Masaya weleweledala kanulen:

MIIRI k’a filɛ ko i tun be yen Buruklini Betɛli la saan 1914 ɔkutɔburukalo tile 2nan, jumalon dɔ sɔgɔma. I ni balimaw siginin be Betɛli ka dumuni kɛyɔrɔ la n’aw be balimacɛ Charles Russell kɔnɔna. Aw y’a ye ko daa yɛlɛla ani balimacɛ Russell lo be donna. A lɔra dɔɔni i ko a be deli k’a kɛ cogo min na, ani a ye betɛlidenw bɛɛ fo ni dusudiya ye ko: “Aw bɛɛ ni sɔgɔma.” O kɔ, sanni a ka sin ka taga sigi a ka sigiyɔrɔ la, a ye tɛgɛrɛ fɔ ani k’a fɔ ko: “Siya wɛrɛ mɔgɔw ka wagati banna, u ka masaw ka masaya tile benna!” O ye ninsɔndiya daan ye e ni betɛliden tɔɔw fɛ sabu aw tun b’o loon kɔnɔna kabi wagatijan! O kama, bɛɛ be tɛgɛrɛba fɔ dumuni kɛyɔrɔ la ninsɔndiya bolo.

 Balimacɛ Russell y’o kumaw fɔ a saan kɛmɛkulu kelen ni kɔ ye nin ye. Kabi o tuma, Ala ka Masaya ye mun lo kɛ? A ye koo caaman yɛrɛ lo kɛ! Jehova tora k’a sagokɛlaw saniya dɔɔni dɔɔni Alako ta fan fɛ, ani ka fɔrɔmasɔn di u ma a ka Masaya sababu fɛ. Saan 1914, Ala sagokɛlaw tun ye mɔgɔ waa damanin dɔrɔn lo ye, nka bi bi nin na an ye mɔgɔ miliyɔn seegi ni kɔ ye. Ala ka Masaya ye fɔrɔmasɔn d’i ma koo jumanw lo la?

Bi bi nin na, an ka teli k’a mɛn balimaw daa la ko: “Jehova ka wotoro be teliyara yɛrɛ le!” O kumaw ye tiɲɛn ye sabu i ko gafe nin b’a yira cogo min na, kabi saan 1914 Jehova ka wotoro be vinna kosɔbɛ. Masaya weleweledalaw tɛmɛna fɛɛrɛ caaman fɛ ka kibaro diiman fɔ duniɲa kuru bɛɛ kɔnɔ i n’a fɔ, zurunaliw, filimuw, kartiw, turnediskiw, arajo ani hali ɛntɛrɛnɛti yɛrɛ. U tun be bɔ caaman fana ni sɛbɛninw ani pankartiw ye u bolo.

Jehova ka dɛmɛ barika la, an be gafe nafamanbaw bɔra kaan 670 ni kɔ bɛɛ la ani k’o di mɔgɔw ma gwansan. Ka fara o kan, jamana yiriwaninw na, ani hali jamana minw na fantanya ka jugu, balima caaman b’u yɛrɛ di ka dɛmɛ don Masaya Boonw, lajɛnba boonw ani Betɛli boonw lɔli baara la. Ani fana, ni balawoko dɔ kɛra yɔrɔ dɔ la, an balima kanulenw be teliya ka taga dɛmɛ don yen. U b’a yira o cogo lo k’u ye an ‘balimaw ye tɔɔrɔ wagati la.’—Talenw 17:17, Bible senuma.

Tuma dɔw la, diinan kuntigiw ani an kɛlɛbaga wɛrɛw be tɛmɛ nanbarakow fɛ walisa ka “tilenbaliya kow kɛ [an na] sariya tɔgɔ la.” (Zab. 94:20, Bible senuma). Nka, k’a ye k’o nanbarakow laban be kɛ sababu ye ‘kibaru diiman be taga ɲɛ,’ o b’an ka limaniya barika bonya yɛrɛ le.—Filip. 1:12.

Nɛɛmaba yɛrɛ lo an fɛ ka baara kɛ n’aw ye aw minw ye Yezu ka ‘baaradenw’ ye i ko anw. Aw ye la a la ko an b’aw bɛɛ kanu kosɔbɛ. An be Jehova deli a k’a kɛ gafe nin k’aw dɛmɛ walisa a ye min bɛɛ di an ma Alako ta fan fɛ, o ka diya aw ye kosɔbɛ ka tɛmɛ fɔlɔ la kan.—Mat. 24:45.

Ala k’aw dɛmɛ!

A’ balimaw,

Jehova Seerew ka Koow Ɲɛnabɔla Jɛnkulu