Kuli Bakabilisha Banensu aba Bufumu:

ELENGANYENI ukuti mwaba mu lupwa lwa pa Bethel ku Brooklyn kabili ni pali Cisano ulucelo, pa 2 October 1914. Muli mu muputule umo ulupwa lwa pa Bethel luliila ifya kulya e lyo na mwikala pa cipuna cilya cine mwikalapo lyonse kabili mulelolela ukuti munyinefwe C. T. Russel ese. Ukwabula no kupoosa inshita aingila mu muputule wa kulilamo. Awe cilya aingila apemwina, e lyo nga filya fine acita lyonse aposha ulupwa lwa Bethel ne nsansa ati: “Mwashibukeni bonse!” Ilyo ashilaikala na pa cipuna, atendeka ukutoota e lyo abilisha ukuti: “Inshita ya bena Fyalo naipwa; inshita ya shamfumu sha pano calo naipwa!” Pa kumfwa aya mashiwi mwatemwa icine cine pantu ifi e fyo mwalelolela pa nshita ntali! Awe aba mu lupwa lwa pa Bethel bonse batemwa e lyo batoota pa nshita iitali.

 Napapita imyaka iingi ukutula apo munyinefwe Russel alandile aya mashiwi. Bushe finshi Ubufumu bwacita ukutula ilya nshita? Bwalicita ifintu ifingi nga nshi! Yehova abomfya Ubufumu bwakwe ku kusambilisha abantu bakwe e lyo no kuwamya ifintu mu kuteyanya. Ababomfi ba kwa Lesa abali fye abanono mu 1914 pali ino nshita nabafula nga nshi ica kuti balicila na pali 7.5 milioni. Bushe imwe mwanonkelamo shani mu fyo Yehova asambilisha abantu bakwe?

Ilingi tulomfwa uko bamunyinefwe balanda ukuti, “iceleta lya kwa Yehova lilesela!” Ca cine ukuti iceleta lilesela. Lelo icishinka ca kuti ukutula mu 1914 ili icileta ilimininako ukuteyanya kwa kwa Yehova lyalitwalilila ukulasela mu kwangufyanya nga fintu mwalasambilila muli ici citabo. Kanshi pa kuti imbila nsuma ishimikilwe mu calo conse, bakabilisha ba Bufumu balibomfya inshila ishalekanalekana. Balishimikila ukubomfya inyunshipepala, ifipampa ifyalembelwepo imbila nsuma, ifikope, amakardi ya kushimikililapo, amaseleti, balisabankanya ifyebo pa filimba e lyo na pa Intaneti.

Yehova alipaala umulimo wakwe icine cine ica kuti pali ino nshita, tulepulinta impapulo mu ndimi ukucila pali 670 kabili tulapeela abantu ishi mpapulo ukwabula ukubalipilisha. Na kabili, bamunyinefwe ne nkashi balaipeela ukukuula Amayanda ya Bufumu, Ifikuulwa fya Kulonganimo Ukulongana Kukalamba e lyo ne misambo. Bakuula ifi fikuulwa mu fyalo fyonse nampo nga ni mu fyalo ifipiina nelyo iyo. E lyo nga kwaba akayofi, aba bwananyina, balaitemenwa ukuya mu kwafwilisha bamunyinabo abaponenwa no bwafya. Ifi bacita, filanga ukuti fibusa fya cine ‘ififyalwa ilyo kuli ubucushi.’—Amapi. 17:17.

Inshita shimo, abantu abatupata ‘balatucusha ukubomfya ifipoope fya mafunde.’ Lelo icitetekelo cesu cilakoselako nga twamona ifyo amapange yabo yafilwa ica kuti ifyo batucusha filenga ‘imbila nsuma yalunduluka ukucila ukuicilikila.’—Amalu. 94:20; Fil. 1:12.

Ala lipaalo ukubombela pamo na imwe apo bonse tuli ba “mu ng’anda” ya kwa shikulu. Tulefwaya mwishibe ukuti twalimutemwa nga nshi. Tulecetekela ukuti ifili muli ici citabo fya kulamwafwa ukulatasha sana pa bupyani twakwata ubwafuma kuli Lesa.—Mat. 24:45.

Tulemulombela ukuti Lesa alemupaala,

Ni fwe bamunyinenwe,

Ibumba Litungulula Ilya Nte sha kwa Yehova