Nomuyandwa Basikumwayama ba Bwami:

AMWEEZYEEZYE kuti muli akati kamukwasyi wa Bbeteli waku Brooklyn muli Bwasanu mafwumofwumo, mu October 2, 1914. Mulikkede acuuno ncomukkala lyoonse mwaunka kulya cakulya camafwumina, mulindila Mukwesu C. T. Russell kuti asike. Kakutanainda ciindi, cijazyo cakuŋanda yakulida cajaluka mpoonya Mukwesu Russell wanjila. Mbuli mbwacita lyoonse, waima asyoonto, wawaanzya mukwasyi wa Bbeteli kumwi kamwetamweta, waamba kuti: “Mwabuka buti nyoonse.” Mpoonya, muciindi cakukkala acuuno aakkala sikusololela, wakamba mumaanza akwaambilizya kuti: “Ciindi Cabamasi camana; ciindi cabami babo camana, cabonwa lino!” Mwakkomana kapati cakuti moyo wanu wazula buyo lumwemwe—mwali kucilangila ciindi eeci kwaciindi cilamfwu! Antoomwe amukwasyi wa Bbeteli mwakamba mumaanza kwaciindi cilamfwu.

 Myaka minji yainda kuzwa ciindi Mukwesu Russell nakaamba majwi aayo aakkomanisya. Ino Bwami bwazuzikizya nzi kuzwa leelyo? Bwacita zintu zinji kapati! Kwiinda mububambe bwa Bwami, Jehova asyoonto-syoonto wali kubasalazya akubayiisya bantu bakwe—kuzwa kubantu basyoonto ibakaliko mu 1914 kusika kubantu bainda ku 7.5 miliyoni mazuba aano. Muunzila nzi momwagwasyigwa alwiiyo luli boobo nywebo kumugama?

Mazuba aano kanji-kanji tulabamvwa bakwesu kabaamba kuti “nkalaki yakujulu ya Jehova ili mukweenda!” alimwi aaya masimpe. Nokuba boobo, masimpe ngakuti kuzwa mu 1914, nkalaki yakujulu, yalo yiiminina cibeela cambunga ya Jehova citalibonyi, yali kweenda cakufwambaana loko, mulalibonena eeci mbocali kucitika kwiinda mukubala bbuku eeli cakusitikila. Kutegwa makani mabotu akambaukwe munyika yoonse, basikumwaya ba Bwami bali kubelesya nzila ziindene-indene, kubikkilizya amiteende, zikwankwani zinyamunwa buya, mafilimu, tupepa tupa bumboni, malekkoodi, mawailesi, alimwi buya a Intaneti.

Kwiinda mukulongezyegwa a Jehova mumulimo ooyu, lino tulamwaya mabbuku aaboneka kabotu mumyaambo iinda ku 670 alimwi tulaabila mabbuku kumuntu uuli woonse uuyanda kakunyina kubbadelesya. Basikugwasyilizya balyaabide balagwasya mumulimo wakuyaka Maanda aa Bwami, Maanda Aakucitila Miswaangano Mipati, alimwi amaofesi aamitabi, balacita oobo muzisi zyoonse tacikwe makani naa cisi cilivwubide naa pe. Alimwi ikuti kwacitika ntenda, bakwesu abacizyi basiluyando balafwambaana kulisungula kupa lugwasyo mubusena mwacitika ntenda, kutondezya kuti ‘mbanyina ibazyalilwa kugwasya muziindi zyamapenzi.’—Tus. 17:17.

Ziindi zimwi, basololi bazikombelo abasikukazya bamwi ‘babikka milao yakupenzya,’ pele cilayumya lusyomo kubona kusoleka kwabo ‘mbokupa kuti makani mabotu aunke ambele.’—Int. 94:20; Flp. 1:12.

Tulikkomene kapati kubelekela antoomwe, ‘nobabelesima bamuŋanda.’ Amuzyibe kuti tulamuyanda kapati nyoonse. Tupailila kuti zibalo izili mubbuku eeli zikamugwasye kulumba lukono lwanu lwakumuuya kwiinda kaindi.—Mt. 24:45.

Kamupona kabotu,

Tobanyoko,

Kabunga Keendelezya ka Bakamboni ba Jehova