Hinigugma nga Igkasi-Magwarali han Ginhadian:

HANDURAWA nga membro ka han pamilya han Bethel ha Brooklyn hadton Biernes han aga, Oktubre 2, 1914. Nalingkod ka na ha imo permanente nga lingkoran ha dining room, ngan naghuhulat han pag-abot ni Bugto C. T. Russell. Tigda inabri an purtahan han dining room. Sumulod hi Bugto Russell kondi inundang hin madaliay sugad han iya nahiaraan, ngan malipayon nga gin-abiabi an pamilya han Bethel, “Maopay nga aga ha iyo ngatanan.” Pero imbes nga dumiretso ha iya lingkoran, nagpakpak hiya ngan nagsiring: “An Panahon han mga Hentil natapos na; tapos na an adlaw han ira mga hadi!” Duro an imo kalipay—maiha mo na nga ginhinulat ini nga takna! Kaupod han bug-os nga pamilya han Bethel, ginkarawat niyo inin makalilipay nga sumat pinaagi hin maiha nga pagpinakpak.

Damu na ka dekada an naglabay tikang han himoon ni Bugto Russell ito nga pahibaro. Ano na an nahimo han Ginhadian tikang hito  nga takna? Damu na hinduro! Pinaagi han Ginhadian, padayon nga gin-uuray ngan ginbabansay ni Jehova an iya katawohan—tikang ha pipira la ka yukot han 1914 ngadto ha sobra pito ngan tunga ka milyon na yana. Sigurado nga personal ka nga nagpapahimulos tikang han sugad nga mga pagbansay.

Yana, agsob naton hibatian an kabugtoan nga nasiring, “An langitnon nga karomata ni Jehova nagios na!” Ngan tinuod ito. Kondi tikang pa man han 1914, malaksi na hinduro nga nagios an langitnon nga karomata nga nagrirepresentar han diri nakikita nga bahin han organisasyon ni Jehova, sugad han iginpapakita hini nga libro. Basi maipasamwak an maopay nga sumat ha bug-os nga kalibotan, an mga magwarali han Ginhadian nagamit hin iba-iba nga pamaagi, upod na an peryodiko, plakard, pasalida, testimony card, ponograpo, radyo, ngan Internet.

Tungod han bendisyon ni Jehova ha buruhaton, naipupublikar na naton an aton magpakaruruyag nga literatura ha sobra 670 nga yinaknan ngan naitatanyag ito hin libre ha ngatanan. An andam ha pagsakripisyo nga mga boluntaryo nabulig ha pagtukod han mga Kingdom Hall, Assembly Hall, ngan pasilidad han sanga, ha riko nga mga nasud pati ha mga nasud nga nagkukuri. Ngan kon may kalamidad, napakadto dayon an aton mahigugmaon nga kabugtoan ha naapektohan nga mga lugar basi bumulig. Ira gud ginpapamatud-an nga hira “natawo para ha kakurian.”—Prob. 17:17.

Usahay, ginagamit han mga klero ngan mga nakontra an “kasugoanan” ha pag-aghat hin kasamok, kondi napaparig-on an aton pagtoo nga makita nga pauroutro nga nababaliskad an ira mga pangalimbasog, ngan nakakabulig lugod ito “ha pag-uswag han maopay nga sumat.”—Sal. 94:20; Fil. 1:12.

Usa nga kadungganan para ha amon nga magin kausa niyo—amon kapariho nga “mga surugoon ha panimalay.” Hinumdumi nga hinigugma gud namon kamo ngatanan. Igin-aampo namon nga makabulig unta ha iyo ini nga publikasyon basi mas mapabilhan gud niyo an iyo espirituwal nga panurundon.—Mat. 24:45.

Ginhahandom namon an pinakamaopay para ha iyo.

An iyo kabugtoan,

Nagmamando nga Lawas han mga Saksi ni Jehova