Nyɛmi Matsɛ Yemi ɔ Fiɛɛlɔ Nɛ A Suɔ:

NGƆƆ lɛ kaa Soha mɔtu ngɛ October 2, 1914 ɔ, o piɛɛ Betel weku ɔ he. O hii si ngɛ he nɛ o hii daa ngɛ ní yemi he ɔ, nɛ nyɛ nihi tsuo nɛ hii si ɔ, nyɛ ngɛ Nyɛminyumu C. T. Russell mlɛe. Tlukaa nɛ Nyɛminyumu Russell bli sinya a nɛ e ba mi. Kɛkɛ nɛ e mlɛ bɔɔ kaa bɔ nɛ e pɔɔ peemi ɔ, nɛ e kɛ bua jɔmi de Betel weku ɔ ke, “I ngaa nyɛ.” Se e ya hí okplɔɔ ɔ yiti ɔ nɔuu, mohu ɔ, e fia e dɛ, nɛ e fia adafi nɛ ngɛ bua jɔmi: “Je Ma Amɛ A Be ɔ ba nyagbe; a matsɛmɛ ɔmɛ a ligbi ɔ nya ta!” O ma ná bua jɔmi wawɛɛ ejakaa o ngɔ be babauu kɛ hyɛ be nɛ ɔ blɔ. Kɛkɛ nɛ nyɛ Betel weku ɔ tsuo nyɛɛ kɛ bua jɔmi gbɔ nyɛ dɛ hluu.

 Jehahi babauu be kɛ je be nɛ Nyɛminyumu Russell tu munyu nɛ ngɛ bua jɔmi nɛ ɔ. Kɛ je jamɛ a be ɔ mi kɛ ba si piɔ ɔ, mɛni Matsɛ Yemi ɔ pee? Matsɛ Yemi ɔ pee níhi fuu. Yehowa gu Matsɛ Yemi ɔ nɔ kɛ ngɛ e we bi a he tsue, nɛ e ngɛ mɛ tsɔsee bɔɔbɔɔbɔɔ. Ngɛ jeha 1914 ɔ mi ɔ, a he pi kulaa, se mwɔnɛ ɔ, a he hiɛ pe ayɔ kpaago kɛ fã. Mɛni blɔhi a nɔ nɛ mo nitsɛ o ná tsɔsemi nɛ Yehowa kɛ ha e we bi ɔ he se ngɛ?

Mwɔnɛ ɔ, wa nyɛmimɛ pɔɔ demi ke, “Yehowa tlɔɔke ngua a ngɛ hɛ mi yae wawɛɛ!” nɛ e ji anɔkuale. Se ngɛ anɔkuale mi ɔ, ke wa kase womi nɛ ɔ saminya a, wa maa na kaa kɛ je jeha 1914 kɛ ma nɛ ɔ, tlɔɔke ngua nɛ ɔ nɛ peeɔ Yehowa blɔ nya tomi ɔ fã nɛ ngɛ hiɔwe ɔ he foni ɔ ngɛ fo tue wawɛɛ nitsɛ. Bɔ nɛ pee nɛ a fiɛɛ ngɛ je kɛ wɛ ɔ, Matsɛ Yemi ɔ he fiɛɛli gu blɔ slɔɔtohi kaa adafi fiami womihi, níhi nɛ a ngma ngɛ womihi a nɔ nɛ a kɛ kpaa si ngɛ ma mi, fonihi nɛ a kɛ tsɔɔ ní, womi tsɔwi nɛ a kɛ yeɔ odase, gramafoo, hleedio, kɛ Intanɛti ɔ nɔ kɛ fiɛɛ.

Akɛnɛ Yehowa ngɛ ní tsumi ɔ nɔ jɔɔe he je ɔ, amlɔ nɛ ɔ, wa ngɛ Baiblo kasemi womihi pee ngɛ gbihi nɛ hiɛ pe 670 mi, nɛ waa kɛ haa nihi nɛ wa he we mɛ sika. Nihi ngɔ a he kɛ ha faa nɛ a ngɛ Matsɛ Yemi Asahi, Kpe Peemi Asahi kɛ asafo ɔ ní tsumi kɔnihi mae ngɛ mahi nɛ a ngɛ sika kɛ mahi nɛ a be sika tsuo a nɔ. Nɛ ke oslaa ko ba a, nyɛmimɛ nyumuhi kɛ yihi jeɔ a suɔmi mi nɛ a kɛ oya yemi ya yeɔ bua nihi nɛ oslaa a ba a nɔ ɔ kɛ tsɔɔ kaa a ji ‘nyɛmimɛ ngɛ haomi behi’ a mi.​—Abɛ 17:17.

Be komɛ ɔ, osɔfohi kɛ si temi kɛ woli “woɔ mlaa yaya,” se behi fuu ɔ, wa naa kaa a ní peepee ɔ ha nɛ “sane kpakpa a ya su nihi babauu,” nɛ enɛ ɔ woɔ wa hemi kɛ yemi mi he wami.​—La 94:20; Filip. 1:12.

E ji he blɔ nɛ wa ná kaa waa kɛ nyɛ ma sɔmɔ kaa wa nyɛmimɛ ‘tsɔli.’ Nyɛmimɛ, wa ngɛ hlae nɛ nyɛɛ le kaa wa suɔ nyɛ saminya. Wa sɔlemi ji kaa womi nɛ ɔ mi munyu ɔ maa ye bua nyɛ konɛ nyɛ bua nɛ jɔ nyɛ mumi mi gbosi ní ɔ he pe daa.​—Mat. 24:45.

Wa ngɛ jɔɔmi bie ha nyɛ, wa ji

Nyɛ nyɛmimɛ,

Yehowa Odasefohi A Blɔ Tsɔɔmi Ajla Toli