Kerido Kompañero Publikadó di Reino,

PURBA di imaginá ku bo tabata un di e miembronan di e famia di Bètel di Brooklyn ku tabata na e desayuno di dia 2 di òktober 1914. Bo ta sintá na bo lugá di kustumber, wardando riba Ruman C. T. Russell. Diripiente e porta di komedor ta habri i Ruman Russell ta kana drenta. Manera ta su kustumber, e ta pousa un momento i ta kumindá e famia di Bètel ku un stèm alegre, bisando: “Rumannan tur, bon dia.” Pero en bes di bai sinta mesora na kabes di mesa, e ta kuminsá bati man i ta hasi un anunsio emoshonante: “E Tempu di e Paganonan a terminá; e dianan di nan reinan a pasa!” Kasi bo no por kontené bo mes. Bo a antisipá e dia akí pa hopi tempu! Huntu ku henter e famia di Bètel, bo ta risibí e notisia eksitante akí ku un tremendo aplouso.

 Entretantu, hopi dékada a pasa desde ku Ruman Russell a hasi e deklarashon eksitante ei. Kiko e Reino a logra for di e tempu ei te ku awor? Basta kos! Pa medio di e Reino, Yehova a bin ta refiná i entrená su pueblo progresivamente; un pueblo ku na 1914 tabata apénas algun mil hende i ku awe ta kasi 8 mion hende. Pensa riba tur e maneranan ku bo mes a benefisiá di e entrenamentu ei!

Awe, hopi biaha nos ta tende nos rumannan bisa: “E garoshi di Yehova ta den moveshon!” i esei ta bèrdat. Pero, segun ku bo ta lesa e buki akí, lo bo ripará ku, bon mirá, for di 1914 e garoshi selestial—ku ta representá e parti invisibel di e organisashon di Yehova—ta moviendo ku gran velosidat. Pa e publikadónan di Reino por a logra prediká e bon notisia rònt mundu, nan a usa un variedat di método masha inovativo, entre otro, korant, kanamentu ku pankarta, presentashonnan oudiovisual, karchi di testimonio, tokadisko, radio i asta Internet.

Komo ku Yehova ta sigui bendishoná e trabou, nos por publiká nos literatura bíbliko awor na mas ku 670 idioma i por ofres’é grátis na tur hende. Boluntarionan ku tin un spiritu di sakrifisio propio ta yuda ku konstrukshon di Salòn di Reino, Salòn di Asamblea i sukursal, tantu den paisnan próspero komo den paisnan di ménos rekurso. Anto ora un kalamidat sosodé, rumannan amoroso ta kore bai yuda e rumannan den áreanan afektá, demostrando asina ku di bèrdat nan t’ei “pa tempu di atversidat.”—Pro. 17:17.

Tin biaha pastornan i otro opositornan ta “plania perversidat pa medio di dekreto.” Pero loke ta fortalesé nos fe ta ku nos ta mira kon, bes tras bes, nan esfuersonan mal dirigí a resultá en realidat “pa adelanto di e bon notisia.”—Sal. 94:20; Flp. 1:12.

Pa nos, ta un onor di por traha huntu ku boso, pasobra nos tur ta ‘sirbidó’ di nos Rei Hesus. (Mat. 24:45) Nos ke pa boso sa ku nos stima boso tur masha hopi. Nos ta hasi orashon pa Yehova laga e kontenido di e buki akí yuda boso haña mas apresio ku nunka pa boso herensia spiritual.

Nos ta deseá boso tur kos bon.

Boso rumannan,

Kuerpo Gobernante di Testigunan di Yehova