Kovazuvarise vOuhona ovakwetu:

NGATU tje oove okaṋepo keṱunḓu roBetel yaBrooklyn, meyuva Oritjatano, tji ye ri 2 ku Seninaṋi 1914. Ove wa haama poruveze rwoye pu u haama aruhe potjiriro omuhuka omunene, nu mo undju kutja Mbuti C. T. Russell me ye. Nu tjimanga omuvero wetuwo romariro au paturuka nu Mbuti Russell a hiti. Eye a kurama kaṱiṱi otja tje tjita aruhe nu a korisa eṱunḓu roBetel neraka rondjoroka a tja, “Moro ku eṋe amuhe.” Okuzambo moruveze rwokuhaama poruveze rwe pe haama aruhe, eye a utu okutona omake ne mu tjivisa ombuze yondjoroka ndji: “Omayuva wOvahaidena ya yanda; ozombara zawo ze tji munu ko!” Ove tjiri arire tji wa yoroka tjinene, orondu ihi otjiṋa tjoo undju oure woruveze orure! Nu amuhe amu utu okutona omake nomasa, orure.

 Pa kapita ozombura ozengi tjinene okuza koruveze Mbuti Russell tja tjita omatjivisiro omananyuṋe ngo. Ouhona wa yenenisa tjike okuza koruveze ndwo? Owo wa yenenisa ovingi tjinene! Okupitira mOuhona, Jehova wa kohorora nokuhonga ovandu ve kouṱiṱiṱiṱi, okuza kovandu omayovi omaṱiṱi uriri mombura ndji 1914 nga kovandu omangete 7 nohinga ndino. Omahongero nga ye ku vatera momiano viṋe?

Ndino tu zuva ovakambure ovakwetu amave tja: “Etemba raJehova ra kutirwa nu ri kayenda komurungu!” nu imbwi tjiri ouatjiri. Posi yokutja okuza kombura ndji 1914, etemba raJehova, oro ndi kuramena po otjira tjaJehova, ra ri ara kutirwa nu ri hakahana okukayenda komurungu, tjimuna tji mo kerimunina omuini mokulesa embo ndi nawa. Nondando yokutjivisa ombuze ombwa mouparanga wouye, ovazuvarise vOuhona va ungurisa omiano pekepeke omipe tjimuna ozongoramambo, oviplakata, omaraisiro woviperendero, oukarata wondjiukiro, ozogramafona, oradio, norungovi wina.

Nondaya Jehova ndje sera koviungura mbi, eṱe nai tu pitisa omambo nge nana ombango yovandu nga zikamena kOmbeibela momaraka wokombanda 670 nu tu ye yandja kovandu nokuhina okusutisa. Ovaungure mbe riyandjera oveni ve vatera moviungura vyokutunga Omatuwo wOmerikotameneno, Omatuwo wOmaworonganeno omanene notutavi twomberoo, momahi omatumbe na inga nge hi noviungurisiwa ovingi. Nu indu tji kwa tjitwa otjiwonga, ovakambure ovakwetu ovarumendu novakazendu ve hakahana okukavatera imba mba wirwa i oumba, nu momuano mbwi owo ve raisa orusuvero “moruveze rwombamisiro.”—Omiano 17:17.

Povikando tjiva, ovahonge vozokereka na varwe mbe tu pirukira ve kondja ‘okurundurura ouhasemba u rire ousemba,’ posi yokutja otjiyanḓiparise okumuna kutja povikando novikando, ozongondjero zawo nḓa za “vatera okuryamisa Ombuze Ombwa komurungu.”—Eps. 94:20; Fil. 1:12.

Tjiri ondjingonekero onene okuungura kuna eṋe, ‘vakarere’ ovakwetu. Arikaneye tjiweye kutja twe mu suvera amuhe nomasa. Matu zeri kutja embo ndi mari mu vatere okuhara ondangi yapeke kotjirumatwa tjeṋu hi.—Mat. 24:45.

Matu mu zerire ouwa,

Ovakambure ovakweṋu,

Orutu Orunane rwOvahongonone vaJehova