Nou bann proklanmater byenneme:

ZIS mazinen ki ou en manm fanmir Betel Brooklyn sa zour Vandredi bomaten, le 2 Oktob 1914. Parey labitid, ou pe asiz dan ou plas atab, pe esper Frer Charles Russell arive. En sel kou, laport lasal a manze i ouver e Frer Russell i antre. Parey son labitid, i arete pour en pti moman e i dir lafanmir Betel “Bonzour zot tou.” Me, apre sa, olye asiz dan son plas lo bout latab, i bat son lanmen e fer en lanons eksitan: “Letan bann nasyon etranze in fini, zour bann lerwa in terminen!” Ou telman dan lazwa ou osi, parski ou ti pe esper sanmenm depi ou batenm! Parey leres lafanmir Betel, ou kontan pour tann sa bon nouvel e ou bat lanmen avek bokou lantouzyasm.

 Pros en syek in pase depi ki Frer Russell ti fer sa lanons eksitan. Ki sa Rwayonm in akonpli depi sa letan? En kantite! Atraver sa Rwayonm, Zeova in ptitapti rafin e form son pep. Zot ti zis en ptigin dan bann lannen 1914, me konmela i annan plis ki set milyon senk san mil zot. Dan ki fason ou’n benefisye personnelman avek bann formasyon?

Konmela, souvan nou tann nou bann frer dir: “Saret Zeova pe bouze menm!” e sa i vre. Par kont, depi 1914, sa saret spirityel ki reprezant parti envizib lorganizasyon Zeova in bouz byen vit, parey ou pou dekouver ler ou pou lir sa liv atantivman. Avek bi pour propaz e pres sa bon nouvel dan lemonn antye, bann proklanmater in esey tou sort metod enkli zournal, lamars, portre ek film, kart temwannyaz, granmofonn, radyo e menm Enternet.

Zeova pe vreman beni sa travay, sanmenm ki ozordi zour nou pe pibliy bann piblikasyon atiran baze lo Labib dan plis ki 670 langaz e nou pe ofer li avek tou dimoun, san fer peye. Bann volonter i ede pour konstri bann Lasal Rwayonm, Lasal Lasanble ek biro brans, dan bann pei ris, ensi ki dan bann ki napa bokou resours. Menm ler i annan bann dezas, nou bann frer ek ser i deswit pare pour al ede dan bann landrwa ki’n ganny afekte e sa i montre ki zot in vreman “ne pour letan ladetres.”​—Prov. 17:17.

Parfwa, bann pret ek opozan i “konplote o non lalwa,” me i ranforsi nou lafwa pour vwar ki toultan zot zefor pour dekouraz nou i plito ede pour fer sa bon nouvel kontinyen propaze.​—Ps. 94:20; Fili. 1:12.

I vreman en gran loner pour nou asosye avek zot, nou bann frer ek ser. Nou anvi zot konnen ki nou kontan zot tou en kantite. Nou swete ki lenformasyon dan sa liv pou ed ou apresye ou leritaz spirityel plis ankor.​—Mat. 24:45.

Nou swet zot le meyer,

Zot bann frer,

Konsey Direkter Temwen Zeova