Wix tiku lichuwinana xTamapakgsin Dios:

KALAKAPASTAKWI tuku lalh makgasa. Tsisa viernes 2 xla octubre kata 1914. Kalilakpuwanti pi makgtapakgsiya kfamilia Betel xalak Brooklyn (Nueva York) chu wila kmesa niku chali chali tawilaya, kgalhkgalhipat kachilh tala Charles Russell. Kaj xalan talakki malakcha niku wayankan chu tanuyachi tala Russell. Chuna la lismaninit, taya tsinu chu xatapaxuwan kawani tiku anta wilakgolh: «Kgalhen mimputumkan». Alistalh akxni nina tawila kmesa niku napulalinan, makgapakgxnan chu masta akgtum lu tlan tamakatsin: «Xkilhtamaku tiku ni judíos sputnita, kilhtamaku xla xmapakgsinakan titaxtunita». Wix lu lipaxuwaya, ¡akglhuwata kata kgalhkgalhipat uma kilhtamaku! Lu paxuwaya, wa xlakata lhuwa katamakgapakgxnana familia Betel.

 Titaxtunita akglhuwa kata lata tala Russell mastalh uma tlan tamakatsin. ¿Tuku tlawanit xTamapakgsin Dios putum uma kilhtamaku nema titaxtunit? ¡Lhuwa tuku tlawanit! Jehová limaklakaskinit Tamapakgsin xlakata nakamaskulunki chu nakamasiyani xlakskujnin, kaj ni lhuwa miles xwankgonit kkata 1914 chu la uku atsinu ni akgtsayan millón. ¿La litamakgtayanita uma tuku masiyakanit?

Makglhuwa kgaxmataw pi kinatalankan wankgo: «Xcarro Jehová xalak akgapun lakapala tlawama», chu uma xlikana. Pero lata 1914, xcarro Jehová, nema kilhchanima xkachikin nema ni tasiya, lakapala tlawama, chuna la naʼakxilha akxni nalikgalhtawakgatilhaya uma libro. Tiku lichuwinankgo Tamapakgsin pulaklhuwa tuku xalaksasti limaklakaskinkgonit xlakata nalichuwinankgo xalakwan xalaksasti xlikalanka katiyatni, pulaktum wa periódicos, marchas niku xlinkan pancartas, películas, tarjetas nema xlichuwinankan Dios, gramófonos, radio chu asta Internet.

Xlakata xtasikulunalin Jehová, la uku tlan imprimirliyaw lakswan likgalhtawakga kliwaka 670 tachuwin chu ni kastamaxkiyaw latamanin. Makgapitsi xatapaxuwan makgtayanankgo xlakata natatlawa Pukgalhtawakga xla xTatayananin Jehová, Salones de Asambleas chu sucursales, kkachikinin niku anan tumin chu niku ni lu anan. Nachuna akxni wi tuku masputunan, kinatalankan tiku lu paxkinankgo lakapala ankgo kamakgtayakgo tiku kaʼakgspulalh tuku nitlan, chu chuna limasiyakgo pi la chatum tala «akxni anan talakgaputsit» (Prov. 17:17).

Min kilhtamaku tiku pulalinkgo takanajla chu atanu tiku ni kinkaʼakxilhputunkgoyan limaklakaskinkgo «limapakgsin xlakata nakinkatlawanikgoyan tuku ni xlilat». Pero matliwakglha kintakanajlakan akxni akxilhaw pi putum tuku lakkaxtlawakgo nila makgantaxtikgo chu wata tlawakgo pi «nalitakgawaniy xatlan tamakatsinin» (Sal. 94:20, Versión Israelita Nazarena; Filip. 1:12).

Lu kpaxuwayaw pi kkataskujan, kinatalankan tiku na «kskujnin» Dios chuna la akinin chu liwana kakatsitit pi lu kkapaxkiyan. Ktasaskiniyaw Jehová pi xlakata likgalhtawakgapat uma libro kamakgtayan lu xlakaskinka naʼakxilha tuku kinkamaxkinitan Dios (Mat. 24:45, TNM).

Kakatsitit pi lu kkapaxkiyan.

Minatalankan,

Lakgkgolotsin tiku Pulalinkgo xTatayananin Jehová