第22章
王国实现上帝对地球嘅旨意
1,2．（甲）点解将乐园嘅希望睇得真实有时好唔容易？（乙）乜嘢可以强化我哋对上帝应许嘅信心？
一个忠心嘅弟兄嚟到王国聚会所。过咗充满压力嘅一日之后，佢感到非常疲累。佢唔单止受到尖酸刻薄嘅老板苛待，仲要承受照顾家人嘅压力，而且佢因为太太遭受病痛折磨而内心感到忧虑。随住聚会开始嘅音乐响起，佢松咗一口气，因为好开心可以同弟兄姊妹一齐喺王国聚会所。王国诗歌同乐园嘅希望有关，歌词使佢联想到将来嘅希望，好似身临其境一样。佢一直都好钟意呢首歌。当佢同家人一齐唱呢首歌嘅时候，原本感到疲累嘅心，因为呢个希望而得到安慰。
2 你曾经系咪都有过噉嘅感觉呢？我哋当中好多人都会有。的确，生活喺呢个旧制度，要将乐园嘅希望睇得真实真系一啲都唔容易。而家系“难以应付嘅非常时期”，呢个世界同乐园有天渊之别。（提摩太后书3:1）乜嘢可以帮助我哋将乐园嘅希望睇得真实呢？我哋点知上帝嘅王国好快就会统治全人类呢？上帝嘅子民喺古代已经目睹过一啲耶和华所作嘅预言点样应验。等我哋一齐嚟分析吓呢啲预言，回顾一下呢啲同其他几个类似嘅预言点样喺今日以令人振奋嘅方式应验。最后，随住我哋嘅信心得到强化，我哋会集中睇吓呢啲预言对我哋嘅未来有乜嘢意义。
耶和华喺古代点样实现佢嘅应许
3．乜嘢应许能够安慰被掳去巴比伦嘅犹太人？
3 请想象吓，喺公元前6世纪，被掳去巴比伦嘅犹太人过住点样嘅生活。佢哋好多人都同父母一样喺异乡成长，生活得好艰苦。佢哋因为对耶和华有信心而遭受巴比伦人嘅嘲笑。（诗篇137:1-3）耶和华承诺会聚集佢嘅子民，使佢哋返回故土。几十年过去嘞，忠心嘅犹太人依然谨记呢个美好嘅希望。耶和华讲过，佢哋故乡嘅情况会变得非常好。佢甚至将复兴之后嘅犹大地比作美丽嘅伊甸园！（请读以赛亚书51:3）上帝作出呢啲应许，显然系为咗使佢嘅子民感到安心，消除困扰佢哋内心嘅疑虑。点解呢啲应许咁强化人心呢？请睇吓以下嘅预言。
4．耶和华点样保证犹太人喺故乡会得享平安？
4 安全 被掳嘅犹太人返去嘅地方实际上唔系一个乐园，而系一片荒废咗70年嘅土地。佢哋当中大部分人连见都未见过呢片遥远嘅故土。当时，喺圣经提到嘅呢片土地，栖息住狮子、狼、豹同其他凶猛嘅野兽。身为家主可能会谂：“我点样保护妻子儿女呢？点样保护啲牛羊呢？”有呢啲忧虑系好自然嘅。不过，请谂吓耶和华喺以赛亚书11:6-9（请读）嘅应许几咁令人安慰。耶和华用优美嘅言词，向被掳嘅犹太人保证，佢哋同牲畜都会得享平安。经文提到狮子会食草，呢个意味住狮子唔会攻击犹太人嘅牲畜。忠心嘅犹太人完全唔需要惊呢啲凶猛嘅野兽。因为耶和华承诺，佢嘅子民喺犹大故土，甚至喺荒野同森林都会大享平安。（以西结书34:25）
5．乜嘢预言帮助返回故土嘅犹太人确信耶和华会充分满足佢哋嘅需要？
5 丰衣足食 佢哋亦都可能会有其他嘅忧虑，心谂：“喺重建嘅家园我有冇能力养起头家呢？我哋有冇地方住呢？会唔会有适合嘅工作？会唔会好过喺巴比伦人嘅统治下做苦工呢？”耶和华好清楚佢哋嘅忧虑，所以通过预言嚟解答佢哋嘅疑问。耶和华承诺会祝福服从佢嘅子民，使大地风调雨顺，结果土地会出产“丰富肥美”嘅食物。（以赛亚书30:23）关于住所同有意义嘅工作，耶和华向佢嘅子民承诺话：“佢哋会建造房屋，自己居住；栽种葡萄园，食自己所种嘅。佢哋建造嘅，唔会俾人占据；佢哋栽种嘅，唔会俾人占有。”（以赛亚书65:21,22）的确，佢哋嘅生活会比喺巴比伦作为俘虏美好得多。不过，最初导致佢哋被掳嘅嗰啲更重要嘅问题可唔可以得到解决呢？
6．长期以来，上帝嘅子民喺属灵方面患有乜嘢疾病？耶和华作出乜嘢应许使返回故土嘅犹太人感到安慰？
6 属灵健康 上帝嘅子民被掳之前有好长时间已经喺属灵方面患病。耶和华通过以赛亚先知同佢嘅子民讲：“你哋嘅头已经病重，心亦都全然衰弱。”（以赛亚书1:5）耶和华俾佢哋劝告嗰时，佢哋就塞住耳仔唔听，俾佢哋启迪嗰阵，佢哋又眯埋双眼唔理，所以佢哋喺属灵方面的确又聋又盲。（以赛亚书6:10；耶利米书5:21；以西结书12:2）如果返回故土嘅犹太人依然有同样嘅问题，佢哋又点会得享平安呢？佢哋唔系会再次失去耶和华嘅悦纳咩？耶和华嘅应许真系令人感到非常安慰，佢话：“到嗰日，聋人会听见书上嘅话，盲人眼中所见嘅唔再系幽暗漆黑。”（以赛亚书29:18）冇错，耶和华会帮助嗰啲接受纠正同埋衷心悔改嘅人恢复属灵嘅健康。只要佢哋继续服从上帝，接受佢嘅教导，就能够从耶和华得到带嚟生命嘅指引同启迪。
7．上帝点样实现佢对返回故土嘅犹太人嘅应许？点解呢个应许嘅实现可以强化我哋信心？
7 耶和华有冇信守承诺呢？通过历史记载就可以知道答案。上帝赐福俾返回故土嘅犹太人，使佢哋得享安全，丰衣足食，仲享有属灵嘅健康。例如，虽然周围嘅民族都比犹太人强大，而且人数比佢哋多，但耶和华保护咗佢嘅子民。另外，犹太人嘅牲畜亦都冇俾猛兽食咗。虽然，以赛亚、耶利米同以西结等等嘅先知所预言嘅乐园景象只系得到部分嘅应验，但上帝嘅子民大受鼓舞，因为呢个就系佢哋当时需要嘅。沉思耶和华为返回故土嘅犹太人所做嘅一切，可以强化我哋嘅信心。呢个预言只系初步应验都已经咁令人兴奋，将来完全应验嘅时候又会点样呢？请睇吓耶和华今日为我哋成就咗啲乜嘢。
耶和华喺今日点样实现佢嘅旨意
8．今日，上帝嘅子民享有一片点样嘅“土地”？
8 耶和华嘅子民并冇组成一个实际嘅国家，亦都唔系住喺同一个地方。反而，受膏基督徒组成咗一个属灵嘅国族，即系“上帝嘅以色列”。（加拉太书6:16）佢哋同“另外嘅绵羊”一齐喺呢片属灵嘅“土地”上，团结一致崇拜耶和华上帝。呢种崇拜就系佢哋嘅生活方式。（约翰福音10:16；以赛亚书66:8）耶和华赐俾我哋嘅系一片点样嘅“土地”呢？系属灵嘅乐园。耶和华应许我哋会喺伊甸园一样嘅环境下生活，今日呢个预言已经喺属灵方面应验咗。请睇吓一啲例子。
9,10．（甲）以赛亚书11:6-9嘅预言喺今日点样应验？（乙）乜嘢证据表明上帝嘅子民追求和睦？
9 安全 以赛亚书11:6-9嘅预言描述咗一种和平安宁嘅美好环境。喺呢个环境里面，人类、家畜同野生动物之间都可以和睦共处。今日，呢个预言有冇喺属灵方面应验呢？有！点解野生动物唔会造成任何伤害或者破坏呢？经文嘅第9节将原因话俾我哋知：“因为认识耶和华嘅知识必定遍满大地，就好似水弥漫海洋一样。”动物会唔会因为认识“耶和华嘅知识”而改变佢哋嘅行为呢？唔会。其实人类先至能够通过认识至高嘅上帝改变自己，而且效法佢用和平嘅方式嚟解决问题。所以，我哋可以喺今日嘅属灵乐园睇到呢个令人鼓舞嘅预言实现。喺王国嘅统治之下，基督嘅门徒学习点样除去野兽一样嘅凶残品性，同属灵嘅弟兄姊妹正享有融洽嘅关系同和平嘅生活。
10 例如，我哋已经喺呢本书讨论过同基督徒中立有关嘅事，包括保持中立嘅圣经根据，同埋上帝嘅子民因为保持中立而遭受嘅迫害。喺呢个充满暴力嘅世界，有一大群人就算面对死亡嘅威胁都依然拒绝使用任何形式嘅暴力，呢个唔系好令人难以置信咩？呢一切有力噉表明，弥赛亚君王嘅子民的确享有以赛亚书所讲嘅和平！耶稣话佢嘅门徒会因为彼此相爱而为人所知。（约翰福音13:34,35）喺会众当中，基督正通过佢“忠信睿智嘅奴隶”耐心噉教导所有真基督徒追求和睦，以仁爱，温和嘅态度待人。（马太福音24:45-47）
11,12．今日嘅世界喺边方面遭受饥荒？而耶和华点样向佢嘅子民提供充足嘅供应？
11 丰衣足食 呢个世界正遭受属灵嘅饥荒。至高嘅主宰耶和华喺圣经发出一个警告，话：“睇吓！日子快到嘞，我要将饥荒降喺地上。人遭遇饥荒唔系因为缺粮，干渴亦都唔系因为缺水，而系因为缺乏耶和华嘅话。”（阿摩司书8:11）上帝王国嘅子民系咪都同样要挨饿呢？耶和华预告佢嘅子民同佢嘅仇敌之间会有以下嘅鲜明对比：“我嘅仆人必得吃，而你哋就饥饿。我嘅仆人必得喝，而你哋就干渴。我嘅仆人必欢喜，而你哋就蒙羞。”（以赛亚书65:13）你有冇睇见呢啲话语应验呢？
12 我哋得到嘅属灵供应越来越丰富，好似滔滔嘅河水不断向我哋涌嚟。喺呢个属灵饥荒嘅世界里面，我哋基于圣经嘅出版物，例如录音、影像、聚会同大会，仲有网站嘅资料，呢啲灵粮好似潮水一样不断上涨。（以西结书47:1-12；约珥书3:18）你喺自己嘅日常生活中，睇见耶和华兑现承诺，提供丰富嘅灵粮，一定感到非常振奋！你有冇经常吸收耶和华所赐嘅灵粮呢？
会众帮助我哋喺属灵方面丰衣足食，得到安全同健康
13．关于恢复属灵视力同听觉，你见到耶和华点样实现呢个应许？
13 属灵健康 属灵上嘅眼盲耳聋系今日呢个世界嘅通病。（哥林多后书4:4）不过，基督喺全球各地医治紧属灵方面患病嘅人。你有冇见过盲人恢复视力，聋人恢复听觉呢？如果你见到有人认识圣经嘅确切知识之后，摆脱曾经遮住佢哋眼睛同塞住佢哋耳朵嘅错误宗教道理，噉你就已经见到以下嘅应许喺佢哋身上应验：“到嗰日，聋人会听见书上嘅话，盲人眼中所见嘅唔再系幽暗漆黑。”（以赛亚书29:18）喺全世界，每年都有成千上万嘅人得到呢啲属灵医治。每一个离开大巴比伦，同我哋一齐喺属灵乐园里面支持正确崇拜嘅人，都系活生生嘅证据，证明耶和华嘅应许已经实现！
14．沉思乜嘢证据可以强化我哋嘅信心？
14 呢本书嘅每一章都提出有力嘅证据，证明基督喺呢段最后嘅日子已经带佢嘅门徒进入咗一个真真正正嘅属灵乐园。我哋要不断沉思喺今日呢个乐园当中自己得到嘅各种福分，噉样，我哋嘅信心就会继续得到强化，确信耶和华对未来嘅应许必然实现。
“愿你嘅王国来临”
15．点解我哋可以肯定地球会成为乐园？
15 耶和华嘅旨意一直以来都系要使整个地球成为乐园。佢俾亚当同夏娃住喺一个美丽嘅园子里面，吩咐佢哋要繁衍后代，使子孙遍满地面，亦都要照顾各种各样嘅动物。（创世记1:28）不过，亚当同夏娃跟从撒但反叛上帝，导致佢哋所有嘅后代都变得唔完美，不得不面对罪同死亡。即使系噉，上帝嘅旨意从来都冇改变。佢嘅说话一旦讲出就必定会完全实现。（请读以赛亚书55:10,11）我哋可以确信，整个地球会成为乐园，亚当同夏娃嘅后代将会遍满地面，开拓大地，悉心照顾耶和华创造嘅动物。到时，耶和华向犹太人讲嘅关于乐园生活嘅预言就会完全实现！请睇吓以下嘅例子。
16．圣经点样描述我哋喺乐园享有安全嘅生活？
16 安全 以赛亚书11:6-9所描述嘅呢个温馨场景，最终会喺现实当中完全实现。无论男人定女人，大人定细路，去到世界嘅任何地方都会受到保护，感到安全。无论人类定系动物，所有嘅生物都和睦共处，唔会互相伤害。请想象吓，到时你会将整个地球都当成自己屋企，你可以喺大海、湖泊、河流畅泳，可以自由自在噉穿越山脉，或者喺草原上漫步，无论喺边度你都完全唔需要担心自己嘅安全。就算黑夜降临，你都唔会感到不安。以西结书34:25嘅预言将会实现，使上帝嘅子民甚至可以“喺旷野安居，喺森林入面瞓觉”。
17．点解我哋可以肯定，王国统治遍及全球嗰时耶和华会满足我哋嘅一切需要？
17 丰衣足食 请想象一下，唔再有贫穷、营养不良或者饥荒，连福利制度都唔需要嘅时候会系一番点样嘅景象。上帝嘅子民今日所享有嘅属灵富足，证明弥赛亚君王一定会满足佢子民嘅一切需要。当耶稣喺地上嘅时候，佢只系用咗几个饼同几条鱼，就喂饱咗几千个饥饿嘅人，证实佢有能力使全人类丰衣足食。（马太福音14:17,18；15:34-36；马可福音8:19,20）当上帝嘅王国喺全球施行统治嘅时候，以下嘅预言就会完全实现：“你撒种喺地上，主必降雨，使土地出产丰富肥美嘅食物。到嗰日，你嘅牲畜都会喺广阔嘅牧场上食草。”（以赛亚书30:23）
18,19．（甲）以赛亚书65:20-22嘅预言对你有乜嘢意义？（乙）我哋嘅寿命会“好似树木嘅寿命”系乜嘢意思呢？
18 今日，好多人都难以想象自己会拥有一个舒适嘅家或者有一份心满意足嘅工作。喺呢个腐败嘅制度下，好多人长时间辛苦工作，但只能够为自己同家人赚到好少嘅报酬，相反，大部分嘅利益都俾嗰啲富有而且贪婪嘅人吞占晒。请想象吓，以下预言喺全世界应验嗰时嘅景象：“佢哋会建造房屋，自己居住；栽种葡萄园，食自己所种嘅。佢哋建造嘅，唔会俾人占据；佢哋栽种嘅，唔会俾人占有。我子民嘅寿命，会好似树木嘅寿命。我所拣选嘅人一定可以充分享受自己劳碌嘅成果。”（以赛亚书65:20-22）
19 我哋嘅寿命会“好似树木嘅寿命”，呢句话系乜嘢意思呢？当你企喺一棵巨大嘅树下面嗰时，你会谂呢棵树到底已经存在咗几耐，可能喺你爷爷嫲嫲嘅父母出世之前，呢棵树已经存在咗好耐嘞。你会唔会好自然就产生一种肃然起敬嘅感觉呢？或者你可能会谂到，就算有一日你唔喺世上，已经成为人哋嘅回忆之后，呢棵大树仲系会喺度伸展枝叶继续生长。但系，耶和华仁爱噉保证，我哋喺将来嘅乐园会得到永生，大享平安！（诗篇37:11,29）喺将来嘅日子，即使系呢啲长寿嘅大树，对我哋嚟讲都只不过好似小草噉样转瞬即逝，而我哋就会享有永远嘅生命！
20．上帝王国嘅忠贞子民会点样享有完美嘅健康？
20 完美嘅健康 今日，疾病同死亡嘅阴影笼罩住整个世界。喺某种意义上嚟讲，我哋所有人都感染咗一种叫做罪嘅不治之症。唯一嘅解救方法就系基督嘅赎价。（罗马书3:23；6:23）喺千年统治期间，耶稣以及同佢一齐作王嘅人会使赎价嘅益处喺忠心嘅人身上完全发挥出嚟，逐渐消除所有罪嘅影响。以赛亚嘅呢个预言将会彻底应验：“唔会再有居民话：‘我有病。’住喺地上嘅人，罪都会被赦免。”（以赛亚书33:24）请想象吓，到时唔会再有盲眼、耳聋、跛脚嘅人。（请读以赛亚书35:5,6）无论系身体上、精神上、抑或感情上，所有嘅疾病耶稣都有能力医治。上帝王国嘅忠贞子民都会享有完美嘅健康！
21．死亡最终会点呢？点解你可以从呢个应许得到安慰？
21 因为罪，我哋都会患病，亦都无可避免要面对死亡，噉死亡最终又会点呢？死亡系我哋“最后嘅仇敌”，唔完美嘅人类最终都难免一死。（哥林多前书15:26）不过对耶和华嚟讲，死亡系咪一个冇办法对付嘅仇敌呢？请留意以赛亚所预告嘅：“佢一定会永远吞灭死亡。至高主宰耶和华要擦去所有人面上嘅眼泪”。（以赛亚书25:8）你能唔能够想象呢个情景呢？到时，唔会再有葬礼、坟墓同悲伤嘅泪水，而会充满喜乐嘅眼泪！因为耶和华实现佢激动人心嘅应许，使死去嘅人重获生命！（请读以赛亚书26:19）最后，死亡所带嚟嘅无尽痛苦都会被通通消除。
22．弥赛亚王国实现上帝对地球嘅旨意嗰时，会发生乜嘢事？
22 到千年统治结束嘅时候，王国已经实现上帝对地球嘅旨意，基督就会将统治权交还俾佢父亲。（哥林多前书15:25-28）到时，撒但会从无底深渊释放出嚟，已经恢复完美嘅人类就要面对一场最终嘅考验。之后，基督就会采取行动，最终将邪恶嘅撒但同佢所有嘅支持者彻底毁灭。（创世记3:15；启示录20:3,7-10）而所有忠贞爱戴耶和华嘅人都会有一个光明嘅前景。对于呢个前景，圣经作咗最好嘅描述，就系忠心嘅人会享有“上帝儿女荣耀嘅自由”。（罗马书8:21）
上帝嘅王国会实现耶和华关于人类同地球嘅所有应许
23,24．（甲）点解上帝嘅应许一定会实现？（乙）你决心点样做？
23 呢啲应许唔单单系希望、愿望或者梦想。耶和华嘅应许一定会实现！点解呢？喺呢本书第一章我哋讨论过耶稣所讲嘅话。佢教导门徒向耶和华祷告，话：“愿你嘅王国来临。愿你嘅旨意喺地上实现，好似喺天上一样。”（马太福音6:9,10）上帝嘅王国唔系人想象出嚟嘅，而系真实嘅！呢个王国而家正喺天上施行统治。一百年来，我哋可以喺基督徒会众当中清楚睇见，上帝嘅王国喺好多方面已经实现咗耶和华嘅应许。所以我哋可以确信，当上帝嘅王国来临，完全统治地球嗰时，耶和华嘅所有应许就会实现！
24 我哋知道上帝嘅王国一定会来临，耶和华嘅每个应许一定会实现。点解呢？因为上帝嘅王国统治嘞！我哋可以问吓自己：“我嘅生活方式系咪表明自己接受王国嘅统治呢？”我哋而家就要喺生活上尽力表明自己系王国嘅忠贞子民，噉就可以从王国完美正义嘅统治永远得益！
