola vha ḽa mitshelo yayo. A vha nga fhaṱi ha dzula muṅwe; a vha nga simi ha ḽa muṅwe.” (Yes. 65:21, 22) Vhukuma, vho vha vha tshi ḓo tshila nga nḓila yavhuḓi u fhira musi vhe ngei vhuthubwani ha Babele ḽa vhuhedeni. Fhedzi vho vha vha tshi ḓo ita mini nga thaidzo dzavho khulwane—dze dza ita uri vha fheleledze vho ya vhuthubwani?

6. Vhathu vha Mudzimu vho vha vhe na vhulwadze ha mufuda-ḓe u bva kale nahone ndi mini zwe Yehova a zwi khwaṱhisedza vha bvaho vhuthubwani?

⁶ Vhushaka havhuḓi na Yehova. Lwa tshifhinga tshilapfu vhathu vha Mudzimu vha sa athu iswa vhuthubwani, vho vha vha tshi khou ḓi lwala nga lwa muya. Yehova o amba zwi tevhelaho a tshi shumisa muporofita Yesaya, o ri: “Ṱhóho yoṱhe yo no vhaisala, na mbilu yoṱhe yo no hoṱefhala.” (Yes. 1:5) Vho vha vho pofula na u dzinga nḓevhe  nga lwa muya, ngauri vho dzulela u thivha nḓevhe dzavho uri vha si thetshelese nyeletshedzo ya Yehova nahone vha vala maṱo avho uri vha si vhone tshedza tshine a khou vha ṱavhisela tshone. (Yes. 6:10; Yer. 5:21; Hesek. 12:2) Arali vho vha vha tshee na dzenedzo thaidzo musi vha tshi bva vhuthubwani, vho vha vha tshi ḓo tsireledzea hani? Naa vho vha vha sa ḓo dovha vha xelelwa nga vhushaka havho na Yehova? Yehova o vha ṋea fulufhedziso ḽi khwaṱhisaho, o ri: “Misi iyo mafhungo a bugu a ḓo pfiwa nga madzinganḓevhe; maṱo a mabofu a ḓo bva swiswini na kha vhutswu, a vhona.” (Yes. 29:18) Vhukuma, Yehova o vha a tshi ḓo ilafha lwa muya vhathu vhawe vho ḓisolaho na vho rembuluwaho. O vha a tshi ḓo vha ṋea vhulivhisi vhu ṋeaho vhutshilo tenda vha bvela phanḓa vha tshi thetshelesa.

7. Mafulufhedziso e Mudzimu a a fulufhedzisa vhathu vhawe vhe vha vha vhe vhuthubwani o ḓadzea nga nḓila-ḓe, nahone ndi ngani honoho u ḓadzea hu tshi ri khwaṱhisa lutendo?

⁷ Naa Yehova o ita zwe a fulufhedzisa? Phindulo i wanala kha mafhungo a ḓivhazwakale. Vhayuda vhe vha vhuyelela shangohaya ḽavho vho tsireledzwa, vha wana muḓalo wa zwithu, nahone vha vha na vhushaka havhuḓi na Yehova. Sa tsumbo, Yehova o vha tsireledza kha tshaka dze vha vha vho ṋekana masakha nadzo, dze dza vha dzi khulwane nahone dzi na maanḓa u vha fhira. Zwivhanda a zwo ngo ḽa zwifuwo zwa Vhayuda. Ndi ngoho uri vhenevho Vhayuda vho vhona u ḓadzea huṱuku ha vhuporofita ha paradiso he vhanna vha ngaho Yesaya, Yeremia, na Hesekiele vha vhu ṅwala—fhedzi u ḓadzea he vhathu vha Mudzimu vha hu vhona ho vha hu nyanyulaho nahone ndi he vha vha vha tshi hu ṱoḓa nga tshenetsho tshifhinga. Lutendo lwashu lu ḓo khwaṱha musi ri tshi elekanya nga ha zwe Yehova a zwi itela vhathu vhawe tshifhingani tsho fhiraho. Arali vhathu vho takadzwa nga u ḓadzea huṱuku ha honoho vhuporofita, hu pfi mini nga u ḓadzea ho fhelelaho? Ṱhogomelani zwe Yehova a ri itela zwone ṋamusi.

8. Ndi “shango” ḽa mufuda-ḓe ḽine vhathu vha Mudzimu vha ḓiphina ngaḽo ṋamusi?

⁸ Vhathu vha Yehova ṋamusi a si lushaka lwa vhukuma, nahone a vha dzuli shangoni ḽithihi. Nṱhani hazwo, Vhakriste vho ḓodzwaho ndi lushaka lwa muya, “Isiraele wa Mudzimu.” (Vhagal. 6:16) Khonani dzavho vha “dziṅwe nngu” vha dzula navho kha “shango” ḽa lwa muya, ḽine ḽa vha matshilele a u gwadamela Yehova Mudzimu nga vhuthihi. Honoho vhurabeli ndi nḓila ine vha tshila ngayo. (Yoh. 10:16; Yes. 66:8) Yehova o ri ṋea “shango” ḽa mufuda-ḓe? Paradiso ya lwa muya. Henefha mafulufhedziso a Mudzimu malugana na vhuimo vhu fanaho na ha Edeni a khunyelela lwa muya nga nḓila i mangadzaho. Ṱhogomelani dziṅwe tsumbo.

9, 10. (a) Vhuporofita vhu re kha Yesaya 11:6-9 vhu khou khunyelela hani ṋamusi? (b) Ndi vhuṱanzi vhufhio vhune ha sumbedza uri vhathu vha Mudzimu vha na mulalo?

⁹ U tsireledzea. Vhuporofita vhu re kha Yesaya 11:6-9 vhu amba nga ha vhuimo vhu takadzaho: vhathu na zwifuwo zwavho a vha tsha ḓo ofha phukha dza ḓaka na phukha dza ḓaka a dzi tsha ḓo vha ofha. Naa zwenezwo zwithu zwi khou khunyelela nga lwa muya ṋamusi? Ee! Kha ndimana 9, ri vhona uri ndi ngani dzenedzo phukha dzi sa ḓo vha na khombo kana u tshinyadza: “Ngauri shango ḽoṱhe ḽi ḓo ḓala u ḓivha Yehova, vhunga maḓi a tshi adzamedza lwanzhe.” Naa “u ḓivha Yehova” zwi shandula matshilele a phukha? Hai, ndi vhathu  vhane vha shandulwa nga u ḓivha Mudzimu wa Ṱaḓulu-ṱaḓulu na u guda u edzisa nḓila dzawe dza mulalo. Ndi ngazwo ṋamusi ri tshi nga kona u vhona u khunyelela ha honoho vhuporofita paradisoni yashu ya lwa muya. Nga fhasi ha vhuvhusi ha Muvhuso, vhatevheli vha Kristo vha khou guda u ṱutshela pfaneleo dza vhuhali, dza vhupuka nahone vha tshila vhe na mulalo na nyanḓano na vhahavho vha tshinnani na vha tshisadzini vha lwa muya.

¹⁰ Sa tsumbo, kha ino bugu ro haseledza nga ha mafhungo a u sa dzhia sia ha Vhukriste—u pfesesa hashu lwa Maṅwalo eneo mafhungo na u tovholwa he vhathu vha Mudzimu vha sedzana naho nga u sa dzhia sia. Naa a zwi takadzi uri kha ḽino shango ḽo ḓalaho vhuvemu, hu na “lushaka” luhulwane lwa vhathu vhane vha hana u shela mulenzhe kha vhuvemu naho vhu vhufhio, naho vha tshi shushedzwa uri vha ḓo vhulahwa? Honovhu ndi vhuṱanzi vhu swayeaho lungafhani ha uri vhavhusiwa vha Khosi ya Vhumessia vha khou ḓiphina nga mulalo u fanaho na we wa ṱaluswa nga Yesaya! Yesu o amba uri vhatevheli vhawe vha ḓo ḓivhiwa nga nḓila ine vha funana ngayo. (Yoh. 13:34, 35) Kristo u khou shumisa “mulanda a fulufhedzeaho na wa vhuṱali” a sa fheli mbilu, u funza Vhakriste vhoṱhe vha ngoho uri vha vhe na mulalo, lufuno, na vhulenda.—Mat. 24:45-47.

11, 12. Vhathu vho farwa nga nḓala ya mufuda-ḓe ṋamusi, fhedzi Yehova o ṱhogomela hani vhathu vhawe nga muḓalo wa zwiḽiwa?

¹¹ Muḓalo wa zwithu. Shango ḽi khou tambudzwa nga nḓala ya lwa muya. Bivhili yo ṋea tsevho ine ya ri: “Ḓivhani-ha, hu amba Muṋe wa vhoṱhe Yehova, hu ḓo ḓa maḓuvha, ane kha shango nda ḓo ruma nḓala, i sí nḓala ya vhuswa, ḽi sí ḓora ḽa maḓi; hu ḓo lilwa u pfa fhungo  ḽa Yehova.” (Amosi 8:11) Naa na vhadzulapo vha Muvhuso wa Mudzimu vho farwa nga yeneyi nḓala? Yehova o amba hu tshee nga phanḓa nga ha phambano ye ya vha i tshi ḓo vha hone vhukati ha vhathu vhawe na maswina awe, musi a tshi ri: “Ngangoho vhalanda vhanga vha ḓo ḽa, inwi ni tshi khou fa nga nḓala; vhalanda vhanga vha ḓo nwa, inwi ni tshi khou fa nga ḓora; vhalanda vhanga vha ḓo takala, inwi ni tshi khou shona.” (Yes. 65:13) Naa eneo maipfi no no a vhona a tshi khunyelela?

¹² Zwiḽiwa zwa muya zwine ra kanzwa ngazwo zwi nga mulambo une wa khou ṱanḓavhuwa na u tsela fhasi u tshi ya. Khandiso dzashu dzo thewaho Bivhilini—u katela na zwithu zwo rekhodiwaho na dzividio, miṱangano yashu na mabuthano, na zwithu zwine zwa vha kha Web site yashu—zwi wela kha muḓalo wa zwiḽiwa zwa muya zwine ra zwi wana kha ḽeneḽi shango ḽine ḽa khou sika nga nḓala ya lwa muya. (Hesek. 47:1-12; Yoele 3:18) Naa a ni takadzwi nga u vhona u khunyelela ha mafulufhedziso a Yehova a muḓalo wa zwithu vhutshiloni haṋu ha ḓuvha ḽiṅwe na ḽiṅwe? Naa ni ita vhungoho ha uri ni ḽa zwiḽiwa zwi re ṱafulani ya Yehova tshifhinga tshoṱhe?

13. No vhona hani u khunyelela ha fulufhedziso ḽa Yehova malugana na u bonyololwa ha maṱo a vho pofulaho na u thivhululwa ha nḓevhe dza vho dzingaho nḓevhe?

¹³ Mutakalo wa lwa muya. Vhunzhi ha vhathu ṋamusi vho pofula na u dzinga nḓevhe nga lwa muya. (2 Vhakor. 4:4) Naho zwo ralo, Kristo u khou fhodza vhuholefhali na malwadze shangoni ḽoṱhe. Naa no no vhona maṱo a muthu o pofulaho a tshi bonyololwa na nḓevhe dza muthu o dzingaho dzi tshi thivhululwa? Arali no no vhona vhathu vha tshi wana nḓivho yo teaho ya ngoho ya Ipfi ḽa Mudzimu, vha ṱutshela mazwifhi a zwa vhurereli e a vha pofudza na u vha dzingisa nḓevhe uri vha si pfesese ngoho, no no vhona fulufhedziso ḽi tevhelaho ḽi tshi khunyelela: “Misi iyo mafhungo a bugu a ḓo pfiwa nga madzinganḓevhe; maṱo a mabofu a ḓo bva swiswini na kha vhutswu, a vhona.” (Yes. 29:18) Shangoni ḽoṱhe, vhathu vha maḓana a zwigidi vha khou wana dzilafho ḽo raloho ḽa lwa muya ṅwaha muṅwe na muṅwe. Muthu muṅwe na muṅwe ane a ṱutshela Babele Ḽihulu nahone a ṱanganela na riṋe kha vhurabeli hashu paradisoni ya lwa muya, ndi vhuṱanzi ha uri Yehova u khou khunyeledza zwe a zwi fulufhedzisa!

14. Lutendo lwashu lu ḓo khwaṱha arali ra elekanya nga ha mini?

¹⁴ Ndima iṅwe na iṅwe ya ino bugu i na vhuṱanzi vhu re na maanḓa ha uri Kristo o ḓisa vhatevheli vhawe paradisoni ya lwa muya ya vhukuma kha tshino tshifhinga tsha vhufhelo. Kha ri dzule ri tshi elekanya nga ha nḓila nnzhi dzine ra khou fhaṱutshedzwa ngadzo kha yeneyo paradiso ṋamusi. Musi ri tshi ita nga u ralo, lutendo lwashu kha mafulufhedziso a Yehova malugana na vhumatshelo lu ḓo bvela phanḓa lu tshi khwaṱha.

15. Ndi ngani ri tshi nga vha na vhungoho ha uri ḽifhasi ḽi ḓo vha paradiso?

¹⁵ Ndivho ya Yehova u bva kale yo vha i ya u ita uri ḽifhasi ḽoṱhe ḽi vhe paradiso. O vhea Adamu na Eva tsimuni ya paradiso nahone a vha laedza uri vha ḓadze ḽifhasi nga vhana vhavho na u ṱhogomela zwivhumbiwa zwaḽo zwoṱhe. (Gen. 1:28) Nṱhani hazwo, Adamu na Eva vho vha mashandukwa u fana na Sathane nahone vha ḓisela vhana vhavho u sa fhelela, tshivhi na lufu. Fhedzi ndivho ya Mudzimu  a yo ngo vhuya ya shanduka. Zwine a zwi amba zwi a khunyelela nga ho fhelelaho tshifhinga tshoṱhe. (Vhalani Yesaya 55:10, 11.) Nga zwenezwo, ri nga vha na vhungoho ha uri vhaḓuhulu vha Adamu na Eva vha ḓo ḓadza ḽeneḽi ḽifhasi vha ḽi kunda, vha ṱhogomela nga lufuno tsiko ya Yehova kha shango ḽoṱhe ḽine ḽa ḓo vha ḽi paradiso. Nga tshenetsho tshifhinga, vhuporofita he u thomani ha vhudzwa Vhayuda vhe vha vha vhe vhuthubwani malugana na u tshila shangoni ḽi fanaho na paradiso, vhu ḓo khunyelela nga ho fhelelaho! Ṱhogomelani tsumbo dzi tevhelaho.

16. Bivhili i ṱalusa hani u tsireledzea hune ha ḓo vha hone paradisoni?

¹⁶ U tsireledzea. Maipfi avhuḓi a pfanyisedzo a takadzaho mbilu a re kha Yesaya 11:6-9, a ḓo fheleledza o khunyelela nga nḓila ya vhukuma. Vhanna, vhafumakadzi na vhana vha ḓo tsireledzea huṅwe na huṅwe hune vha ya hone kha ḽifhasi. A hu na tshivhumbiwa, hu nga vha muthu kana tshipuka, tshine tsha ḓo itela tshiṅwe khombo. Edzani u humbula tshifhinga tshine pulanete yoṱhe ya ḓo vha i haya haṋu, hune na ḓo kona u bambela milamboni, maishani na lwanzheni; hune na ḓo gonya dzithavha; na tendeleka midavhini no tsireledzea tshoṱhe. Musi ḽi tshi kovhela, ni nga si vhilaele. Maipfi a re kha Hesekiele 34:25 a ḓo khunyelela, zwine zwa ḓo dovha zwa ita uri zwi konadzee uri vhathu vha Mudzimu vha ‘dzule vho takala sogani, na u eḓela maṱakani.’

17. Ndi ngani ri tshi nga vha na vhungoho ha uri Yehova u ḓo fusha zwishaiwa zwashu nga vhuḓalo musi Muvhuso u tshi vhusa ḽifhasi ḽoṱhe?

¹⁷ Muḓalo wa zwithu. Vhonani nga iṱo ḽa muhumbulo tshifhinga tshine ha ḓo vha hu si tsheena vhushai, vhushayapfushi, nḓala kana tshumelo dza tshitshavha dza u thusa vha si na zwavho. Zwiḽiwa zwinzhi zwa muya zwine vhathu vha Mudzimu vha ḓiphina ngazwo ṋamusi, ndi vhuṱanzi ha uri Khosi ya Vhumessia i ḓo kanzwa vhavhusiwa vhayo kha masia oṱhe. Musi Yesu e kha ḽifhasi, o sumbedza nga nḓila ṱhukhu uri a nga ḓadzisa eneo mafulufhedziso, ngauri o kanzwa zwigidi zwa vhathu vha re na nḓala nga zwinkwa zwi si gathi na khovhe. (Mat. 14:17, 18; 15:34-36; Marko 8:19, 20) Musi Muvhuso wa Mudzimu u tshi vhusa ḽifhasi ḽoṱhe, vhuporofita vhu fanaho na honovhu, vhu ḓo khunyelela zwa vhukuma: “[U] ḓo nisela mavhele au mvula, na zwe wa zwi sima masimuni au. Na vhuswa vhu bvaho masimuni au vhu ḓo fusha ha khwaṱhisa. Misi iyo masambi au a ḓo fu̗la pfuloni yo aṱamaho.”—Yes. 30:23.

18, 19. (a) Vhuporofita ho ṅwalwaho kha Yesaya 65:20-22 vhu ni kwama hani? (b) Maḓuvha ashu “a ḓo nga maḓuvha a muri” nga muhumbulo ufhio?

¹⁸ Ṋamusi vhathu vhanzhi a vha vhuyi vha lora uri vha ḓo vha na nnḓu yavhuḓi kana mushumo u lambedzaho na u fushaho. Kha ḽino shango ḽivhi, vhathu vhanzhi vha fhedza tshifhinga tshinzhi vha tshi khou ita mushumo u konḓaho, fhedzi a vha wani malamba a eḓanaho vhone na miṱa yavho, ngeno vhapfumi na vhadzia-vhupangwa vhe vhone vhane vha kumba zwoṱhe. Edzani u humbula uri zwi ḓo vha zwi hani musi vhuporofita vhu tevhelaho vhu tshi khunyelela shangoni ḽoṱhe: “Vha ḓo fhaṱa dzinnḓu vha dzula khadzo’; vha ḓo sima miṱokola vha ḽa mitshelo yayo. A vha nga fhaṱi ha dzula muṅwe; a vha nga simi ha ḽa muṅwe; ngauri maḓuvha a vhathu vhanga a ḓo nga maḓuvha a muri; zwe vhanangiwa vhanga vha zwi wana nga mishumo yavho zwi ḓo ḽiwa nga vhone vhaṋe.”—Yes. 65:20-22.

¹⁹ Zwi amba mini uri maḓuvha ashu “a ḓo nga maḓuvha a muri”?  Musi no ima tsindeni ḽa muri muhulwane, naa a zwi ni mangadzi musi ni tshi humbula uri wonoyo muri wo no fhedza tshifhinga tshilapfu u tshi khou tshila—khamusi na vhomakhulukuku waṋu vha sa athu u bebwa? Ni nga kha ḓi zwi ṱhogomela uri arali ni kha ḓi vha kha vhuimo haṋu ha zwino ha u sa fhelela, wonoyo muri u nga kha ḓi bvela phanḓa u tshi tshila tshifhinga tshilapfu, inwi no no ḓi fa kale-kale. Ndi vhuthu vhuhulwane lungafhani vhune Yehova a khou ri sumbedza hone musi a tshi ri khwaṱhisedza uri Paradisoni ine ya khou ḓa, ri ḓo tshila tshifhinga tshilapfu nga mulalo! (Ps. 37:11, 29) Hu ḓo ḓa tshifhinga tshine na miri ye ya tshila tshifhinga tshilapfu kha riṋe ya vho ḓo nga hatsi vhune ha vha hone lwa tshifhinganyana nga murahu ha puta, ngeno riṋe ri tshi khou ḓi bvela phanḓa u tshila nga hu sa fheli!

20. Vhavhusiwa vha fulufhedzeaho vha Muvhuso vha ḓo ḓiphina hani nga mutakalo wo fhelelaho?

²⁰ Mutakalo wo fhelelaho. Vhulwadze na lufu zwi kwama muṅwe na muṅwe ṋamusi. Zwi re zwone ndi uri roṱhe ri a lwala—ro kavhiwa nga dwadze ḽi vhulayaho ḽine ḽa vhidzwa tshivhi. Dzilafho ḽithihi fhedzi ḽa ḽeneḽo dwadze ndi tshiṱhavhelo tsha Kristo tshi rengululaho. (Vharoma 3:23; 6:23) Tshifhingani tsha Vhuvhusi ha Miṅwaha ya Tshigidi, Yesu na vhane a ḓo vhusa navho, vha ḓo shumisa nga vhuḓalo zwivhuya zwa tshenetsho tshiṱhavhelo nahone vha fhelisa tshivhi kha vhathu vha fulufhedzeaho nga zwiṱuku nga zwiṱuku. Vhuporofita vhu tevhelaho ha Yesaya vhu ḓo khunyelela nga vhuḓalo: “Kha vho dzulaho fhano a huna ane a ḓo ri: Ndi a lwala; ngauri vhathu vha dzulaho fhano vho hangwelwa zwivhi.” (Yes. 33:24) Edzani u humbula nga ha tshifhinga tshine ha ḓo vha hu si na o pofulaho, o dzingaho nḓevhe kana o holefhalaho. (Vhalani Yesaya 35:5, 6.) A hu na vhulwadze vhune Yesu a ḓo kundelwa u vhu fhodza—hu sa londwi uri ndi ha muvhilini, muhumbuloni kana maḓipfeleni. Vhavhusiwa vha fulufhedzeaho vha Muvhuso vha ḓo ḓiphina nga mutakalo wo fhelelaho!

21. Hu ḓo itea mini nga lufu, nahone ndi ngani ḽeneḽo fulufhelo ḽi tshi ni khuthadza?

²¹ Naho zwo ralo, hu pfi mini nga mvelelo dzo ḓoweleaho dza vhulwadze, vhune ha vha mvelelo dzi sa iledzei dza tshivhi—lufu? Ḽeneḽo ndi ‘swina ḽashu ḽa u fhedza,’ ḽine vhathu vhoṱhe vha songo fhelelaho vha si vhe na maanḓa a u ḽi kunda. (1 Vhakor. 15:26) Fhedzi naa Yehova u a tshuwiswa nga lufu? Ṱhogomelani zwe Yesaya a zwi amba hu tshee nga phanḓa: “Lufu u ḓo lu lozwa tshoṱhe; Muṋe wa vhoṱhe Yehova u ḓo fhuluṱa maṱodzi kha zwoṱhe zwifhaṱuwo.” (Yes. 25:8) Edzani u humbula ni tshi khou tshila nga tshenetsho tshifhinga! Hu si tsheena dzimbulungo, mavhiḓa na miṱodzi ya u pfa vhuṱungu! Nṱhani ha zwenezwo, vhathu vha ḓo tsengisa miṱodzi ya dakalo musi Yehova a tshi khunyeledza fulufhedziso ḽawe ḽi nyanyulaho ḽa u vusa vhafu! (Vhalani Yesaya 26:19.) Mafheleloni vhuṱungu vhunzhi ho bveledzwaho nga lufu vhu ḓo fhola.

22. Hu ḓo itea mini musi Muvhuso wa Vhumessia wo no khunyeledza u ita zwi funwaho nga Mudzimu kha ḽifhasi?

²² Musi Miṅwaha ya Tshigidi i tshi fhela, Muvhuso u ḓo vha wo no khunyeledza zwi funwaho nga Mudzimu kha ḽifhasi nahone Kristo u ḓo ṋekedza Khotsi awe vhuvhusi. (1 Vhakor. 15:25-28) Samusi vhathu vha tshi ḓo vha vho fhelela, vha ḓo vha vho lugela u sedzana na u lingwa lwa u fhedza musi Sathane a tshi bviswa mugodini we  khawo a vha a sa koni u ita tshithu. Nga murahu ha zwenezwo, Kristo u ḓo fhelisa tshoṱhe ḽeneḽo ḽiṋowa ḽivhi khathihi na vhatikedzi vhaḽo vhoṱhe. (Gen. 3:15; Nzumb. 20:3, 7-10) Fhedzi vhoṱhe vhane vha funa Yehova vha ḓo vha na tshilavhelelwa tshavhuḓi. Khamusi a hu na maipfi ane a nga zwi ṱalusa zwavhuḓi u fhira ane a wanala Bivhilini. Ndi fulufhedziso ḽa uri vhane vha fulufhedzea vha ḓo ṋewa “vhugala ha vhana vha Mudzimu vho vhofholowaho.”—Vharoma 8:21.

23, 24. (a) Ndi ngani zwi sa timatimisi uri mafulufhedziso a Mudzimu a ḓo khunyelela? (b) No ḓiimisela u ita mini?

²³ Eneo mafulufhedziso a si a mahandana, a si zwine ra sokou zwi tama kana miloro zwayo. A zwi timatimisi uri mafulufhedziso a Yehova a ḓo khunyelela! Ndi ngani? Humbulani maipfi a Yesu e ra a haseledza kha ndima ya u thoma ya yeneyi bugu. O gudisa vhatevheli vhawe uri musi vha tshi rabela Yehova vha ri: “Muvhuso wau nga u ḓe. Zwine wa funa nga zwi itwe fhano kha ḽifhasi vhunga zwi tshi itwa ngei ṱaḓulu.” (Mat. 6:9, 10) Muvhuso wa Mudzimu a si tshithu tshe muṅwe muthu a sokou tshi humbula. Ndi wa vhukuma! U khou vhusa ṱaḓulu zwino. Wo no fhedza miṅwaha ya ḓana u tshi khou khunyeledza mafulufhedziso a Yehova nga nḓila dzine ra kona u dzi vhona zwavhuḓi tshivhidzoni tsha Vhukriste. Nga zwenezwo-ha, ri nga vha na vhungoho ha uri mafulufhedziso oṱhe a Yehova a ḓo khunyelela musi Muvhuso wa Mudzimu u tshi ḓa u vhusa nga vhuḓalo kha ḽifhasi!

²⁴ Ri a zwi ḓivha uri Muvhuso wa Mudzimu u ḓo ḓa. Hafhu ri a zwi ḓivha na uri fulufhedziso ḽiṅwe na ḽiṅwe ḽa Yehova ḽi ḓo khunyelela. Ndi ngani? Nga nṱhani ha uri MUVHUSO WA MUDZIMU U A VHUSA! Muṅwe na muṅwe washu a nga ḓivhudzisa uri, ‘Naa ndi khou vhuswa nga wonoyo Muvhuso?’ Kha ri ite zwoṱhe zwi re maanḓani ashu u tshila sa vhavhusiwa vha fulufhedzeaho vha wonoyo Muvhuso zwino, uri ri kone u vhuyelwa nga vhuvhusi hawo ho fhelelaho na ho lugaho lwa tshoṱhe!