E te taata poro i te Basileia here e:

A FERURI na e mero oe no te utuafare o te Betela i Brooklyn. I te poipoi Mahana pae 2 no Atopa 1914, te parahi ra oe i te vahi ta oe i matau i te parahi, a tiai noa ˈi ia taeae Russell ia tae mai. Matara ihora te opani o te piha tamaaraa, e tomo maira taeae Russell. Tia noa ihora oia, mai ta ˈna i matau, e aroha maira i te utuafare o te Betela ma te parau: “Iaorana outou pauroa.” Aita râ o ˈna i haere oioi e parahi, popo ihora oia e parau maira: “Ua hope te tau o te Etene,” aore ra o te mau nunaa ěê, e “ua hope te tau o to ratou mau arii!” Oaoa roa ihora oe, mea maoro hoi to oe tiai-noa-raa i tera taime! E ere hoi o oe anaˈe. Popo noa ˈtura outou pauroa i teie parau apî oaoa mau.

 Hoê hanere tiahapa matahiti i teie nei to taeae Russell faahitiraa i teie parau oaoa mau. Eaha ta te Basileia i rave mai reira mai? Mea rahi te ohipa! Na roto i te Basileia, ua tamâ e ua faaineine riirii noa Iehova i to ˈna nunaa, tau tausani ratou i 1914 e hau atu i te vaˈu mirioni i teie mahana. Mea nafea oe iho i te faufaaraahia i tera faaineineraa?

Pinepine to tatou mau taeae e tuahine i te parau: “Te tere ra te pereoo i te raˈi o Iehova!” Tera iho â. Teie râ, mai 1914 mai ra, mea tere taua pereoo ra o te faahohoˈa ra i te tuhaa itea ore o ta Iehova faanahonahoraa. Ta te taioraa ïa o teie buka e haapapu atu. Ia atutu te parau apî oaoa na te ao nei, ua faaohipa te feia poro i te Basileia e rave rau ravea apî: vea, taahiraa e te poroi papaihia, pataraa hohoˈa teata, tareta pororaa, matini faataˈi pehe, radio, e te Internet.

Maoti ta Iehova haamaitairaa, e nehenehe tatou e pia i teie nei i ta tatou mau papai Bibilia mea au roa ia taio na roto hau atu i te 670 reo, e pûpû atoa ma te tamoni ore na te taata. Te apiti nei te mau rima tauturu feruriraa haapae i te paturaa i te mau Piha a te Basileia, Piha tairururaa e te mau amaa na te mau fenua navai e te mau fenua navai ore. E ia tupu te ati natura, e ru te mau taeae e tuahine î i te here i te tauturu i to ratou mau hoa Kerisetiano e fifi ra, haapapuraa ïa e hoa mau ratou i te mau taime ati.—Mas. 17:17.

I te tahi taime, e faaohipa te mau tia faaroo e te tahi atu mau enemi i te ture no te imi hara. Pinepine râ e huri te mataˈi. Inaha na roto i ta ratou mau raveraa tano ore, e paturuhia ˈtu â te parau apî oaoa. E haapuai hoi te reira i te faaroo.—Sal. 94:20; Phil. 1:12.

E fanaˈoraa taa ê na matou ia apiti atu ia outou, te mau tavini a to tatou Arii o Iesu. A tiaturi mai, mea here roa na matou ia outou pauroa. Mea maitai e tauturu teie buka ia oe ia poihere atu â i ta oe faufaa pae varua.—Mat. 24:45.

Ma te here,

To oe mau taeae,

Tino aratai a te mau Ite no Iehova