Mmemeteli WeMbuso Lotsandzekako:

ASEWUTICABANGE ulilunga lemndeni waseBethel leseBrooklyn ngaLesihlanu ekuseni, nga-October 2, 1914. Uhleti etafuleni lovame kuhlala kulo njalo ekuseni, ulindzele kutsi uMzalwane C. T. Russell afike. Kusenjalo, kuvuleka umnyango bese kungena uMzalwane Russell. Uma kancane njengobe nje avame kwenta, bese ubingelela umndeni waseBethel ngenjabulo atsi: “Sanibonani nonkhe.” Kepha kunekutsi ahlale phansi, ushaya tandla bese asho nasi simemetelo lesijabulisako: “Tikhatsi Tebetive setiphelile, emakhosi abo asabusile!” Njengobe uva lesimemetelo, uyehluleka kutibamba, phela bewusolo ulangatelela kutsi lesikhatsi sifike. Ngenca yaloko, wena kanye nawo wonkhe umndeni waseBethel nemukela lesimemetelo ngekushaya tandla niveta kweneliseka nekujabula.

 Sekuphele iminyaka leminyenti uMzalwane Russell akhuluma lamavi lajabulisako. Yini uMbuso loyifezile kusukela ngaleso sikhatsi? Kunyenti kakhulu! Asebentisa uMbuso, Jehova bekasolo acenga futsi acecesha bantfu bakhe, kusukela kulabatinkhulungwane letimbalwa nga-1914 kuya kulabangetulu kwetigidzi letingu-7.5 lamuhla. Wena kukusite ngatiphi tindlela lokuceceshwa?

Sivame kuva bazalwane betfu batsi: “Inkhalishi yaJehova yasezulwini iyahamba!” futsi bacinisile. Nanobe kunjalo, liciniso likutsi kusukela nga-1914, lenkhalishi yasezulwini lemelela incenye yenhlangano yaJehova lengabonakali, beyisolo igijima ngesivinini lesikhulu kakhulu, njengobe nje kufundza lencwadzi ngekucophelela kutasibonisa. Njengobe bamemeteli beMbuso bafuna kusakata tindzaba letimnandzi emhlabeni wonkhe, basebentise tindlela letehlukahlukene letifaka ekhatsi kushumayela ngemaphephandzaba, ngemamashi, ngetitfombe, ngemakhadi ekufakaza, ngemagilamafoni, ngemsakato, kanye nange-Internet.

Ngesizatfu sekutsi sibusiswa nguJehova kulomsebenti, nyalo sesishicilela tincwadzi letikhangako letisekelwe eBhayibhelini ngetilwimi letingetulu kwa-670, bese sitihambisela bonkhe bantfu mahhala. Emavolontiya latinikele asita ekwakhiweni kwemaHholwa eMbuso, EmaHholwa Emihlangano netakhiwo teligatja, futsi loko akwenta emaveni lanjingile nasemaveni laphuyile. Nakuvela tinhlekelele, bazalwane nabodzadze labanelutsandvo basita labo labakuleto tindzawo letihlaselwe yinhlekele, ngekwenta njalo bafakazela kutsi ‘batalelwe sikhatsi sekuhlupheka.’​—Taga 17:17, NW.

Ngaletinye tikhatsi bafundisi kanye nalabanye baphikisi ‘benta bubi kube shangatsi ngumtsetfo,’ kodvwa kuyasicinisa kwati kutsi etikhatsini letinyenti imetamo yabo lemibi iphumela “ekuchutjekiselweni phambili kwetindzaba letimnandzi.”​—Hla. 94:20; Fil. 1:12.

Kulilungelo kitsi kuhlanganyela kanye nani, njengobe ‘nitisebenti’ letikanye natsi. Sicela niciniseke ngekutsi sinitsandza kakhulu. Sithantazela kutsi lencwadzi inisite nilitsatse njengaleliligugu kakhulu lifa lenu lelivela kuNkulunkulu.​—Mat. 24:45.

Sinifisela lokuhle kodvwa,

Bazalwane benu,

Sigungu Lesibusako SaBoFakazi BaJehova