Diosmanta willakuq wawqi-panillaykuna:

KAYPI piensariy. Brooklyn llaqtapi betel wasipi llamkaq kasqaykipi. 1914 watapi 2 kaq octubre punchawpim desayunota tomanaykipaq maymi tiyanaykipiña tiyachkanki, iñiqmasinchik Charles Russellta suyaspa. Hinaptinmi qunqayllamanta punkuta kichaykamuspan kusisqallaña nin: ‘Buenos dias, llapallaykichiktam rimaykullaykichik’, nispa. Chaymantañataq maymi tiyananman manaraq chayachkaspan makinwan taqllakuspa kaynata nin: ‘Mana judiokunapa utaq Diosta mana yupaychaqkunapa chaynataq kamachiqninkupa tiemponmi tukurunña’, nispa. Chayna nisqanwanqa ¡maynatachá kusikunki!, chay willakuytaqa unay watakunañam suyachkarqanki. Chayna nisqanta uyarispaykim chaypi kaqkunawan kuska unayta taqllakunki.

 Iñiqmasinchik Charles Russellpa chayna rimasqanmantaqa yaqa pachak watañam pasarun. ¿Imakunatam chay tiempomanta kunankamaqa kamachiwaqninchik Jesucristo ruwarun? Admirakuypaq kaqkunatam. Jehova Diosqa Jesucristowan kamachimuspanmi tiempo pasasqanman hina serviqninkunata yupaychayninkupi chuyanchaspan allin yachachiq kanankupaq yanapachkan, 1914 watapiqa manaraqmi llumpay achkaraqchu karqanchik, kunan tiempopim ichaqa yaqa pusaq millonña kachkanchik. ¿Imaynatam qamtapas Jesucristoqa yanapasuchkanki Diosta allinta servinaykipaq?

Yaqa sapa kutillam iñiqmasinchikkuna ninku: “Diospa llaqtanpim imakunapas sapa kutilla astawan allin kachkan”, nispa. Chaytaqa llapallanchikmi musyanchik. Ichaqa 1914 watamantapacham Diospa llaqtanpi imakunapas astawanraq allinninchikpaq kachkan. Chaykunamantam kay qillqapi yachasunchik. Dios imayna kamachimunanmanta willakuqkunaqa tukuytam servichikurqaku enteron pachapi willakunankupaq. Chaypaqmi servichikurqaku periodicokunata, qasqunkupi letrerokunata, foto drama nisqanta, Diosmanta willakunapaq tarjetakunata, gramofono nisqa aparatota, radiota chaynataq internettapas.

Jehova Diospa bendicionninwanmi kunan tiempopiqa 670 masnin rimaykunapiña qillqanchikkunata ruwachkanchik, chaykunatam mana qullqillapaq runamasinchikkunaman qunchik. Achka iñiqmasinchikkunam huñunakunanchik wasikunata, hatun huñunakuyninchikpaq localkunata chaynataq betel wasikunata ruwaypi yanapakuchkanku, chaykunataqa ruwanku enteron pachapim. Chaymantapas ima desgraciapas pasaptinqa kuyapayakuq iñiqmasinchikkunam ‘sasachakuypi’ kaqkunata chaylla yanapanku (Prov. 17:17).

Wakinpiqa pantay religionpi kamachiqkunam utaq chiqniwaqninchik runakunam autoridadkunapa hurqusqan leykunata servichikuspa sasachawanchik. Ichaqa chayna tanteasqanku yanqapaq kasqanta qawasqanchik hinaspa Diosmanta willakuyninchik astawan yapakusqanta qawasqanchikmi iñiyninchikpi kallpanchawanchik (Sal. 94:20; Filip. 1:12).

Kuyasqa wawqi-panillaykuna, anchatam kusikuniku qamkunawan kuska Dios servisqaykumanta. Jehova Diostam mañakuchkaniku kay qillqata leespaykichik payta tukuy sunquykichikwan hinalla yupaychanaykichikpaq (Mat. 24:45).

Tukuy sunquykuwanmi kuyaykiku

Enteron pachapi Diospa llaqtanpi punta apaqkuna