Atavanyʼa ma Ũsumbĩ Endwa:

KWASŨANĨA wĩ ũmwe wa athũkũmi ma Mbetheli ya Brooklyn, na twĩ Wakatano kwakya, Matukũ 2, Mwei wa 10, 1914. Kwakya kũu wĩkalĩte o vala wĩkalaa ĩvinda ya kwĩtwʼa ĩta, weteele Mwana-a-asa C. T. Russell. Ĩvenyʼa na ĩsalukya, mũomo wa nyũmba ya kũĩĩa lĩu ũivingũka, na Mwana-a-asa  Russell ailika, na aiũngama o vanini o tondũ wĩkaa. Na ĩndĩno aimũkethya e mũtanu, “Mũamũkie ata inywʼonthe.” Ĩndĩ atanekala nthĩ, aikũnanga moko na aineena ndeto ii sya kũtanĩthya mũno: “Mavinda ma Andũ-ma-mbaĩ-ingĩ nĩ mathelu, na mĩthenya ya asumbĩ moo nĩ mĩthelu!” Amina kũneena ndeto isu, ũyĩwʼa mũyo ũtaelesya nũndũ ũsu nĩ ũndũ ũtwĩe weteele ĩvinda yĩasa! Na ĩndĩ we na athũkũmi ala angĩ ma Mbetheli mũikũnanga moko mũno, mwĩ na ũtanu mwingĩ.

Ve myaka mingĩ mĩvĩtu kuma ĩla Mwana-a-asa Russell waneenie ndeto isu sya kũtanĩthya mũno. Ũsumbĩ wa Ngai wĩanĩĩtye kyaũ kuma  ĩvinda yĩu? Wĩanĩĩtye maũndũ maingĩ mũno! Kĩtumi nũndũ, kwĩsĩla Ũsumbĩ ũsu, Yeova ethĩĩtwe aithesya na kũmanyĩsya andũ make ala maĩ o ngili nini mwakanĩ wa 1914, na yu nĩmongelekete makavika ta milioni nyanya. We mwene ũtethekete ata kumana na momanyĩsyo asu?

Mavinda maingĩ nĩtwĩwʼaa ana-a-asa mayasya, “Ngalĩ ya Yeova ya ĩtunĩ nĩsembete mũno!” na ũu nĩ wʼo. Ĩndĩ ũndũ ũla twaĩle kũmanya nĩ kana ngalĩ ĩsu, ĩla nĩyo kĩlungu kya ũseũvyo wa Yeova kya ĩtunĩ, yĩthĩĩtwe ĩsembete mũno, o tondũ ĩvuku yĩĩ yĩeleetye. Nĩ kana ũvoo mũseo ũtavanwʼe nthĩ yonthe, atavanyʼa ma Ũsumbĩ methĩĩtwe maitũmĩa nzĩa syĩ kĩvathũkanyʼo ta: sinema, inanda, letiũ, makaseti ma maũvoo, o vamwe na Indaneti. O na tene nĩkweethĩawa nguthu sya atavanyʼa maatĩanĩaa makwete kana mekĩĩte syĩndũ syĩ na ũvoo mũandĩke.

Yeova nũathimĩte wĩa ũsu wa kũtavanyʼa, na kwondũ wa ũu nĩtwĩthĩĩtwe tũtonya kumĩthya mavuku kwa ithyomo mbee wa 670, ala maeleetye Mbivilia. Mavuku asu nĩmanengawe andũ onthe vate ndĩvi. O na kwĩ ana-a-asa na eĩtu-a-asa meyumĩtye kũtetheesya kwaka Nyũmba sya Ũsumbĩ, Nyũmba sya Maũmbano Manene, na myako ya Mbetheli nthĩnĩ wa nthĩ ila nthwii na ila ite na ũkwati mwingĩ. O na ĩngĩ, ĩla kwaumĩla mĩisyo kũndũ kũna, ana-a-asa na eĩtu-a-asa nĩmeyumasya na mĩtũkĩ makatetheesye andũ ma kũu. Ũu wonanasya kana ana-a-asa na eĩtu-a-asa asu ‘masyaiwe kwondũ wa kũthĩnũkasya.’—Nth. 17:17.

Mavinda amwe atongoi ma ndĩni na andũ angĩ ala matũvĩngaa nĩmatataa mũno nĩ kana twoneke ta ‘tũatĩĩaa sila ũte wa katĩ’ wĩanĩ witũ. Ĩndĩ, mũĩkĩĩo witũ nĩ wĩkĩawa vinya mũno ĩla twoona kana mavinda maingĩ mĩvango ĩsu yoo mĩthũku nĩtumaa “ũvoo mũseo ũendeea na mbee.”—Sav. 94:20, The Holy Bible in Current Kikamba Language; Avi. 1:12.

Nĩ ndaĩa nene kwĩthĩwa tũithũkũma vamwe nenyu nũndũ ithyonthe twĩ “athũkũmi” ma Mũsumbĩ witũ Yesũ. (Mat. 24:45, BCK) Manyai kana nĩtũmwendete mũno na nĩ wĩkwatyo witũ kana, maũndũ ala me ĩvukunĩ yĩĩ nĩmeũmũtetheesya mũendeee kwona ũtiĩwa wenyu wa kĩ-veva wĩ wa vata vyũ.

Ĩthĩwai na ĩvinda ĩseo.

Nithyĩ ana-a-asa menyu,

Nzama Ĩla Ĩtongoesye ya Ngũsĩ sya Yeova