1, 2. (a) Tipagine duhe ti ni ti kura regbo ni kpakarapai ka bi Paradizo ni ndikidipai? (b) Ginihe rengbe ka undo rani ani nyakasi gaani idapase rogo ga Mbori akidohe?

RURU wirina da ba dunguratise yo, ko na mbugo be agu apai ko naamangaha. Gako bairasunge niima manga fuko gbegberẽ, ko ni fudifudiko be agu akpakarapai nabipa ngerafuo gako aborokporo, gbiati gu kaza namanga diako. Wa manzigo nga ga bambata bia apaa, ko ukaga ome ko, na ko na ngbarago tipa kadu Bambu Kindo yo na awirinako. Gu bia re tipa gu maabangirise nga ga raka Paradizo yo, na afugo gu bia re nasanako ko berẽkuriipa gu maabangirise re, ki ni bi tiko wa ko gu du yo. Ko aima kpinyemu gi bia re, na wa ko gbiati gako aborokporo abihe, gu maabangirise nga ga raka kumbatayo re fu wasa fuko.

² Ya mo pai amangingo ro wa gure? Si aima manga dungu rani. Nirengo, raka rogo gi zegino re rengbe ka saha furani ni mbumbupai ani bi gu Paradizo du kumbatayo wa ndikidipai. Gi regbo re nga “kusa rago” du ni gbegberẽhe, na gu zegino ani araka rogoho si wa Paradizo te. (2 Tim. 3:1) Ginihe rengbe ka undo rani ani bi gaani maabangirise ni ndikidipai? Sidu, wai du ini ani he nzunzu nga ga Mbori Kindo nika zoga aboro dunduko barambeda? Ani bingo bete sangbaanebi be Yekova nga gu gako aboro abihe bakuru kusayo si ni digisitihe. Fuani ani nika fugöpai tipa gu sangbaanebi re gbiati agu akuraha du wakina ha nadigisotihe awere. Niyangaraha, wa si nika nyakasa gaani idapase, ani nika gbeberã rani sa wai gu sangbanebi re nika digiso tihe tipa rani kumbatayo.

3. Gini kidohe nanyakasi agu aYudo naaraka ni zizi yo Babera yo?

³ Oni berẽnga pa wai raka adu fu agu aYudo naadu ni zizi yo ku Babera yo rogo sita kama agarã M.B.K. Badunguyo naasono kina koyo, a wa si adu tipa avunguyo, na raka aima kpakara. ABabera anaasawia yo asawia tipa gayo idapase kuti Yekova. (Tam. 137:1-3) Vuru gu dungu agarã re, ruru aYudo akakuti gi wene maabangirise re nga: Yekova akidohe tipa ka karaga gako aboro berewe ku rogo gayo ringara. Yekova aya raka nika du yo ni bawenehe gbe. Ko aringbisi gu ringara nga ga aYudo i nika bungia  ha kuti ati Edene nangia paradizo! (Oni gedi Yesaya 51:3.) Gu ngbatunga kidohe re adu tipa kafu maabangirise fu ga Mbori aboro, na ka dia gu tikö naadu kpotoyo yo kusayo. Rogo gini gene? Oni kparianga bete gu kura kparakpara sangbaanebi.

4. Wai du Yekova akido aYudo tipa ngbabase rogo gayo ringara?

⁴ Ngbabase. Si adu nga agu aYudo re nika ga, angianga ku rogo ndikidi paradizo ya, ono ku rogo gu ringara i aima gbarasaha agarã 70 kusayo, nga gu ringara dunguyo aabingo ho mbata ya. Abahu, awaru, amama, na gu kura kere anya aima nge rogo agu aringara agu apangbanga nga ga Baibiri amangi rogoho. Bariikporo aima rengba ka berã nga, ‘Mi abanda diare na awire wai yo? Ginipai nika manga tipa gimi akandoro na abagara, mi nikaa banda ra wai?’ Ngbatunga agu abakabangirise re agberãnga te. Oni berẽnga pa gu ga Mbori kidohe du rogo Yesaya 11:6-9 na wai si arengbe ka fu wasa fuyo. (Oni gedihe.) Na gi wene siasia afugo re, Yekova akido agu aYudo re nga i na awiriyo nika du ni bandabanda yo. Si adu nga bahu ari kazimorũ du rogoyo nga u aimongo gayo abagara te. Ndupai aadunga ho tipa ruru aboro nigunde be kere anyarinde te. Yekova akidohe nga gako aboro nika du ni bandabanda yo rogo gu ringara i nika bungia ha re, zavura rogo angbakungbo ho na rogo abire he a.—Yeze. 34:25.

5. Gini sangbaanebi naundo agu aYudo nayego Babera yo i du na kido nga Yekova nika ngera angerafuo gayo azingo wenengai?

⁵ Riahe kpaima. Gu kura abakabangirise arengbe kadu nga: ‘Ya mo mi arengba ka riga gimi aborokporo yo? Wari ani ka raka ni? Boro sunge adu yo, na ya mo si angba kisusi gu kere asunge agi arungosi rani re afuhe furani rogo gayo ringara?’ Rogo gu sangbanebi re naabaha, Yekova aima karagapai kuti agu asanahe re dunduko. Yekova akido gako aboro giasangba nga mai nikaa na ana yo; ni sangbanaha, kpotosende nika sa ahe ‘si idi ki zu kpaima.’ (Yes. 30:23) Nibipa abambu na wene sunge, Yekova akido gako aboro nga: “I adúdua abambu ki niraki rogo; i arũka bakakue aati yo ki niri zuzuhe. I adúa nga bambu kura aboro ki raki rogo ho te; i arũ nga he kura aboro ki ri he te.” (Yes. 65:21, 22) Nirengo, si adu nga raka nika du fuyo ni wenehe rogo dungu agene yo kisusi wai raka adu fuyo Babera yo. Na ginipai naadu tipa gayo nyanyakipa kpakarapai naasa gupai nga i ga nayo ku Babera yo?

6. Gini kaza naima digo nirungosi ga Mbori aboro, na ginipai Yekova akido agu aYudo nakaragatiyo nani?

⁶ Pagume na Mbori. Ga Mbori aboro aima digo ni woki rogo toro yo mbata fu i ga nayo ku Babera yo. Vurube gu nebi nangia Yesaya, Yekova aya fu gako aboro wẽ: “Rironi dunduko du na kaza, kpotoroni yo dunduko narungbura.” (Yes. 1:5) Bangiriyo na tuyo adu ni kisikisihe rogo toro yo, mbiko i aaidanga ka degatuyo sa ga Yekova arugute te na i kini kisi bangiriyo akiso ti gu imarago ko aafuhe. (Yes. 6:10; Yere. 5:21; Yeze. 12:2) Rogo gu gene re, ka gu bangisa kpakaraapai re amangi agu aYudo naakaragatiyo, ka apai angbanga nayo te. Ya mo ka i adu na ngbanya berewe na Yekova? Nangba wai ga Yekova kidohe angba fuyo nga:  “Ti gu rago re airangbianga agia agu apai du kitabu yo, bangiri airavurari abi he bibiri rago yo na ku bitimo yo.” (Yes. 29:18) Nirengo, si adu nga Yekova nika husa gu gako aboro naima saberã re rogo toro yo. Si adu nga ka i amanga gupai ko apehe na kini gisangbako, ko nika fu agu arugute nika banda ungayo na kini yugupai fuyo.

7. Wai du ga Mbori akidohe fu aYudo adigisitihe, na tipagine si aida si nyakasi gaani idapase ti ni?

⁷ Ya mo Yekova amangi agu apai ko akidohe tipaha? Ani rengbe ka gbia karagapai ka si du nga ani wisigi wai apai amangi. Agu aYudo nakaragatiyo ku rogo gayo ringara re aima du na wene bandahe, riahe kpaima, na gayo pagume na Mbori kidu ni wenehe. Ni kpiapai, Yekova aima bandayo be agu aboro naaraka patiyo nangia airaome na ki nge susi yo. Anyarinde aanyasanga riipa gayo zogozogo anya te. Nirengo, agu aYudo re abi kina wiri papara gu sangbaanebi naadu tipa gu raka nga ga paradizo agu akumba nangia Yesaya, Yeremaya, na Yezekere akehe, ono agu apai ga Mbori aboro abihe si ni digisitihe re aima ngba na si angia agu apai i aaidaha ti gu regbo re. Ka ani aberãkurii agu apai Yekova amangihe fu gako aboro bakuru kusayo re, gaani idapase nika da ni nyanyakihe. Ka si du nga gu wiri papara sangbaanebi nadigisi tihe re aima ngba, bakere digisidigisihe nika du wai tigaha? Oni kparianga agu apai Yekova namangihe furani areme.

8. Gini ngbatunga “ringara” ga Mbori aboro agbia ngbarago behe areme?

⁸ Anga ga Yekova aboro areme nga bangisa ngbatunga sa te, na i arakanga rogo bangisa ringara sa a te. Kuba gure, mbedimbedi aKristano nga “ga Mbori Yisaraere.” (Gara. 6:16) Agu abakureayo nga “kura akandoro” koditiyo nayo rogo gu ringara nga ga toro nga gu i airiso Yekova rogoho ni kodikodi yo. Gu irisombori re nga gayo gene raka. (Yo. 10:16; Yes. 66:8) Na gini ngbatunga “ringara” du Yekova nafuhe furani? Si nga gu paradizo nga ga toro. Ane, gu ga Mbori akidohe naadu fu aYudo tipa sa gayo ringara wa ati Edene ima ringbisatihe rogo toro yo. Oni bingo bete akpiapai.

9, 10. (a) Wai du gu sangbanebi nga ga Yesaya 11:6-9 adigiso tihe areme? (b) Gini gopai nga ga zereda ani abihe areme dagba ga Mbori aboro?

⁹ Ngbabase. Rogo gu sangbanebi du rogo Yesaya 11:6-9, ani nabi wai abi si afura tipa bawene kodatise gbiati zereda dagba anyarinde na aboro kodihe na gayo zogozogo anya a. Ya mo gupai re nadigiso tihe areme rogo toro yo? Ii! Rogo veresi 9, ani nawirika ndu gupai agu anya re nikaa manganga boro na gbegberẽpai watadu ka gbarasapa ahe ya nga: “Bambiko kpotosende ahí be ina pa Yekova wa aime nahisa gango baime.” Ya mo “ina pa Yekova” na aria gu mangaapai nga ga anya? Oó, aboro du namanga ariapai ho i ainopa gu ko ni nga Bahe Kisusi na kini wiriki gako gene mangapai nga ga zereda. Si nga ndu gupai ani abi wai  gu sangbanebi re adigisotihe rogo gaani paradizo nga ga toro areme. Tii gu zogarago nga ga Kindo, apekefuo Kristo nawirika wai ka mbu zinga, agu asino du wakina ga anya tipa ka raka rogo zereda na kodatise na agu awirinayo nga ga toro yo.

¹⁰ Ni kpiapai, rogo gi buku re, ani ima wisigopai tipa zanga rimisotise ku rogo agu atagbagapai nga ga zegino, gbiati agu arugute nga ga Ziazia Kekeapai naza rani ti mangaha na agu arungosiro ga Mbori aboro agbia ha mbiko zanga rimiso tiyo ku rogoho. Anga iˈiriwopai ngaha ka bi gupai nga rogo gi zegino nga ga zuu re, “rikaaboro” kinaho niima ká ka rimiso tiyo ku rogo gu mangaapai nga ga zuu si ki vura du vurũ nga pa zanga rimiso yo tiyo ku rogoho rengbe ka ye na kpio fuyo te? Nairiwo wai si afu ngbarago ka ino gupai nga agu azogo nga ga Masiya Kindo na ngbarago kadu na gu zereda beyo furayo tipaha rogo Yesaya re! Yesu afura tipa pai kumbatayo nga, i aino apefuoko ti gu nyemuse nika du dagbayo. (Yo. 13:34, 35) Rogo dungurati, Kristo namangasunge na “kangara moyambu du na tatamana” ka yugupai fu aKristano dunduko i du na zereda, nyemuse, gbiati wenesino.—Mt. 24:45-47.

11, 12. Gini ngbatunga ngbongi namanga zegino areme, ono wai du Yekova afu riahe kpaima fu gako aboro?

¹¹ Riahe kpaima. Zegino nakoba akoba areme be gu ngbongi ga ga toro. Baibiri nazahe nga: “‘Oni ngére, arago naye,’ wo  poi Gbia Mbori, ‘ho mi ka keda ngbongi ni ku rogo ringara; ngbongi riahe te, ngbongi gomoro ime a te, ono ngbongi pa gia agu apai nga ga Yekova.’” (Amosa 8:11) Ya mo azogo nga ga Kindo na nyokora a be gu ngbongi nga ga toro? Yekova apepa gu kparakparapai du dagba gako aboro na avurako nga: “Gimi amoyambu ari he, ono oni adú na gomoro; oni ngére, gimi amoyambu ambira he, ono oni adú na gomoro ime; oni ngére, gimi amoyambu angi, ono oni adù na zee.” (Yes. 65:13) Ya mo oni bi agi afugo re si ni digisitihe?

¹² Ani na gu riahe nga ga toro areme kpaima nga gu nakio kina kumbatayo. Gaani awaraga du mburuhe rii Baibiri, agu i adefugo ho gbiati avidio, gaani adunguratise na kikindigihe, gbiati agu ahe i akusaha rogo gaani bangiriba nga ga Internet, si dunduko nga gu riahe nga ga toro du berani kpaima rogo gu zegino nanyokora be gomoro rogo toro yo re. (Yeze. 47:1-12; Yoe. 3:18) Rago angbanga tiro ka bi gu ga Yekova akidohe du tipa gu riahe nga ga toro du kpaima si ni digisitihe rogo gamo raka yo te? Ya mo mo naamanga ome kaa rihe dedede rii ga Yekova mbisa?

13. Wai du oni nabi ga Yekova kidohe tipa kisikisi abangirise na atue si ni zaki areme?

¹³ Pagume na Mbori. Dungu aboro areme nga airavurari na ni airangbiongo rogo toro yo. (2 Kor. 4:4) Ono wa vura duhe wo, Kristo nahusa akaza rogo zegino dunduko. Ya mo mo bingo airangbiongo i ni gipai na airavurari kini ngere? Ka si du nga mo bi aboro i nidi gu ndikidi inohe nga ga rengo du rogo Fugo Mbori yo kugume, kini mbu agu aziree yugopai naasayo i du ni airavurari na ni airangbiongo kuti rengo, gure nga mo ima bi gu kidohe du re si nimangi: “Ti gu rago re airangbianga agia agu apai du kitabu yo, bangiri airavurari abi he bibiri rago yo na ku bitimo yo.” (Yes. 29:18) Rogo zegino dunduko, akama akutu nga ga aboro rogo agarã dunduko nagbia gu ziga nga ga toro re. Agu aboro ni basasa mbu Bakere Babera ki ye fuo rani ani irisimbori rogo gu paradizo nga ga toro, i nga gu gopai nayugo na ni nga ga Yekova kidohe nada ti rengo!

14. Gini gopai rengbe ani ka berãkuriihe si nyakasi gaani idapase?

¹⁴ Agu akapita ni basasa nga ga gi buku re na nyanyaki gopai rogoho nga Kristo ima ye na apefuoko ku rogo ndikidi paradizo nga ga toro rogo gi yangara arame re. Ani berẽnga kurii gu dungu agene ani agbia maku ngbaha rogo gi paradizo re areme. Ka ani amangaha wo, gaani idapase kuti ga Yekova akidohe du kumbatayo nika da ni nyanyakihe.

15. Tipagine rengbe ani kadu ti ni na kido nga kpotosende nika da ada ni paradizo?

¹⁵ Ga Yekova ringbisapai ti tonatonaha aima du nga ka sa gi zegino re naabaha ni paradizo. Ko amoi Adamu na Eva rogo gu ati nangia paradizo, na ko afu zinahe fuyo i hiisi kpotosende na awiriyo na kini ngerefuo kusikusiahe. (Bam. P. 1:28) Kuba gure,  Adamu na Eva akoditiyo kuti ga Satana samungu na ki mangi atitayo dunduko ngbaome i di zangarengba, ingapai, na kpio. Ono tie, ga Mbori ringbisapai aˈarianga tihe te. Bara sa kindi Mbori nagumbapai, si du wa ka si mangi. (Oni gedi Yesaya 55:10, 11.) Sidu, ani rengbe kadu na kido tie nga, atita Adamu na Eva nika hiiso kpotosende na ki raki rogoho, kini ngerefuo ga Yekova kusikusiahe wenengai rogo gu paradizo nika du rogo zegino dunduko. Ti gu regbo re, gu sangbaanebi Mbori apehe fu agu aYudo naadu nizizi yo tipa wai gayo ringara nika du wa paradizo, si nika digiso tihe nzunzu! Oni kparianga bete agi akpiapai re.

16. Wai du Baibiri asakapai tipa gu ngbabase ani ka du na ni rogo Paradizo?

¹⁶ Ngbabase. Niyangaraha, gu wenewene afugo du rogo Yesaya 11:6-9 nika digiso tihe nzunzu ni rengo. Akumba, adee, na agude nika du ni bandabanda yo rogo agu aba dũ i nikaa ta rogoho auru kpotosende. Kusikusihe ho, boro watadu nya nika imisa gu kuraha te. Oni berẽnga kina pa gu regbo oni ka bi gi zegino re naabaha wa kpuroni, gu ba rengbe mo ka guzo rogoho rogo adi na abaime; ka dakpa rii abaagangara yo; na kini ta rogo anvuo zanga gunde. Ho yuru nikaa ni da ni, ka mo adunga na gunde ya. Afugo Yezekere 34:25 nika da ti rengo, tipa ka sa apai taata fu ga Mbori aboro i “niraki zezeredi rogo ngbakungba ki nira rogo abire yo.”

17. Tipagine rengbe ani ti ni kadu na kido nga Yekova nika ngera angera kpaima fuo gaani azingo ho Kindo nika tona zogarago ni auru kpotosende?

¹⁷ Riahe kpaima. Oni berẽnga pa gu regbo rungo nikaa dunga ti ni berewe ya, zingo riahe, ngbongi, watadu agu ariigbu nangerafuo aboro rungo. Gu kumu ariahe nga ga toro ga Mbori aboro arihe areme nga gu nyanyaki kidohe nayugo na ni nga gu Bakindo nga Masiya nika riga gako azogo rogo agene dũ. Ho Yesu adu ni auru kpotosende ane, ko aima manga agu apai naayugo wai rengbe ko ka digiso agi akidohe re, mbiko ko arigi akutu aboro na wiri bete kpakuto na atĩo gbua. (Mt. 14:17, 18; 15:34-36; Mk. 8:19, 20) Ho ga Mbori Kindo nika zoga kpotosende ni naabaha, sangbaanebi wa gere nika digiso tihe: “Ko nikafu mai tipa gaoni tunga ahe nga gu oni narũ he ku sende yo, na zende ahe nga ga sende, si aida ki zu kpaima. Ni gu rago re gaoni zogozogo anya arika rogo bakere abanambu.”—Yes. 30:23.

18, 19. (a) Ginipai gu sangbanebi du rogo Yesaya 65:20-22 ayugoho foro? (b) Rogo gini gene du arame rani nika du “wa gu rame nga ga ngua”?

¹⁸ Si ima kpakara fu dungu aboro areme i berẽpa dua wene kporo watadu ka gbia wene sunge. Rogo gi gbegberẽ zegino re, dungu aboro nabihe nga i namangasunge nyanyaki na tipa gbanga regbo na si naundo yo na gayo aborokporo gbua tooni, kina airakumuko na airaangbu nagbia bakere undo ti ni. Oni berẽnga pa wai apai nika du ho gi sangbanebi re ka manga ni rogo zegino dunduko: “I adúdua abambu ki niraki rogo; i arũka bakakue aati yo ki niri zuzuhe. I adúa nga bambu kura aboro ki raki rogo ho te; i arũ nga he kura aboro ki ri he te; bambiko wa gu rame  nga ga ngua wo rame gimi aboro nikadu, gimi siasia aboro ará zezeredi tipa gbanga rago mbiko gu mangapai nga ga beyo.”—Yes. 65:20-22.

¹⁹ Rogo gupai yo nga arame rani nika du “wa gu rame nga ga ngua” nga gine? Ho mo aru ni tii bangua, ya mo iriworago naaziongo ro mo ki tona ka berãkuriipa agu agarã gu ngua re naraki tipaha isoke singia mbata fu atita atitaro du ti ni te? Mo rengbe ka bihe nga, ka mo nye ni boro zangarengba, gba na kuragba mo nika kpi akpi, ono gu ngua re nikaa raka tipa gbanga regbo rogo zereda zavura fuo zirã mo kusayo vurũ. Nangba sino Yekova wai ko nakido rani nga, rogo gu Paradizo naye, arame rani nika du ni gbangaha na rogo zereda! (Tam. 37:11, 29) Regbo adaada nga gu ani kaa bi agu angua niima raka tipa dungu agarã wakina nvuo, nita kura kini kpi ono ani tigani kini raki nyeanye kindi!

20. Wai du ruru azogo nga ga Kindo nika da na rengberengbe kpotoyo?

²⁰ Wene kpotose. Areme, akaza na kpio narungosi aboro dunduko rogo gi zegino re. Ka pepai ngba kura gene, ani dunduko nawoka awoka be gu kere kaza nga ingapai. Gu yangara ziga duho nga ga Kristo motumo. (Rom. 3:23; 6:23) Ti regbo ga Yesu Zogarago Tipa Agarã Kutu, ko gbiati gako abadiazogarago nika undo aboro i gbia undo ti gu motumo re, i nika dia surungba ingapai ti ruru aboro kusayo yeeye. Ga Yesaya sangbanebi nika da ti rengo nga: “A nga boro kporo sa ayá, ‘Mi nawoka’ te; agu aboro naraka rogo ho i avú yo avu ti gayo irairapai.” (Yes. 33:24) Oni berẽnga kina pa gu regbo airavurari, airangbiongo, watadu gbarĩgbarĩ aboro nikaa dunga ti ni berewe ya. (Oni gedi Yesaya 35:5, 6.) Kaza ho nika gasa Yesu ti husa ha te, ko nika husa ngbatunga akaza dunduko. Ruru azogo nga ga Kindo nika du na rengberengbe kpotoyo!

21. Ginipai nika manga tipa kpio, na tipagine si afu wasa ti ni foro?

²¹ Na ginipai tigaha du tipa surungba ingapai nga kpio ka aboro anenga ha ya? Si nga “yangara vura” rani nga gu rengbe ka nyasariipa aboro zangarengba areme watadu gba. (1 Kor. 15:26) Ono ya mo kpio rengbe ka gasa Yekova? Oni kparianga gupai Yesaya agumbaha: “Ko adígisa pa kpio nye anye kindi, Gbia Mbori awéga aume ti bangirise ku sa yo dunduko.” (Yes. 25:8) Oni berẽnga gupai nga: Kporokpee te, amurö te, na aume tipa kpio boro a te! Ono tie, agu aume nga ga ngbarago nika duadu ho Yekova nika digiso gako kidohe ni nga ga zingisa aboro be kpio! (Oni gedi Yesaya 26:19.) Ni yangaraha, agu aigiterẽ kpio aye na ni dũ nika hu.

22. Ginipai nika manga ho ga Masiya Kindo nika nyasa manga gupai Mbori akpinyemuhe ni auru kpotosende ane?

²² Ti digido Agarã Kutu, Kindo nika digiso manga ga Mbori ringbisapai auru kpotosende ane, na Kristo ki karaga zogarago fu Bako. (1 Kor. 15:25-28) Aboro nika du ni rengberengbe yo ti gu regbo re tipa ka gbiatiyo na yangara asada ho i nika kusa Satana ni rogo gu due adunga mburuhe ti ni ya. Fuo gure ngbutuko,  Kristo nika fitika ko na agu aboro dũ nasongoda ko. (Bam. P. 3:15; Yugo. 20:3, 7-10) Ono agu aboro dunduko du ni ruruyo fu Yekova nika du na wene maabangirise. Isoke, fugo ho rengbe yo ka ringbisaha na gu wene afugo ani agbiaha rogo Baibiri yo te. Si nga gu kidohe ruru aboro apidoho nga ka gbia “gu taarimo nga ga [du ni] awiri Mbori.”—Rom. 8:21.

23, 24. (a) Tipagine du ani ti ni na kido nga ga Mbori akidohe nika daada nirengo? (b) Ginipai mo nadiberã tipa ka mangaha?

²³ Anga mburu agu akidohe re rii kungbo amaabangirise, aberãpai, watadu amusumo te. Ga Yekova akidohe nika manga amanga nirengo! Tipagine? Oni tingidipa agu afugo Yesu ani asakipai tipaha rogo gu bambata kapita nga ga gi buku re. Ko ayugupai fu apefuoko i kpari fu Yekova nga: “Ga ngbi yé, ani mángi rogo kpotosende wa mo akpi nyemu he, wa du he ngbangbaturũ yo.” (Mt. 6:9, 10) Ga Mbori Kindo nga gupai kina boro akusihe te. Ndikidipai du! Si nazogarago ngbangbaturũ yo awere. Tipa kama agarã awere, si ima digiso ga Yekova akidohe ngba agu agene ani abihe abi rogo gu dungurati nga ga aKristano. Ani rengbe kadu na kido nga, ga Yekova akidohe dunduko nika manga amanga ho gako Kindo nika ye ni ka yugo gaha ome auru kpotosende ane!

²⁴ Ani ima inoho nga ga Mbori Kindo nika yeaye. Ani ima inoho a nga ga Yekova afugo kidohe dũ nika daada nirengo. Tipagine? Bambiko GA MBORI KINDO NAZOGARAGO! Gu sanahe si aida ani sana tirani na ni ni basasa nga, ‘Ya mo gu Kindo re nazoga re?’ Ani mangingo ome amanga dunduko ka raka ni ruru azogo nga ga gu Kindo re awere, wa ka ani gbia undo ti gaha ruru zogarago nyenye kindi!