Munasqa hermano:

KAY 1914 watapi 2 octubre paqarinpi imachus kasqanpi tʼukurina. Brooklyn Betelpi (Nueva York) llankʼajkunamanta ujnin kasqaykita yuyay. Maypichus sapa paqarin tiyakunki chaypi tiyasqa kashanki, hermano Charles Russell chayamunanta suyaspa. Jinallapi punkuta kichaykamuspa, hermano Russell yaykumun. Sapa paqarin jina, uj chhikanta sayarispa tukuyta may kusiywan “buen día” nispa napaykusunkichej. Chaymantataj niraj tiyaykushaspa tʼajllarikun, kaytataj nin: “Mana judío kajkunaj pʼunchayninku juntʼakunña; reyesninpa pʼunchayninpis tukukunña”, nispa. Qanqa mayta kusirikunki, imajtinchus may unaytaña chay pʼunchayta suyasharqanki. May kusiywantaj tukuy Betelpi kajkunawan khuska unayta tʼajllarikunki.

 Hermano Russell chayta willasqanmantaqa ashkha watasña kashan. ¿Imastañataj chay wataspi Diospa Reinon ruwan? ¡Ashkha imastaña! Jehovaqa Reinonnejta kamachisninta llimphuchan, wakichintaj. Kay 1914 watapeqa Diospa kamachisnin pisilla karqanku, kunantaj pusaj millones jinaña kanku. ¿Imaspitaj yanapasunki chay wakichisqan?

Hermanosqa kayta niyta yachanku: “Jehovaj carretanqa may usqhayllata rishan”, nispa. Chaytaj jinapuni. Kay librota leerispa reparanki jina, Diospa carretanqa nisunman Jehovaj janaj pachapi llajtanqa 1914 watamantapacha ñauparishallanpuni. Diospa Reinonmanta willajkunaqa tukuy imaymanamanta sumaj willaykunata Jallpʼantinpi willanku: periodicosnejta, letrerosniyoj marchasnejta, videosnejta, grabasqasnejta, willayniyoj papelitosnejta, tocadiscosnejta, radionejta, Internetnejta ima.

Jehová bendeciwasqanchejrayku, kunanqa publicacionesninchejta 670 kuraj parlaykunapi imprimikushan, mana qolqeta mañaspallataj runaman saqeshanchej. Ashkha hermanos, Tantakuna Wasista, Jatun Tantakuna Wasista, sucursalesta ima ruwaypi yanapakunku, qhapaj suyuspi jinallataj wajcha suyuspipis. Chantá ima llakiy kajtin, hermanosqa chay llakiypi tarikojkunata usqhayllata yanapaj rinku. Ajinamantataj rikuchinku “khuska llakiypi” sayaykunankupaj wakichisqa kasqankuta (Pro. 17:17).

Wakin kuteqa religionta kamachejkuna, waj churanakojkunapiwan “leypa contrampi sajrata ruwanku”. Chaywanpis creeyninchej mayta kallpachakun churanakusqanku manakajlla kasqanta rikuspa, chaytaj sumaj willaykuna “astawan ñawpajman rinampaj” yanapan (Sal. 94:20; Fili. 1:12).

Munasqa hermanos qankunapis noqayku jinallataj kamachis kankichej, qankunawan khuska llankʼayqa may sumaj. Yachanaykichejta munayku mayta munakusqaykuta. Jehovamantataj mañakuyku kay librota leespa, Diospa llajtanpi kasqaykichejta herenciata jina aswan jatunpaj qhawanaykichejta (Mat. 24:45).

Qankunata mayta munakuyku,

Hermanosniykichej,

Diospa Llajtanta Kamachejkuna