1, 2. (a) Xeeni okathi mukina vanikhala aya voovila okupali wira yooleiherya ya eParayiisu ekeekhai? (b) Exeeni ennikhaliherya olipiha waaroromela wahu anatiri a Muluku?

MUNNA mmosa oororomeleya onniphiya omuthukumanoni, ookhulumuwa mwaha wa muteko onivara awe. Owo onnilavuliwa moohiloka ni patarau awe, onnixankela moota wookhapelela emusi awe, ni onnixankiheya-tho ni oretta wa amwaarawe. Okathi oniipiwa aya nsipo noopacerya, owo onniittha iphumu mootteeliwa murima mwaha wookhala Empa ya Omwene vamosa ni anna ni arokora omunepani. Nsipo nlo nnilavula voohimya sa ekumi mParayiisu, nto masu a nsipo nlo anitumererya mutthu wuupuwelaka oryeene mParayiisu. Nsipo nla ninnimusivela okhuma khalai, ni okathi oniipa awe vamosa ni emusi awe, nlipelelo nlo ninnisareya vamurimani vawe nnaamwi oryeene ooxankiheya.

² Yootoko wookhumelelani etthu ntoko eyo? Anamunceene a hiyo yootoko waakhumelela. Tthiri olumwenku ola onikhala ahu onnimwiiriha mutthu woonaka okhala voovila omoona Parayiisu ntoko etthu yeekeekhai. Tthiri ala “mahiku òxanka” tivonto olumwenku onikhala ahu khoreere ovirikana ni eParayiisu. (2 Tim. 3:1) Exeeni enrowa onikhaliherya woonaka yoolipelela eyo okhala yeekeekhai? Ninsuwela sai wira voohipisa Omwene wa Muluku onrowa waalamulela apinaatamu? Nrowe nithokorerye iprofesia vakhaani sa Yehova seiyo atthu awe soonale aya siiraneyaka khalai. Nuumala-vo ninrowa woona moota iprofesia iyo ni sikina sinrowa aya wiiraneya voohipisa-va. Wuukiseryani nuumala olipiha nroromelo nahu, ninrowa othokorerya moota iprofesia iyo sirina aya yootaphulela yuulupale wa okumi ahu wa muhoolo.

3. Yoolaiherya xeeni yaaphwanyinhe omaaleleya aYuda yaari weepotthani oBabilonia?

³ Nkuupuwelani moota aYuda saakhala aya aryeene wepotthani oBabilonia, eseekulu ya neethanu na mosa AEC. Anamunceene yaayariwe weepotthani, nave ntoko siireya aya ni anamuyari aya, okhala weepotthani waari wooxankiha. Atthu a oBabilonia yanaatheya aYuda mwaha wa omwaamini waya Yehova. (Esal. 137:1-3) Mwa iyaakha miloko sinceene, aYuda oororomeleya yanuupuwela yoolaiherya yoowi Yehova aarowa waathukumanya atthu awe elapo aya. Yehova aahihimya wira itthu saarowa okhala sooreera mulaponi mwaya. Maana Yehova aahilikanyiha elapo ya oYuda ni ejardim  ya wEdeni, niire so, eParayiisu! (Mmusome Yesaya 51:3.) Soolaiherya iye saari sowiiweya saana tivonto sahaana waalipiherya atthu a Muluku ni omala-maliha mukhino-khino woonasa wene waarina aya. Moota xeeni? Nwehe iprofesia iya saahimmwale.

4. Moota xeeni Yehova aaroromelinhe awe aYuda wira yaarowa okhalaka ni murettele yatthikela elapo aya?

⁴ Omaaleleya ni ohoova. Atthu ale, khiyaarowa otthikela mparayiisu, masi yaarowa elapo yoorakamela yanyaanyiwe khuvira iyaakha 70, anamunceene khiyaatonko woona. Okathi ole, elapo ntoko ele saanikhala inama soowali ntoko akharamu, miici, ahavara, ni inama sikina. Nto mulopwana oothela owehasa wene aniikoha oriki: ‘Kinrowa waakhapelela sai amwaaraka ni anaaka elapo ntoko eyo? Kinrowa owerya sai waakiherya ipwittipwitthi ni inyompe saka’? Tthiri makoho awo yaari ookhalela. Vano muupuwele yoolaiherya eri va Yesaya 11:6-9 ni moone moota masu awo yaaryaaya oohakalaliha. (Mmusome.) Orumeelaka masu ala ooreerela ni oovara murima, Yehova aahaaroromeliha atthu ale wira inama saya khisaarowa okhuuriwa. Kharamu aarowa olyaaka malaxi okhala wira khaarowa okhuuraka inyompe sa aYuda. Atthu ale oororomeleya, khiyaatthuneya woova inama iye soowali. Yehova aahilaiherya wira atthu awe yaarowa omaaleleya ni ohoova nuumala otthikela elapo aya oYuda, hata mothakoni wala mutakhwani.​—Ezek. 34:25.

5. Iprofesia xeeni saakhalihenrye aYuda oororomela wira Yehova aarowa waavaha khula etthu yaarowa waathowa?

⁵ Yoolya yowaatta. Muxankiho mukina woonasa wene waakhumelenle tuula: ‘Kiireke kinoowerya olyiha etthoko aka elapo eyo? Ninrowa okhalaka vai? Ninrowa ovaraka muteko xeeni, nto niireke okumi ahu onrowa okhala wooloka ovikana ola orina ahu weepotthani oneettihiwa ahu ni atthu anivanre’? Orumeelaka masu a iprofesia iye, Yehova aahaakhula-tho makoho awo. Yehova aahaaleiherya atthu awe wira amwaarupihela epula yeeyo yaarowa wiiriha etthaya wiimiha “solya sinjene”. (Yes. 30:23) Voohimya sa mapuro ookhala ni muteko woovara, Yehova aahaalaiherya atthu awe wira: “Atthu awo anrowa oteka ipa saya, ekhaleke memmo, anrowa ophatteya miri s’evidera, elyeke mihokorokho saya. Khanrowa oteka ipa saya, vano akina ekhaleke-mo khanrowa ophatteya miri saya, vano akina elyeke mihokorokho sene”. (Yes. 65:21, 22) Aayo, mwa inamuna sinceene, ekumi ya atthu ale yaarowa okhala yoolokexa, ovikana ele yaarina aya weepotthani oBabilonia. Nto sai voohimya sa muxankiho aya muulupale yoole waawiirinhe okuxiwa aroihiwaka weepotthani?

6. Oretta xeeni waarina atthu a Muluku khalai, nto yoolaiherya xeeni Yehova aavanhe awe ale yaatthikela elapo aya?

⁶ Olooliwa womunepani. Khalaixa ahinatthi oroihiwa weepotthani, atthu a Muluku yaahiphwanya oretta wa omunepani. Yehova aahimuruma profeta awe Yesaya waaleela atthu ale wira: “Muru anyu wosareya makhwatta, mirima sanyu sohononeya”. (Yes. 1:5) Mwa mpantta wa omunepani, atthu ale khiyaiwa, khiyoona, okhala wira yaahittiya maaru aya wira ahiiweke miruku sa Yehova, nto yahiwala maitho aya, wira ahooneke okathi Yehova aamwaleela awe ephiro. (Yes. 6:10; Yer. 5:21; Ezek. 12:2) Vaakhanle wira oretta owo womunepani wahaaphwanya atthu ale yaatthikenle elapo aya, yaarowa okhala sai? Niireke khiyaarowa-tho opweteiwa wataana waya ni Yehova? Nto masu a Yehova aaleihenrye awe, yaahaalipiha ori ki: “Okathi owo, alipa-òttiyela màru animwiwa molumo a mulivuruni, maitho a àlipa-òhona anotthukuwa, ekhumaka moripa ni mwepiphini”. (Yes. 29:18) Aayo, Yehova aarowa waaloola omunepani atthu yaale yaattharunwe itampi saya. Okathi waarowa aya okhala atthu oowoona, oowiiwa, ni oowiiwelela; Yehova aarowa waavahaka malakiheryo yaarowa omwaleela ekumi aya.

7. Anatiri a Yehova voohimya sa atthu awe yaakhwanenle sai, nto moota xeeni waakhwanela waya onlipiha aya nroromelo nahu?

⁷ Niireke Yehova ahaakhwaniherya yoolaiherya awe ele? Waakhuliwa wa nikoho nla, oniphwanyaneya mwa ele elempwale voohimya sa aYuda ale. Atthu ale yaatthikenle elapo aya, yaahireelihiwa khukhalana murettele, yoolya, ni olooliwa wa omunepani. Mwa ntakiheryo, Yehova aahaakhapelela wira ahitupheliwe ni maloko yaattamanne aya, yaawo yaari ootupa ni oowaatta atthu waavikana aYuda. Inama soowali khisaakhurale inama sa aYuda. Tthiri aYuda ale, yaahoona wiiraneya wa vakhaani wa iprofesia voohimya sa eparayiisu, yaalempwale ni Yesaya, Yeremiya, ni Ezekiyeli; nto wiiraneya wa iprofesia iye waahikumiherya ohakalala waatthuneya okathi ole. Okathi onuupuwela ahu ele Yehova aawiirinhe awe atthu awe khalai, nroromelo nahu ninnilipa. Akhala wira waakhwanela waya woopacerya waari woohakalaliha, sai voohimya sa waakhwanela wuulupale waarowa okhala sai? Nrowe nithokorerye ele Yehova epanke awe mahiku ahu ala.

8. Muthinto xeeni wa “elapo” evahiwe aya atthu a Muluku olelo-va?

⁸ Atthu a Yehova mahiku ala, khahiyo atthu a nloko nimosa paahi, wala khanikhala elapo emosa paahi otheene aya. Tthiri maKristau oowoottihiwa aniirela mpantta nloko nimosa na omunepani, nniireliwa ‘Isarayeli a Muluku’. (aGal. 6:16) Apatthani aya ale a ipwittipwitthi sikina”, anikhala vamosa “elapo” ya omunepani, niire so, marehereryo a muteko, onimukokhorela aya Yehova Muluku mowiiraana. Okokhorela iwo, onihela muhina okumi aya wotheene. (Yoh. 10:16; Yes. 66:8) Masi enamuna xeeni ya “elapo” Yehova onivanha awe? Eyo ti eparayiisu ya omunepani. Nto yoolaiherya ya Muluku ya elapo enilikana ni wEdeni ennooneya yaakhwanelaka momunepani. Nwehe matakiheryo ala anittharelana.

9, 10. (a) Moota xeeni eprofesia ya Yesaya11:6-9, enaakhwanela aya mahiku ahu ala? (b) Etthu xeeni enooniherya wira eriyari ya atthu a Muluku wookhala murettele?

⁹ Omaaleleya ni ohoova. Eprofesia elempwale va Yesaya 11:6-9, hiyo ninniphwanya moolumo anooniherya wiiraana ni murettele, mwa inama sa mutakhwani ni apinaatamu ni inama saya. Niireke masu awo anniiraneya olalo-va? Aayo! Iveersu 9, ninniixutta wira inama iyo khasinrowa okumiherya yoonanara ni yowoopiha: “Tthiri atthu othene a mulaponi anosareya osuwela [wa Yehova], ntoko vansareyaya màsi mphareya”. Niireke “osuwela [wa Yehova]” onnirukunuxa owali wala mweettelo wa inama? Nnaari, maana atthu taniwerya orukunuxa makhalelo aya mwaha woomusuwela Muluku Oovuwexa ni wiixutta otakiha makhalelo awe a murettele. Tivonto olelo-va mparayiisu ahu omunepani ninnoona waakhwanela waya wookuxa murima. Alamuleliwaka ni Omwene wa Kristu, atthareli awe anniixutta orula makhalelo oowoopiha anlikana ni axinama, wira akhaleke ni murettele ni wiiraana ni anna ni arokora mmulokoni.

¹⁰ Mwa ntakiheryo, eliivuru ela yootthokiherya mwaha wa maKristau ohiirelaka mpantta myaha sa elapo. Mwa inamuna piili: wiiwexexa wahu Soolepa sinivaha malakiheryo awo, ni olupatthiwa onaakhumelela atthu a Muluku mwaha woohiirela mpantta elapo. Niireke khamuneemya okhala etthu yoovirikana olumwenku ola woosareya atthu oowali, woona wira nookhala ‘nloko’ na atthu ninkhootta wiirela mpantta khuta etthu enikumiherya owali? Tthiri eyo yowooniherya yuulupale yoowi atthu a Omwene wa Mesiya anniwerya okhalana murettele ntoko ole ohimmwale ni Yesaya! Yesu aahihimya wira awiixutti awe yaarowa osuweliwaka mwaha wa ophentana waya mukina ni mukhwa awe. (Yoh. 13:34, 35) Mmulokoni, moopixa murima Yesu onnimuruma ‘murumeyi awe ororomeleya’ wira owiixuttihe maKristau okhala a murettele, oophenta ni ooreerela murima.​—Math. 24:45-47.

11, 12. Enamuna xeeni ya etala enahaaxa atthu a mulaponi, masi moota xeeni Yehova onaavaha awe atthu awe yoolya yowaatta?

¹¹ Yoolya yowaatta. Olumwenku ola woosareya etala ya omunepani. Biibiliya aahihimya khalai sa Yehova oriki: “‘Anophiya mahiku anrowaka omorihela etala elapo. Atthu anovoliwa, masi khahiyó ni etala ya yolya, nnákhala ni ntthona na màsi: anovoliwa ni etala yo wiwa molumo a Apwiya’”. (Am. 8:11) Niireke nave atthu a Omwene wa Muluku annivoliwa etala? Yehova aahihimya vahinatthi ovirikana waarowa okhala wa arummwa awe ni atthu pure ni awanani awe: “Arumeyi aka animolya, nyuwo nvoliwaka etala; awo  anowurya, nyuwo nvoliwaka ntthona; arumeyi aka anotteliwa murima, nyuwo mùliwaka muru”. (Yes. 65:13) Niireke munnoona waakhwanela waya masu ala?

¹² Yoolya ya omunepani enikaweliwa ahu enikhala ntoko muro woosarya maasi anivira. Nookhalana iliivuru sahu sinimutthokiherya Biibiliya, masu oogravariwa ni iviidiyu, mithukumano sa mmulokoni ni sa muttetthe, ohela muhina myaha sinikumiheriwa va Web saite ahu; itthu iyo sotheene siniirela mpantta yoolya ahu yomunepani yeeyo enivona ahu anamunceene avoliwaka etala. (Ezek. 47:1-12; Yow. 3:18) Niireke murima anyu khonihakalala woona moota Yehova onaakhwaniherya awe yoolaiherya awe ya yoolya yinceene khula nihiku? Niireke nyuwo munnikhalela nthiti olya vameesa va Yehova khula nihiku?

13. Niireke muhoona wiiraneya wa eprofesia ya Yehova voohimya sa atthu ahinoona otthukuwa maitho ni ale ahiniiwa opacerya wiiwa?

¹³ Olooliwa womunepani. Olelo-va ohuulaana ohoona ni ohiiwa wa omunepani. (2 aKor. 4:4) Masi Yesu onnaavoniha aretta awo olumwenku wotheene. Mootoko omoona mutthu ohinoona ohuliwaka maitho, ni mutthu ohiniiwa atthukuliwaka maaru awe? Akhala wira mootoko waaweha atthu yiixuttaka ekeekhai ya Nuulumo na Muluku, anahiya itthu sowoothiwa saawiirinhe okhala atthu oohoona ni ohiiwa; anapacerya ophenta ekeekhai nto mootoko woona waakhwanela wa eprofesia ela eni: “Okathi owo, alipa-òttiyela màru animwiwa molumo a mulivuruni, maitho àlipa-òhona anotthukuwa, ekhumaka moripa ni mwepiphini”. (Yes. 29:18) Olumwenku wotheene ikonto imiya sinceene sa atthu, annipenuxiwa momunepani. Khula mutthu onikhuma mBabilonia muulupale, nto onarwa omukokhorela Yehova ni hiyo mparayiisu ahu omunepani, eyo eri ethoonyeryo yoowi Yehova onnaakhwaniherya yoolaiherya awe!

14. Itthu xeeni sikhanle ahu owuupuwela sinrowa olipiha nroromelo nahu?

¹⁴ Khula muru wa eliivuru ela, ookhalana yowooniherya yuulupale yoowi Kristu, ohaavaha eparayiisu yomunepani arumeyi awe eekeekhai mahiku ala ookiserya. Vano nrowe nivikaniheke ovaha efaita inamuna iya soovirikana sireelihiwe ahu, mwaha woovahiwa eparayiisu ela yomunepani olelo-va. Okathi onrowa ahu opakaka eyo, onrowa wunnuwaka waaroromela wahu anatiri a Yehova voohimya sa itthu sinrowa okhumelela muhoolo.

15. Exeeni ekhanle oonikupaliha wira elapo ela enrowa okhala eparayiisu?

¹⁵ Yoolakela ya Yehova okhuma khalai, okhaliha elapo ela eparayiisu. Owo aahaapweha Adamu ni Eva mparayiisu, ni aahaavaha nlamulo noowi yaayareke anamwane ni asareyeke valaponi, wira akhapeleleke soopattuxiwa sotheene siri valaponi. (Maph. 1:28) Ohiya opaka eyo, Adamu ni Eva, yaahimwiiwelela Satana, khummwareelaka Muluku nto khaaphwanyihaka anaaya otheene ehasara ya ohimalela, etampi, ni okhwa. Hata vari siiso, yoolakela ya Muluku khenaturukeye. Okhala wene, Muluku ahimya etthu ehaana wiiraneya moomalela. (Mmusome Yesaya 55:10, 11.) Tivonto hiyo nihaana waamini wira osuulu wa Adamu ni Eva, tthiri  onoosarya elapo ela, okhapeleleke soopattuxiwa sotheene sa Yehova mparayiisu. Okathi owo, enimwaakhwanela moomalela eprofesia ele yaavahiwe aya aYuda ale yoowi yaarowa okhalaka mparayiisu! Muthokorerye matakiheryo ala anittharelana.

16. Biibiliya onitthokiherya sai murettele ni omaaleleya onrowa ahu okhalana mparayiisu?

¹⁶ Omaaleleya ni ohoova. Nwehe makhalelo ala oovara murima alempwale va Yesaya 11:6-9 yaawo anrowa ahu woona yaakhwanelaka waya moomalela. Alopwana, athiyana, ni anamwane, anrowa okhalaka ni murettele khula nipuro ninrowa aya na olumwenku ola. Khiivo yoopattuxiwa ntoko mutthu wala inama, enrowa omukumiherya yonanara mukina. Nkahaya muupuwele okathi nyuwo munrowa anyu owehaka olumwenku ola wotheene ntoko etthoko anyu, okathi onrowa anyu okataka khula muro, nratta, mphareya, mulapuwaka myaako, ni mweettaka mapuro anilya inama sa khula enamuna masi muhoovaka etthu. Nto nuumala okela nsuwa, nyuwo khamunrowa woovaka etthu. Tthiri masu ari va Ezekiyeli 34:25 anrowa aya waakhwanela, nto atthu a Yehova anrowa “okhalaka ni murettele mmathalani n’umumula mutakhwani”.

17. Xeeni vanireerela ahu okupaliki wira okathi Omwene onrowa awe olamulelaka elapo, Yehova onrowa okumiherya itthu sinceene mmureerelo ahu?

¹⁷ Yoolya yowaatta. Mmananihe woona okathi ohinrowa aya okhala itthu ntoko osikhini, othowa yoolya, etala wala othowa makhalelo ooloka. Yoolya ya omunepani yeeyo enivahiwa aya atthu a Muluku olelo-va yoowooniherya yoowi Omwene wa Mesiya onimwaalyihaka atthu awe wa khuta inamuna. Okathi waari awe valaponi, Yesu aahooniherya ele yaarowa awe opaka muhoolo, okhala wira aahaalyiha atthu ikonto sinceene ni phawu ni ihopa vakhaani paahi. (Math. 14:17, 18; 15:34-36; Mar. 8:19, 20) Vaavo Omwene wa Muluku onrowa awe olamulelaka elapo yoothene, sinimwaakhwanela moomalela iprofesia ntoko iya: “Apwiya anorupihela epula iphyó sinàlanyu mmatta, awo animovahani solya sinjene ni sosiva sa mmatta mwanyu. Mahiku awo mihuwo sanyu sinolyasa malaxi òwatta ni òripelela”.​—Yes. 30:23.

18, 19. (a) Eprofesia elempwale va Yesaya 65:20-22, enitaphulela exeeni wa nyuwo? (b) Mwa enamuna xeeni iyaakha sahu sinrowa aya “olikanaka ni mahiku a mwiri”?

¹⁸ Mahiku ala atthu anceene khaniwerya okhalana empa yooloka yawaya ene wala ovara muteko woohakalaliha oniphwanyiha mureerelo. Elapo ela yowaatta makhwankwa, anamunceene anniviriha iwoora sinceene avaraka muteko woovila masi mireerelo siniphwanya aya awo ni emusi aya sinikhala vakhaani paahi, masi okathi omosaru owo athaaciri ni ananrima annincererya mihakhu saya. Nkahaya muupuwele, okathi enrowa aya waakhwanela eprofesia ela olumwenku wotheene: “Atthu awo anrowa oteka ipa saya, ekhaleke memmo, anrowa ophatteya miri, s’evidera elyeke mihokorokho saya. Khanrowa oteka ipa saya, vano akina akina ekhaleke-mo, khanrowa ophatteya miri saya, vano akina elyeke mihokorokho sene. Iyakha s’atthu aka sinrowa olikanaka n’iyakha sa miri, atthu aka animolya mihokorokho sihawenlyaya”.​—Yes. 65:20-22.

¹⁹ Anitaphulela exeeni masu oowi “Iyakha s’atthu aka sinrowa olikanaka n’iyakha sa miri”? Okathi oneemela anyu vathi va mwiri muulupale, nyuwo khamunitikinihiwa munaphavela osuwela muriki mwiri ola omenle liini nipuro nle; kiireke omenle hata apapaya apiipi ahinatthi oyariwa? Nto nyuwo munapacerya wuupuwela  wira mmakhalelo anyu oohimalela, mwiri ole onoovikaniha okhala mahiku manceene nyuwo mukhwiiye ene muhinuupuweleliwa-tho. Tthiri Yehova tooreera murima vaavo vannileiherya awe wira mParayiisu iyaakha sahu sinrowa olikanaka ni iyaakha sa mwiri ikhalaka sinceene ni samurettele! (Esal. 37:11, 29) Aayo onoophiya okathi vaavo vaniira aya mwiiri yoole onoona ahu wira wookhalana iyaakha sinceene nooneke okhala wowaakuva onyaala ntoko malaxi animela olelo, meelo khunyaala, mwaha wookhalaka wa mahiku otheene!

20. Moota xeeni atthu anikhaliherya Omwene moororomeleya anrowa aya okhalana ekumi yoomalela oloka waya?

²⁰ Ekumi yoomalela. Olelo-va iretta ni okhwa sinnahasula atthu otheene anikhala valaponi. Mmukhalelo owo otheene ahu naaretta, noophwanya eretta yoowaakuva wiiva eniitthaniwa etampi. Murette oniwerya oloola eretta eyo ti yowoopola ya Kristu paahi. (aRom. 3:23; 6:23) Okathi wa Omwene wa iyaakha Ekonto Emosa, wa Yesu Kristu ni apatthani awe, ninrowa ovarela muteko moomalela mureerelo sa yowoopola ya Yesu, okhala wira vakhaani- vakhaani, sinrowa omalamalihiwa mixankiho sinaakhumelela apinaatamu mwaha wa etampi. Eprofesia ya Yesaya enrowa waakhwanela moomalela yeeyo eni: Mw’atthu ankhala mmuttettheni khavo-tho onkela ohimya wira: ‘Miyo ki muretta’, atthu othene anoleveleliwa sottheka saya”. (Yes. 33:24) Nkahaya muupuwele okathi ohinrowa aya okhala atthu oohoona, oohiiwa, aahiiso oorakala. (Mmusome Yesaya 35:5, 6.) Khiivo eretta yuulupale ehiniweryaneya omala-malihiwa ni ikuru Yesu orina awe, pooti okhala iretta sa werutthuni, mmuupuweloni hata oriipiwa murima wa khula enamuna. Tthiri atthu a Momweneni anrowa okhalana ekumi yoomalela oloka!

21. Okhwa onrowa wiirihiwa exeeni, nto xeeni vanoona anyu yooleiherya eyo okhala yooloka?

²¹ Nto sai voohimya sa ele enikhumelela mwaha wa oretta, yookhumelela ya etampi, niire so, okhwa? Owo ti nwanani ahu “okiserya” yoowo oniwanana aya apinaatamu otheene oohimalela yoowo moohipisa-va onrowa omala-malihiwa. (1 aKor. 15:26) Niireke okhwa ti nwanani Yehova ohininwerya awe? Nwehe ele Yesaya yaahimmye awe vahinatthi wira: “Apwiya anomaliha khuluwí okhwa. Apwiya Muluku animùkuttha maithori owitho wothene”. (Yes. 25:8) Niireke nyuwo munniwerya woona makhalelo a okathi owo? Okathi ole atthu khantthuna orowaka onaakhwani, khonrowa okhala mahiye hata maithori khanrowa omoraka mwaha wa okhweliwa! Ohiya-vo atthu anrowa omoraxaka maithori mwaha wootteeliwa murima okhala wira Yehova onrowa omwaakhwaniherya natiri awe a waattikiherya ekumi atthu akhwiiye! (Mmusome Yesaya 26:19.) Wuukiseryani waya owereya wotheene waakumiheriwa ni okhweliwa onrowa omalamalihiwa.

22. Etthu xeeni enrowa wiiraneya nuumala Omwene wa Mesiya omaleliha ootthuna wa Muluku valaponi?

²² Wuukiseryani wa Olamulelo wa iyaakha Ekonto, onirowa omaliheriwa yootthuna ya Muluku wa elapo ela nto Kristu onrowa onvahererya Omwene Tiithi awe. (1 aKor. 15:25-28) Nto nuumala apinaatamu okhala oomalela, anoowerya ovikana weehereriwa wookiserya vaavo Satana onrowa awe okumihiwa mulittini mwahaawerya awe opaka etthu. Moottharelana, Kristu onrowa ompwetexa moomalela Diabo ni anamakhaliherya awe otheene. (Maph. 3:15; Wis. 20:3, 7-10) Masi ale animwiiwelela Yehova anrowa waakhela mareeliho manceene oohimala. Owehasa wene khaavo masu anihimya mwaha ola oratteene ovikana ala aniphwanyaneya efrase ela ya mBiibiliyani. Masu awo yooleiherya wa ale oororomeleya, anrowa aya woona yiiraneyaka: “otaphuwa n’uvuwa w’àna a Muluku”.​—aRom. 8:21.

23, 24. (a) Xeeni ohimmwaka wira waakhwanela wa anatiri a Yehova etthu yeekeekhai? (b) Etthu xeeni elakenle anyu opaka okhuma olelo orowa ohoolo?

²³ Soolaiherya iyo sa Muluku khahiyo ethiru, wala otthuna wa murima paahi, aahiiso etthu yolohiwa. Maana wiiraneya wa soolaiherya sa Yehova etthu enikupaleya! Moota xeeni? Muupuwele masu a Yesu yaawo alavuliwe ni muru woopacerya wa eliivuru ela. Owo aahiwiixuttiha atthareli awe onvekela Yehova so: ‘Omwene anyu orwe. Otthuna wanyu wireye ntoko wirimu siso vathí-va’. (Math. 6:9, 10) Omwene wa Muluku khahiyo etthu epakeliwe ni muupuwelo wa apinaatamu. Tthiri owo etthu ekhanle! Owo onnilamulela wiirimu nenna-va. Olelo-va soovira iyaakha emiya emosa, Omwene wa Muluku waakhwaniheryaka solaiherya sa Yehova, mwa enamuna eniwerya ahu woona saana mmulokoni wa eKristau. Vano nihaana ororomela tthiri wira anatiri otheene a Yehova animwiiraneya tthiri vaavo Omwene wa Muluku onrowa awe olamulelaka elapo yotheene!

²⁴ Hiyo noosuwela wira Omwene wa Muluku onimoorwa tthiri. Hiyo noosuwela wira khula etthu Yehova enileiherya awe ennaakhwanela. Moota xeeni? Okhala wira OMWENE WA MULUKU ONNILAMULELA! Nikoho ninreerela ahu wiikoha otheene ahu ti nla: ‘Niireke Omwene owo onnikilamulela miyo?’ Nrowe niimananihe opaka sotheene siniwerya ahu wira nikhaliherye Omwene nenna-va, wira niwerye okhala ni ekumi yoomalela nilamuleliwaka ni yena moohimala!