Talofa te Taina Talai o te Malo:

FAKAATAATA i tou mafaufau me ko fai koe mo fai se sui o te kāiga Peteli i Brooklyn i te taeao o te Aso Lima, i a Oketopa 2, 1914. Ko sagasaga atu koe i tou nofoga masani i te taipola mō te ‵kaiga i te taeao, kae faka‵tali ki te oko atu o te Taina ko C. T. Russell. E seki leva, kae ‵tala mai te mataloa ki te koga ‵kai kae ko sae mai a te Taina ko Russell. Ne masani tou tagata o mānava malie aka, oti, ko fakatalofa atu ei ki te kāiga Peteli mo te fiafia penei “Talofa koutou katoa.” Kae i lō te fai penā, ne sagasaga fakavave ifo tou tagata i te mata o te taipola, ne patipati ana lima kae fai atu ne ia se faka‵pulaga fakafiafia: “Ko oti atu a Taimi o Fenua Fakaa‵tea; ko oti atu foki a aso o olotou tupu!” Ko oko eiloa i tou fiafia​—me ko leva eiloa ne olioli koe ki te aso tenei! Ne patipati fakatasi atu ou lima mo te kāiga Peteli kātoa, i te taimi ne lagona ei ne koe a te tala fakafiafia tenei.

 Ko oti eiloa ne ‵teka atu te fia sefulu tausaga talu mai te taimi ne fai ei ne te Taina ko Russell te fakamatalaga gali tenā. Se a te mea ne fai ne te Malo talu mai te taimi tenā? E uke ‵ki eiloa! E auala i te fakatokaga o te Malo, ne tumau eiloa a Ieova i te faka‵maga mo te akoakoga o ana tino​—mai i nai afe i te 1914 ki te fitu mo te āfa miliona tupu i aso nei. E fia auala ne maua ei ne koe a mea aoga mai te vaegā akoakoga tenā?

I aso nei, e masani o lagona ne tatou a pati a ‵tou taina penei, “Ko gasuesue faeloa a te kaliota afi a Ieova!” kae se mea tonu eiloa. Kae ko te manatu tonu me talu mai te 1914, a te kaliota afi, telā e fakaata mai i ei a te vaega sē matea o te fakapotopotoga a Ieova, ne gasuesue malosi i se auala vave e pelā mo te mea ka fakaasi mai i te tusi tenei māfai e faitau faka‵lei ki ei. Ko te mea ke talai atu te tala ‵lei ki te lalolagi kātoa, ko oti eiloa ne fakaaoga ne tino talai o te Malo a auala ‵fou kese‵kese, e aofia i ei a nusipepa, te faiga o māti, ata mo fakamatalaga i ei, testimony card, laleo, letiō, ke oko foki eiloa ki te Itaneti.

Ona ko te fakamanuiaga a Ieova ki luga i te galuega, ko mafai nei ne tatou o ‵lomi ‵tou tusi faka-te-Tusi Tapu ‵gali i ‵gana e silia atu i te 670, kae ofo atu ki tino katoa e aunoa mo se ‵togi. A volenitia a‵lofa sē fakapito e fesoasoani atu ki te fakatū‵tuga o Kingdom Hall, Fale Fai Fono, mo ofisa lagolago, i fenua mau‵mea mo fenua ma‵tiva. Kae kafai ko ‵tupu a fakalavelave, e olo fakavave atu a taina mo tuagane a‵lofa ke fesoasoani atu ki tino i koga konā, kae e fakamaoni atu ei me e toka latou o “fesoasoani atu i taimi o fakalavelave.”​—Faata. 17:17.

I nisi taimi, e “fakatulafono” ne faifeau mo tino ‵teke “a te mea ‵se” ko te mea ke fakatupu aka ei se fakalavelave, kae e fakamalosi aka te ‵tou fakatuanaki ke lavea atu me i olotou taumafaiga ‵se, ne iku atu ki te faiga “ke gasolo atu ki mua a te tala ‵lei” i taimi e uke.​—Sala. 94:20; Fili. 1:12.

E maua eiloa ne matou a te tulaga fakaaloalo ke ga‵lue fakatasi mo koutou, omotou taina “tavini.” Masaua la me e a‵lofa malosi eiloa matou ki a koutou katoa. E ‵talo malosi eiloa matou ke fesoasoani atu a mataupu i loto i te tusi tenei ke momea aka te fakatāua ne koe tou tofi faka-te-agaga i lō aso mua.​—Mata. 24:45.

Alofa lasi atu, matou,

Otou taina,

Te Potukau Pule o Molimau a Ieova