Vhahuweleli nga Riṋe Vha Funwaho vha Muvhuso:

ḒIVHONENI ni muraḓo wa muṱa wa Bethele ya ngei Brooklyn nga Ḽavhuṱanu nga matsheloni, nga ḽa 2 October, 1914. No dzula kha tshidulo tshine na anzela u dzula khatsho nga tshifhinga tsha zwiḽiwa zwa nga matsheloni, no lindela Wahashu C. T. Russell uri a swike. Vothi ḽa holoni ya zwiḽiwa ḽa mbo ḓi vulea nahone Wahashu Russell a mbo ḓi dzhena. A fhumulanyana samusi i nḓowelo yawe, a lumelisa muṱa wa Bethele o takala a ri “Ndi matsheloni noṱhe.” Fhedzi nṱhani ha uri a mbo ḓi dzula kha tshidulo tshawe sa ṱhoho ya ṱafula, a vhanda zwanḓa nahone ita nḓivhadzo i takadzaho a ri: “Zwifhinga zwa Vhannḓa zwo fhela; tshifhinga tsha mahosi avho tsho swika magumoni!” Zwenezwo zwi a ni takadza vhukuma ngauri ndi kale no zwi lindela nga maṱo matswuku! Inwi kathihi na vha muṱa wa Bethele ni takadzwa nga enea mafhungo lune na vhanda zwanḓa lwa tshifhinga tshilapfu.

 Ho no fhela mahumi manzhi a miṅwaha u bva tshee Wahashu Russell a bula eneo maipfi a takadzaho. Muvhuso wo no khunyeledza mini u bva tsheetsho? Wo khunyeledza zwithu zwinzhi! A tshi shumisa ndugiselelo ya Muvhuso, nga zwiṱuku nga zwiṱuku Yehova o kunakisa na u gudisa vhathu vhawe—u bva musi vha tshee zwigidi zwi si gathi nga 1914 u swika zwino hune vha vha milioni dza sumbe na hafu. No vhuyelwa hani nga honoho u gudiswa?

Kanzhi ṋamusi ri pfa vhahashu vha tshi ri, “goloi ya Yehova ya ṱaḓulu i khou gidima!” nahone zwenezwo ndi ngoho. Naho zwo ralo, ngoho ndi ya uri u bva nga 1914, goloi ya ṱaḓulu, ine ya fanyisela tshipiḓa tshi sa vhonali tsha ndangulo ya Yehova, yo vha i tshi khou gidima nga luvhilo luhulwane, samusi ni tshi ḓo zwi vhona arali na vhala yeneyi bugu nga vhuronwane. U itela uri vha huwelele mafhungo maḓifha shangoni ḽoṱhe, vhahuweleli vha Muvhuso vho shumisa nḓila dza vhuṱali dzo fhamba-fhambanaho, u katela na gurannda, u matsha vho fara kana u kungela mabammbiri a re na mulaedza, dzifilimu, garaṱa dza u ṱanziela, giramafoni, radio khathihi na Inthanethe.

Samusi Yehova a tshi khou fhaṱutshedza mushumo, zwino ri kona u gandisa khandiso dzashu dzavhuḓi dzo thewaho Bivhilini nga nyambo dzi fhiraho 670 nahone ra dzi ṋea vhathu mahala. Vhomaḓilonga vhane vha ḓiṋekedzela vha thusa kha u fhaṱa Holo dza Muvhuso, Holo dza Maguvhangano na zwifhaṱo zwa davhi, mashangoni o pfumaho na a shayaho. Musi hu tshi vha na khombo ya mupo, vhahashu vha tshinnani na vha tshisadzini vha sumbedza lufuno nga u gidimela u thusa vho welwaho nga khombo, vha sumbedza uri ngangoho vha ‘bebelwa ḓuvha ḽa khombo.’—Mir. 17:17.

Nga zwiṅwe zwifhinga, vhafunzi na vhaṅwe vhapikisi vha ri itela khakhathi vha tshi shumisa “mulayo,” fhedzi zwi khwaṱhisa lutendo u vhona uri tshifhinga tshoṱhe vhuḓidini havho ha u thivhela mushumo washu ho ita uri “mafhungo maḓifha a bvele phanḓa a tshi ḓivhadzwa.”—Ps. 94:20; Vhafil. 1:12.

Ndi ndugelo kha riṋe u shumisana na vhoiwe vha “nnḓu” nga riṋe. Ḓivhani uri ri a ni funa vhukuma noṱhe. Ri rabelela uri mafhungo a re kha heyi bugu a ni thuse uri ni dzhiele nṱha ifa ḽashu ḽa muya u fhira naho hu lini.—Mat. 24:45.

Ri ni tamela mashudu, riṋe

Vhahaṋu,

Tshigwada tshi Langaho tsha Ṱhanzi dza Yehova