1, 2. (a) Kay ano nga usahay makuri toohan an tiarabot nga Paraiso? (b) Ano an makakabulig ha aton nga maparig-on an aton pagtoo ha mga saad han Dios?

INABOT ha katirok an usa nga matinumanon nga bugto, kapoy tungod han nakakaistres nga magkulop. Damu an sugo ha iya han iya agaron, damu liwat an iya problema ha pag-ataman han iya pamilya, ngan may sakit an iya asawa. Pagtokar han musika ha pagtikang han katirok, naggaan an iya pag-abat, ngan nalipay nga aadto hiya ha Kingdom Hall kaupod han kabugtoan. An kanta mahitungod ha Paraiso, ngan an liriko hito nag-aaghat nga handurawon niya nga aadto na hiya ha Paraiso. Paborito niya ito nga kanta, ngan samtang nagkakanta kaupod han iya pamilya, napuno hin paglaom para ha tidaraon an iya kasingkasing.

² Kadam-an ha aton an may pariho hito nga eksperyensya. Kondi diri naton maninigaran nga tungod han kakurian hinin maraot nga sistema, diri masayon toohan an tiarabot nga Paraiso. Nagkikinabuhi kita ha “peligroso gud nga mga panahon nga makuri pakiangayan,” ngan an kalibotan nga aton gin-uukyan hirayo gud ha kahimtang han Paraiso. (2 Tim. 3:1) Ano an makakabulig basi magin tinuod ha aton an Paraiso? Paonan-o mahibabaroan nga hirani na magmando an Ginhadian han Dios ha ngatanan nga katawohan? Hisgotan naton an pipira nga tagna ni Jehova nga nakita han iya katawohan nga natuman ha naglabay. Katapos, rirepasuhon naton kon paonan-o natutuman ito ngan an iba nga tagna nga pariho hito yana. Ha kataposan, hihisgotan naton kon paonan-o matutuman ito nga mga tagna ha tidaraon.

3. Ano nga saad an nakaliaw ha mga Judio nga nadistyero ha Babilonya?

³ Handurawa an kinabuhi han mga Judio nga nadistyero ha Babilonya han ika-unom ka siglo B.C.E. Makuri an kinabuhi didto. Gintatamay hira han mga taga-Babilonya tungod han ira pagtoo kan Jehova. Damu ha ira an didto na nagdaku sugad la han ira mga kag-anak. (Sal. 137:1-3) Kondi, bisan ha paglabay han mga dekada, gintitipigan la gihap han maunungon nga mga Judio inin makalilipay nga paglaom: Nagsaad hi Jehova nga iya ibabalik an iya katawohan ha ira natawhan nga tuna. Hiya nagsiring nga  magigin maopay an ira kahimtang didto. Iginpariho pa ngani niya an iginpahiuli nga tuna han Juda ha hardin han Eden nga usa nga paraiso! (Basaha an Isaias 51:3.) Klaro nga an katuyoan hito nga mga saad amo an pagpasarig ha ira nga waray hira sadang kabarak-an. Kay ano nga makakasiring kita hito? Tagda an pipira nga tagna.

4. Paonan-o ginpasarig ni Jehova an mga Judio nga magkakaada hira seguridad ha ira natawhan nga tuna?

⁴ Seguridad. Diri literal nga paraiso an babalikon han mga nadistyero, kondi usa nga hirayo nga tuna nga nagin binayaan ha sulod hin 70 ka tuig, usa nga tuna nga pipira la ha ira an nakakita. Ha panahon han Biblia, komon la an leon, lobo, leopardo, ngan iba pa nga magbangis nga hayop. Salit bangin maghunahuna an mga padre de pamilya, ‘Paonan-o ko mapapanalipdan an akon asawa ngan mga anak? Paonan-o ko mapapanalipdan an amon kakarnerohan ngan kabakahan?’ Natural la nga mabaraka hira. Kondi, hunahunaa kon paonan-o hira ginliaw han saad han Dios ha Isaias 11:6-9. (Basaha.) Pinaagi hito nga tagna, ginpasarig ni Jehova an mga distyero nga magigin talwas hira ngan an ira mga hayop. An leon makaon hin dagami, karuyag sidngon diri hito kakaunon an ira mga baka. An magtinumanon diri sadang mahadlok ha mabangis nga mga hayop. Nagsaad hi Jehova nga magigin talwas hira ha iginpahiuli nga tuna han Juda, bisan ha kamingawan ngan ha kagurangan.—Esek. 34:25.

5. Ano nga mga tagna an nakabulig ha mga nadistyero nga magkaada pagsarig nga abunda nga itatagana ni Jehova an ira panginahanglan?

⁵ Kahuraan. Bangin may iba pa nga kabaraka an katawohan. ‘Mapapakaon ko ba an akon pamilya ha iginpahiuli nga tuna? Diin kami maukoy? May trabaho ba didto, ngan magigin mas maopay ba an kinabuhi didto kay han amon kinabuhi yana sugad nga distyero?’ Pinaagi hin mga tagna, ginbaton gihap ni Jehova ito nga mga pakiana. Nagsaad hiya ha iya masinugtanon nga katawohan nga makakasarig hira ha uran; salit an tuna “magmamatambok ngan madadamu” an produkto. (Isa. 30:23) May kalabotan liwat ha urukyan ngan trabaho, hi Jehova nagsaad: “Hira magtutukod hin mga balay ngan maukoy hini; ngan hira magtatanom hin mga urubasan, ngan makaon han mga bunga hini. Diri hira magtutukod, ngan an iba an maukoy; diri hira magtatanom, ngan an iba an makaon.” (Isa. 65:21, 22) Oo, sigurado nga magigin mas maopay an ira kinabuhi kon itanding han distyero pa hira ha pagano nga Babilonya. Pero kumusta man an ira pinakadaku nga problema—an rason han ira kadistyero?

6. Ano nga sakit an maiha na nga problema han katawohan, ngan ano nga pasarig an iginhatag ni Jehova ha ira?

⁶ Espirituwal nga kahimsog. Maiha na antes madistyero, may sakit na ha espirituwal an katawohan han Dios. Pinaagi kan propeta Isaias, hi Jehova nagsiring mahitungod ha ira: “An bug-os nga ulo masakit, ngan an bug-os nga kasingkasing maluya.” (Isa. 1:5) Mga buta ngan bungol hira ha espirituwal tungod kay nagpapakabungol-bungol hira ha sagdon ni Jehova ngan nagpapakabuta-buta ha kahayag nga iya igintatagana. (Isa. 6:10; Jer. 5:21; Esek. 12:2) Kon bumangon an pariho nga problema ha nabalik  nga nadistyero nga katawohan, magkakaada ba hira seguridad? Diri ba mawawara la nira utro an pag-uyon ni Jehova? Makaparig-on gud an saad ni Jehova: “Hadto nga adlaw an bungol makakabati han mga pulong han basahon, ngan an mga mata han buta makakakita tikang ha kangitngitan ngan tikang ha kasisidman.” (Isa. 29:18) Oo, tatambalon ni Jehova ha espirituwal an iya mapainubsanon ngan mabinasulon nga katawohan. Samtang namamati ngan masinugtanon, magtatagana hi Jehova hin giya ngan kahayag nga maghahatag ha ira hin kinabuhi.

7. Paonan-o natuman an mga saad ni Jehova ha iya nadistyero nga katawohan, ngan kay ano nga makaparig-on ito ha pagtoo?

⁷ Gintuman ba ni Jehova an iya saad? Ginbaton ito han kasaysayan. An mga Judio nga bumalik ha ira natawhan nga tuna ginbendisyonan hin seguridad, kahuraan, ngan espirituwal nga kahimsog. Pananglitan, ginpanalipdan hira ni Jehova tikang ha ira kahigrani nga mga nasud nga mas makusog ngan mas damu kay ha ira. Waray labti han magbangis nga hayop an ira inataman nga mga hayop. Oo, waray makita han mga Judio an bug-os nga katumanan han mga tagna mahitungod ha Paraiso nga iginsurat han kalalakin-an sugad kanda Isaias, Jeremias, ngan Esekiel. Kondi makalilipay na gihap adto ngan igo na para hito nga panahon. Kon papamalandungon naton an ginbuhat ni Jehova para ha iya katawohan hadto, magigin mas marig-on an aton pagtoo. Kon an siyahan nga katumanan hito nga mga saad makalilipay na, ano pa daw la an mas daku nga katumanan hito? Paghisgotan naton an ginhihimo ni Jehova para ha aton yana.

8. Ano nga “tuna” an napapahimulosan han katawohan han Dios?

⁸ An katawohan ni Jehova yana diri literal nga nasud, diri liwat hira naukoy ha uusa la nga nasud. Lugod, an dinihogan nga mga Kristiano nagkukompwesto han espirituwal nga nasud, “an Israel han Dios.” (Gal. 6:16) Kaupod nira an “iba nga mga karnero,” ha espirituwal nga “tuna,” diin urosa nga ginsisingba nira hi Jehova nga Dios. Ito nga pagsingba amo an sentro han ira kinabuhi. (Juan 10:16; Isa. 66:8) Ngan ano nga “tuna” an iginhahatag ni Jehova ha aton? Usa ito nga espirituwal nga paraiso. Sugad han iginsaad han Dios, an kahimtang hito magigin pariho ha Eden. Tagda an pipira nga ehemplo.

9, 10. (a) Paonan-o natutuman yana an tagna ha Isaias 11:6-9? (b) Ano nga ebidensya may kalabotan ha kamurayawan an makikita ha katawohan han Dios yana?

⁹ Seguridad. Ha tagna ha Isaias 11:6-9, nahahanduraw naton an pagkaurosa ngan kamurayawan butnga han ihalas nga mga hayop ngan han mga tawo ngan han ira gin-aataman nga mga hayop. May-ada ba ito espirituwal nga katumanan yana? Oo! Ha bersikulo 9, mahibabaroan naton kon kay ano nga an magbangis nga hayop diri na makakasakit o makakadaot: “Kay an tuna mapupuno han hibaro ni [kan] Jehova, sugad nga an katubigan nagpupuno han dagat.” Magigin diri ba mabangis an mga hayop tungod han ‘kahibaro kan Jehova’? Diri, mga tawo an nagbabag-o samtang nahibabaro mahitungod han Gihitaasi nga Dios, ngan nasusubad an iya pagin mamurayawon. Salit nakikita naton  yana ha aton espirituwal nga paraiso an makalilipay nga katumanan hito. Ilarom ha pagmando han Ginhadian, an mga sumurunod han Kristo nahibabaro paghukas han ira mabangis ngan hayupnon nga pamatasan ngan nagkikinabuhi nga mamurayawon upod han ira kabugtoan ha espirituwal.

¹⁰ Pananglitan, ginhisgotan hini nga libro an pagin neutral han mga Kristiano—an Kasuratanhon nga basihan hito ngan an paglutos nga ira gin-atubang tungod hito. Diri ba urusahon nga hinin madarahog nga kalibotan, may-ada “nasud” han katawohan nga nadiri pakigbahin ha kamadarahog bisan pa han tarhog nga kamatayon? Usa ini nga klaro nga ebidensya nga an mga sakop han Mesianiko nga Hadi nagpapahimulos hin kamurayawan nga pariho han iginhulagway ni Isaias! Hi Jesus nagsiring nga an iya mga sumurunod makikilala pinaagi han ira gugma ha usa kag usa. (Juan 13:34, 35) Ha sulod han kongregasyon, mahigugmaon nga ginagamit han Kristo an iya “matinumanon ngan maaramon nga uripon” ha pagtutdo ha tinuod nga Kristiano nga magin mamurayawon, mahigugmaon, ngan malumo.—Mat. 24:45-47.

11, 12. Ano nga klase hin gutom an naieksperyensyahan han kalibotan yana, kondi paonan-o hi Jehova hura nga nagtatagana para ha iya katawohan?

¹¹ Kahuraan. An bug-os nga kalibotan nag-aantos hin gutom ha espirituwal. An Biblia nagpahamangno: “Kitaa, an mga adlaw maabot, nasiring an Ginoo nga hi Jehova, nga ako magpapadara hin kagutoman ngada ha tuna, diri an kagutoman hin tinapay,  o kauhaw hin tubig, kondi hin pamati han mga pulong ni Jehova.” (Amos 8:11) Nagugutom ba gihap an mga tuminungnong han Ginhadian han Dios? Igintagna ni Jehova nga an iya katawohan maiiba ha iya mga kaaway: “An akon mga surugoon mangangaon, kondi kamo panggugutumon; kitaa, an akon mga surugoon manginginom, kondi kamo pangunguhawon; kitaa, an akon mga surugoon magkakalipay, kondi kamo pagpapakaalohan.” (Isa. 65:13) Nakikita mo ba an katumanan hito?

¹² Padayon an pag-agos han espirituwal nga mga tagana pariho hin nagtitikahaluag ngan nagtitikahilarom nga salog. Hura kita hin basado ha Biblia nga mga publikasyon—upod han rekording ngan video, katirok ngan kombensyon, ngan an mga materyal ha aton Web site—diri pariho hinin gutom ha espirituwal nga kalibotan. (Esek. 47:1-12; Joel 3:18) Sigurado nga makalilipay makita kada adlaw an kahuraan nga iginsaad ni Jehova! Ginsisiguro mo ba nga regular ka nga nakaon ha lamesa ni Jehova?

13. Ha ano nga paagi natutuman yana an saad ni Jehova mahitungod han buta nga makakakita ngan bungol nga makakabati na?

¹³ Espirituwal nga kahimsog. Kalyap yana an pagin buta ngan bungol ha espirituwal. (2 Cor. 4:4) Kondi ha bug-os nga kalibotan, nagtatambal an Kristo han mga baldado ngan mga may sakit. May nakita ka na ba nga buta nga nakakakita na ngan bungol nga nakakabati na? Kon may nakita ka nga kinarawat han kamatuoran han Pulong han Dios ngan binaya ha kabuwaan han relihiyon nga nakabuta ngan nakabungol ha iya ha kamatuoran, nakikita mo na an katumanan han saad: “Hadto nga adlaw an bungol makakabati han mga pulong han basahon, ngan an mga mata han buta makakakita tikang ha kangitngitan ngan tikang ha kasisidman.” (Isa. 29:18) Ha iba-iba nga dapit han kalibotan ha kada tuig, ginatos ka yukot an nakakabiling han sugad nga espirituwal nga tambal. An tagsa nga nabaya ha Babilonya nga Gamhanan ngan naupod ha aton ha espirituwal nga paraiso basi magsingba, pamatuod nga natutuman an mga saad ni Jehova!

14. Ano an sadang naton pamalandungon nga magpaparig-on han aton pagtoo?

¹⁴ An tagsa nga kapitulo hini nga libro may matin-aw nga ebidensya nga gindadara han Kristo an iya mga sumurunod ngadto ha tinuod nga espirituwal nga paraiso hinin kataposan nga mga adlaw. Pamalandungon unta naton pirme an damu nga bendisyon nga nakakarawat naton dida hito nga paraiso. Ha pagbuhat hito, padayon nga magigin mas marig-on an aton pagtoo ha mga saad ni Jehova ha tidaraon.

15. Kay ano nga sigurado kita nga magigin paraiso an tuna?

¹⁵ Tikang pa ha tinikangan, katuyoan na ni Jehova nga himoon an tuna nga paraiso. Iginbutang niya hira Adan ngan Eva ha paraiso nga hardin, ngan ginsugo nga pun-on ito han ira tulin ngan atamanon an ngatanan nga linarang dida hito. (Gen. 1:28) Kondi umupod hira kan Satanas ha pagrebelde, salit an ira mga anak nagin diri hingpit, makasasala, ngan namamatay. Pero waray magbag-o an katuyoan han Dios. Anoman an nagawas ha iya  baba, ito natutuman. (Basaha an Isaias 55:10, 11.) Salit makakasiguro kita nga an bug-os nga tuna magigin paraiso—mapupuno han mga anak nira Adan ngan Eva, ngan ira ‘paghahadian’ ngan pag-aatamanon an mga linarang ni Jehova. Hito nga panahon, an mga tagna mahitungod han kinabuhi ha Paraiso nga siyahan nga iginhatag ha nadistyero nga mga Judio matutuman na hin bug-os! Tagda an pipira nga ehemplo.

16. Paonan-o ginhuhulagway han Biblia an seguridad nga mapapahimulosan naton ha Paraiso?

¹⁶ Seguridad. Ha kataposan, an makalilipay nga tagna ha Isaias 11:6-9 bug-os na nga matutuman, bisan ha literal nga paagi. Magigin talwas an kalalakin-an, kababayin-an, ngan kabataan diin man hira kumadto. Waray tawo o hayop nga makakadaot ha ira. Handurawa an panahon nga an bug-os nga planeta tatagdon mo nga imo kalugaringon nga urukyan, diin mahimo ka lumangoy ha mga salog, danaw, ngan dagat; sumaka ha mga bukid; ngan magpuropasyada ha kapatagan nga waray ginkakahadlokan. Ngan pagkatunod han adlaw, waray ka la gihap ginkakabarak-an. Matutuman an mga pulong ha Esekiel 34:25 nga an katawohan han Dios “mangungukoy ha masarig didto ha kamingawan, ngan mangangaturog dida ha kagurangan.”

17. Kay ano nga makakasiguro kita nga hura nga magtatagana hi Jehova han aton mga panginahanglan kon magmando na an Ginhadian ha bug-os nga tuna?

¹⁷ Kahuraan. Handurawa an panahon diin waray na kapobrehan, malnutrisyon, o gutom. An espirituwal nga kahuraan nga napapahimulosan han katawohan han Dios yana garantiya nga hura nga magtatagana an Mesianiko nga Hadi han pisikal ngan espirituwal nga panginahanglan han iya mga sakop. Han nakanhi pa hi Jesus ha tuna, iginpakita niya nga may kapasidad hiya ha pagtuman han sugad nga mga saad pinaagi ha pagpakaon ha yinukot nga nagugutom gamit an pipira la nga tinapay ngan isda. (Mat. 14:17, 18; 15:34-36; Mar. 8:19, 20) Kon magmando na an Ginhadian han Dios ha bug-os nga tuna, literal na nga matutuman an mga saad nga pariho hini: “Hiya mahatag han uran para han imo liso, nga imo iginsabwag ha tuna; ngan han tinapay han tubo han tuna, ngan ini magmamatambok ngan madadamu. Hadto nga adlaw an imo mga hayop manginginaon ha dagku nga mga panabsaban.”—Isa. 30:23.

18, 19. (a) Ano an kahulogan han Isaias 65:20-22 para ha imo? (b) Paonan-o an aton “mga adlaw” “masusugad han mga adlaw han usa nga kahoy”?

¹⁸ Yana, damu an diri na naglalaom nga magkakaada pa maopay nga balay o trabaho. Hinin korap nga kalibotan, an nagbabaguod pagtrinabaho gutiay la an sweldo, samtang an waray ginbubuhat nga hakog nga mga riko amo lugod an nakakakuha han mga benepisyo. Handurawa la kon matuman na ini nga tagna ha bug-os nga kalibotan: “Hira magtutukod hin mga balay ngan maukoy hini; ngan hira magtatanom hin mga urubasan, ngan makaon han mga bunga hini. Diri hira magtutukod, ngan an iba an maukoy; diri hira magtatanom, ngan an iba an makaon: kay masusugad han mga adlaw han usa nga kahoy an mga adlaw han akon katawohan, ngan an akon mga pinili ha maihaan magpapahimulos han buhat han ira mga kamot.”—Isa. 65:20-22.

 ¹⁹ Ano an karuyag sidngon nga an aton mga adlaw “masusugad han mga adlaw han usa nga kahoy”? Kon natindog ka ha landong hin daku hinduro nga puno, diri ka ba nahipapausa kon mationan-o na kahilawig an kinabuhi hito—bangin mas edaran pa ito kay han imo kaapoy-apoyan? Posible mahunahuna mo nga kon magpapabilin ka ha diri hingpit nga kahimtang, bangin mauna ka pa ngani pagpahuway ha kamatayon ngan magin hinumdoman na la samtang ito nga puno padayon nga naeksister. Buotan gud hi Jehova nga iya kita ginpapasarig nga ha tiarabot nga paraiso an aton “mga adlaw” hilawig ngan mamurayawon! (Sal. 37:11, 29) Pag-abot han panahon nga an aton kinabuhi waray na kataposan, bisan an mga puno nga higlawig an kinabuhi magigin sugad na la hin lumalabay nga banwa para ha aton!

20. Paonan-o magkakaada hingpit nga kahimsog an maunungon nga mga sakop han Ginhadian?

²⁰ Hingpit nga kahimsog. Yana, kita ngatanan nagkakasakit ngan namamatay. Ha pagkamatuod, kita ngatanan nataponan hin nakakamatay nga sakit—an sala. An tambal la hito amo an halad-lukat han Kristo. (Roma 3:23; 6:23) Durante han Milenyo nga Pagmando ni Jesus ngan han iya mga igkasi-magmarando, bubuligan nira an matinumanon nga mga tawo nga bug-os nga makapahimulos tikang hito nga halad basi hinay-hinay nga mawara an ngatanan nga epekto han sala. An tagna ni Isaias bug-os nga matutuman: “An umurukoy diri masiring: Ako masakit: an katawohan nga naukoy dida pasasayloon han ira karat-an.” (Isa. 33:24) Handurawa an panahon nga waray na buta, bungol, o piay. (Basaha an Isaias 35:5, 6.) Waray sakit nga diri matatambal ni Jesus—pisikal man, mental, o emosyonal. An maunungon nga mga sakop han Ginhadian magkakaada hingpit nga kahimsog!

21. Ano an mahitatabo ha kamatayon, ngan kay ano nga nakakaliaw ito nga saad?

²¹ Kumusta man an ordinaryo nga resulta han sakit ngan an diri malilikyan nga epekto han sala—an kamatayon? Ito an aton “kataposan nga kaaway,” an amo la nga kaaway nga diri napipirde han ngatanan nga diri hingpit nga tawo. (1 Cor. 15:26) Kondi makukurian ba hi Jehova nga pirdehon ito nga kaaway? Tigamni an tagna ni Isaias: “Iya linamoy ha kadayonan an kamatayon; ngan an Ginoo nga hi Jehova magpapahid han mga luha tikang ha ngatanan nga nawong.” (Isa. 25:8) Nahuhunahuna mo ba an mahitatabo? Waray na punerarya, sementeryo, ngan mga luha ha kamatyi! Lugod, magkakaada mga luha ha kalipay samtang gintutuman ni Jehova an iya saad ha pagbanhaw han mga patay! (Basaha an Isaias 26:19.) Hito nga panahon, mawawara na an kasakit nga dara han kamatayon.

22. Ano an mahitatabo kon matuman na han Mesianiko nga Ginhadian an kaburut-on han Dios ha tuna?

²² Ha pagtapos han Milenyo nga Pagmando, bug-os nga natuman na han Ginhadian an katuyoan han Dios ha tuna, ngan ibabalik na han Kristo an pagmando ha iya Amay. (1 Cor. 15:25-28) Tungod kay hingpit na an mga tawo, andam na hira pag-atubang han ultimo nga pagsari kon buhian na hi Satanas tikang ha kahiladman. Katapos, hihimoon han Kristo an ultimo nga  pagdugmok han serpyente ngan han ngatanan nga nasuporta hito. (Gen. 3:15; Pah. 20:3, 7-10) Kondi magkakaada makalilipay nga paglaom an ngatanan nga maunungon nga nahigugma kan Jehova. Bangin waray mas maopay nga mga pulong nga makakaghulagway hito labot han mga saad ha Biblia nga an magtinumanon magkakaada “mahimayaon nga kagawasan” ha pagin “mga anak” han Dios.—Roma 8:21.

23, 24. (a) Kay ano nga sigurado nga matutuman an mga saad han Dios? (b) Ano an determinado mo nga buhaton?

²³ Ito ngatanan diri basta imahinasyon, hingyap, o inop la. Sigurado nga matutuman an mga saad ni Jehova! Kay ano? Hinumdumi an ginsiring ni Jesus ha siyahan nga kapitulo hini nga libro. Iya gintutdoan an iya mga sumurunod nga mag-ampo: “Kumanhi unta an imo Ginhadian. Matuman an imo kaburut-on dinhi ha tuna sugad han ha langit.” (Mat. 6:9, 10) An Ginhadian han Dios diri imahinasyon la. Tinuod ito! Nagmamando na ito ha langit. Ngani, usa ka siglo na yana nga gintutuman hito an mga saad ni Jehova, ngan klaro nga nakikita ito ha Kristiano nga kongregasyon. Salit makakasiguro kita nga matutuman an ngatanan nga saad ni Jehova kon umabot na an Ginhadian han Dios ha paggamit han bug-os nga gahum hito dinhi ha tuna!

²⁴ Maaram kita nga maabot an Ginhadian han Dios. Maaram liwat kita nga matutuman an ngatanan nga saad ni Jehova. Kay ano? Tungod kay NAGMAMANDO NA AN GINHADIAN HAN DIOS! Salit an pakiana ha kada tagsa ha aton, ‘Nagmamando ba an Ginhadian ha akon?’ Buhaton unta naton an ngatanan basi makagkinabuhi nga maunungon sugad nga sakop hito nga Ginhadian yana, ngan makapahimulos han hingpit ngan matadong nga pagmando hito ha kadayonan!