1, 2. (a) Ligongo cici ndaŵi sine mpaka yiŵeje yakusawusya kujiwona Paladaiso kuŵa jisyesyene? (b) Ana ni cici campaka citukamucisye kulimbisya cikulupi cetu pa yilanga ya Mlungu?

 M’BALE jwakulupicika akwika pamisongano ali apesile ni yakutendekwa ya lisikulyo. Jwalakwe atengwice mnope ligongo lyakuti abwana ŵakwe ali ŵakusawusya mnope. Nambosoni akulimbana ni yakusawusya yakusamalila liŵasa lyakwe soni akulaga nganisyo ni ulwele wa ŵamkwakwe. Nambo jwalakwe mtima wakwe ukutama m’malo pajikutanda nyimbo jakuwugulila misongano. Akusangalala kuti ali yalumo ni abale ni alongo ku Nyumba ja Ucimwene. Nyimboji jikusala ya cembeceyo ca umi wa m’Paladaiso. Mwajikupikanicila nyimboji yikumkamucisya kola ciwulili ca cembeceyoci soni akuliwona ali m’Paladaiso. Jwalakwe akusajinonyela mnope nyimboji, mwamti pakwimba yalumo ni liŵasa lyakwe yikumtendekasya kuliŵalila yayimlagasisyeje nganisyo yila.

² Ana yeleyi pakwete payatendecele? Komboleka kuti ŵajinjiwe pakwete payitutendecele. Kusala yisyene, mwawuŵelele umi m’cilambo cakalaci, yili yakusawusya kukulupilila kuti Paladaiso jwamsogolo juli jusyesyene. Ajino jili “ndaŵi ja yakusawusya,” soni m’cilambo catukutamaci pangali cilicose cacikulandana atapanandi ni umi wa m’paladaiso. (2 Tim. 3:1) Ana ni cici campaka citukamucisye kuti tuciwoneje cembeceyo cetu kuŵa cisyesyene? Soni ana tukumanyilila camtuli kuti Ucimwene wa Mlungu usigele panandi kulamulila ŵandu wosope? Kwende tukambilane yakulocesya ya Yehofa yakuŵalanjika yele ŵandu ŵakwe ŵakala ŵayiweni yili mkukwanilicikwa. Kaneko citulole mwele yakulocesyayi soni yine, mwayikuti kakwanilicikwe masiku agano. Kulola yeleyi cikulimbikasye cikulupi cetu. Kaneko citukambilanesoni muyicitukwayila yakulocesyayi kusogolo.

3. Ana ni cilanga capi cacatamice mtima pasi Ayuda ŵaŵatamaga ku Babiloni?

³ Agambe ganicisya muwaŵelele umi wa Ayuda paŵaliji mu ukapolo ku Babulo mu 500 B.C.E. Ŵajinji ŵakulile mu ukapolo mpela muyaŵelele ni acinangolo ŵawo soni umi waliji wakusawusya mnope kwa jemanjaji. Ababulo ŵanyosyaga jemanjaji ligongo lya kumkulupilila Yehofa. (Sal. 137:1-3) Kwa yaka yejinji, Ayuda ŵakulupicika ŵajembeceyaga kuti, Yehofa cacasonganganya ŵandu ŵakwe  ni kwajawusya kumangwawo. Yehofa ŵasalile kuti cacitama ni umi wambone mnope kumangwawoko. Jwalakwe jwayice pakulandanya cilambo ca Yudaci ni mgunda wa Edeni kapena kuti paladaiso. (Aŵalanje Yesaya 51:3.) Yaŵaŵecete Yehofayi, yatamice mtima pasi Ayudaŵa soni kumasya kukayicila m’mitima mwawo. Mwamtuli? Kwende tukambilane yakulocesya yakwamba nganiji.

4. Ana Yehofa ŵasimicisye Ayuda kuti cakacenjeleje camtuli kucilambo cakumangwawo?

⁴ Kwacenjela. Acikapoloŵa ŵawujilaga ngaŵa ku paladaiso jusyesyene, nambo ku cilambo cakwakutalika, cacaliji masame kwa yaka 70. Cilambo cakuti ŵane mwa jemanjaji nganacimanyililaga. Mundaŵi ja Baibulo, m’yilambo yejinji mwapali yinyama yakogoya mpela masimba, masogo soni yisuŵi. Jwamlume jwa paliŵasa komboleka jwaliwusyaga kuti, ‘Ana cingacenjele camtuli ŵamkwangu soni ŵanace ŵangu? Nambi cingasicenjele camtuli ngondolo soni ng’ombe syangu?’ Yaliji yakupikanika kuganisya m’yoyo. Aganicisye sambano yaŵasasile Mlungu yayalembedwe pa Yesaya 11:6-9 soni muyatite pakwalimbikasya Ayudaŵa. (Aŵalanje.) Ni maloŵe gakulakatulidwa mwacinonyeloga, Yehofa ŵasimicisyaga acikapoloŵa kuti cakacenjeleje yalumo ni yilango yawo. Maloŵe gakuti lisimba licilya manyasi yikugopolela kuti ngasilikamula soni kulya ng’ombe syawo. Ayuda ŵakulupicika nganasosekwaga kuyijogopa yinyamayi. Yehofa ŵasimicisye ŵandu ŵakwe kuti cacitamaga mwamtendele m’cilambo ca Yuda atamose ali mkutama m’cipululu soni mu ukweti.—Esek. 34:25.

5. Ana ni yakulocesya yapi yayakamucisye Ayuda ŵaŵawujilaga kumangwawo kusimicisya kuti Yehofa cakapeje yindu yejinji yakusosecela paumi wawo?

⁵ Yakusosecela yejinji. Komboleka kuti acalumeŵa ŵaliwusyagasoni kuti, ‘Ana cingakomboleje kulilisya liŵasa lyangu m’cilambo cakuti cili masame? Nambi citukatameje papi? Ana citukakamuleje masengo, soni cigakaŵeje gambone kulekangana ni masengo gaukapolo gatukukukamula mwakulamulidwa ni Ababulo?’ Kupitila m’maloŵe gakwe gakulocesya, Yehofa ŵaliji ali ajanjile yiwusyoyi. Jwalakwe jwasimicisye ŵandu ŵakwe ŵakulupicika kuti ‘tacigowolaga yejinji’ ligongo ula jiciyikaga mwakutamilicika. (Yes. 30:23) Pakwamba ya malo gakutama soni masengo gakupindulisya, Yehofa jwasimicisye kuti, “Ŵandu ŵangu tacitaŵa nyumba nipo tacitamamo, tacipanda migunda ja mipeleya, tacilya yisogosi yakwe. Ngasataŵa nyumba kuti ŵandu ŵane atamejemo, nipo ngasapanda mipeleya kuti ŵandu ŵane alyeje yisogosi yakwe.” (Yes. 65:21, 22) Kusala yisyene, umi wawo waliji wakuti uciŵa wambone mnope kulekangana ni umi waukapolo wa ku Babulo. Nambi uli pakwamba ya yakusawusya yekulungwa yiyatendekasisye kujigalidwa ku ukapolo?

6. Ana Ayudaŵa ŵalwalaga ulwele wamtuli kwa ndaŵi jelewu, soni Yehofa jwasimicisye cici?

⁶ Umi wausimu. Ayudaŵa mkanajawule ku ukapolo, ŵaliji mkulwala mwausimu. Kupitila mwa jwakulocesya Yesaya, Yehofa jwasasile yakwamba ŵandu ŵakwe kuti, “Isalaeli, mtwe wenu ugumbele ni maŵanga nipo mtima wenu uli wakulwala soni wangali macili.” (Yes. 1:5) Mwausimu, Aisalaeliŵa ŵaliji ŵangalola soni ŵangapikana. Yeleyi yili m’yoyo ligongo ŵalesile kupikanila yaŵasalaga Yehofa soni ŵawugele meso gawo kuti akamanyilila yaŵasakaga Yehofa kwa jemanjajo. (Yes. 6:10; Yel. 5:21; Esek. 12:2) Naga Aisalaeli  akusimanasoni ni yakusawusya yekulungwa mpela yeleyi, ana Yehofa akacenjele camtuli? Ana Yehofa cacigamba kuleka kwanonyela? Yehofa ŵasimicisye kuti, “Pa lisiku lyelelyo ŵandu ŵangapikana tacipikana maloŵe kutyocela m’buku, taciwugula meso gawo ni kulola.” (Yes. 29:18) Yisyene, yaliji yakuti Yehofa cacaposya mwausimu ŵandu ŵakwe ŵaŵapitikwice mtima yisyesyene. Yaliji yakuti jwalakwe cacapaga umanyilisi soni yiwundo yakwalongolela kuŵa ni umi. Yehofa cacatendelaga yeleyi naga cacipitilisya kuŵa ŵakulupicika soni kusacilila kutenda yakwasalila jwalakwe.

7. Ana Mlungu jwakwanilisye camtuli yilanga yakwe kwa ŵandu ŵakwe ŵakutyocela ku ukapolo, soni ligongo cici yeleyi yili yakulimbikasya cikulupi cetu?

⁷ Ana Yehofa ŵakwanilisye yaŵasasileyi? Yayatendecele Aisalaeliŵa yikwanga ciwusyoci. Ayuda ŵakutyocela ku ukapoloŵa Mlungu ŵajaliwe mwa kwacenjela, mwa kwapa yakulya yejinji yakucilu soni yausimu. Mwacisyasyo, Yehofa ŵacenjele jemanjaji ku mitundu jakwasyungulila jijaliji jamacili mnope soni jakola ŵandu ŵajinji kwapunda jemanjaji. Nambosoni yinyama yamwitinji nganiyikamulaga yilango yawo. Kusala yisyene, Ayudaŵa ŵakuweni kwanilicikwa kwapanandipe kwa yakulocesya ya paladaiso yaŵalembile acalume mpela Yesaya, Yelemiya soni Esekieli. Kukwanilicikwa kwa yakulocesyayi kwaliji kwakusangalasya soni ni yaŵasosecelaga pa ndaŵijo. Patukulola yaŵatesile Yehofa kwa ŵandu ŵakwe munyumamu, cikulupi cetu cikusalimba mnope. Naga kwanilicikwa kwandanda kwa yakulocesyayi kwaliji kwakusangalasya m’yiyi, nambi uli pakwanilicikwa kwekulungwa kwakucitendekwa kusogoloku? Kwende tukambilane yakututendela Yehofa m’masiku getu gano.

8. Ana ŵandu ŵa Mlungu masiku agano akusangalala ni mtundu wapi “wacilambo”?

⁸ Ŵandu ŵa Yehofa ngakupanganya mtundu usyesyene wa ŵandu kapena kutama m’cilambo cawocawope. M’malo mwakwe, Aklistu ŵasagulwe akupanganya mtundu wausimu wawuli “Isalaeli jwa Mlungu.” (Aga. 6:16, NW) Acimjawo ŵali ‘ŵangondolo sine’ ali yalumo ni jemanjaji “m’cilambo” causimu, cacili dongosolo jakumlambila Yehofa Mlungu mwakukamulana. Kulambilaku kuli mbali ja umi wawo. (Yoh. 10:16; Yes. 66:8) Sambano, ana ni mtundu wamtuli wa “cilambo” catupele Yehofa? Cili paladaiso jwausimu. M’paladaiso jwausimuju, yaŵasasile Yehofa yakwamba umi wa paladaiso yikwanilicikwa mwausimu. Kwende tukambilane yisyasyo yine.

9, 10. (a) Ana yakulocesya ya pa Yesaya 11:6-9 yikukwanilicikwa camtuli masiku agano? (b) Ana ni umboni wamacili wapi wawukulosya kuti ŵandu ŵa Mlungu ali pa mtendele masiku agano?

⁹ Kutucenjela. Mu yakulocesya ya pa Yesaya 11:6-9, yikusatupa ciwulili cakusangalasya ca mkamulano ni mtendele wa pasikati pa yinyama yakwitinji ni ŵandu yalumo ni yilango yawo. Ana yeleyi yikukwanilicikwa mwausimu masiku getu gano? Kwabasi! Ndime 9, jikusala ligongo lyakwe yinyamayi ngasiyiwulasya kapena konanga. Lilembali likuti, “Ŵandu pacilambo cosope capasi taciŵa ŵegumbale ni lunda lwakwamanyilila Ambuje, mpela mujikusagumbalila nyasa ni mesi.” Ana “lunda lwakwamanyilila Ambuje” mpaka lucenje ndamo ja yinyama? Iyayi, ŵandu ni ŵakusacenga panyuma pakum’manyilila Mlungu Jwakwinani Mnope soni ŵakusakuya  ndamo jakwe ja mtendele. Ni ligongo lyakwe mu paladaiso jwausimu masiku agano, tukusakuwona kukwanilicikwa kwakamula mtima kwa yakulocesyayi. Mu ulamusi wa Ucimwene, ŵakumkuya ŵa Klistu akulijiganya kutyosya ndamo syawo syakogoya syaucinyama, ni kutamaga mwakukamulana soni mwamtendele ni ŵakutumicila acimjawo.

¹⁰ Mwacisyasyo, m’bukuji tulijiganyisye ngani ja ungajinjilila ya m’cilambo kwa Aklistu. Tupikanicisyesoni magongo ga m’Malemba gagakusatutendekasya kuti tukajinjililaga nawo ya m’cilambo. Nambosoni tukambilene yakulagasidwa kwasimene nako ŵandu ŵa Mlungu ligongo lya ungajinjilila nawo ya m’cilamboyi. Ana nganiyiŵa yakutesya lung’wanu kuti m’cilambo caciwawaci, kuti pana “mtundu” wa ŵandu wawukusakana kujigala mbali mu yakutendekwa yaciwawa yamtundu uliwose atamose yili yakuti umi wawo ciwuŵe pangosi ligongo lyakukanaku? Welewu uli umboni wamacili wakulosya kuti ŵandu ŵakulongoleledwa ni Mwenye jwa Umesiya akusangalala ni mtendele waŵawusasile Yesaya. Yesu ŵasasile kuti ŵakumkuya ŵakwe cacimanyika ni cinonyelo cacacilosyanaga jwine ni mjakwe. (Yoh. 13:34, 35) Yesu mwakuwusima mtima, akukamulicisya masengo “kapolo jwakulupicika ni jwalunda” kuti ŵajiganyeje Aklistu ŵasyesyene ŵali mumpingo wakwe kuŵa ŵamtendele, ŵacinonyelo soni ŵakuwusimana mtima.—Mat. 24:45-47.

11, 12. Ana cilamboci cikulaga ni cici, soni Yehofa ŵajaliwe camtuli ŵandu ŵakwe ni cakulya causimu?

 ¹¹ Yakusosecela yejinji. Cilamboci cikulaga ni sala jausimu. Baibulo jakalamwisye kuti, “Ndaŵi jikwisa jitinjitumisya sala pacilambo. Ŵandu taciŵa ni sala nambo ngaŵaga ja mkate, kapena njota ja mesi, nambo sala jakusoŵa maloŵe ga Ambuje. Une Ambuje mbecete m’yoyo.” (Amo. 8:11) Ana ŵandu ŵakutamilicika mu Ucimwene wa Mlungu akulagasoni ni sala jeleji? Yehofa ŵasasile kulekangana kwakupali pasikati pa ŵandu ŵakwe ni acimmagongo ŵakwe. Jwalakwe jwasasile kuti, “ Ŵakutumicila ŵangu tacijikuta nambo jemanja timciŵa ni sala. Mlole, ŵakutumicila ŵangu tacimwa nambo jemanja timciŵa ni njota. Ŵakutumicila ŵangu cacisangalala, nambo jemanja cimcitenda sooni.” (Yes. 65:13, NW) Ana akuweni kukwanilicikwa kwa maloŵega?

¹² Cakulya causimu cikwika kwetuwe mpela mesi ga m’lusulo lwalukupitilisya kusokoka soni kukula. Cakulya causimuci cili mabuku getu gakusala ya Baibulo, yindu yakupikanila, mafidiyo soni misongano ja mpingo ni jekulungwakulungwa. Nambosoni tukwete yindu yayikusasimanikwa pa Webusayiti jetu. Yosopeyi yili yakulya yejinji yausimu yayikusatulimbikasya m’cilambo casala jausimuci. (Esek. 47:1-12; Yow. 3:18) Pakukuwona kukwanilicikwa kwa yindu yaŵasasile Yehofa pakwamba ya cakulya causimu cakusatupa mwakutamilicika, ana ngayikwatendekasya kuŵa ŵakusangalala? Ana akulolecesya kuti ndaŵi syosope akulya pa tebulo ja Yehofa?

13. Ana akuweni camtuli kukwanilicika kwa cilanga ca Yehofa cakuti, ŵandu ŵangalola akulola soni ŵandu ŵangapikana akupikana?

¹³ Umi wausimu. Ŵandu ŵajinji masiku agano ali ŵangapikana mwausimu soni ali m’cipi causimu. (2 Akoli. 4:4) Nambope, Klistu akuposya kulemala soni yilwele yausimu pacilambo cosope. Ana pakwete paŵaweni ŵandu ŵangalola ali mkulola soni ŵangapikana ali mkupikana? Naga pakwete paŵaweni ŵandu ali mkwika pakumanyilila usyesyene wa m’Baibulo, ni kuleka yijiganyo yaunami ya dini yiyatendekasyaga kuŵa ŵangalola soni ŵangapikana mwausimu, nikuti pakwete payiweni yeleyi. Tukuŵeceta yeleyi ligongo Baibulo jikusati, “Palisiku lyelelyo ŵandu ŵangapikana tacipikana maloŵe gakutyocela m’buku, taciwugula meso gawo ni kulola.” (Yes. 29:18) Pacilambo cosope, caka cilicose ŵandu ŵajinji akupata cikamucisyo causimuci. Naga mundu akopwece mu Babiloni Jwamkulungwa ni kwinjila m’paladaiso jwausimu ukusaŵa umboni wakuti yaŵasasile Yehofayi yili yisyene.

14. Ana cikulupi cetu mpaka cilimbe patukuganicisya ya cakutendekwa capi?

¹⁴ Mtwe uliwose m’bukuji, ukulosya umboni wamacili wakuti Klistu ŵajinjisye ŵakumkuya ŵakwe m’paladaiso jusyesyene jwausimu m’masiku gambesi gano. Kwende ndaŵi syosope tuganicisyeje ya majali gejinji gatukupata m’paladaiso jwausimuju. Kutenda yeleyi, kucitukamucisya kuti tukulupilileje mnope yaŵasasile Yehofa yakwamba m’sogolo.

15. Ligongo cici mpaka tuŵe ŵakusimicisya kuti cilamboci ciciŵa paladaiso?

¹⁵ Kutandila kundanda cakulinga ca Yehofa cili cakuti cilamboci ciŵe paladaiso. Jwalakwe jwaŵisile Adamu ni Hawa mu mgunda wa paladaiso. Jwapele jemanjaji lilamusi lyakuti aŵelekane nigumbala pacilambopa soni kuti asamalileje yaumi yosope ya  pacilambopa. (Gen. 1:28) Nambo, Adamu ni Hawa ŵampikanile Satana. Yeleyi yatendekasisye kuti aŵe ŵakwimucila soni kuti ŵanace ŵawo wosope aŵe ŵangali umlama, ŵakulemwa soni aweje. Nambope, cakulinga ca Yehofa nganicicenga. Yaŵecete ndaŵi syosope yikusakwanilicikwaga. (Aŵalanje Yesaya 55:10, 11.) M’yoyo, tuli ŵakusimicisya kuti ŵanace ŵa Adamu ni Hawa cacitupa ni kugumbala pacilambopa. Jemanjaji caciyilolelaga mwacinonyelo yakupanganyikwa ya Yehofa m’cilambo ca paladaiso. Pandaŵiji, yakulocesya yayapelecedwe kwa Ayuda ŵaŵaliji mu ukapolo yakwamba umi wa paladaiso yicikwanilicikwa kusyesyene. Kwende tulole yisyasyo yakuyicisyayi.

16. Ana Baibulo jikusasala yamtuli pa ngani jakwacenjela ŵandu m’Paladaiso?

¹⁶ Kwacenjela ŵandu. Pambesi pakwe, maloŵe gakusangalasya ga pa Yesaya 11:6-9 gacikwanilicikwa kusyesyene mwakucilu. Acalume, acakongwe soni ŵanace ngasatendaga woga ni cilicose kulikose kucacijawulaga pacilambopa. Pangali cakupanganyikwa cilicose, cinga mundu kapena cinyama, caciciŵa cakogoya. Aganicisye pa ndaŵi jele cilambo cosope ciciŵa malo gawo gacacitamaga mwangali woga. M’cilamboci cacisangalalaga ni yindu yejinji mpela kung’ambila m’lusulo ni m’nyasa soni kwenda m’matumbi ni mwitinji mwakusalala mnope. Nambosoni pakuswele ngasatendaga woga. Maloŵe ga pa Esekieli 34:25 gacikwanilicikwa, mwamti ŵandu ŵa Mlungu ‘cacitamaga mwacitetelo m’cipululu ni gonaga muwukweti.’

17. Ligongo cici mpaka tuŵe ŵakusimicisya kuti Yehofa tacitupa yakusosecela yetu pandaŵi jele Ucimwene wakwe uciŵa uli mkulamulila pacilambo cosope?

¹⁷ Yakusosecela yejinji. Aganicisye ndaŵi jele paciŵa pangali yindu mpela usawuci, kulwala ligongo lyakusoŵa yakulya yambone m’cilu, sala kapena makuga kapena kuti mabungwe gakamucisya ŵakulaga. Yakulya yejinji yausimu yakusangalala nayo ŵandu ŵa Mlungu masiku agano yikusimicisya kuti Mwenye jwa Umesiya cacalisyaga ŵandu ŵacaciŵa pasi paulamusi wakwe ni yakulya yejinji. Yesu ali pacilambo capasi, ŵalosisye panandi kuti cacikwanilisya yeleyi. Jwalakwe jwalisisye ŵandu ŵajinji ŵasala ni tumikate soni tusomba twamnono. (Mat. 14:17, 18; 15:34-36; Mak. 8:19, 20) Ucimwene wa Mlungu paucilamulilaga pacilambopa, yakulocesya mpela ayi yicikwanilicikwa kusyesyene, “Pandaŵi jitimcipandaga mbeju syenu, Ambuje tamcitumicisya ula kuti simele, ni timcigowola yejinji. Pa lisiku lyelelyo, ng’ombe tisicikola mopo wejinji.”—Yes. 30:23.

18, 19. (a) Ana yakulocesya yayili pa Yesaya 65:20-22 yikusagopolela cici kwa wawojo? (b) Ana masiku getu gacilandana camtuli mpela “gayitela”?

¹⁸ Masiku agano, ŵandu ŵajinji yikusiyasawusya kupata malo gambone gakutama kapena kukola masengo gampaka ajikutileje nago. M’cilambo cakunonyela yakatangaleci, ŵajinji akusalipikana kuti akusakamula masengo gakupweteka kwandaŵi jelewu nambo akusapata malipilo gangakwanila kulisamalila liŵasa lyawo ligongo lyakuti ŵandu ŵasicile soni ŵawumbombo akusiŵalila masuku pa mtwe. Agambe kuganicisya mwayiciŵela yindu pacilambo cosope pacicikwanilicikwa cakulocesya cakuti, “Ngasataŵa nyumba kuti ŵandu ŵane atamejemo, nipo ngasapanda mipeleya kuti ŵandu ŵane alyeje yisogosi yakwe. Ŵandu ŵangu tacikola umi kwa ndaŵi jelewu mpela yitela, nipo ŵandu ŵakusagulidwa tacisangalalila masengo ga makono gawo kwa ndaŵi jelewu.”—Yes. 65:20-22.

 ¹⁹ Ana maloŵe gakuti tucikola umi kwa ndaŵi jelewu “mpela yitela” gagopolela cici? Tuwanicisye kuti ajimi ciŵandika citela cekulungwa mnope, ana mpaka alaje ni kuganicisya yandaŵi jacitemi citelaco, cele cikuwoneka kuti mwine capali anganga ŵawo ŵa anganga ŵawo wawojo mkanapagwe? Yeleyi yikugopolela kuti naga wawojo ali ciŵela mu ndamo jawo jangali umlama, ni kuti citelaci mpaka yikombolece kuŵape ciŵela cili mu ndamo jambone wawojo ali awile ni kuliŵalicika kuti ŵapali. Yehofa pakutusimicisya kuti m’paladaiso jajikwika tuciŵa ni masiku gejinji soni ga mtendele, yikulosya kuti akusatunonyela mnope. (Sal. 37:11, 29) Ndaŵi jiciyika pele citela ca masiku gejinji ciciŵaga mpela manyasi gagagambile kutama kwa masiku gamnono, pele m’we tucipitilisyaga kutama mpaka kalakala.

20. Ana yicikomboleka camtuli kuti ŵandu ŵakulupicika casangalale ni yilu yambone mu Ucimwene wa Mlungu?

²⁰ Cilu cambone. Masiku agano, yilwele soni ciwa yikusamkwayaga jwalijose pacilambopa. Yisyesyene yakwe ni yakuti wosope pacilambopa tukulwala. Tukuŵeceta yeleyi ligongo lyakuti wosope watujambucile ulwele wakogoya mnope wa ulemwa. Mtela wakupocesya ulwelewu cili ciwombolo ca mbopesi ja Klistu. (Alo. 3:23; 6:23) Mkati mwa Ulamusi wa Yaka 1,000, Yesu ni ŵakulamulila acimjakwe ŵa 144,000, cacikamulicisya masengo mwakwanila ciwomboloci pakwikasya majali pacilambopa. Cacimasyaga mwapanandipanandi yosope yakwayana ni ulemwa kwa ŵandu ŵakulupicika. Cakulocesya ca Yesaya cakuti ‘Pangali atamose jumo m’cilambomo jutaciŵeceta kuti, ‘Une ngulwala,’ nipo ŵandu wosope ulemwa wawo tiwucikululucidwa,’ cicikwanilicikwa kusyesyene. (Yes. 33:24) Aganicisye ndaŵi jele pangali jucaciŵa jwangalola, jwangapikana soni jwamlemale. (Aŵalanje Yesaya 35:5, 6.) Pangali ulwele wele Yesu ucimlema kuwuposya, cinga wakucilu kapena wamunganisyo. Ŵandu ŵakulupicika ŵa Ucimwene wa Mlungu cacisangalala ni umi wamlama.

21. Ana ni cici cacicitendecela ciwa soni ligongo cici cilanga celeci cili cakutamika mtima pasi?

²¹ Nambi uli pakwamba ya ciwa cacili cakusawusya cekulungwa cacikusayika ligongo lya ulemwa? “Mmagongo jwakumalisya” jwakulimbana ni ŵandu wosope ŵangali umlamaju, pacelewe kapana pakacelewa ngasakolasoni macili. (1 Akoli. 15:26) Nambo ana ciwa cili mmagongo jwakogoya kwa Yehofa? Alole yaŵalocesye Yesaya. Jwalakwe jwatite, “Ambuje tacicimasya ciwa mpaka ndaŵi jangali mbesi. Tacipukuta misosi m’meso mwa jwalijose.” (Yes. 25:8) Ana akuciwona ciwulili ca ndaŵiji mu nganisyo mwawo? Paciŵa pangali malilo, malembe soni kulila ligongo lya yindu yakutesya canasa. Mwakulekangana ni yeleyi, ŵandu cacikoposyaga misosi ligongo lyakusangalala pele Yehofa cacikwanilisyaga yindu yakusangalasya yaŵasasile yakwajimusya ŵandu ŵawe. (Aŵalanje Yesaya 26:19.) Pambesi pakwe yakusawusya yejinji yayikusayika ligongo lya ciwa yicimala.

22. Ana cicitendekwa cici Ucimwene wa Umesiya uli wukwanilisye cakulinga ca Mlungu pacilambo capasi?

²² Kumbesi kwa ulamusi wa yaka 1,000, Ucimwene uciŵa uli ukwanilisye cakulinga ca Mlungu pacilambo capasi. M’yoyo Klistu caciwucisya ulamusiwu kwa Atatigwe. (1 Akoli. 15:25-28) Panyuma pakuti ŵandu wosope ali ŵamlama, Satana cacimgopola kwisimbo  ni kwalinga ŵandu kakumalisya. Kaneko Klistu cacimjonanga Satanaju pampepe ni wosope ŵacaciŵa kumbali jakwe. (Gen. 3:15; Ciw. 20:3, 7-10) Nambo wosope ŵakusamnonyela Yehofa yisyesyene cacikola sogolo jambone. Yiciŵa yakusangalasya kukuwona kwanilicikwa kwa maloŵe ga m’Baibulo gakuti ŵandu wosope ‘cacipocela ufulu ni ucimbicimbi wa ŵanace ŵa Mlungu.’—Alo. 8:21.

23, 24. (a) Ligongo cici tuli ŵakusimicisya kuti yilanga ya Yehofa yicikwanilicikwa? (b) Ana wawojo ali ŵakusimicisya kutenda cici?

²³ Yilanga yeleyi yili yisyesyene ngaŵa sagamisi kapena yakumbila ya mtimape. Kwanilicikwa kwa yilanga ya Yehofa jili ngani jisyesyene. Ligongo cici? Akumbucile maloŵe ga Yesu gatwakambilene mu mtwe wandanda wa bukuji. Jwalakwe ŵasalile ŵakumkuya ŵakwe kupopela kwa Yehofa kuti, “Ucimwene wawo uyice; kusosa kwawo kutendekwe, pacilambo capasi mpela kwinani.” (Mat. 6:9, 10) Ucimwene wa Mlungu nganijiŵa ngani jagamba kuganicisya nambo jili jisyesyene. Apanopano Ucimwenewu ukulamulila kwinani. Kwa yaka yejinji Ucimwenewu ukwanilisye yilanga ya Yehofa. Yeleyi yikuwonecela cenene mumpingo wa Ciklistu. M’yoyo, mpaka tuŵe ŵakusimicisya kuti yilanga yosope ya Yehofa yicikwanilicika Ucimwene wa Mlungu pawucilamulilaga pacilambo cosope capasi.

²⁴ Tukumanyilila kuti Ucimwene wa Mlungu uciyika. Tukumanyililasoni kuti maloŵe gosope ga Yehofa gacikwanilicikwa. Ligongo cici? Ligongo lyakuti UCIMWENE WA MLUNGU UKULAMULILA. Nambo ciwusyo cakusosekwa jwalijose jwetuwe kuliwusya ni cakuti, ‘Ana Ucimwenewu ukulamulila une?’ M’yoyo, kwende tutende yosope yampaka tukombole kuti tuŵe ŵakulupicika ku Ucimwenewu sambano jino. Kutenda yeleyi, kucitukamucisya kupata majali ga ulamusi wamlama soni wacilungamo wa Ucimwenewu kwangamala.