Diospa gobiernonmanta willaq wawqe-panaykuna:

YUYARISUN 1914 watapi 2 octubre killapi pasasqanta. Sichus chay kutipi Brooklyn llaqtapi kaq Betelpi (Nueva York) kashawaq karqan chayqa kaytachá rikuwaq karqan: Chay tutamantanmi llapa Betelpi llank’aqkuna Charles Russell iñiqmasinchis hamunanta suyasharqanku, llapankupas tiyanankupin kasharqanku, chayllamanmi Charles Russell iñiqmasinchisqa chayamurqan, payqa sapa tutamanta ruwasqanta hinan huk rato sayaykuspa llapankuta napaykurqan “imaynallan kashankichis wawqe-panaykuna” nispa. Hinan tiyananpi manaraq tiyaykushaspa iskay kutita t’aqllarikuspa kayta willarqan: “Wak suyu runakunaq kamachikunan tiempon hunt’akunña, kamachikuqkunaq tiemponmi tukukunña”, nispa. Iñiqmasikunaqa askha watañan chay tiempo hunt’akunanta suyakusharqanku, hinan llapallanku kusikuymanta t’aqllakuyta qallarirqanku.

 Charles Russell iñiqmasinchispa chay willasqanmantaqa askha watakunañan pasarqon. ¿Chay watamantapacha imakunatan Diospa gobiernon ruwarqan? Imaymanatan ruwarqan. Jehová Diosqa chay gobiernonpa yanapayninwanmi serviqninkunata ch’uyancharqan aswan allinta servinankupaqpas yachachirqan, 1914 watapiqa pisillan karqanku, kunanmi ichaqa yaqa pusaq millón hinaña kashanchis. ¿Imapin yanaparqasunki chay yachachikuyta chaskisqayki?

Iñiqmasikunaq kay nisqantaqa uyarirqankichá: “Diospa carronqa usqhayllan purishan”, nispa. Chay nisqankuqa cheqaqmi, ichaqa Diospa carronqa 1914 watamantapachan usqhaylla purishan, chaytaqa reparanki kay librota leespaykin. “Diospa carron” nispaqa nikun hanaq pachapi Diospa llaqtantan. Diospa gobiernonmanta willaqkunaqa imaymanatan utilizarqanku predicanankupaq: periodicokunata, fotodrama nisqata, predicanapaq tarjetakunata, tocadiscota, radiota, letrerokunata, hinallataq internet-tapas.

Diospa yanapayninwanmi kunanqa 670 más simikunapi qelqakunata ruwakushan, gratisllataqmi runakunamanpas qonchis. Iñiqmasikunaq yanapayninwanmi hatarichikun huñunakunanchis wasikunata, asambleakunata ruwanapaq wasikunata, sucursalkunatapas; chaytaqa ruwakushanmi pisi qolqeyoq kasqan nacionkunapipas. Hinaspapas mayqen nacionpipas lloqllakuna otaq terremotokuna kaqtinqa usqhayllan iñiqmasinchiskunata yanapanchis, chhaynapin rikuchinchis “llaki-phutiy tiempopipas wawqe” hina khuyapayakuq kasqanchista (Prov. 17:17).

Mayninpiqa religionpi umallikuna otaq huk enemigonchiskunan ‘mana chaninta’ ruwawarqanchis leykunata utilizaspa. Ichaqa manan atipawarqanchischu, aswanpas chay hawan “allin willakuykunaqa astawan” willakurqan. Chaykuna pasasqanqa astawanmi iñiyninchista wiñachirqan (Sal. 94:20; Filip. 1:12).

Ancha kusikunapaqmi qankunawan kuska llank’ayqa, ñoqaykupas qankuna hinan ‘wasipi kamachikuna’ kayku. Anchatan Jehová Diosmanta mañakushayku kay librota leespa Diosmanta chaskisqaykichis herenciata valoranaykichispaq (Mat. 24:45).

Ñoqaykuqa anchatan munakuykichis,

Iñiqmasiykichiskuna,

Jehová Diospa testigonkunata umalliq t’aqa