Ŵakunonyelwa Ŵakulalicila ya Ucimwene Acimjetu:

AWANICISYE kuti ŵapali mu liŵasa lya Beteli ja ku Brooklyn, lyamsano kundaŵi pa October 2, 1914. Mpela mwandaŵi syosope, atemi pamalo gawo m’cipinda cakulila yakulya ni kumjembeceyaga M’bale C. T. Russell. Kaneko akuliwona litanga lili mkuwuguka, soni M’bale Russell akwinjila. Mpela mwandaŵi syosope, jwalakwe akwima kaje ni kulikomasya mwakusangalala liŵasa lya Beteli kuti, “Ajimwice uli wosope.” Nambo kaneko m’malo mwakuti akatame pa malo gakwe, jwalakwe akukwata m’miyala ni kupeleka cimanyisyo cakusangalasya cakuti, “Ndaŵi ja Ŵandu Ŵakusa jimasile, acayimwene ŵawo ndaŵi jawo jamalile!” Mwangakayicila mpaka aŵe ŵakusangalala mnope ligongo lyakuti aŵele ali mkwembeceya ndaŵiji kwandaŵi jelewu. Wawojo ni acimjawo ŵa m’liŵasa lya Beteli akujipocela nganiji ni makono gaŵili, mwamti akukwatila m’miyala kwandaŵi jelewu.

 Sambano pamasile yaka yejinji, kutyocela pele M’bale Russell ŵapelece cimanyisyo cakusangalasyaci. Ana Ucimwene ukombwele kutenda cici kutyocela pandaŵiji? Pana yindu yejinji yawutesile. Kupitila mu Ucimwenewu, Yehofa aŵele ali mkwajiganya soni kwakamucisya ŵandu ŵakwe kupikanicisya usyesyene. Mu 1914 ŵanduŵa ŵaliji masawusande gamnono, nambo apano ali ŵakupunda pa 8, miliyoni. Ana majiganyoga gakamucisye wawojo m’matala gapi?

Masiku agano nganiyiŵa yacilendo kwapikana abale ali mkuŵeceta kuti “Ligeleta lyakwinani lya Yehofa likwenda.” Yeleyi yili yisyene. Soni yisyesyene yakwe ni yakuti kutandila mu 1914, ligeleta lyakwinani lya Yehofa, lyalikusajimila mbali ja likuga lya Yehofa lyakwinani, liŵele lili mkuwutuka mnope. Pakuŵalanga mwakusamala bukuji capikanicisye cenene yeleyi. Pakusaka kuti ngani syambone silalicidwe pacilambo cosope capasi, ŵakulalicila ya Ucimwene aŵele ali mkukamulicisya masengo matala gasambano. Matalaga gali manyusipepala, yikwangwani yakwenda nayo, yiwulili, makadi, magalamafoni, wailesi, soni Intaneti.

Ligongo lyakuti Yehofa akujaliwa masengoga, sambano tukupakombola kuwandisya mabuku gakusala ya m’Baibulo kwalulele mu yiŵeceto yakupunda 670. Konjecesya pelepa, abale akusalipeleka pakamucisya kutaŵa Nyumba sya Ucimwene, Malo ga Misongano soni maofesi ga nyambi. Yeleyi yikutendekwa m’yilambo yakusicila soni yakulaga. Soni naga patendekwe ngosi sya m’cipago, abale ni alongo akusajawula mwacitema kukwakamucisya abale m’mikuli jajitendekwe ngosijo. Yeleyi yikusapeleka umboni wakuti “ŵapagwile kuti atukamucisye pa ndaŵi ja yisawusyo.”—Mis. 17:17.

Ndaŵi sine acimlongola ŵa dini, soni ŵakusisya ŵane akusatandisya yipwetesi ‘mwakugapindimasya malamusi . . . gagoloka.’ Nambo yakulimbikasya cikulupi yikusaŵaga yakuti, ndaŵi ni katema acimlongolaŵa pakukamulicisya masengo macili gawo mwakulemweceka, ‘yikusatendekasya kuti ŵandu akulupilile ngani syambone.’—Sal. 94:20; Afil. 1:12.

Kusala yisyene uli upile wetu kutumicila yalumo ni jemanja “ŵamasengo” acimjetu. Amanyilileje kuti m’weji tukusitwanonyela mnope jemanja wosope. Tukuŵenda Mlungu kuti kupitila m’bukuji, ŵakamucisye jemanja kuyamicila cipanje causimu kupundana ni kalakose.—Mat. 24:45.

Tukwasosela yambone yosope

M’weji acalongo acimjawo,

Likuga Lyakulongolela lya Mboni sya Yehofa