Uso Pele e:

SEʻI faapea o loo e iai i le aiga Peteli i Brooklyn i le taeao o le Aso Faraile, Oketopa 2 i le 1914. O loo e saofaʻi i lou nofoa mo le taumafataga o le taeao, ma tālia le taunuu atu o le uso o C. T. Russell. Ua faafuaseʻi ona matala le faitotoʻa o le potuʻai ma e iloa atu o ia. Ua ia tū mo sina taimi ona ia faapea mai lea, “Mālō le usu i lenei taeao.” Nai lo o le agaʻi atu loa i lona nofoa, ae sa ia patipati ma faia se faasilasilaga mataʻina e faapea: “Ua iʻu tausaga o Nuu Ese; ua iʻu foʻi aso o o latou tupu!” E mautinoa ua leva ona e tulimataʻia lenā taimi tāua. Peitaʻi, o lea ua outou olioli faatasi ma isi sui o le aiga Peteli, a o faalogo atu i lenā tala fiafia.

Ua toetoe atoa le 100 tausaga talu ona faia e le uso o Russell lenā faasilasilaga mataʻina. O ā ni mea ua faataunuuina e le Malo talu  mai lenā taimi? Ua faaauau ona toleni ma faamamā e Ieova ona tagata e ala mai i faatulagaga o le Malo. E na o le faitau afe tagata o le Atua sa iai i le 1914, peitaʻi, ua silia i le fitu ma le ʻafa miliona i aso nei. O ā ni auala ua e maua ai aogā mai i lenā toleniga?

E masani ona faapea mai uso: “O loo agaʻi pea i luma le kariota faalelagi a Ieova,” ma o le mea moni lenā o loo tupu. Peitaʻi, talu mai le 1914, ua matuā saosaoa le agaʻi i luma o le kariota faalelagi, lea e faaāta mai ai le vaega lē vaaia o le faalapotopotoga a Ieova, ma o le a e mātauina lenā vala a o e faitauina lenei lomiga. Na faaaogā e tagata talaʻi o le Malo nisi o auala e pei o nusipepa, pepa lapopoʻa e faasilasila ai le feʻau, faaaliga o ata, pepa e avatu ai se molimau, laau e tā ai lauga, leitiō, faapea le Initaneti ina ia talaʻia ai le tala lelei i le lalolagi aoao.

Ua mafai ona lomia a tatou lomiga i le silia i le 670 gagana ma tufaina atu e aunoa ma se totogi, ona o le faamanuia a Ieova i la tatou galuega. O loo fesoasoani foʻi tagata tauofo i le fausiaina o Maota mo Sauniga, Maota mo Fonotaga, faapea foʻi ofisa o lālā i atunuu e malosi le tamaoaiga, faapea atunuu e vaivai le tamaoaiga. Pe a tulaʻi mai mala, e vave ona fesoasoani atu uso ma tuafāfine loto alolofa i vaipanoa o loo aafia. O i latou o uso ua ʻfananau mo taimi faigatā.’—Faata. 17:17.

Ua tele taumafaiga a taʻitaʻi lotu ma tagata tetee e “faalavelave e ala i le poloaʻiga [tulafono].” Peitaʻi, o loo faamalosia pea lo tatou faatuatua pe a mātauina lo latou lē taulau, ma ua atili ai ona ʻagaʻigaʻi i luma le tala lelei.’—Sala. 94:20; Fili. 1:12.

O se faaeaga lo tatou galulue faatasi o se “ʻaufaigaluega.” E matou te alolofa iā te outou uma. E matou te faamoemoe o le a fesoasoani lenei tusi iā te outou, e matuā talisapaia ai lo outou tofi faaleagaga.—Mata. 24:45.

Alofaaga māfana,

O outou uso,

Le Vaega Pule o Molimau a Ieova