ຈົດໝາຍຈາກຄະນະກຳມະການປົກຄອງ
ເຖິງເພື່ອນຜູ້ປະກາດເລື່ອງລາຊະອານາຈັກທີ່ຮັກ
ຂໍໃຫ້ນຶກພາບວ່າເຈົ້າເປັນສະມາຊິກຄອບຄົວເບເທນທີ່ບຸກລິນ ໃນຕອນເຊົ້າວັນສຸກທີ 2 ຕຸລາ ປີ ຄ.ສ. 1914. ເຈົ້ານັ່ງຢູ່ໂຕະອາຫານເຊິ່ງເປັນບ່ອນປະຈຳຂອງເຈົ້າ ກຳລັງລໍຖ້າວ່າເມື່ອໃດພີ່ນ້ອງຊີ. ທີ. ຣັດເຊວຈະມາ. ທັນໃດນັ້ນປະຕູຫ້ອງອາຫານກໍເປີດອອກ ເຈົ້າເຫັນພີ່ນ້ອງຣັດເຊວຍ່າງເຂົ້າມາ ລາວຢຸດບຶດໜຶ່ງຄືກັບແຕ່ລະເທື່ອ ແລ້ວກ່າວຄຳທັກທາຍສະມາຊິກຄອບຄົວເບເທນດ້ວຍນ້ຳສຽງທີ່ອ່ອນໂຍນວ່າ: “ສະບາຍດີທຸກຄົນ.” ແຕ່ແທນທີ່ຈະນັ່ງຢູ່ຫົວໂຕະທັນທີຄືກັບທີ່ເຄີຍເຮັດໃນແຕ່ລະມື້ ລາວພັດຕົບມືແລະປະກາດດ້ວຍນ້ຳສຽງທີ່ຕື່ນເຕັ້ນວ່າ: “ເວລາກຳນົດຂອງຄົນຕ່າງຊາດສິ້ນສຸດລົງແລ້ວ ໝົດຍຸກກະສັດຂອງເຂົາເຈົ້າແລ້ວ!” ເຈົ້າຕື່ນເຕັ້ນດີໃຈຈົນບອກບໍ່ຖືກ ເຈົ້າຄອຍຖ້າເວລານີ້ມາດົນແລ້ວ! ເຈົ້າກັບທຸກຄົນໃນຄອບຄົວເບເທນຕອບຮັບຂ່າວດີນີ້ດ້ວຍສຽງຕົບມືທີ່ດັງກຶກກ້ອງເປັນເວລາດົນ.
ຜ່ານໄປຫຼາຍສິບປີແລ້ວຫຼັງຈາກທີ່ພີ່ນ້ອງຣັດເຊວປະກາດຂ່າວທີ່ໜ້າຕື່ນເຕັ້ນນັ້ນ ຕັ້ງແຕ່ຕອນນັ້ນລາຊະອານາຈັກໄດ້ເຮັດຫຍັງສຳເລັດໄປແດ່ແລ້ວ? ມີຫຼາຍແທ້ໆ! ໂດຍທາງລາຊະອານາຈັກ ພະເຢໂຫວາໄດ້ຊຳຮະປະຊາຊົນຂອງພະອົງໃຫ້ສະອາດແລະຝຶກສອນເຂົາເຈົ້າຕະຫຼອດມາ. ຈາກຈຳນວນບໍ່ເທົ່າໃດພັນຄົນໃນປີ 1914 ເປັນເກືອບ 8 ລ້ານຄົນໃນທຸກມື້ນີ້. ຕົວເຈົ້າເອງໄດ້ຮັບປະໂຫຍດຈາກການຝຶກສອນນັ້ນໃນທາງໃດແດ່?
ໃນທຸກມື້ນີ້ເຮົາມັກໄດ້ຍິນພີ່ນ້ອງເວົ້າວ່າ: “ລົດກະສັດຂອງພະເຢໂຫວາຢູ່ທາງພາກສະຫວັນກຳລັງເຄື່ອນທີ່!” ການເວົ້າແບບນັ້ນກໍບໍ່ຜິດ. ທີ່ຈິງການອ່ານປຶ້ມເຫຼັ້ມນີ້ຢ່າງລະອຽດຈະຊ່ວຍເຮົາໃຫ້ເຫັນພາບລົດກະສັດທີ່ຢູ່ເທິງສະຫວັນເຊິ່ງໝາຍເຖິງສ່ວນທີ່ເບິ່ງບໍ່ເຫັນໃນອົງການຂອງພະເຢໂຫວາວ່າໄດ້ເຄື່ອນທີ່ດ້ວຍຄວາມໄວສູງສຸດມາຕັ້ງແຕ່ປີ 1914 ແລ້ວ. ຜູ້ປະກາດລາຊະອານາຈັກຄິດຄົ້ນວິທີໃໝ່ໆຫຼາຍວິທີເພື່ອປະກາດຂ່າວດີໄປທົ່ວໂລກ ເຊັ່ນ: ໃຊ້ໜັງສືພິມ ເດີນຂະບວນປະກາດ ບັນລະຍາຍໂດຍໃຊ້ພາບປະກອບ ໃຊ້ບັດໃຫ້ຄຳພະຍານ ເຄື່ອງຫຼິ້ນແຜ່ນສຽງ ວິທະຍຸ ແລະອິນເຕີເນັດ.
ເນື່ອງຈາກພະເຢໂຫວາອວຍພອນວຽກຂອງເຮົາ ຕອນນີ້ເຮົາຈຶ່ງພິມປຶ້ມທີ່ໜ້າສົນໃຈກ່ຽວກັບຄຳພີໄບເບິນຫຼາຍກວ່າ 670 ພາສາແລະແຈກຢາຍໃຫ້ກັບຜູ້ຄົນໂດຍບໍ່ຄິດໄລ່ເງິນ. ອາສາສະໝັກຫຼາຍຄົນສະລະເວລາແລະກຳລັງເພື່ອຊ່ວຍວຽກກໍ່ສ້າງຫໍປະຊຸມລາຊະອານາຈັກ ຫໍປະຊຸມໃຫຍ່ແລະສຳນັກງານສາຂາ ທັງໃນປະເທດທີ່ຮັ່ງມີແລະປະເທດທີ່ມີຊັບພະຍາກອນຈຳກັດ. ເມື່ອມີໄພພິບັດເກີດຂຶ້ນ ພີ່ນ້ອງກໍຟ້າວໄປຊ່ວຍເຫຼືອຄົນທີ່ໄດ້ຮັບຜົນກະທົບ ນີ້ເປັນຂໍ້ພິສູດວ່າເຂົາເຈົ້າຮັກກັນແລະ “ຊ່ວຍກັນໃນເວລາລຳບາກ.”—ສຸພາ. 17:17, ລ.ມ.
ບາງຄັ້ງພວກນັກເທດນັກບວດແລະຜູ້ຕໍ່ຕ້ານຄົນອື່ນໆ “ອອກກົດໝາຍເພື່ອສ້າງຄວາມເດືອນຮ້ອນ, ລ.ມ.” ຂັດຂວາງວຽກຂອງເຮົາ ແຕ່ເຖິງຈະເກີດເລື່ອງແບບນີ້ຫຼາຍຄັ້ງ ຄວາມເຊື່ອຂອງເຮົາກໍຍັງເຂັ້ມແຂງ ເພາະເຮົາເຫັນວ່າຄວາມພະຍາຍາມແບບຜິດໆຂອງເຂົາເຈົ້າໄດ້ “ເຮັດໃຫ້ຂ່າວດີຍິ່ງແຜ່ອອກໄປ, ລ.ມ.”—ເພງ. 94:20; ຟີລິບ 1:12
ພວກເຮົາຮູ້ສຶກເປັນກຽດທີ່ໄດ້ເປັນໝູ່ກັບເຈົ້າ ເຮົາທຸກຄົນເປັນ “ຄົນຮັບໃຊ້” ທີ່ເຮັດວຽກຮ່ວມກັນ ຂໍໃຫ້ເຈົ້າຮູ້ວ່າເຮົາຮັກເຈົ້າຫຼາຍ ເຮົາອະທິດຖານຂໍໃຫ້ປຶ້ມເຫຼັ້ມນີ້ຊ່ວຍເຈົ້າໃຫ້ເຫັນຄຸນຄ່າການສອນຈາກພະເຈົ້າຫຼາຍຂຶ້ນໃນແບບທີ່ບໍ່ເຄີຍມີມາກ່ອນ.—ມັດ. 24:45, ລ.ມ.
ດ້ວຍຄວາມຮັກ
ພີ່ນ້ອງຂອງເຈົ້າ
ຄະນະກຳມະການປົກຄອງຂອງພະຍານພະເຢໂຫວາ
