Ore irũ repredikáva avei pe Rréino:

EPENSAMÍNA reimeha Betel de Broóklynpe (Nueva York), pe 2 de octubre de 1914 pyhareve. Nde reguapy hína nde lugárpe, ha umi ótro vetelítandi pehaʼarõ ermáno Charles Rússellpe. Peichahágui ojavri pe komedór rokẽ ha oike ermáno Russell. Jepiveguáicha torýpe oporosaluda oikévo ha heʼi: “Mbaʼéichapa penekoʼẽ”. Upe rire, oguapy mboyve pe mesa akãme, ojepopete oñemaña hag̃ua hese ha ojapo peteĩ anúnsio nemopirĩmbáva. Heʼi: “Pe tiémpo oñemeʼẽva umi tetãme opáma; mburuvichakuéra tiémpo og̃uahẽma huʼãme”. Ndaikatúi rejejoko revyʼaitereígui pórke aréma rehaʼarõ hague upéva. Upévo nde ha umi ótro vetelíta pejepopete hatã ha are porã.

 Ohasáma heta áño ermáno Russell ojapo hague ko anúnsio. ¿Mbaʼépa ohupytýma Ñandejára Rréino upe guive? ¡Hetaiterei mbaʼéma! Jehová ojevale pe Rréinore omopotĩ ha ohekomboʼe hag̃ua isiervokuérape. Áño 1914-pe mbovymínte oĩ vaʼekue hikuái, koʼág̃a katu oĩma 8 millónrupi. ¿Mbaʼéichapa ndéve ideprovécho koʼã mbaʼe?

Pyʼỹi ñahendu ermanokuéra heʼírõ: “Jehová kárro yvagapegua pyaʼeterei oho hína”, ha siérto upéva. Péro añetehápe 1914 guive pe kárro yvagapegua (orrepresentáva pe párte jahechaʼỹva Jehová organisasióngui), hatãiterei oho. Upéva rehechakuaáta releévo ko lívro. Umi opredikáva pe Rréino oiporu umi mbaʼe pyahu oikuaauka hag̃ua umi notísia porã ko yvy tuichakuére. Por ehémplo oiporu diário, okorre kállere kartél reheve, oiporu pelíkula, tarhéta ojepredika hag̃ua, fonógrafo, rrádio ha Internet.

Jehová ñanevendesi rupi koʼág̃a ñaimprimíma ñane puvlikasionkuéra porãite mas de 670 idiómape, ha ñaikuaveʼẽ la héntepe jakovraʼỹre hese. Heta ermáno ojesakrifika ha ombaʼapo de voluntário omopuʼã hag̃ua Salón del Reino, de Asambléa ha sukursál, tahaʼe tetã iplátavape térã imboriahúvape. Avei, oiko jave algún sarambi, ñane ermanokuéra imbaʼeporãitéva pyaʼe oho oipytyvõ umi oikotevẽvape. Péicha ohechauka oĩha iñermáno ykére ‘ojejopy vai jave’ (Prov. 17:17).

Sapyʼánte umi paʼi ha ambue ndaijaʼéiva ñanderehe oñomoirũ ñane kóntrape. Ojevale hikuái umi léi rehe ñandeperhudika hag̃ua. Péro ñande jerovia imbareteve jahechávo nosẽiha hikuái la ijidéape ha upéva rangue “iñasãiveha ohóvo umi marandu porã” (Sal. 94:20; Filip. 1:12).

Oréve g̃uarã ningo tuichaiterei mbaʼe rombaʼapo pende ykére ore ermanokuéra pembaʼapóva tembiguáiramo oréicha avei. Peikuaákena pohayhuetereiha. Rojerure Jehovápe ko lívro tapenepytyvõ ikatu hag̃uáicha pemombaʼeve umi mbaʼe porã perresivíva chugui (Mat. 24:45).

Ore maitei rory ha mborayhu peẽme g̃uarã.

Pene ermanokuéra,

Kuérpo Governánte omoakãva testígo de Jehovápe