Yɛ Diema Nolobɔlɛnli Kulovolɛ:

PƐ YE nvoninli kɛ ɛboka Brooklyn Bɛtɛle abusua ne anwo wɔ Yalɛ nwonlomɔ, October 2, 1914. Wɔdɛnla wɔ ɛkponle ne anwo wɔ ɛleka mɔɔ ɛtɛnla ye dɛba la ɛlɛkendɛ kɛ Adiema C. T. Russell bara. Arɛlevilɛ nu ala anlenkɛ ne buke na Adiema Russell finde. Kɛmɔ ɔyɛ ye dɛba la, ɔgyinla ekyii na ɔfa anyelielɛ ɔbiza Bɛtɛle abusua ne “amuala Ahye.” Noko kɛ anrɛɛ ɔbadɛnla aze ɛkɛ ne ala la, ɔbɔ ɔ sa nu na ɔbɔ anyelielɛ nolo bie: “Maanle Maanle Mekɛ ne ɛwie; bɛ arelemgbunli ne mɔ mekɛ ɛdwu!” Anyelielɛ ɛmmaa ɛngola ɛ nwo zo komo​—ɛ nye ɛla edwɛkɛ ɛhye ade mekɛ tendenle! Ɛ nee Bɛtɛle abusua ne anu amra mɔɔ bɛha la fa anyelielɛ bɔ bɛ sa nu mɔɔ bɛngyakyi a.

 Adiema Russell hanle zɔhane anyelielɛ edwɛkɛ ne la ɛvolɛ dɔɔnwo ɛpɛ nu. Duzu a Belemgbunlililɛ ne ɛyɛ ɔvi zɔhane mekɛ ne a? Ninyɛne dɔɔnwo! Ɔlua Belemgbunlililɛ ngyehyɛleɛ ne azo, Gyihova ɛlɛtu ye menli ne anu ngyikyi ngyikyi na yeatete bɛ, yemɔti menli apenle ekyi wɔ 1914 anwo ɛzo ɛrayɛ mɔɔ bo mgbe nsuu nee foa ɛnɛ. Ndenle nyɛ azo a wɔnyia zɔhane ndetelɛ ne azo nvasoɛ a?

Ɛnɛ, yɛta yɛte kɛ mediema ka kɛ “Gyihova anwuma konle ehwili ne ɛlɛkɔ ɔ nyunlu!” na ɔle nɔhalɛ noko. Kɛmɔ buluku ɛhye mɔɔ ɛbagenga ye kpalɛ la bamaa wɔanwu ye la, nɔhalɛ ne a le kɛ ɔvi 1914, anwuma konle ehwili ne mɔɔ kile Gyihova ahyehyɛdeɛ ne mɔɔ ɛnyelɛ ɛnnwu ye la, ɛlɛtia ndɛndɛ. Kɛmɔ ɔwɔ Belemgbunlililɛ nolobɔlɛma ne adwenle nu kɛ bɛka edwɛkpa ne wɔ ewiade amuala la ati, bɛva ndenle ngakyile mɔɔ baboa mɔɔ bie a le adwelie ngɛlata, ngɛlata mɔɔ bɛto ɛlɔnwɔne bɛdɛ ye bɛ sa nu, nvoninli mɔɔ bɛye bɛmaa bɛnea, daselɛlilɛ ngɛlata, gramafuu, riledio nee Intanɛte ne bɔbɔ la bɛli gyima.

Kɛmɔ Gyihova ɛlɛyila yɛ gyima ne azo la ati, kɛkala yɛkola yɛyɛ yɛ Baebolo nwo mbuluku ngɛnlɛma ne wɔ aneɛ mɔɔ bo 670 la anu na yɛfa yɛmaa menli mɔɔ yɛndɔne ye a. Menli fi bɛ ɛhulolɛ nu boa Belemgbunlililɛ Asalo, Nyianu Asalo, nee Bɛtɛle azua ɛsisilɛ wɔ maanle mɔɔ bɛlɛ ezukoa nee mɔɔ bɛnlɛ ezukoa dɔɔnwo la anu. Saa esiane si a, mediema mɔɔ bɛlɛ ɛhulolɛ la ka bɛ nwo kɔboa menli mɔɔ esiane ne ɛdo bɛ la bɛfa bɛda ye ali kɛ amgba ‘anwongyelelɛ ti a bɛwole’ bɛ a.​—Mrɛ. 17:17.

Ɔdwu mekɛ ne bie a ɛsɔfo ne mɔ maa bɛdua “mɛla” zo bɛgyegye yɛ, noko saa yɛnwu kɛzi bɛ mɔdenlebɔlɛ mgbane ne “ɛboa ɛmaa Edwɛkpa ne ɛhɔ zo” dahuu la a, ɔmaa diedi nu mia.​—Edw. 94:20; Fel. 1:12.

Yɛ gɔnwo mɔ ‘sonvolɛma mɔɔ bɛha,’ ɔle anyunlunyia ɔmaa yɛ kɛ yɛbɔ nu yɛsonle la. Yɛsɛlɛ bɛ, bɛnwu ye kɛ yɛkulo bɛ kpalɛ. Yɛ asɔneyɛlɛ a le kɛ buluku ɛhye anu edwɛkɛ ne baboa wɔ yeamaa ɛ nye azɔ wɔ sunsum nu agyadeɛ ne adɛla mekɛ biala.​—Mat. 24:45.

Yɛdwenle bɛ nwo dahuu,

Bɛ mediema,

Gyihova Alasevolɛ Neazo Eku