Ighwoghwota Eghanghanre:

VWẸ ẹwẹn roro nẹ wọ ga vwẹ Bẹtel rọhẹ Brooklyn vwẹ urhiọke ri Friday, October 2, 1914. Wo chidia agbara wẹn vwẹ asan ra da riemu, ra vwọ hẹrhẹ Oniọvo C. T. Russell. Siẹvuọvo na, ẹchẹ rẹ asan ra da riemu na de rhiephiyọ, Oniọvo Russell da vwomaphia. Ọ da dowọji emerha, kirobo ro ruẹ jovwo, o de yeren orua ri Bẹtẹl na “Vwan doo.” Ẹkẹvuọvo, ukperẹ o vwo chidia agbara rọyen, ọ da teyen abọ ji ru aghwoghwo ọvwevwerhen nana: “Ọke rẹ Ikeferi na wanre; ẹdẹ rẹ ivie rayen vwoba re!” A mrẹ vwo dje aghọghọ na-a, wo rhẹro rẹ ẹdẹ nana krẹre! Wẹ vẹ iniọvo ri chekọ re je ga vwẹ Bẹtẹl na da teyen abọ krekri.

Ikpe buebun wanre rẹ Oniọvo Russell vwọ ta ota nana. Rhanvwẹ ọke yena rhire na, die yen Uvie rẹ Ọghẹnẹ rure? Ọ dia ọmọrhiẹ  erọnvwọ-ọn! Womarẹ ọrhuẹrẹphiyotọ rẹ Uvie na, Jihova ru ihwo rọyen fuan, o ji yono ayen; vwo nẹ omarẹ ihwo uriorin iyorin vwẹ 1914, ayen vrẹ oduduru ẹrenren gbe ubro nonẹna re. Erhọ yen erere evo ri te we obọ womarẹ uyono nana re?

Nonẹna, avwanre nyo iniọvo re tanẹ “Akpẹrẹ ri Jihova ghene djẹ!” ọyena ghini uyota. Ẹkẹvuọvo, vwọrẹ uyota, rhanvwẹ 1914 rhire na, akpẹrẹ na ro mudiaphiyọ ukoko ri Jihova rọhẹ odjuvwu na, nabọ djẹ kpatakpata, kirobo rẹ ẹfuẹrẹn rẹ ọbe nana che djephia. Rere ovuẹ na sa vwọ ro akpọeje, ighwoghwota rẹ Uvie na reyọ ena sansan vwo ruiruo aghwoghwo na, kerẹ ẹbe re ghwa iyẹnrẹn, ephapha re si ovuẹ phiyọ ra vwọ yan nene irhuvwu, ihoho, ikadi re vwo ghwoghwo iyẹnrẹn esiri na, igramafonu, iredio, kugbe Intanẹti.

Womarẹ ebruphiyọ ri Jihova, avwanre teyen ẹbe vwẹ ejajẹ ri joma te 1000 asaọkiephana, a je vwẹ ayen kẹ ihwo ọphẹ. Iniọvo vwomakpahotọ vwo ruiruo rẹ ebabọn rẹ Eguan Ruvie, Eguan Romẹvwa, kugbe eghọn ukoko, vwẹ ẹkuotọ ri vwo igho vẹ i ri jẹ igho evwo. Ọke rẹ oghwọrọ da vwọmaphia, iniọvo na brokpakpa vwọ vwẹ ukẹcha phia vwẹ asan rẹ oghwọrọ na da phia na, ayen pha kerẹ iniọvo re vwiẹre “fiki rẹ ẹdoja.”—Isẹ 17:17.

Ọkiọvo, ilori rẹ ẹga vẹ ihwo re vwọsua avwanre “vwẹ urhi na ruẹ emu ogbarogba,” ẹkẹvuọvo, ọke buebun ẹgbaẹdavwọn rayen rhoma “nẹrhẹ iyẹnrẹ esiri na yan hẹ obaro,” ọnana bọn esegbuyota avwanre gan.—Une 94:20; Fil. 1:12.

Ọnana ọghọ rode ra vẹ ovwan vwọ ga kuẹgbe vwẹ “uwevwi” vuọvo. Biko ovwan riẹn nẹ avwanre vwo ẹguọnọ rẹ ovwan mamọ. Avwanre nẹrhovwo nẹ ọbe nana cha chọn ovwan uko vwo vwo ọdavwaro kpahen ughwẹ rẹ ovwan, vwọ vrẹ obo ri jovwo.—Mat. 24:45.

E jẹ ufuoma nene ovwan dia,

Iniọvo ovwan,

Ẹko Rọvwẹrote Iruo rẹ Iseri ri Jihova