Mukwetu a kifulo mulungudi a Bufumu:

BANDA kupwandikisha bu’be mwina Betele a ku Brooklyn mu dya Katano kunamashika mu 2/10/1914. We mushaale pa mbalo yoshalaa ku mesa ku namashika, anutengyela kutwela kwa mukwetu Russell. Mususa umune kibelo kya mu nshibo ya kudiila kibashituka na, mukwetu Russell batwele. Bayikisha munda mwa kapindji, muyiile kiubishi kyaaye, bayimuna beena Betele na muloo ooso shi: “Nenwimunayi booso.” Kadi, pamutwe pa kushaala mususa umune ku mesa a kumpala, bakupila bikashi na alungula bantu na muloo ooso shi: “Kipungo kya bingi bisamba kibafudiila, na banfumu baabo mbapwe kupeta mafuku aabo!” Twe na mushindo wa kwimika muloo oodi nawo—takudi mafuku ebungi kasha obanga kutengyela ino nsaa! Pamune na beena Betele, nubatambula uno mukandu na kukupila bikashi na muloo ooso.

 Kubaapu kukila bipwa makumi kasha mukwetu Russell aakula bino bishima bya muloo. Kubanga mu aa mafuku, Bufumu mbulombashe myanda kinyi? Myanda ibungi! Muyiile mpàngo ya Bufumu, Yehowa mwende na kulumbuula mpa na kulongyesha mwilo waaye​—penda mu ndambo ya bipwa lukama kubanga mu 1914, mafuku akile pa midiyo musambo na kipindji lelo uno. Mu mishindo kinyi moodi mupete bukwashi bwa aa malongyesha?

Lelo uno tukwete kupusha bakwetu abamba shi: “Etempu dya mwiyilu dya Yehowa dikwete kwenda!” na byabya mbya binyibinyi. Anka, kubanga mu 1914, etempu dya mwiyilu, adilesha ndumbulwilo a Yehowa shamweneka, dikwete kutambuka lubilo lukile, bu abikyebe kwibilesha kubadika kwi buwa kwa uno mukanda. Na lukalo lwashi mukandu wibwa ulungulwe mu nsenga ishima, balungudi ba Bufumu mbatumikye na mishindo ibuwa ilekeene, mu yaaya mishindo mwi ma jurnale, bantu abende na kutambuka n’ebaya difunde mukandu, kulesha kwa bifwatulo, ma karte a bu kamonyi, ma fono, kisaashi, na Internet.

Bu byabidi shi Yehowa kwete kukwasha uno mudimo, binobino twi na mushindo wa kutuusha mikanda ayipatuula Bible mu ndimi ikile pa 670 na kwiyipa bantu booso kushii kwibateka makuta. Bantu abakumiina kwisumina ingi miloo bakwete kwipaana mu mudimo wa kwibaka kwa Mashibo a Bufumu, Mashibo a Bikongeno, na ma biro a filiale, booso mu maumbo e na bupeta bwibungi na ashii na bupeta bwibungi. Na su masaku abatuuku, bakwetu balume na bakashi abendaa lubilo mu kukwasha baaba be mu ma mbalo atukye masaku, abalesha kalolo shi ‘be nabo mu mpombo ngub’oso.’​—Mye. 17:17.

Ingi nsaa, bakata ba bipwilo na bangi beshikwanyi bakwete ‘kutwesha malwa pa kupeesha miiya,’ kadi nyi mwanda aunyingisha lukumiino pa kumona shi misusa ibungi, byooso byabadi bakite mbyalulukye abyo nkukwasha bwa “kuyiisha mukandu wibuwa kumpala.”​—Mis. 94:20; Fid. 1:12.

Twi na kinemo kya kwikala nenu bu bakwetu “beena nshibo.” Ukayi shi twi benufule ngofu. Atutekye shi myanda i mu uno mukanda inukwashe bwa kusangeela bupyanyi bwenu bwa mu kikudi kukila bibanudi anwibusangeela kumpala.​—Mat. 24:45.

Na muloo ooso, natwe

Bakwenu,

Kasaka ka Bakunkushi-Bakulu ka Batemwe ba Yehowa